ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
1 սեպտեմբերի 2022 թվականի N 1358-Ն
ՀԱՄԱՅՆՔԱՅԻՆ ՄԱՍՀԱՆՈՒՄՆԵՐԻ ԾԱԽՍՄԱՆ ԾՐԱԳԻՐԸ ԿԱՄ ԾՐԱԳՐԻ ՓՈՓՈԽՈՒԹՅՈՒՆՆԵՐԸ ՏԱՐԱԾՔԱՅԻՆ ԿԱՌԱՎԱՐՄԱՆ ԲՆԱԳԱՎԱՌԻ ԼԻԱԶՈՐ ՄԱՐՄՆԻ ՀԵՏ ՀԱՄԱՁԱՅՆԵՑՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ
i
Հիմք ընդունելով «Հայաստանի Հանրապետության բյուջետային համակարգի մասին» Հայաստանի Հանրապետության օրենքի 20-րդ հոդվածի 9-րդ մասը` Հայաստանի Հանրապետության կառավարությունը որոշում է.
1. Սահմանել համայնքային մասհանումների ծախսման ծրագիրը կամ ծրագրի փոփոխությունները տարածքային կառավարման բնագավառի լիազոր մարմնի հետ համաձայնեցման կարգը` համաձայն հավելվածի:
2. Սույն որոշումն ուժի մեջ է մտնում 2023 թվականի հունվարի 1-ից:
Հայաստանի Հանրապետության
վարչապետ Ն. Փաշինյան
2022 թ. սեպտեմբերի 1
Երևան
Հավելված
ՀՀ կառավարության
2022 թվականի սեպտեմբերի 1-ի
N 1358-Ն որոշման
ԿԱՐԳ
ՀԱՄԱՅՆՔԱՅԻՆ ՄԱՍՀԱՆՈՒՄՆԵՐԻ ԾԱԽՍՄԱՆ ԾՐԱԳԻՐԸ ԿԱՄ ԾՐԱԳՐԻ ՓՈՓՈԽՈՒԹՅՈՒՆՆԵՐԸ ՏԱՐԱԾՔԱՅԻՆ ԿԱՌԱՎԱՐՄԱՆ ԲՆԱԳԱՎԱՌԻ ԼԻԱԶՈՐ ՄԱՐՄՆԻ ՀԵՏ ՀԱՄԱՁԱՅՆԵՑՄԱՆ
1. Սույն կարգով կարգավորվում են համայնքային մասհանումների ծախսման ծրագրի նախագիծը (այսուհետ` ծրագիր) կամ ծրագրի փոփոխությունների նախագիծը տարածքային կառավարման բնագավառի լիազոր մարմնի (այսուհետ` լիազոր մարմին) հետ համաձայնեցնելու հետ կապված հարաբերությունները:
2. Ծրագիրը կամ ծրագրում առաջարկվող յուրաքանչյուր փոփոխություն համայնքի ավագանու հաստատմանն է ներկայացվում լիազոր մարմնի հետ սահմանված կարգով համաձայնեցվելուց հետո 10 աշխատանքային օրվա ընթացքում:
3. Ծրագիրը կամ ծրագրի փոփոխությունները մշակում է համայնքի ղեկավարը, հիմք ընդունելով տվյալ մարզի կամ համայնքի զարգացման ծրագրային կամ ռազմավարական նշանակության փաստաթղթերը` առաջնահերթություն տալով ազդակիր բնակավայրի զարգացման ծրագրերին, և ներկայացնում է լիազոր մարմին` համաձայնեցման:
4. Ծրագիրը կամ ծրագրի փոփոխությունները համաձայնեցնելու նպատակով համայնքի ղեկավարը լիազոր մարմին է ներկայացնում դիմում` թղթային կամ էլեկտրոնային եղանակով:
5. Դիմումին կից ներկայացվում են`
1) ծրագիրը կամ ծրագրի փոփոխությունները.
2) ծրագրի անհրաժեշտության հիմնավորումը:
6. Դիմումի գրանցման օրվանից հետո` 15 աշխատանքային օրվա ընթացքում, լիազոր մարմինը քննարկում է դիմումին կից ներկայացված ծրագրի կամ ծրագրի փոփոխությունների փաթեթը, որի արդյունքում համայնքի ղեկավարին ծանուցում է`
1) ծրագիրը կամ ծրագրի փոփոխությունները լիազոր մարմնի հետ համաձայնեցված համարելու մասին.
2) ծրագիրը կամ ծրագրի փոփոխությունները լրակազմման վերադարձնելու մասին, որի դեպքում սույն կարգի 6-րդ կետով սահմանված ժամկետը համարվում է կասեցված մինչև համայնքի ղեկավարի կողմից լրակազմված փաթեթի ներկայացման օրը, բայց ոչ ավելի, քան 10 աշխատանքային օրը.
3) ծրագրի կամ ծրագրի փոփոխությունների վերաբերյալ համաձայնություն տալը մերժելու մասին:
7. Լիազոր մարմինը չի տրամադրում համաձայնություն, եթե`
1) ծրագրով կամ փոփոխվող ծրագրով նախատեսված միջոցառումները հակասում են Հայաստանի Հանրապետության օրենսդրությանը, Հայաստանի Հանրապետության կողմից վավերացված միջազգային կոնվենցիաներին.
2) ծրագրի փաթեթում ներկայացված տեղեկությունները թերի են.
3) ծրագրի փաթեթում բացակայում է ծրագրի անհրաժեշտության հիմնավորումը.
4) ծրագրով նախատեսվող միջոցառումների ֆինանսավորման ծավալների հանրագումարը գերազանցում է տվյալ տարվա բյուջեով ծրագրի իրականացման համար համայնքին տրամադրված համայնքային մասհանումների չափը.
5) ծրագրով նախատեսվող միջոցառումները չեն բխում մարզի կամ համայնքի զարգացման ծրագրային կամ ռազմավարական նշանակության փաստաթղթերից, չունեն համայնքի սոցիալ-տնտեսական զարգացման ուղղվածություն, կամ ծրագրերում նախատեսված միջոցառումների ուղղությունները և դրանց առաջնահերթությունները չեն համապատասխանում Հայաստանի Հանրապետության կառավարության կողմից սահմանված` համայնքային մասհանումների ծախսման ծրագրով նախատեսված միջոցառումների ուղղություններին, դրանց առաջնահերթություններին:
8. Լիազոր մարմինը վերադարձնում է ծրագիրը կամ ծրագրի փոփոխությունները լրակազմման, եթե դրանում առկա է սույն կարգի 7-րդ կետի 2-4-րդ ենթակետերով սահմանված հիմքերից որևէ մեկը:
9. Լիազոր մարմինը մերժում է ծրագրի կամ ծրագրի փոփոխությունների վերաբերյալ համաձայնություն տալը, եթե ծրագրում առկա է սույն կարգի 7-րդ կետի 1-ին և 5-րդ ենթակետերով սահմանված հիմքերից որևէ մեկը, ինչպես նաև այն դեպքում, եթե սույն կարգի 6-րդ կետի 2-րդ ենթակետով սահմանված ծանուցումն (այսուհետ` ծանուցում) ստանալու պահից 10 աշխատանքային օրվա ընթացքում լրակազմված փաթեթը լիազոր մարմին չի ներկայացվում:
10. Ծանուցումն ուղարկվում է թղթային եղանակով, իսկ համայնքի ղեկավարի կողմից լիազոր մարմին ներկայացված դիմումում էլեկտրոնային հասցեն նշված լինելու դեպքում` նաև էլեկտրոնային եղանակով:
11. Եթե սույն կարգի 6-րդ կետով սահմանված ժամկետում լիազոր մարմինը դիմումի վերաբերյալ համայնքի ղեկավարին չի ծանուցում, ապա համաձայնությունը համարվում է տրված:
Պաշտոնական հրապարակման օրը` 1 սեպտեմբերի 2022 թվական: