Սեղմել Esc փակելու համար:
ԴԱՏԱԻՐԱՎԱԿԱՆ ԲԱՐԵՓՈԽՈՒՄՆԵՐԻ ԱՆՑՈՒՄԱՅԻ...
Քարտային տվյալներ

Տեսակ
Գործում է
Ընդունման ամսաթիվ
Համար

Ստորագրման ամսաթիվ
ՈՒժի մեջ մտնելու ամսաթիվ
ՈՒժը կորցնելու ամսաթիվ
Ընդունման վայր
Սկզբնաղբյուր

Ժամանակագրական տարբերակ Փոփոխություն կատարող ակտ

Որոնում:
Բովանդակություն

ԴԱՏԱԻՐԱՎԱԿԱՆ ԲԱՐԵՓՈԽՈՒՄՆԵՐԻ ԱՆՑՈՒՄԱՅԻՆ ԺԱՄԱՆԱԿԱՇՐՋԱՆՈՒՄ ՎՃՌԱԲԵԿ ԴԱՏԱՐԱՆԻ ԳՈՐԾՈՒՆ ...

 

 

010.0225.020798

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՕՐԵՆՔԸ

 

Ընդունված է Ազգային ժողովի կողմից
«1» հուլիսի 1998 թ.

 

i

ԴԱՏԱԻՐԱՎԱԿԱՆ ԲԱՐԵՓՈԽՈՒՄՆԵՐԻ ԱՆՑՈՒՄԱՅԻՆ ԺԱՄԱՆԱԿԱՇՐՋԱՆՈՒՄ ՎՃՌԱԲԵԿ ԴԱՏԱՐԱՆԻ ԳՈՐԾՈՒՆԵՈՒԹՅԱՆ ՄԱՍԻՆ

 

ՀՈԴՎԱԾ 1. Սույն օրենքը կարգավորում է դատաիրավական բարեփոխումների անցումային ժամանակաշրջանում (օրենքն ուժի մեջ մտնելու օրվանից մինչև 1999 թվականի հունվարի 12-ը) վճռաբեկ դատարանի կազմավորման և գործունեության կարգն ու դրա հետ կապված գործող քաղաքացիական և քրեական դատավարության օրենսգրքերով սահմանված վճռաբեկ ու հսկողական վարույթների իրականացման առանձնահատկությունները:

 

ՀՈԴՎԱԾ 2. Վճռաբեկ դատարանը կազմված է`

1. վճռաբեկ դատարանի նախագահից.

2. քաղաքացիական և տնտեսական գործերով պալատից.

3. քրեական և զինվորական գործերով պալատից:

Վճռաբեկ դատարանի յուրաքանչյուր պալատ կազմված է վճռաբեկ դատարանի պալատի նախագահից և պալատի 5 դատավորից:

 

i

ՀՈԴՎԱԾ 3. Մինչև 1998 թվականի հուլիսի 8-ը արդարադատության խորհուրդը, Հայաստանի Հանրապետության Սահմանադրության 95 հոդվածի 3-րդ կետին համապատասխան և «Արդարադատության խորհրդի մասին» Հայաստանի Հանրապետության օրենքի 15 հոդվածով սահմանված կարգով, Հայաստանի Հանրապետության Նախագահին առաջարկում է վճռաբեկ դատարանի, նրա պալատների նախագահների և դատավորների թեկնածությունները:

 

ՀՈԴՎԱԾ 4. Մինչև 1998 թվականի հուլիսի 10-ը Հայաստանի Հանրապետության Նախագահը, Հայաստանի Հանրապետության Սահմանադրության 55 հոդվածի 11-րդ կետին համապատասխան, նշանակում է վճռաբեկ դատարանի անդամներին` վճռաբեկ դատարանի, նրա պալատների նախագահներին ու դատավորներին:

 

ՀՈԴՎԱԾ 5. 1998 թվականի հուլիսի 10-ից վճռաբեկ դատարանը համարվում է կազմավորված և իրականացնում է սույն օրենքով իրեն վերապահված լիազորությունները:

Հայաստանի Հանրապետության Սահմանադրության 116 հոդվածի 10-րդ կետին համապատասխան 1998 թվականի հուլիսի 10-ից դադարում են Հայաստանի Հանրապետության գերագույն դատարանի անդամների լիազորությունները:

 

ՀՈԴՎԱԾ 6. Անցումային ժամանակաշրջանում վճռաբեկ դատարանի նախագահը`

1) ապահովում է վճռաբեկ դատարանի բնականոն գործունեությունը.

2) հրավիրում և վարում է վճռաբեկ դատարանի լիագումար նիստը.

3) նշանակում է գործը լուծող վճռաբեկ դատարանի կազմը և նիստը նախագահողին.

4) դատավորին բացարկ հայտնելու կամ դատավորի ինքնաբացարկի դեպքում նշանակում է փոխարինող դատավոր.

5) իրականացնում է գործող օրենսդրությամբ Հայաստանի Հանրապետության նախկին գերագույն դատարանի նախագահին վերապահված այլ լիազորություններ:

 

ՀՈԴՎԱԾ 7. Անցումային ժամանակաշրջանում վճռաբեկ դատարանի պալատի նախագահը`

1) հրավիրում և վարում է պալատի նիստերը.

2) վճռաբեկ դատարանի նախագահի բացակայության դեպքում` վերջինիս հանձնարարությամբ, ժամանակավորապես իրականացնում է նրա լիազորությունները:

 

ՀՈԴՎԱԾ 8. Վճռաբեկ դատարանի կազմավորման օրվանից Հայաստանի Հանրապետության նախկին գերագույն դատարանի քաղաքացիական գործերով դատական կոլեգիայի` Հայաստանի Հանրապետության քաղաքացիական դատավարության օրենսգրքով սահմանված լիազորություններն իրականացնում է վճռաբեկ դատարանի քաղաքացիական և տնտեսական գործերով պալատը` 3 դատավորի կազմով:

Վճռաբեկ դատարանի կազմավորման օրվանից Հայաստանի Հանրապետության նախկին գերագույն դատարանի քրեական գործերով դատական կոլեգիայի և զինվորական գործերով դատական կոլեգիայի` Հայաստանի Հանրապետության քրեական դատավարության օրենսգրքով սահմանված լիազորություններն իրականացնում է վճռաբեկ դատարանի քրեական և զինվորական գործերով պալատը` 3 դատավորի կազմով:

 

ՀՈԴՎԱԾ 9. Վճռաբեկ դատարանի կազմավորման օրվանից Հայաստանի Հանրապետության նախկին գերագույն դատարանի նախագահության` Հայաստանի Հանրապետության քաղաքացիական դատավարության օրենսգրքով սահմանված լիազորություններն իրականացնում է վճռաբեկ դատարանի քաղաքացիական և տնտեսական գործերով պալատը` 3 դատավորի կազմով:

Տվյալ գործով չեն կարող մասնակցել վճռաբեկ դատարանի քաղաքացիական և տնտեսական գործերով պալատի այն անդամները, որոնք նախկինում մասնակցել են այդ գործի քննությանը:

 

ՀՈԴՎԱԾ 10. Վճռաբեկ դատարանի կազմավորման օրվանից Հայաստանի Հանրապետության նախկին գերագույն դատարանի նախագահության` Հայաստանի Հանրապետության քրեական դատավարության օրենսգրքով սահմանված լիազորություններն իրականացնում է վճռաբեկ դատարանի քրեական և զինվորական գործերով պալատը` 3 դատավորի կազմով:

Տվյալ գործով չեն կարող մասնակցել վճռաբեկ դատարանի քրեական և զինվորական գործերով պալատի այն անդամները, որոնք նախկինում մասնակցել են այդ գործի քննությանը:

 

ՀՈԴՎԱԾ 11. Վճռաբեկ դատարանի կազմավորման օրվանից Հայաստանի Հանրապետության նախկին գերագույն դատարանի պլենումի` Հայաստանի Հանրապետության քաղաքացիական և քրեական դատավարության օրենսգրքերով սահմանված լիազորություններն իրականացնում է վճռաբեկ դատարանի լիագումար նիստը:

Վճռաբեկ դատարանը լիագումար նիստին մասնակցում են վճռաբեկ դատարանի նախագահը, պալատների նախագահները և վճռաբեկ դատարանի դատավորները:

Վճռաբեկ դատարանի լիագումար նիստի միջոցով հսկողության կարգով իրականացնում է գործերի քննությունը` վճռաբեկ դատարանի անդամների ընդհանուր թվի առնվազն 2/3-ի կազմով:

 

ՀՈԴՎԱԾ 12. Հայաստանի Հանրապետության գերագույն դատարանի քաղաքացիական, քրեական և զինվորական գործերով կոլեգիաների` մինչև սույն օրենքի ուժի մեջ մտնելն առաջին ատյանի կարգով իրենց վարույթ ընդունած գործերը, որոնցով մինչև հուլիսի 9-ը ներառյալ չի կայացվել դատավճիռ, վճիռ կամ այլ վերջնական որոշում, Հայաստանի Հանրապետության գերագույն դատարանի նախագահի կողմից ուղարկվում են առաջին ատյանի դատարան, և գործի քննությունը վերահսկվում է:

 

ՀՈԴՎԱԾ 13. Սույն օրենքի ուժի մեջ մտնելու պահից ուժը կորցրած ճանաչել`

i

1) Հայաստանի Հանրապետության քրեական դատավարության օրենսգրքի 28 և 29 հոդվածները.

i

2) Հայաստանի Հանրապետության քաղաքացիական դատավարության օրենսգրքի 114 հոդվածը.

i

3) Հայաստանի Հանրապետության քրեական դատավարության օրենսգրքի 9 հոդվածի չորրորդ և հինգերորդ մասերը:

 

i

ՀՈԴՎԱԾ 14. Հայաստանի Հանրապետության քաղաքացիական դատավարության օրենսգրքի 1 հոդվածի առաջին մասը շարադրել հետևյալ խմբագրությամբ`

«Քաղաքացիական գործերի վարույթի կարգը Հայաստանի Հանրապետության բոլոր դատարաններում որոշվում է Հայաստանի Հանրապետության քաղաքացիական դատավարության օրենսգրքով և «Դատաիրավական բարեփոխումների անցումային ժամանակաշրջանում վճռաբեկ դատարանի գործունեության մասին» Հայաստանի Հանրապետության օրենքով: Սույն օրենսգրքի և վերոհիշյալ օրենքի միջև հակասությունների դեպքում գործում են վերջինիս նորմերը»:

 

i

ՀՈԴՎԱԾ 15. Հայաստանի Հանրապետության քրեական դատավարության օրենսգրքի 1 հոդվածի առաջին մասը շարադրել հետևյալ խմբագրությամբ`

«Հայաստանի Հանրապետության տարածքում քրեական գործերի վարույթի կարգը որոշում է Հայաստանի Հանրապետության քրեական դատավարության օրենսգրքով և «Դատաիրավական բարեփոխումների անցումային ժամանակաշրջանում վճռաբեկ դատարանի գործունեության մասին» Հայաստանի Հանրապետության օրենքով: Սույն օրենսգրքի և վերոհիշյալ օրենքի միջև հակասությունների դեպքում գործում են վերջինիս նորմերը»:

 

ՀՈԴՎԱԾ 16. Վճռաբեկ դատարանի կազմավորումից հետո մեկշաբաթյա ժամկետում վճռաբեկ դատարանի նախագահն ստեղծում է լուծարային հանձնաժողով, որը վեցամսյա ժամկետում իրականացնում է գերագույն դատարանի լուծարման հետ կապված աշխատանքները:

Վճռաբեկ դատարանի կազմում չնշանակված` գերագույն դատարանի անդամների աշխատավարձը և օրենսդրությամբ սահմանված հավելավճարները պահպանվում են մինչև 1999 թվականի հունվարի 1-ը:

 

ՀՈԴՎԱԾ 17. Վճռաբեկ դատարանն իր գործունեությունն իրականացնում է Երևան քաղաքում, նախկին գերագույն դատարանի նստավայրում /Խորհրդարանի 6/:

 

ՀՈԴՎԱԾ 18. Սույն օրենքն ուժի մեջ է մտնում պաշտոնական հրապարակման պահից և գործում է մինչև 1999 թվականի հունվարի 12-ը:

 

2 հուլիսի 1998 թ.

ՀՕ-225

 

 

pin
ՀՀ 01.07.1998
N ՀՕ-225 օրենք