ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
10 սեպտեմբերի 2020 թվականի N 1487-Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2018 ԹՎԱԿԱՆԻ ՀՈՒԼԻՍԻ 10-Ի N 792-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ
Հիմք ընդունելով «Նորմատիվ իրավական ակտերի մասին» Հայաստանի Հանրապետության օրենքի 33-րդ հոդվածը` Հայաստանի Հանրապետության կառավարությունը որոշում է.
1. Հայաստանի Հանրապետության կառավարության 2018 թվականի հուլիսի 10-ի «Ժամկետային աշխատանքային պայմանագիր կնքելու կարգը սահմանելու մասին» N 792-Ն որոշմամբ սահմանված հավելվածում (այսուհետ` հավելված) կատարել հետևյալ փոփոխությունները և լրացումները`
1) հավելվածի 5-րդ և 6-րդ կետերը շարադրել հետևյալ խմբագրությամբ.
i
«5. Ժամանակավոր թափուր պաշտոն առաջանալու օրվան հաջորդող յոթ աշխատանքային օրվա ընթացքում պաշտոնում նշանակելու իրավասություն ունեցող պաշտոնատար անձը`
1) տվյալ մարմնի քաղաքացիական ծառայության կադրերի ռեզերվում գրանցված քաղաքացիական ծառայողին կարող է առաջարկել կնքել պայմանագիր` տվյալ քաղաքացիական ծառայողի տվյալները տեղադրելով տվյալ մարմնի պաշտոնական կայքէջում, իսկ դրա անհնարինության դեպքում` տվյալ մարմնի վերադաս համապատասխան մարմնի պաշտոնական կայքէջում, կամ`
2) իր պաշտոնական կայքէջում, իսկ դրա անհնարինության դեպքում` իր վերադաս համապատասխան մարմնի պաշտոնական կայքէջում կարող է հրապարակել հայտարարություն` ժամանակավոր թափուր պաշտոնն զբաղեցնելու համար մեկ այլ անձի հետ ժամկետային աշխատանքային պայմանագիր կնքելու նպատակով:
6. Հայտարարությունը պարունակում է առնվազն հետևյալ տեղեկությունները`
1) համապատասխան մարմնի անվանումը.
2) քաղաքացիական ծառայության` որոշակի ժամկետով թափուր պաշտոնի անվանումը, ծածկագիրը և տվյալ պաշտոնի անձնագրով (աշխատատեղի նկարագրով) սահմանված հիմնական գործառույթների համառոտ նկարագիրը.
3) քաղաքացիական ծառայության` որոշակի ժամկետով թափուր պաշտոնի անձնագրով այդ պաշտոնն զբաղեցնելու համար մասնագիտական գիտելիքների և կոմպետենցիաների տիրապետման տեսանկյունից ներկայացվող պահանջները.
4) քաղաքացիական ծառայության` որոշակի ժամկետով թափուր պաշտոն առաջանալու հիմքի հնարավոր վերացման ժամկետը.
5) դիմումները ներկայացնելու վերջնաժամկետը, որը պետք է լինի տվյալ հայտարարության հրապարակմանը հաջորդող երրորդ աշխատանքային օրը, իսկ սույն կարգի 18-րդ կետով նախատեսված դեպքում առաջացած ժամանակավոր թափուր պաշտոնը զբաղեցնելու համար հայտարարություն հրապարակելիս` պաշտոնում նշանակելու իրավասություն ունեցող անձի կողմից սահմանված օրը: Ընդ որում` փաստաթղթերի ընդունումը յուրաքանչյուր օրվա համար չպետք է պակաս լինի երեք ժամից.
6) աշխատավարձի չափը.
7) աշխատանքի վայրը, հեռախոսահամարը և էլեկտրոնային փոստի հասցեն.
8) պաշտոնում նշանակելու իրավասություն ունեցող պաշտոնատար անձի կողմից ընտրություն կատարելու եղանակը.
9) անհրաժեշտ փաստաթղթերի ցանկը:».
i
2) հավելվածի 10-րդ կետում «հրապարակումից մեկ ամիս հետո» բառերը փոխարինել «հրապարակումից հետո` մեկ ամսվա ընթացքում» բառերով.
3) հավելվածը լրացնել հետևյալ բովանդակությամբ 10.1-ին կետով`
i
«10.1. Սույն կարգի 10-րդ կետով սահմանված ժամկետներում ժամանակավոր թափուր պաշտոնը ժամկետային աշխատանքային պայմանագրով չհամալրվելու դեպքում հայտարարությունները հրապարակվում են նույն պարբերականությամբ:».
i
4) հավելվածի 17-րդ կետում «6-րդ կետով» բառերը փոխարինել «5-րդ կետի 2-րդ ենթակետով» բառերով.
5) հավելվածը լրացնել հետևյալ բովանդակությամբ 18-րդ կետով`
i
«18. Ռազմական դրության ժամանակ զորահավաքային զորակոչին մասնակցելու հետևանքով քաղաքացիական ծառայողի ծառայողական պարտականությունները կատարելու ժամանակավոր անհնարինության դեպքում առաջացած քաղաքացիական ծառայության ժամանակավոր թափուր պաշտոնը կարող է զբաղեցվել նաև առանց սույն կարգի 5-րդ կետի 2-րդ ենթակետով նախատեսված հայտարարություն հրապարակելու` տվյալ պաշտոնի անձնագրի պահանջները բավարարող մեկ այլ անձի հետ ժամկետային աշխատանքային պայմանագիր կնքելու միջոցով:».
i
6) ժամկետային աշխատանքային պայմանագրի ձևում «բնակության վայրը`» բառերը փոխարինել «հաշվառման հասցեն`» բառերով:
2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
Հայաստանի Հանրապետության
վարչապետ Ն. Փաշինյան
2020 թ. սեպտեմբերի 11
Երևան
Պաշտոնական հրապարակման օրը` 11 սեպտեմբերի 2020 թվական: