Սեղմել Esc փակելու համար:
ՌԱԴԻՈՀԱՃԱԽԱԿԱՆՈՒԹՅՈՒՆՆԵՐԻ ՕԳՏԱԳՈՐԾՄԱՆ...
Քարտային տվյալներ

Տեսակ
Գործում է
Ընդունող մարմին
Ընդունման ամսաթիվ
Համար

Գրանցման ամսաթիվ
ՈՒժի մեջ մտնելու ամսաթիվ
ՈՒժը կորցնելու ամսաթիվ
Ընդունման վայր
Սկզբնաղբյուր

Ժամանակագրական տարբերակ Փոփոխություն կատարող ակտ

Որոնում:
Բովանդակություն

Հղում իրավական ակտի ընտրված դրույթին X
irtek_logo

ՌԱԴԻՈՀԱՃԱԽԱԿԱՆՈՒԹՅՈՒՆՆԵՐԻ ՕԳՏԱԳՈՐԾՄԱՆ ԹՈՒՅԼՏՎՈՒԹՅՈՒՆՆԵՐԻ ԿԱՍԵՑՄԱՆ ԵՎ ԴԱԴԱՐԵՑՄԱՆ ...

 

 

600.0231.230611

ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ

                                      «23»        06            2011 Թ.

                                        ՊԵՏԱԿԱՆ ԳՐԱՆՑՄԱՆ ԹԻՎ 60011266

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎ

ՈՐՈՇՈՒՄ

 

11 մայիսի 2011 թվականի N 231-Ն

 

ՌԱԴԻՈՀԱՃԱԽԱԿԱՆՈՒԹՅՈՒՆՆԵՐԻ ՕԳՏԱԳՈՐԾՄԱՆ ԹՈՒՅԼՏՎՈՒԹՅՈՒՆՆԵՐԻ ԿԱՍԵՑՄԱՆ ԵՎ ԴԱԴԱՐԵՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

 

Հիմք ընդունելով «Էլեկտրոնային հաղորդակցության մասին» Հայաստանի Հանրապետության օրենքի 5-րդ հոդվածի 1-ին մասի 2-րդ կետի բ) ենթակետը և 12-րդ հոդվածի 1-ին մասը` Հայաստանի Հանրապետության հանրային ծառայությունները կարգավորող հանձնաժողովը որոշում է.

1. Հաստատել ռադիոհաճախականությունների օգտագործման թույլտվությունների կասեցման և դադարեցման կարգը (հավելված):

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

 

Հավելված

Հաստատված է ՀՀ հանրային

ծառայությունները կարգավորող

հանձնաժողովի

2011 թվականի մայիսի 11-ի

N 231-Ն որոշմամբ

 

ԿԱՐԳ

ՌԱԴԻՈՀԱՃԱԽԱԿԱՆՈՒԹՅՈՒՆՆԵՐԻ ՕԳՏԱԳՈՐԾՄԱՆ ԹՈՒՅԼՏՎՈՒԹՅՈՒՆՆԵՐԻ ԿԱՍԵՑՄԱՆ ԵՎ ԴԱԴԱՐԵՑՄԱՆ

 

Սույն կարգը սահմանում է ռադիոհաճախականությունների օգտագործման թույլտվությունների (այսուհետ` Թույլտվություն) կասեցման և դադարեցման ընթացակարգը:

 

1. Թույլտվության կասեցում

 

1. Թույլտվության (Թույլտվության գործողության) կասեցումը որոշակի ժամկետով կամ որոշակի պայմաններով Թույլտվություն ունեցող անձին տրամադրված ռադիոհաճախականությունների օգտագործման իրավունքից ժամանակավորապես զրկումն է:

2. Թույլտվության կասեցման ընթացքում Թույլտվություն ունեցող անձն իրավունք չունի օգտագործել Թույլտվությամբ տրամադրված ռադիոհաճախականությունները:

3. Հայաստանի Հանրապետության հանրային ծառայությունները կարգավորող հանձնաժողովը (այսուհետ` Հանձնաժողով) իրավասու է կասեցնել Թույլտվությունը «Լիցենզավորման մասին» Հայաստանի Հանրապետության օրենքի 36-րդ հոդվածի 1-ին մասի 1-ին, 3-րդ, 5-7-րդ, 9-րդ, 12-րդ կետերով, «Էլեկտրոնային հաղորդակցության մասին» Հայաստանի Հանրապետության օրենքի 4-րդ հոդվածի 1-ին մասի 6-րդ կետով և 12-րդ հոդվածի 2-րդ մասի 1-ին (Հանձնաժողովին տրամադրված ցանկացած հայտարարության մեջ Թույլտվություն ունեցող անձի կողմից դիտավորյալ կեղծ տեղեկություն ներկայացնելու մասով), 3-7-րդ կետերով նախատեսված դեպքերում (հիմքերով):

4. Թույլտվության կասեցման մասին Հանձնաժողովն ընդունում է որոշում, որում նշվում են կասեցման պատճառները, իրավական հիմքերը և ժամկետները (պայմանները):

5. Թույլտվություն ունեցող անձն իրավունք ունի Հանձնաժողովի նիստում արտահայտել իր կարծիքը, ներկայացնել առարկություններ և առաջարկություններ Թույլտվության կասեցման վերաբերյալ:

5.1 Թույլտվության գործողությունը կասեցված է համարվում այդ մասին Հանձնաժողովի որոշումը Թույլտվություն ունեցող անձին պատշաճ հանձնելու կամ նրա մոտ մուտքագրվելու օրվանը հաջորդող օրվանից, եթե Թույլտվություն ունեցող անձն իր դիմումի մեջ ավելի ուշ ժամկետ չի նշել կամ Թույլտվությունը կասեցնելու մասին որոշմամբ ավելի ուշ ժամկետ նախատեսված չէ:

(5.1-ին կետը լրաց. 21.03.18 թիվ 90-Ն որոշում)

6. Թույլտվության կասեցման ժամանակահատվածում ռադիոհաճախականությունների օգտագործման համար օրենքով սահմանված պարտադիր վճարները Թույլտվություն ունեցող անձի կողմից ենթակա են վճարման` անկախ կասեցման հիմքերից և ժամկետներից (պայմաններից), բացառությամբ «Էլեկտրոնային հաղորդակցության մասին» Հայաստանի Հանրապետության օրենքի 12-րդ հոդվածի 2-րդ մասի 7-րդ կետով նախատեսված դեպքի:

7. Թույլտվության կասեցումը վերացված է համարվում Թույլտվության կասեցման ժամկետը լրանալու օրվան հաջորդող օրվանից` բացառությամբ սույն կարգի 21-րդ կետով սահմանված դեպքի:

 

2. Թույլտվության կասեցումը Թույլտվություն ունեցող անձի նախաձեռնությամբ

 

8. Թույլտվություն ունեցող անձը Թույլտվությունը կասեցնելու ցանկության դեպքում դիմում է ներկայացնում Հանձնաժողով` նշելով կասեցման ժամկետը:

9. Թույլտվությունը կասեցնելու կամ կասեցումը մերժելու մասին որոշումը Հանձնաժողովն ընդունում է Թույլտվություն ունեցող անձի դիմումն ստանալու (Հանձնաժողովում մուտքագրվելու) օրվանից 20 օրվա ընթացքում:

10. Թույլտվությունը կասեցվում է Թույլտվություն ունեցող անձի դիմումի մեջ նշված ժամկետով, բացառությամբ սույն կարգի 11-րդ կետով նախատեսված դեպքերի:

11. Թույլտվությունը կարող է կասեցվել Թույլտվություն ունեցող անձի դիմումի մեջ նշված ժամկետից ավելի կարճ ժամկետով` ազգային անվտանգության կամ հանրային շահի, կամ ռադիոհաճախականությունների տիրույթի արդյունավետ օգտագործման և կառավարման նկատառումներից ելնելով:

12. (12-րդ կետն ուժը կորցրել է 21.03.18 թիվ 90-Ն որոշում)

13. Թույլտվության կասեցման մասին դիմումը Հանձնաժողովը համապատասխան որոշմամբ մերժում է, եթե`

1) դիմումի մեջ նշված չէ կասեցման ժամկետը,

2) Թույլտվության կասեցման հետևանքով վտանգվում է կամ կարող է վտանգվել ազգային անվտանգությունը կամ հանրային շահը,

3) Թույլտվության կասեցումը կհանգեցնի ռադիոհաճախականությունների տիրույթի անարդյունավետ օգտագործման կամ կառավարման:

14. Սույն կարգի 9-րդ կետում նշված ժամկետում Թույլտվությունը կասեցնելու կամ կասեցումը մերժելու մասին Հանձնաժողովի կողմից որոշում չընդունվելու դեպքում Թույլտվության կասեցման մասին դիմումը համարվում է բավարարված, իսկ Թույլտվությունը կասեցված` դիմումն ստանալու օրվանից և Թույլտվություն ունեցող անձի կողմից նշված ժամկետով:

 

3. Թույլտվության կասեցումը Հանձնաժողովի նախաձեռնությամբ

 

15. Հանձնաժողովը Թույլտվության կասեցման գործընթաց նախաձեռնելու դեպքում հարուցում է վարչական վարույթ և առաջնորդվում է «Վարչարարության հիմունքների և վարչական վարույթի մասին» Հայաստանի Հանրապետության օրենքով սահմանված կարգով և ժամկետներով` բացառությամբ սույն կարգի 17-րդ կետում նախատեսված դեպքի:

16. «Էլեկտրոնային հաղորդակցության մասին» Հայաստանի Հանրապետության օրենքի 4-րդ հոդվածի 1-ին մասի 6-րդ կետով, 12-րդ հոդվածի 2-րդ մասի 1-ին (Հանձնաժողովին տրամադրված ցանկացած հայտարարության մեջ Թույլտվություն ունեցող անձի կողմից դիտավորյալ կեղծ տեղեկություն ներկայացնելու մասով), 3-7-րդ կետերով նախատեսված դեպքերում Թույլտվությունը, օրենքով կամ Հանձնաժողովի որոշմամբ այլ ժամկետ նախատեսված չլինելու դեպքում, կասեցվում է մինչև խախտման պատճառի վերացումը:

17. «Էլեկտրոնային հաղորդակցության մասին» Հայաստանի Հանրապետության օրենքի 12-րդ հոդվածի 2-րդ մասի 7-րդ կետով նախատեսված դեպքում Հանձնաժողովը, առանց վարչական վարույթ հարուցելու, անմիջապես ընդունում է Թույլտվությամբ տրամադրված ռադիոհաճախականությունների օգտագործման արգելման մասին որոշում, որն ուժի մեջ է մտնում Թույլտվություն ունեցող անձին այն պատշաճ ձևով հանձնելու պահից: Եթե տրամադրված ռադիոհաճախականությունների օգտագործման արգելման մասին որոշումն ուժի մեջ մտնելու պահից 3 աշխատանքային օրվա ընթացքում Հանձնաժողովը չի ընդունում Թույլտվությունը կասեցնելու մասին որոշում, ապա Թույլտվությամբ տրամադրված ռադիոհաճախականությունների օգտագործման արգելման մասին որոշումը համարվում է անվավեր, եթե Հանձնաժողովը նշված ժամկետում չի ընդունում Թույլտվությունը դադարեցնելու մասին որոշում: Թույլտվությամբ տրամադրված ռադիոհաճախականությունների օգտագործման արգելման մասին որոշումն անվավեր համարվելու դեպքում Հանձնաժողովը պարտավոր է փոխհատուցել Թույլտվություն ունեցող անձի կրած վնասը:

18. «Էլեկտրոնային հաղորդակցության մասին» Հայաստանի Հանրապետության օրենքի 12-րդ հոդվածի 2-րդ մասի 7-րդ կետով նախատեսված հիմքով Թույլտվությունը կասեցվում է առավելագույնը 3 ամիս ժամկետով: Եթե նշված ժամանակահատվածում չեն վերանում Թույլտվության կասեցման հիմքերը, ապա Հանձնաժողովն ընդունում է Թույլտվության դադարեցման մասին որոշում:

19. «Լիցենզավորման մասին» Հայաստանի Հանրապետության օրենքի 36-րդ հոդվածի 1-ին մասի 1-ին, 3-րդ, 5-7-րդ կետերով նախատեսված դեպքերում Թույլտվությունը կասեցվում է նույն օրենքով սահմանված ժամկետներով (պայմաններով):

20. (20-րդ կետն ուժը կորցրել է 21.03.18 թիվ 90-Ն որոշում)

21. Եթե Թույլտվության կասեցման ժամկետ սահմանվել է մինչև խախտման պատճառի վերացումը, ապա Թույլտվության կասեցումը վերացված է համարվում Թույլտվություն ունեցող անձի խախտումները վերացնելու մասին դիմումը համապատասխան հիմնավորող փաստաթղթերով Հանձնաժողովում մուտքագրվելու օրվան հաջորդող հինգերորդ օրվանից, եթե այդ ընթացքում Հանձնաժողովն այլ որոշում չի կայացնում:

22. «Լիցենզավորման մասին» Հայաստանի Հանրապետության օրենքի 36-րդ հոդվածի 1-ին մասի 1-ին, 3-րդ, 5-7-րդ, 12-րդ կետերով, «Էլեկտրոնային հաղորդակցության մասին» Հայաստանի Հանրապետության օրենքի 4-րդ հոդվածի 1-ին մասի 6-րդ կետով և 12-րդ հոդվածի 2-րդ մասի 1-ին (Հանձնաժողովին տրամադրված ցանկացած հայտարարության մեջ Թույլտվություն ունեցող անձի կողմից դիտավորյալ կեղծ տեղեկություն ներկայացնելու մասով), 3-6-րդ կետերով նախատեսված հիմքերով (դեպքերում) Թույլտվությունը կարող է կասեցվել խախտում կատարելու օրվանից ոչ ուշ, քան վեց ամսվա ընթացքում, իսկ շարունակվող կամ տևական խախտման դեպքում` այն բացահայտելու օրվանից վեց ամսվա ընթացքում:

 

4. Թույլտվության դադարեցում

 

23. Թույլտվությունը (Թույլտվության գործողությունը) կարող է դադարեցվել «Էլեկտրոնային հաղորդակցության մասին» Հայաստանի Հանրապետության օրենքի 4-րդ հոդվածի 1-ին մասի 6-րդ կետով, 12-րդ հոդվածի 2-րդ մասով, «Լիցենզավորման մասին» Հայաստանի Հանրապետության օրենքի 37-րդ հոդվածի 1-ին մասի 1-3-րդ, 5-9-րդ կետերով նախատեսված դեպքերում (հիմքերով):

24. Թույլտվություն ունեցող անձն իրավունք ունի Հանձնաժողովի նիստում արտահայտել իր կարծիքը, ներկայացնել առարկություններ և առաջարկություններ Թույլտվության դադարեցման վերաբերյալ:

25. Թույլտվությունը դադարեցվում է` վերջինս, իսկ Հանձնաժողովի որոշմամբ Թույլտվություն տրամադրելու դեպքում` Հանձնաժողովի համապատասխան որոշումն ուժը կորցրած ճանաչելու միջոցով:

26. «Լիցենզավորման մասին» Հայաստանի Հանրապետության օրենքի 37-րդ հոդվածի 1-ին մասի 2-րդ կետի հիմքով Թույլտվությունը համարվում է դադարեցված Թույլտվություն ունեցող իրավաբանական անձի լուծարման, անհատ ձեռնարկատիրոջ գործունեությունը դադարեցվելու կամ ֆիզիկական անձի մահվան օրվանից:

27. «Լիցենզավորման մասին» Հայաստանի Հանրապետության օրենքի 37-րդ հոդվածի 1-ին մասի 8-րդ կետի հիմքով Թույլտվությունը համարվում է դադարեցված նրա գործողության ժամկետը լրանալու օրվան հաջորդող օրվանից:

 

5. Թույլտվության դադարեցումը Թույլտվություն ունեցող անձի

նախաձեռնությամբ

 

28. Թույլտվություն ունեցող անձը Թույլտվությունը դադարեցնելու ցանկության դեպքում դիմում է ներկայացնում Հանձնաժողով:

29. Թույլտվության դադարեցման կամ դադարեցման մերժման մասին որոշումը Հանձնաժողովն ընդունում է Թույլտվություն ունեցող անձի դիմումն ստանալու (Հանձնաժողովում մուտքագրվելու) օրվանից 20 օրվա ընթացքում:

30. Թույլտվության գործողությունը համարվում է դադարեցված` Հանձնաժողովի որոշումը Թույլտվություն ունեցող անձին պատշաճ հանձնելու կամ նրա մոտ մուտքագրվելու օրվան հաջորդող օրվանից, բացառությամբ սույն կարգի 31-րդ կետով սահմանված դեպքի, կամ եթե Թույլտվություն ունեցող անձն իր դիմումի մեջ չի նշել Թույլտվության դադարեցման ավելի ուշ ժամկետ:

(30-րդ կետը փոփ. 21.03.18 թիվ 90-Ն որոշում)

31. Հանձնաժողովը կարող է սահմանել Թույլտվություն ունեցող անձի դիմումն ստանալու (Հանձնաժողովում մուտքագրվելու) օրվանից, իսկ եթե Թույլտվություն ունեցող անձն իր դիմումի մեջ նշել է Թույլտվության դադարեցման ավելի ուշ ժամկետ, ապա այդ ժամկետից ավելի ուշ ժամկետ, եթե Թույլտվության դադարեցման հետևանքով վտանգվում է կամ կարող է վտանգվել ազգային անվտանգությունը կամ հանրային շահը:

32. Թույլտվության դադարեցման մասին դիմումը Հանձնաժողովը համապատասխան որոշմամբ մերժում է, եթե դա նախատեսված է օրենքով կամ Թույլտվության դադարեցման հետևանքով վտանգվում է ազգային անվտանգությունը կամ հանրային շահը:

33. Սույն կարգի 29-րդ կետում նշված ժամկետում Թույլտվությունը դադարեցնելու կամ դադարեցումը մերժելու մասին Հանձնաժողովի որոշում չընդունվելու դեպքում Թույլտվությունը դադարեցված է համարվում դիմումն ստանալու օրվանից, իսկ եթե Թույլտվություն ունեցող անձն իր դիմումի մեջ ավելի ուշ ժամկետ է նշել, ապա այդ ժամկետից:

 

6. Թույլտվության դադարեցումը Հանձնաժողովի նախաձեռնությամբ

 

34. Հանձնաժողովը Թույլտվության դադարեցման գործընթաց նախաձեռնելու դեպքում հարուցում է վարչական վարույթ և առաջնորդվում է «Վարչարարության հիմունքների և վարչական վարույթի մասին» Հայաստանի Հանրապետության օրենքով սահմանված կարգով և ժամկետներով, բացառությամբ սույն կարգի 35-րդ կետում նախատեսված դեպքի:

35. «Էլեկտրոնային հաղորդակցության մասին» Հայաստանի Հանրապետության օրենքի 12-րդ հոդվածի 2-րդ մասի 7-րդ կետով նախատեսված դեպքում Հանձնաժողովը, առանց վարչական վարույթ հարուցելու, անմիջապես ընդունում է Թույլտվությամբ տրամադրված ռադիոհաճախականությունների օգտագործման արգելման մասին որոշում, որն ուժի մեջ է մտնում Թույլտվություն ունեցող անձին այն պատշաճ ձևով հանձնելու պահից: Եթե տրամադրված ռադիոհաճախականությունների օգտագործման արգելման մասին որոշումն ուժի մեջ մտնելու պահից 3 աշխատանքային օրվա ընթացքում Հանձնաժողովը չի ընդունում Թույլտվությունը դադարեցնելու մասին որոշում, ապա Թույլտվությամբ տրամադրված ռադիոհաճախականությունների օգտագործման արգելման մասին որոշումը համարվում է անվավեր, եթե Հանձնաժողովը նշված ժամկետում չի ընդունում Թույլտվությունը կասեցնելու մասին որոշում: Թույլտվությամբ տրամադրված ռադիոհաճախականությունների օգտագործման արգելման մասին որոշումն անվավեր համարվելու դեպքում Հանձնաժողովը պարտավոր է փոխհատուցել Թույլտվություն ունեցող անձի կրած վնասը:

36. «Լիցենզավորման մասին» Հայաստանի Հանրապետության օրենքի 37-րդ հոդվածի 1-ին մասի 1-ին, 3-րդ, 5-րդ, 6-րդ, 9-րդ կետերով, «Էլեկտրոնային հաղորդակցության մասին» Հայաստանի Հանրապետության օրենքի 4-րդ հոդվածի 1-ին մասի 6-րդ կետով և 12-րդ հոդվածի 2-րդ մասի 1-6-րդ կետերով նախատեսված հիմքերով (դեպքերում) Թույլտվությունը կարող է դադարեցվել խախտում կատարելու օրվանից ոչ ուշ, քան 1 տարվա ընթացքում, իսկ շարունակվող կամ տևական խախտման դեպքում` այն բացահայտելու օրվանից 1 տարվա ընթացքում:

 

@ՍԹh

 

 

pin
Հանրային ծառայ. կարգ. հանձնաժողով
11.05.2011
N 231-Ն
Որոշում