Սեղմել Esc փակելու համար:
«ՀՀ ՏԱՐԱԾՔՈՒՄ ԳՈՐԾՈՂ ԲԱՆԿԵՐԻ, ՎԱՐԿԱՅԻ...
Քարտային տվյալներ

Տեսակ
Գործում է
Ընդունող մարմին
Ընդունման ամսաթիվ
Համար

Գրանցման ամսաթիվ
ՈՒժի մեջ մտնելու ամսաթիվ
ՈՒժը կորցնելու ամսաթիվ
Ընդունման վայր
Սկզբնաղբյուր

Ժամանակագրական տարբերակ Փոփոխություն կատարող ակտ

Որոնում:
Բովանդակություն

Հղում իրավական ակտի ընտրված դրույթին X
irtek_logo

«ՀՀ ՏԱՐԱԾՔՈՒՄ ԳՈՐԾՈՂ ԲԱՆԿԵՐԻ, ՎԱՐԿԱՅԻՆ ԿԱԶՄԱԿԵՐՊՈՒԹՅՈՒՆՆԵՐԻ, ՆԵՐԴՐՈՒՄԱՅԻՆ ԸՆԿԵՐՈ ...

 

 

050.0322.211211

ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ

                                      «21»         12           2011 Թ.

                                        ՊԵՏԱԿԱՆ ԳՐԱՆՑՄԱՆ ԹԻՎ 05011560

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

ՈՐՈՇՈՒՄ

 

30 նոյեմբերի 2011 թվականի թիվ 322-Ն

 

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ԳՈՐԾՈՂ ԲԱՆԿԵՐԻ, ՎԱՐԿԱՅԻՆ ԿԱԶՄԱԿԵՐՊՈՒԹՅՈՒՆՆԵՐԻ, ՆԵՐԴՐՈՒՄԱՅԻՆ ԸՆԿԵՐՈՒԹՅՈՒՆՆԵՐԻ, ՆԵՐԴՐՈՒՄԱՅԻՆ ՖՈՆԴԵՐԻ ԵՎ ՆԵՐԴՐՈՒՄԱՅԻՆ ՖՈՆԴԵՐԻ ԿԱՌԱՎԱՐԻՉՆԵՐԻ ՀԱՇՎԱՊԱՀԱԿԱՆ ՀԱՇՎԱՌՄԱՆ ՀԱՇՎԱՅԻՆ ՊԼԱՆԸ» ԵՎ «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ԳՈՐԾՈՂ ԲԱՆԿԵՐԻ, ՎԱՐԿԱՅԻՆ ԿԱԶՄԱԿԵՐՊՈՒԹՅՈՒՆՆԵՐԻ ԵՎ ՆԵՐԴՐՈՒՄԱՅԻՆ ԸՆԿԵՐՈՒԹՅՈՒՆՆԵՐԻ, ՆԵՐԴՐՈՒՄԱՅԻՆ ՖՈՆԴԵՐԻ ԵՎ ՆԵՐԴՐՈՒՄԱՅԻՆ ՖՈՆԴԵՐԻ ԿԱՌԱՎԱՐԻՉՆԵՐԻ ՀԱՇՎԱՊԱՀԱԿԱՆ ՀԱՇՎԱՌՄԱՆ ՀԱՇՎԱՅԻՆ ՊԼԱՆԻ ԿԻՐԱՌՄԱՆ ՀՐԱՀԱՆԳԸ» ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ԽՈՐՀՐԴԻ ՄԻ ՇԱՐՔ ՈՐՈՇՈՒՄՆԵՐ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

(11-րդ մաս)

 

Ենթաբաժին 140
«Արժեթղթեր»

 

Ենթաբաժին 140-ը նախատեսված է մինչև մարման ժամկետը պահվող արժեթղթերի հաշվառման համար:

Ենթաբաժին 140-ը ներառում է հետևյալ 1-ին կարգի հաշիվները` 1400 «Կենտրոնական բանկերի կողմից թողարկված արժեթղթեր», 1401 «Պետական արժեթղթեր», 1402 «Ոչ պետական արժեթղթեր», 1403 «Միջազգային ֆինանսական կազմակերպությունների արժեթղթեր»:

 

1-ին կարգի հաշիվ 1400

«Կենտրոնական բանկերի կողմից թողարկված արժեթղթեր»

 

1-ին կարգի հաշիվ 1400-ում ընդգրկված 2-րդ կարգի հաշիվներն ակտիվային են` դեբետում արտացոլվում են կազմակերպությանը պատկանող մինչև մարման ժամկետը պահվող արժեթղթերը և դրանց գծով հաշվեգրված տոկոսները, իսկ կրեդիտում` դրանց ելքագրումը:

 

14000 «Կենտրոնական բանկերի կողմից թողարկված առանց տոկոսի արժեթղթեր» - հաշիվը նախատեսված է կենտրոնական բանկերի կողմից թողարկված զեղչատոկոսային (դիսկոնտային) և անտոկոս արժեթղթերի հաշվառման համար: Զեղչատոկոսային արժեթղթերից եկամուտը ստացվում է անվանական արժեքի ու ձեռքբերման գնի տարբերություն հանդիսացող զեղչի (դիսկոնտի) ամորտիզացիայի միջոցով:

Հաշիվը դեբետագրվում է

ա) արժեթուղթը ձեռք բերելիս`

Դտ - 14000 (իրական արժեք գումարած գործարքի իրականացմանն ուղղակիորեն առնչվող գործառնական ծախսերի գումար)

Կտ - Դրամական միջոցներ

Այն դեպքում, երբ ձեռքբերման համար վճարած գումարը տարբերվում է ճանաչման արժեքից, տարբերությունը վերագրվում է առքուվաճառքից եկամուտներին կամ վնասին:

բ) մինչև արժեթղթի մարման ժամկետը արդյունավետ տոկոսադրույքի մեթոդով կատարված զեղչատոկոսի ամորտիզացիայի չափով` այն դուրս գրելով եկամուտների հաշվին`

Դտ - 14000

Կտ - 60700

Հաշիվը կրեդիտագրվում է արժեթղթի մարման դեպքում`

Կտ - 14000

Դտ - Դրամական միջոցներ

 

14001 «Կենտրոնական բանկերի կողմից թողարկված տոկոսային արժեթղթեր» - հաշիվը նախատեսված է տոկոսային եկամուտ բերող կենտրոնական բանկերի կողմից թողարկված արժեթղթերի հաշվառման համար: Այս արժեթղթերը ձեռք բերվելիս գրանցվում են ձեռքբերման արժեքով (ձեռքբերման գին գումարած գործարքի հետ կապված ծախսումներ):

Հաշիվը դեբետագրվում է

ա) արժեթուղթը ձեռք բերելիս`

Դտ - 14001 (իրական արժեք գումարած գործարքի իրականացմանն ուղղակիորեն առնչվող գործառնական ծախսեր)

Կտ - Դրամական միջոցներ

Այն դեպքում, երբ ձեռքբերման համար վճարած գումարը տարբերվում է ճանաչման արժեքից, տարբերությունը վերագրվում է առքուվաճառքից եկամուտներին կամ վնասին:

բ) արժեթղթի ամորտիզացված արժեքով հաշվառման ժամանակ` արդյունավետ տոկոսադրույքի չափով`

Դտ - 14001

Կտ - 60701:

Հաշիվը կրեդիտագրվում է

ա) արժեթղթի անվանական տոկոսադրույքին համապատասխան ստացման ենթակա գումարի չափով`

Դտ - 14002

Կտ - 14001:

 

14002 «Կենտրոնական բանկերի կողմից թողարկված տոկոսային արժեթղթերի գծով ստացվելիք տոկոսներ, տույժեր և տուգանքներ» - հաշիվը նախատեսված է կենտրոնական բանկերի կողմից թողարկված տոկոսային արժեթղթերից ստացվելիք տոկոսների, ինչպես նաև տույժերի և տուգանքների (առկայության դեպքում) հաշվառման համար:

Հաշիվը դեբետագրվում է կենտրոնական բանկերի կողմից թողարկված տոկոսային արժեթղթերի գծով կուտակված, բայց դեռևս չվճարված տոկոսների չափով`

Դտ - 14002

Կտ - 14001

կամ տույժեր և տուգանքներ հաշվեգրելիս`

Դտ - 14002

Կտ - 66301

Հաշիվը կրեդիտագրվում է կենտրոնական բանկի կողմից թողարկված տոկոսային արժեթղթերի տոկոսները ստանալիս`

Դտ - Դրամական միջոցներ

Կտ - 14002:

Ենթաբաժին 140-ում ընդգրկված մնացած հաշիվների հաշվառումը տարվում է նույն սկզբունքով, ինչ որ 1-ին կարգի հաշիվ 1400-ի դեպքում:

 

Ենթաբաժին 141
«Ֆակտորինգ»

 

Ենթաբաժին 141-ը նախատեսված է ֆակտորինգային գործառնություններից ստացվելիք գումարների հաշվառման համար:

Ենթաբաժին 141-ը ներառում է հետևյալ 1-ին կարգի հաշիվները` 1410 «Ֆինանսական կազմակերպությունների հետ ֆակտորինգ», 1411 «Ֆինանսական կազմակերպություն չհանդիսացող առևտրային կազմակերպությունների հետ ֆակտորինգ», 1412 «Հիմնարկների և ոչ առևտրային կազմակերպությունների հետ ֆակտորինգ», 1413 «Այլ անձանց հետ ֆակտորինգ»: Ենթաբաժնում ընդգրկված հաշիվների հաշվառումը տարվում է նույն սկզբունքով, ինչ որ ենթաբաժին 140-ում ընդգրկված հաշիվներինը:

 

Ենթաբաժին 142
«Մինչև մարման ժամկետը պահվող ֆինանսական ակտիվների հնարավոր կորուստների պահուստ»

 

Ենթաբաժին 142-ը նախատեսված է մինչև մարման ժամկետը պահվող ֆինանսական ակտիվների հնարավոր կորուստների պահուստի հաշվառման համար:

Ենթաբաժին 142-ը ներառում է հետևյալ 1-ին կարգի հաշիվները` 1420 «Մինչև մարման ժամկետը պահվող ֆինանսական ակտիվների հնարավոր կորուստների պահուստ ֆինանսական կազմակերպությունների գծով», 1421 «Մինչև մարման ժամկետը պահվող ֆինանսական ակտիվների հնարավոր կորուստների պահուստ ֆինանսական կազմակերպություն չհանդիսացող անձանց գծով»:

Ենթաբաժին 142-ում ընդգրկված 2-րդ կարգի հաշիվը պասիվային է` կրեդիտում արտացոլվում են հատկացումները հնարավոր կորուստների պահուստին, իսկ դեբետում` դրանց ելքագրումը: Յուրաքանչյուր ակտիվի գծով պահուստավորումն իրականացվում է տվյալ ակտիվի հիմնական և նրա գծով ստացվելիք տոկոսներ, տույժեր և տուգանքներ հաշիվների հանրագումարի նկատմամբ:

 

Ենթաբաժին 143
«Կենտրոնական բանկերին և ֆինանսական կազմակերպություններին ռեպո համաձայնագրերով վաճառված մինչև մարման ժամկետը պահվող արժեթղթեր»

 

Ենթաբաժին 143-ը նախատեսված է ռեպո համաձայնագրերի շրջանակներում վաճառված այն արժեթղթերի համար, որոնք մինչև վաճառքը դասակարգված են եղել որպես մինչև մարման ժամկետը պահվող:

Ենթաբաժին 143-ը ներառում է հետևյալ 1-ին կարգի հաշիվները` 1430 «Կենտրոնական բանկերին ռեպո համաձայնագրերով վաճառված մինչև մարման ժամկետը պահվող արժեթղթեր», 1431 «Բանկերին ռեպո համաձայնագրերով վաճառված մինչև մարման ժամկետը պահվող արժեթղթեր», 1432 «Վարկային կազմակերպություններին ռեպո համաձայնագրերով վաճառված մինչև մարման ժամկետը պահվող արժեթղթեր», 1433 «Ներդրումային ընկերություններին ռեպո համաձայնագրերով վաճառված մինչև մարման ժամկետը պահվող արժեթղթեր», 1434 «Ապահովագրական ընկերություններին ռեպո համաձայնագրերով վաճառված մինչև մարման ժամկետը պահվող արժեթղթեր», 1432 «Այլ ֆինանսական կազմակերպություններին ռեպո համաձայնագրերով վաճառված մինչև մարման ժամկետը պահվող արժեթղթեր»: Արժեթղթերի հետագա չափումը տարվում է նույն եղանակով, ինչ որ մինչև ռեպո համաձայնագրերի շրջանակներում վաճառելը:

 

1-ին կարգի հաշիվ 1430

«Կենտրոնական բանկերին ռեպո համաձայնագրերով վաճառված մինչև մարման

ժամկետը պահվող արժեթղթեր»

 

1-ին կարգի հաշիվ 1430-ում ընդգրկված 2-րդ կարգի հաշիվներն ակտիվային են` դեբետում արտացոլվում են կենտրոնական բանկերի հետ կնքված ռեպո համաձայնագրերի շրջանակներում վաճառված արժեթղթերը, իսկ կրեդիտում դրանց վերադարձը:

 

14300 «ՀՀ կենտրոնական բանկի կողմից թողարկված արժեթղթեր» - հաշիվը նախատեսված է կենտրոնական բանկերի հետ կնքված ռեպո համաձայնագրերով վաճառված ՀՀ կենտրոնական բանկի կողմից թողարկված արժեթղթերի հաշվառման համար:

Հաշիվը դեբետագրվում է ռեպո համաձայնագրով վաճառված արժեթղթի վերադասակարգման արդյունքում` արժեթղթի հաշվեկշռային արժեքի չափով`

Դտ - 14300

Կտ - Համապատասխան արժեթղթի հաշիվ

Միաժամանակ կատարվում է պայմանագիրը արտացոլող գրանցում`

Դտ - Դրամական միջոցներ

Կտ - 34000

Հաշիվը կրեդիտագրվում է ռեպո համաձայնագրի ավարտին`

Դտ - Համապատասխան արժեթղթի հաշիվ

Կտ - 14300

Միաժամանակ կատարվում է գումարի վերադարձը արտացոլող գրանցում`

Դտ - 34000

Կտ - Դրամական միջոցներ:

Ենթաբաժիններ 143-ում, 144-ում, 145-ում և 146-ում ընդգրկված մնացած հաշիվների հաշվառումը տարվում է նույն սկզբունքով, ինչ որ 1-ին կարգի հաշիվ 14300:

 

ԲԱԺԻՆ 15
«ՊԱՀԱՆՋՆԵՐ ՖԻՆԱՆՍԱԿԱՆ ԿԱԶՄԱԿԵՐՊՈՒԹՅՈՒՆՆԵՐԻ ՆԿԱՏՄԱՄԲ»

 

Բաժին 15-ը նախատեսված է ֆինանսական կազմակերպությունների նկատմամբ կազմակերպության պահանջների հաշվառման համար:

Բաժին 15-ը ներառում է հետևյալ ենթաբաժինները` 150 «Ֆինանսական կազմակերպություններին տրված վարկեր և փոխառություններ», 151 «Կազմակերպության հետ կապված ֆինանսական կազմակերպություններին տրված վարկեր և փոխառություններ», 152 «Այլ պահանջներ ֆինանսական կազմակերպությունների գծով», 153 «Վարկերի հնարավոր կորուստների պահուստ ֆինանսական կազմակերպությունների գծով»: Հաշվառումն իրականացվում է միջազգային հաշվապահական հաշվառման ստանդարտների, ՀՀ կենտրոնական բանկի և ՀՀ կառավարության կողմից ընդունված այլ իրավական ակտերի հիման վրա: Արտարժույթով արտահայտված ակտիվները վերագնահատվում են ՀՀ կենտրոնական բանկի կողմից հայտարարված ֆինանսական շուկայում ձևավորված փոխարժեքով` համաձայն ՀՀՄՍ 21-ի:

 

Ենթաբաժին 150
«Ֆինանսական կազմակերպություններին տրված վարկեր և փոխառություններ»

 

Ենթաբաժին 150-ը նախատեսված է ֆինանսական կազմակերպություններին տրամադրված վարկերի և փոխառությունների հաշվառման համար:

Ենթաբաժին 150-ը ներառում է հետևյալ 1-ին կարգի հաշիվները` 1500 «Բանկերին տրված վարկեր և փոխառություններ», 1501 «Վարկային կազմակերպություններին տրված վարկեր և փոխառություններ», 1502 «Ներդրումային ընկերություններին տրված վարկեր և փոխառություններ», 1503 «Ապահովագրական ընկերություններին տրված վարկեր և փոխառություններ», 1504 «Այլ ֆինանսական կազմակերպություններին տրված վարկեր և փոխառություններ»: Հաճախորդներին տրված վարկերի և այլ փոխատվությունների հաշվառումն իրականացվում է ՖՀՄՍ 9-ի և այլ նորմատիվ ակտերի համաձայն: Արտարժույթով արտահայտված ակտիվները վերագնահատվում են ՀՀ կենտրոնական բանկի կողմից հայտարարված ֆինանսական շուկայում ձևավորված փոխարժեքով` համաձայն ՀՀՄՍ 21-ի: Ենթաբաժնում ընդգրկված հաշիվներն ակտիվային են` դեբետում ցույց է տրվում վարկերի, փոխատվությունների տրամադրումը և դրանց դիմաց տոկոսների հաշվեգրումը, իսկ կրեդիտում` վարկերի ու փոխատվությունների մարումը, տոկոսների ստացումը, ինչպես նաև մայր գումարի ու տոկոսների դուրսգրումը:

 

1-ին կարգի հաշիվ 1500

«Բանկերին տրված վարկեր և փոխառություններ»

 

1-ին կարգի հաշիվ 1500-ում ընդգրկված 2-րդ կարգի հաշիվներն ակտիվային են` դեբետում արտացոլվում են կազմակերպության կողմից բանկերին տրամադրված վարկերը` այդ թվում նաև օվերդրաֆտները, օվերնայթները և վարկային գծերը և դրանց գծով հաշվեգրված տոկոսները, իսկ կրեդիտում` դրանց ելքագրումը:

 

15000 «Բանկերին տրված վարկեր և փոխառություններ» - հաշիվը նախատեսված է կազմակերպության կողմից բանկերին տրամադրված վարկերի հաշվառման համար:

Հաշիվը դեբետագրվում է

ա) կազմակերպության կողմից վարկը տրամադրելիս`

 

Դտ - 15000 (վարկի գումարի չափով)

Կտ - Դրամական միջոցներ:

Դտ - 15000 (վարկի տրամադրման նպատակով վարկատուի կողմից կատարված

վճարումների գումարի չափով)

Կտ - 19120 (քանզի, նշված վճարները կատարվում են նախքան վարկի

տրամադրումը, դրանք պետք է հաշվառվեն որպես ապագա ժամանակաշրջանի

ծախսեր, որպեսզի վարկի տրամադրումից հետո ընդգրկվեն արդյունավետ

տոկոսադրույքի հաշվարկում`

 

Դտ.- 19120/Կտ. - Դրամական միջոցներ (կատարված վճարումների գումարի

չափով):

Դտ - 38700 (նշված վճարները վարկառուի կողմից կատարվում են նախքան վարկի

տրամադրումը և պետք է հաշվառվեն որպես ապագա ժամանակաշրջանի

եկամուտներ, որպեսզի վարկի տրամադրումից հետո ընդգրկվեն արդյունավետ

տոկոսադրույքի հաշվարկում` Դտ.-Դրամական միջոցներ (կատարված

վճարումների գումարի չափով/Կտ. - 38700)

Կտ - 15000 (վարկի ստացման նպատակով վարկառուի կողմից կատարված

վճարումների գումարի չափով):

 

Այն դեպքում, երբ որոշում է կայացվում վարկ չտրամադրել, վարկի գծով կատարված ծախսերը և ստացված գումարները (այն գումարները, որոնք կազմակերպությունը ստանում է վարկավորման հարցը դիտարկելու համար), որոնք մինչ այդ ճանաչվել էին որպես ապագա ժամանակաշրջանների ծախսեր և եկամուտներ ճանաչվում են ծախս և եկամուտ`

Դտ - 38700

Կտ - 62100

Դտ - 71000

Կտ - 19120:

 

բ) վարկի ամորտիզացված արժեքով հաշվառման ժամանակ` արդյունավետ տոկոսադրույքի կիրառմամբ հաշվարկված եկամտի չափով`

Դտ - 15000

Կտ - 60100:

 

Հաշիվը կրեդիտագրվում է

 

ա) վարկի անվանական տոկոսադրույքի հիման վրա հաշվարկված ստացման ենթակա տոկոսների չափով`

 

Դտ - 15001

Կտ - 15000

 

բ) վարկի մարումների ժամանակ`

Դտ - Դրամական միջոցներ

Կտ - 15000:

 

Վարկի տարեկան սպասարկման վճարը ստանալու պահին (առկայության դեպքում) կատարվում է եկամտի ճշգրտում, սպասարկման վճարի չափով ձևափոխելով տոկոսային եկամուտը ոչ տոկոսայինի`

 

Դտ - 60100

Կտ - 62100

 

Վարկի վաղաժամկետ մարման դեպքում կատարվում են հետևյալ թղթակցումները`

Դտ - Դրամական միջոցներ

Կտ - 15000

Կտ - 60100 եթե ակտիվի հաշվեկշռային արժեքը գերազանցում է տվյալ պահի

դրությամբ վճարման ենթակա գումարը կամ

Դտ - 60100 եթե տվյալ պահի դրությամբ վճարման ենթակա գումարը գերազանցում է ակտիվի հաշվեկշռային արժեքը

 

15001 «Բանկերին տրված վարկերից և փոխառությունների գծով ստացվելիք տոկոսներ, տույժեր և տուգանքներ» - հաշիվը նախատեսված է բանկերին տրամադրված վարկերի և փոխառությունների գծով ստացման ենթակա տոկոսների, ինչպես նաև տույժերի և տուգանքների հաշվառման համար:

Հաշիվը դեբետագրվում է բանկերին տրամադրված վարկերի գծով կուտակված, բայց դեռևս չվճարված անվանական տոկոսների չափով`

Դտ - 15001

Կտ - 15000

կամ տույժեր և տուգանքներ հաշվեգրելիս`

Դտ - 15001

Կտ - 66301

 

Հաշիվը կրեդիտագրվում է բանկերին տրամադրված վարկերի գծով կուտակված տոկոսները ստանալիս`

Դտ - Դրամական միջոցներ

Կտ - 15001:

 

Արժեզրկված վարկերի տոկոսների հաշվեգրումը չի դադարեցվում:

 

Ենթաբաժիններ 150-ում և 151-ում ընդգրկված մնացած հաշիվների հաշվառումը տարվում է նույն սկզբունքով, ինչ որ 2-րդ կարգի հաշիվներ 15000-ի և 15001-ի դեպքում, բացառությամբ օվերդրաֆտներին, օվերնայթներին և վարկային գծերին (այն վարկային գծերին, որոնց տրամադրման պայմանները նման են օվերդրաֆտների տրամադրման պայմաններին) վերաբերվող հաշիվներից, որոնց հաշվառումը իրականացվում է գծային եղանակով, եթե կազմակերպությունը չի կարող կանխատեսել այդ ակտիվների ապագա դրամական հոսքերը:

 

Ենթաբաժին 152
«Այլ պահանջներ ֆինանսական կազմակերպությունների գծով»

 

Ենթաբաժին 152-ում ընդգրկված հաշիվները ակտիվային են: Ենթաբաժին 152-ը ներառում է հետևյալ 1-ին կարգի հաշիվները` 1520 «Կարճաժամկետ պահանջներ ֆինանսական կազմակերպությունների նկատմամբ արտարժույթի առքուվաճառքի գծով», 1521 «Կարճաժամկետ պահանջներ ֆինանսական կազմակերպությունների նկատմամբ այլ հաշվարկների գծով», 1522 «Դեպոնացված միջոցներ»:

Ենթաբաժին 152-ի հաշիվներում արտացոլվում են բանկի կողմից իրականացվող կարճ ժամկետ ունեցող (2 օր) սփոթ տիպի գործարքների, ինչպես նաև այլ հաշվարկների գծով պահանջները: Ենթաբաժնի հաշիվներում արտացոլվում են ակրեդիտիվային կամ այլ գործառնությունների իրականացման նպատակով այլ բանկերում կամ ֆինանսական կազմակերպություններում դեպոնացված (սառեցված) գումարները:

 

Ենթաբաժին 153
«Վարկերի հնարավոր կորուստների պահուստ ֆինանսական կազմակերպությունների գծով»

 

Ենթաբաժին 153-ում ընդգրկված հաշիվները պասիվային են:

Ենթաբաժին 153-ը ներառում է հետևյալ 1-ին կարգի հաշիվները` 1530 «Վարկերի հնարավոր կորուստների պահուստ ֆինանսական կազմակերպությունների գծով», 1531 «Վարկերի հնարավոր կորուստների պահուստ կազմակերպության հետ կապված ֆինանսական կազմակերպությունների գծով»: Պահուստավորումն իրականացվում է ակտիվի հաշվեկշռային արժեքի և դրա գծով հաշվեգրված, բայց դեռևս չստացված տոկոսների և այլ գումարների հանրագումարի նկատմամբ:

 

1-ին կարգի հաշիվ 1530

«Վարկերի հնարավոր կորուստների պահուստ ֆինանսական

կազմակերպությունների գծով»

 

1-ին կարգի հաշիվ 1530-ում ընդգրկված 2-րդ կարգի հաշիվներն պասիվային են` կրեդիտում արտացոլվում են կազմակերպության կողմից բանկերին տրամադրված վարկերի գծով իրականացված պահուստավորումը, իսկ դեբետում` դրա ելքագրումը:

15300 «Վարկերի հնարավոր կորուստների պահուստ բանկերի գծով» - հաշիվը նախատեսված է կազմակերպության կողմից բանկերին տրամադրված վարկերի գծով իրականացրած պահուստավորման հաշվառման համար:

Հաշիվը կրեդիտագրվում է պահուստավորումն իրականացնելիս`

Դտ - 73000

Կտ - 15300:

 

Հաշիվը դեբետագրվում է

Դտ - 15300

Կտ - 63000:

Ընդ որում, պահուստի գումարը հաշվարկվում է 15000 և 15001 հաշիվների հանրագումարի նկատմամբ:

 

ԲԱԺԻՆ 16
«ՊԱՀԱՆՋՆԵՐ ՖԻՆԱՆՍԱԿԱՆ ԿԱԶՄԱԿԵՐՊՈՒԹՅՈՒՆ ՉՀԱՆԴԻՍԱՑՈՂ ԱՆՁԱՆՑ ՆԿԱՏՄԱՄԲ»

 

Բաժին 16-ը նախատեսված է ֆինանսական կազմակերպություն չհանդիսացող անձանց նկատմամբ կազմակերպության պահանջների արտացոլման համար:

Բաժին 16-ը ներառում է հետևյալ ենթաբաժինները` 160 «Ֆինանսական կազմակերպություն չհանդիսացող առևտրային կազմակերպություններին տրված վարկեր և փոխառություններ», 161 «Հիմնարկներին և ոչ առևտրային կազմակերպություններին տրված վարկեր և փոխառություններ», 162 «Այլ անձանց տրված վարկեր և փոխառություններ», 163 «Կազմակերպության հետ կապված ֆինանսական կազմակերպություն չհանդիսացող առևտրային կազմակերպություններին տրված վարկեր և փոխառություններ», 164 «Կազմակերպության հետ կապված հիմնարկներին և ոչ առևտրային կազմակերպություններին տրված վարկեր և փոխառություններ», 165 «Կազմակերպության հետ կապված այլ անձանց տրված վարկեր և փոխառություններ», 166 «Վարկերի հնարավոր կորուստների պահուստ ֆինանսական կազմակերպություն չհանդիսացող անձանց գծով»: Ենթաբաժիններ 160-ում, 161-ում, 162-ում, 163-ում, 164-ում և 165-ում ընդգրկված հաշիվների հաշվառումը տարվում է նույն սկզբունքով, ինչ որ բաժին 15-ում ընդգրկված համապատասխան հաշիվների դեպքում:

Ենթաբաժին 166-ում ընդգրկված հաշիվները կոնտրակտիվային են: Ենթաբաժին 166-ում ընդգրկված հաշիվները նախատեսված են վարկերի հնարավոր կորուստների համար ստեղծվող պահուստներին հատկացումների հաշվառման համար:

 

ԲԱԺԻՆ 17
«ՌԵՊՈ ՀԱՄԱՁԱՅՆԱԳՐԵՐ»

 

Բաժին 17-ը ներառում է հետևյալ ենթաբաժինները` 170 «Ռեպո համաձայնագրեր կենտրոնական բանկերի հետ», 171 «Ռեպո համաձայնագրեր ֆինանսական կազմակերպությունների հետ», 172 «Ռեպո համաձայնագրեր ֆինանսական կազմակերպություն չհանդիսացող անձանց հետ: Հաշվառումն իրականացվում է ՖՀՄՍ 9-ի համաձայն: Սույն բաժնի հաշիվներում հաշվառվում են կազմակերպության կողմից այլ անձանց հետ կնքված այն համաձայնագրերը, որոնք տվյալ անձանց համար հանդիսանում են ռեպո համաձայնագրեր` համաձայն ՖՀՄՍ 9-ի: Բաժնում ընդգրկված հաշիվներն ակտիվային են` դեբետում ցույց են տրվում այլ անձանց նկատմամբ բանկի պահանջների աճը, իսկ կրեդիտում` դրանց նվազումը: Հաշվառումը տարվում է ամորտիզացված արժեքով` արդյունավետ տոկոսադրույքի կիրառմամբ: Բաժնում ընդգրկված հաշիվների հաշվառումը իրականացվում է նույն սկզբունքով, ինչ որ բաժին 16-ում ընդգրկված հաշիվների դեպքում:

 

Ենթաբաժին 170
«Ռեպո համաձայնագրեր կենտրոնական բանկերի հետ»

 

Ենթաբաժին 170-ը նախատեսված է կենտրոնական բանկերի կողմից կազմակերպության հետ կնքված ռեպո համաձայնագրերի հաշվառման համար:

Ենթաբաժին 170-ը ներառում է հետևյալ 1-ին կարգի հաշիվները` 1700 «Ռեպո համաձայնագրեր կենտրոնական բանկերի հետ»:

 

1-ին կարգի հաշիվ 1700

«Ռեպո համաձայնագրեր կենտրոնական բանկերի հետ»

 

1-ին կարգի հաշիվ 1700-ում ընդգրկված 2-րդ կարգի հաշիվներն ակտիվային են` դեբետում արտացոլվում են ՀՀ կենտրոնական բանկի հետ կնքված ռեպո համաձայնագրերի շրջանակներում այն գործարքները, որտեղ կազմակերպությունը սկզբնապես ձեռք է բերել արժեթղթեր կամ արտարժույթ, դրանց դիմաց վճարելով ՀՀ դրամով:

17000 «Ռեպո համաձայնագրեր կենտրոնական բանկերի հետ» - հաշիվը նախատեսված է կենտրոնական բանկերի հետ կնքված այն ռեպո համաձայնագրերի համար, որտեղ կազմակերպությունը սկզբնապես ձեռք է բերել արժեթղթեր կամ արտարժույթ, դրանց դիմաց վճարելով ՀՀ դրամով:

Հաշիվը դեբետագրվում է

ա) պայմանագրում նշված գումարի

չափով`

Դտ - 17000

Կտ - Դրամական միջոցներ

 

բ) պայմանագրի ամորտիզացված արժեքով հաշվառման ժամանակ` արդյունավետ տոկոսադրույքի կիրառմամբ հաշվարկած եկամտի չափով`

Դտ - 17000

Կտ - 60200:

 

Միաժամանակ կատարվում է գրանցում արտահաշվեկշռային բաժին 82-ի համապատասխան հաշվում:

Հաշիվը կրեդիտագրվում է`

 

ա) ռեպո համաձայնագրի գծով տոկոսադրույքին համապատասխան ստացման ենթակա տոկոսների գումարների չափով`

Դտ - 17001

Կտ - 17000

 

բ) ռեպո համաձայնագրի ավարտին, այն է գումարը հետ ստանալիս`

Դտ - Դրամական միջոցներ

Կտ - 17000:

 

Միաժամանակ, արտահաշվեկշռային բաժին 82-ի համապատասխան հաշվից ձեռք բերված արժեթուղթը ապաճանաչվում է:

 

17001 «Կենտրոնական բանկերի հետ կնքված ռեպո համաձայնագրերի գծով ստացվելիք տոկոսներ, տույժեր և տուգանքներ» - հաշիվը նախատեսված է կենտրոնական բանկերի հետ կնքված ռեպո համաձայնագրերից հաշվեգրված տոկոսների, ինչպես նաև տույժերի և տուգանքների հաշվառման համար:

Հաշիվը դեբետագրվում է ռեպո համաձայնագրի գծով տոկոսը հաշվեգրելիս`

Դտ - 17001

Կտ - 17000

 

կամ տույժեր և տուգանքներ հաշվեգրելիս`

Դտ - 17001

Կտ - 66301

 

Հաշիվը կրեդիտագրվում է տոկոսը և այլ գումարները մարելիս`

Դտ - Դրամական միջոցներ

Կտ - 17001:

 

Բաժին 17-ում ընդգրկված մնացած հաշիվների հաշվառումը տարվում է նույն սկզբունքով, ինչ որ 1-ին կարգի հաշիվներ 17000 և 17001:

 

ԲԱԺԻՆ 18
«ԱՅԼ ԳՈՐԾԱՌՆՈՒԹՅՈՒՆՆԵՐԻ ԳԾՈՎ ՍՏԱՑՎԵԼԻՔ ԳՈՒՄԱՐՆԵՐ»

 

Այս բաժինը ներառում է հետևյալ ենթաբաժինները` 180 «Ակրեդիտիվներ», 181 «Երաշխիքներ և երաշխավորություններ», 182 «Ֆինանսական վարձակալություն», 183 «Արժեթղթերի փաթեթի կառավարում», 184 «Արժեթղթերով գործարքների գծով ստացվելիք գումարներ», 185 «Արժեթղթերի պահառության գծով ստացվելիք գումարներ»; 186 «Ներդրումային ֆոնդերի կառավարման գծով ստացվելիք գումարներ», 187 «Խորհրդատվության գծով ստացվելիք գումարներ», 188 «Հեջավորման գործիքներ», 189 «Հաշվարկներ կազմակերպության և իր մասնաճյուղերի միջև»:

Բաժնում ընդգրկված հաշիվներն ակտիվային են` դեբետում ցույց է տրվում բանկի ունեցած պահանջների ավելացումը, իսկ կրեդիտում` դրանց նվազումը:

Արտարժույթով արտահայտված ակտիվները վերագնահատվում են ՀՀ կենտրոնական բանկի կողմից հայտարարված ֆինանսական շուկայում ձևավորված փոխարժեքով` համաձայն ՀՀՄՍ 21-ի:

 

Ենթաբաժին 180
«Ակրեդիտիվներ»

 

Ենթաբաժին 180-ը նախատեսված է տրամադրված ակրեդիտիվների հաշվառման համար:

Ենթաբաժին 180-ը ներառում է հետևյալ 1-ին կարգի հաշիվները` 1800 «Ֆինանսական կազմակերպություններին տրված ակրեդիտիվներ», 1801 «Ֆինանսական կազմակերպություն չհանդիսացող առևտրային կազմակերպություններին տրված ակրեդիտիվներ», 1802 «Հիմնարկներին և ոչ առևտրային կազմակերպություններին տրված ակրեդիտիվներ», 1803 «Այլ անձանց տրված ակրեդիտիվներ»:

 

1-ին կարգի հաշիվ 1800»

Ֆինանսական կազմակերպություններին տրված ակրեդիտիվներ»

 

1-ին կարգի հաշիվ 1800-ում ընդգրկված 2-րդ կարգի հաշիվներն ակտիվային են` դեբետում արտացոլվում են ֆինանսական կազմակերպություններին տրամադրված ակրեդիտիվները և դրանց դիմաց տոկոսների հաշվեգրումը, իսկ կրեդիտում` ակրեդիտիվների մարումը, ինչպես նաև տոկոսների դուրս գրումը:

 

18000 «Բանկերին տրված ակրեդիտիվներ» - այս հաշվում հաշվառվում են ակրեդիտիվ բացող (էմիտենտ) բանկի կողմից այլ բանկերին տրված ակրեդիտիվների գումարները: Ակրեդիտիվ բացելիս (պայմանագիրը կնքելիս) բանկը գրանցում է կատարում հետհաշվեկշռային 80100 «Ակրեդիտիվներ» հաշվում:

ա) Առանց հաճախորդ բանկի թղթակցային հաշիվը սառեցնելու ակրեդիտիվի դեպքում մատակարարի հաշիվն ակցեպտավորելիս (հոժարագրելիս) ձևակերպվում է`

Դտ - 18000

Կտ - 36100

 

Վճարում կատարելիս`

Դտ - 36100

Կտ - Դրամական միջոցներ

 

Ակրեդիտիվի ամորտիզացված արժեքով հաշվառման ժամանակ` արդյունավետ տոկոսադրույքի չափով`

Դտ - 18000

Կտ - 60400:

 

Ակրեդիտիվի գծով տոկոսադրույքին համապատասխան ստացման ենթակա գումարի չափով`

Դտ - 18001

Կտ - 18000

 

Հաճախորդ բանկից փոխհատուցում ստանալիս տրվում է հետևյալ ձևակերպումը`

Դտ - Հաճախորդի թղթակցային հաշիվ, դրամական միջոցներ

Կտ - 18000

 

բ) հաճախորդի հաշիվը սառեցնելու դեպքում տրվում են հետևյալ ձևակերպումները`

Դտ - Հաճախորդի հաշիվ

Կտ - 36200

 

Վճարում կատարելիս`

Դտ - 36200

Կտ - Թղթակցային հաշիվ

 

18001 «Բանկերին տրված ակրեդիտիվների գծով ստացվելիք տոկոսներ, տույժեր և տուգանքներ» - այս հաշվում հաշվառվում են բանկի կողմից այլ բանկերին տրված ակրեդիտիվների դիմաց հաշվեգրված տոկոսները, ինչպես նաև տույժերը և տուգանքները:

 

Հաշիվը դեբետագրվում է ստացման ենթակա գումարների չափով`

Դտ - 18001

Կտ - 18000

 

կամ տույժեր և տուգանքներ հաշվեգրելիս`

Դտ - 18001

Կտ - 66301

 

Հաշիվը կրեդիտագրվում է տոկոսներն ստանալիս`

Դտ - Դրամական միջոցներ

Կտ - 18001:

 

Ենթաբաժին 180-ում ընդգրկված մնացած հաշիվների հաշվառումը տարվում է նույն սկզբունքով, ինչ որ հաշիվներ 18000-ի և 18001-ի դեպքում:

 

Ենթաբաժին 181
«Երաշխիքներ և երաշխավորություններ»

 

Ենթաբաժին 181-ը նախատեսված է տրամադրված երաշխիքների և երաշխավորությունների գծով կատարված վճարումների հաշվառման համար:

Ենթաբաժին 181-ը ներառում է հետևյալ 1-ին կարգի հաշիվները` 1810 «Երաշխիքներ և երաշխավորություններ ֆինանսական կազմակերպությունների համար», 1811 «Երաշխիքներ և երաշխավորություններ ֆինանսական կազմակերպություն չհանդիսացող առևտրային կազմակերպությունների համար», 1812 «Երաշխիքներ և երաշխավորություններ հիմնարկների և ոչ առևտրային կազմակերպությունների համար», 1813 «Երաշխիքներ և երաշխավորություններ այլ անձանց համար»:

 

1-ին կարգի հաշիվ 1810

«Երաշխիքներ և երաշխավորություններ ֆինանսական կազմակերպությունների

համար»

 

1-ին կարգի հաշիվ 1810-ում ընդգրկված 2-րդ կարգի հաշիվներն ակտիվային են` դեբետում արտացոլվում են ֆինանսական կազմակերպություններին երաշխիքների և երաշխավորությունների գծով կազմակերպության կողմից կատարված վճարումները և դրանց դիմաց ստացվելիք վճարների հաշվեգրումը, իսկ կրեդիտում` երաշխիքների և երաշխավորությունների մարումը, ինչպես նաև տոկոսների դուրս գրումը:

18100 «Երաշխիքներով և երաշխավորություններով կատարված վճարումներ բանկերի համար» - հաշիվը նախատեսված է կազմակերպության կողմից բանկերի համար տրված երաշխիքների և երաշխավորությունների դիմաց կատարված վճարումների հաշվառման համար: Երաշխիքների և երաշխավորությունների հաշվառումը տարվում է ՀՀՄՍ 37 «Պահուստներ, պայմանական պարտավորություններ և պայմանական ակտիվներ» ստանդարտի համաձայն: Այս պահանջների արժեզրկման դեպքում նրանց գծով կատարվում է պահուստավորում և դուրսգրում` ըստ «Հայաստանի Հանրապետության տարածքում գործող բանկերի վարկերի ու դեբիտորական պարտքերի դասակարգման և հնարավոր կորուստների պահուստների ձևավորման կարգի»:

Հաշիվը դեբետագրվում է

ա) տրված երաշխիքների և երաշխավորությունների դիմաց վճարում կատարելիս`

Դտ - 18100

Կտ - Դրամական միջոցներ

 

բ) երաշխիքի կամ երաշխավորության ամորտիզացված արժեքով հաշվառման ժամանակ` արդյունավետ տոկոսադրույքի կիրառմամբ հաշվարկած գումարի չափով`

Դտ - 18100

Կտ - 61200:

 

Գործարքի հետ կապված միջնորդավճարների ամորտիզացված արժեքի հաշվարկի մեջ ընդգրկման մոտեցումը նույնն են, ինչ որ վարկերի դեպքում:

Հաշիվը կրեդիտագրվում է`

 

ա) վճարված գումարի դիմաց փոխհատուցում ստանալիս`

Դտ - Դրամական միջոցներ, հաճախորդ բանկի թղթակցային հաշիվ

Կտ - 18100

 

բ) տրված անհուսալի երաշխիքների գծով տոկոսադրույքին համապատասխան ստացման ենթակա գումարի չափով`

Դտ - 18101

Կտ - 18100

 

գ) տրված անհուսալի երաշխիքները հաշվեկշռից դուրս գրելիս`

Դտ - Ակտիվների հնարավոր կորուստների դուրսգրման պահուստների հաշիվներ

Կտ - 18100:

 

18101 «Բանկերի համար տրված երաշխիքների և երաշխավորությունների գծով ստացվելիք տոկոսներ, տույժեր և տուգանքներ» - հաշիվը նախատեսված է կազմակերպության կողմից բանկերի համար տրված երաշխիքների և երաշխավորությունների գծով կատարված վճարների դիմաց հաշվարկված, սակայն դեռ չստացված տոկոսների, ինչպես նաև տույժերի և տուգանքների հաշվառման համար:

Հաշիվը դեբետագրվում է ստացվելիք վճարների գումարի չափով`

Դտ - 18101

Կտ - 18100,

 

կամ տույժեր և տուգանքներ հաշվեգրելիս`

Դտ - 18101

Կտ - 66301

 

Հաշիվը կրեդիտագրվում է վճարներն ստանալիս`

Դտ - Դրամական միջոցներ, հաճախորդ բանկի թղթակցային հաշիվ

Կտ - 18101:

 

Ենթաբաժին 181-ում ընդգրկված մնացած հաշիվների հաշվառումը տարվում է նույն սկզբունքով, ինչ որ հաշիվներ 18100-ի և 18101-ի դեպքում:

 

Ենթաբաժին 182
«Ֆինանսական վարձակալություն»

