31.03.2022 -
ՄԱՐԴՈՒ ԻՐԱՎՈՒՆՔՆԵՐԻ ԵՎՐՈՊԱԿԱՆ ԴԱՏԱՐԱՆԻ (ՉՈՐՐՈՐԴ ԲԱԺԱՆՄՈՒՆՔ) ԿՈՄԻՏԵԻ ՎՃԻՌԸ «ՍԿԻԶԲ ՄԵԴԻԱ ԿԵՆՏՐՈՆ» ՍՊԸ-Ն ԸՆԴԴԵՄ ՀԱՅԱՍՏԱՆԻ ԳՈՐԾՈՎ ԵՎ 2 ԱՅԼ ԳԱՆԳԱՏՆԵՐ
ՈՐՈՇՈՒՄ
ՉՈՐՐՈՐԴ ԲԱԺԱՆՄՈՒՆՔ
Գանգատ թիվ 32251/12
«ՍԿԻԶԲ ՄԵԴԻԱ ԿԵՆՏՐՈՆ» ՍՊԸ-Ն ընդդեմ Հայաստանի և 2 այլ գանգատներ
(տե՛ս կից աղյուսակը)
Մարդու իրավունքների եվրոպական դատարանը (Չորրորդ բաժանմունք), 2022 թվականի մարտի 10-ին հանդես գալով Կոմիտեի հետևյալ կազմով`
Յոլիեն Շուկինգ [Jolien Schukking]` Նախագահ,
Արմեն Հարությունյան [Armen Harutyunyan],
Անա Մարիա Գուերա Մարտինս [Ana Maria Guerra Martins]` դատավորներ,
և Վիկտորիա Մարադուդինա [Viktoriya Maradudina]` Բաժանմունքի քարտուղարի տեղակալի պաշտոնակատար,
հաշվի առնելով կից ներկայացված աղյուսակում նշված տարբեր ամսաթվերին ներկայացված վերոնշյալ գանգատները,
անցկացնելով խորհրդակցություն, որոշեց հետևյալը.
ՓԱՍՏԵՐԸ ԵՎ ԸՆԹԱՑԱԿԱՐԳԸ
Դիմումատու ընկերությունը` «Սկիզբ Մեդիա Կենտրոն»-ը, սահմանափակ պատասխանատվությամբ ընկերություն է, որի գործունեության իրականացման վայրը Երևանում է: Այն ներկայացրել է Երևանում գործող իրավաբան պրն Ն. Բաղդասարյանը:
Դիմումատու ընկերության` Կոնվենցիայի 10-րդ հոդվածով ամրագրված` ազատ արտահայտվելու իր իրավունքի ենթադրյալ խախտման վերաբերյալ բողոքներն ուղարկվել են Հայաստանի կառավարություն (Կառավարություն), որը ներկայացրել է գանգատի ընդունելիության և ըստ էության քննության վերաբերյալ իր դիտարկումները: Դիտարկումներն ուղարկվել են դիմումատու ընկերությանը, որին հրավիրել են ներկայացնելու իր սեփական դիտարկումները: Քարտուղարի նամակներին որևէ պատասխան չի ստացվել:
Պատվիրված նամակով ուղարկված` 2021 թվականի հունվարի 11-ով թվագրված գրություններով դիմումատու ընկերությունը ծանուցվել է, որ թիվ 32251/12 և թիվ 71470/12 գանգատների առնչությամբ իր դիտարկումները ներկայացնելու համար սահմանված ժամկետը լրացել է 2017 թվականի մայիսի 29-ին, իսկ թիվ 12890/13 գանգատի առնչությամբ` 2017 թվականի հուլիսի 6-ին, և որ ժամկետը երկարաձգելու վերաբերյալ որևէ միջնորդություն չի ներկայացվել:
Դիմումատու ընկերության ուշադրությունը հրավիրվել է Կոնվենցիայի 37-րդ հոդվածի 1-ին կետի «ա» ենթակետի վրա, որով նախատեսվում է, որ Դատարանը կարող է գանգատը վարույթ չընդունել, եթե հանգամանքները հանգեցնում են այն եզրակացության, որ դիմումատուն մտադիր չէ վարույթը շարունակել: Դիմումատու ընկերության փաստաբանն այդ նամակներն ստացել է 2021 թվականի փետրվարի 17-ին: Այնուամենայնիվ, որևէ պատասխան չի ստացվել:
2013 թվականից սկսած դիմումատու ընկերությունը կամ նրա փաստաբանը կապ չի հաստատել Դատարանի հետ:
ԻՐԱՎՈՒՆՔԸ
Հաշվի առնելով գանգատների նույնաբովանդակ առարկան` Դատարանը նպատակահարմար է գտնում է դրանց քննությունն իրականացնել համատեղ` մեկ որոշման շրջանակներում:
Վերոնշյալի լույսի ներքո, ինչպես նաև Կոնվենցիայով և դրան կից արձանագրություններով երաշխավորված իրավունքների նկատմամբ հարգանքի մասով որևէ հատուկ հանգամանքի բացակայության առնչությամբ` Դատարանը համարում է, որ գանգատի քննությունը շարունակելն այլևս արդարացված չէ` համաձայն Կոնվենցիայի 37-րդ հոդվածի 1-ին կետ «ա» ենթակետի:
Հետևաբար գործը պետք է վարույթ չընդունվի:
Այս հիմնավորմամբ Դատարանը միաձայն`
Որոշում է միացնել գանգատները.
Որոշում է գանգատները վարույթ չընդունել:
Կատարված է անգլերենով և գրավոր ծանուցվել է 2022 թվականի մարտի 31-ին:
|
Վիկտորիա Մարադուդինա [Viktoriya Maradudina]`
Քարտուղարի տեղակալի պաշտոնակատար |
Յոլիեն Շուկինգ [Jolien Schukking]`
Նախագահ |
ՀԱՎԵԼՎԱԾ
Կոնվենցիայի 10-րդ հոդվածի համաձայն ներկայացված բողոքներ պարունակող գանգատների ցանկը
|
Թիվ |
Գանգատ թիվ |
Գործի անվանումը |
Ներկայացնելու ամսաթիվը |
Դիմումատու Բնակության վայրը |
Ներկայացվել է |
|
1. |
32251/12 |
«Սկիզբ Մեդիա Կենտրոն» ՍՊԸ-ն ընդդեմ Հայաստանի |
18 մայիսի 2012թ. |
«ՍԿԻԶԲ ՄԵԴԻԱ ԿԵՆՏՐՈՆ» ՍՊԸ Երևան |
Նիկոլայ ԲԱՂԴԱՍԱՐՅԱՆ |
|
2. |
71470/12 |
«Սկիզբ Մեդիա Կենտրոն» ՍՊԸ-ն ընդդեմ Հայաստանի |
27 հոկտեմբերի 2012թ. |
|
3. |
12890/13 |
«Սկիզբ Մեդիա Կենտրոն» ՍՊԸ-ն ընդդեմ Հայաստանի |
31 հունվարի 2013թ. |