 

Ենթաբաժին 182-ը նախատեսված է տրամադրված ֆինանսական վարձակալության հաշվառման համար:

Ենթաբաժին 182-ը ներառում է հետևյալ 1-ին կարգի հաշիվները` 1820 «Ֆինանսական կազմակերպություններից Ֆինանսական վարձակալության գծով ստացվելիք գումարներ», 1821 «Ֆինանսական կազմակերպություն չհանդիսացող անձանցից Ֆինանսական վարձակալության գծով ստացվելիք գումարներ», 1822 «Ֆինանսական վարձակալության դիմաց չվաստակած ֆինանսական եկամուտներ ֆինանսական կազմակերպություններից», 1823 «Ֆինանսական վարձակալության դիմաց չվաստակած ֆինանսական եկամուտներ ֆինանսական կազմակերպություն չհանդիսացող անձանցից»:

Ենթաբաժին 182-ում ընդգրկված հաշիվները նախատեսված են ֆինանսական վարձակալության հաշվառման համար: Հաշվառումը տարվում է համաձայն ՀՀՄՍ 17 «Վարձակալություն» ստանդարտի:

 

1-ին կարգի հաշիվ 1820

«Ֆինանսական կազմակերպություններից Ֆինանսական վարձակալության գծով

ստացվելիք գումարներ»

 

1-ին կարգի հաշիվ 1820-ում ընդգրկված 2-րդ կարգի հաշիվներն ակտիվային են` դեբետում արտացոլվում են ֆինանսական կազմակերպություններից Ֆինանսական վարձակալության գծով ստացվելիք գումարներ, իսկ կրեդիտում` ֆինանսական վարձակալության մարումը:

 

18200 «Բանկերից Ֆինանսական վարձակալության գծով ստացվելիք գումարներ» - հաշիվը նախատեսված է բանկերին տրամադրված ֆինանսական վարձակալության գծով ստացվելիք գումարները հաշվառելու համար:

Հաշիվը դեբետագրվում է հիմնական միջոցները ֆինանսական վարձակալությամբ բանկերին տրամադրելիս`

Դտ - 18200

Կտ - 607 ենթաբաժնի համապատասխան հաշիվները (ակտիվի իրական արժեքի և

հաշվեկշռային արժեքի տարբերության չափով)

Կտ - ակտիվի համապատասխան հաշիվը

Կտ - 1822, 1823 հաշիվներում ընդգրկված համապատասխան հաշիվները:

 

Հաշիվը կրեդիտագրվում է բանկերին տրամադրված ֆինանսական վարձակալության գծով լրիվ կամ մասնակի վճարում ստանալիս`

Դտ - Դրամական միջոց

Կտ - 18200:

 

Ենթաբաժին 182-ի 1-ին կարգի հաշիվներ 1822-ում և 1823-ում ընդգրկված մնացած հաշիվների հաշվառումը տարվում է նույն սկզբունքով, ինչ որ հաշիվ 18200-ի դեպքում:

 

Ենթաբաժին 183
«Արժեթղթերի փաթեթի կառավարում»

 

Ենթաբաժին 183-ը նախատեսված է արժեթղթերի փաթեթի կառավարման շրջանակներում տրամադրված ծառայությունների դիմաց ստացվելիք գումարների հաշվառման համար:

Ենթաբաժին 183-ը ներառում է հետևյալ 1-ին կարգի հաշիվները` 1830 «Ֆինանսական կազմակերպություններից արժեթղթերի փաթեթի կառավարման գծով ստացվելիք գումարներ», 1831 «Ֆինանսական կազմակերպություն չհանդիսացող անձանցից արժեթղթերի փաթեթի կառավարման գծով ստացվելիք գումարներ»: Ներդրումային ծառայությունների մատուցման շրջանակներում կառավարվող ակտիվները չեն գրանցվում սույն հաշիվների ներքո, քանի որ դրանք չեն հանդիսանում կազմակերպության սեփականությունը: Ենթաբաժնի հաշիվները դեբետագրվում են ծառայության մատուցման դեպքում, թղթակցելով համապատասխան եկամուտների հաշիվների հետ

 

Ենթաբաժին 184
«Արժեթղթերով գործարքների գծով ստացվելիք գումարներ»

 

Ենթաբաժին 184-ում ընդգրկված հաշիվների հաշվառումը տարվում է նույն սկզբունքով, ինչ ենթաբաժին 183-ում ընդգրկված հաշիվների դեպքում:

 

Ենթաբաժին 185
«Արժեթղթերի պահառության գծով ստացվելիք գումարներ»

 

Ենթաբաժին 185-ում ընդգրկված հաշիվների հաշվառումը տարվում է նույն սկզբունքով, ինչ ենթաբաժին 183-ում ընդգրկված հաշիվների դեպքում:

 

Ենթաբաժին 186»
Ներդրումային ֆոնդերի կառավարման գծով ստացվելիք գումարներ»

 

Ենթաբաժին 186-ում ընդգրկված հաշիվների հաշվառումը տարվում է նույն սկզբունքով, ինչ ենթաբաժին 183-ում ընդգրկված հաշիվների դեպքում: Հաշիվը կիրառվում է ներդրումային ֆոնդերի կառավարիչների կողմից:

 

Ենթաբաժին 187
«Խորհրդատվության գծով ստացվելիք գումարներ»

 

Ենթաբաժին 187-ում ընդգրկված հաշիվների հաշվառումը տարվում է նույն սկզբունքով, ինչ ենթաբաժին 183-ում ընդգրկված հաշիվների դեպքում:

 

Ենթաբաժին 188
«Հեջավորման գործիքներ»

 

Ենթաբաժին 188-ում ընդգրկված հաշիվները նախատեսված են հեջավորման ածանցյալ և ոչ ածանցյալ գործիքների հաշվառման համար: Հաշվառումը տարվում է ՀՀՄՍ 32, ՖՀՄՍ 9 ստանդարտների և այլ կարգերի համաձայն:

 

Ենթաբաժին 189
«Հաշվարկներ կազմակերպության և իր մասնաճյուղերի միջև»

 

Ենթաբաժին 189-ում ընդգրկված հաշիվները նախատեսված են այն գումարների հաշվառման համար, որոնք առաջանում են բանկի և մասնաճյուղերի միջև փոխադարձ հաշվարկների արդյունքում: Հաշվետվություն ներկայացնելու կամ հրապարակելու ժամանակ այս հաշիվը ենթակա է զրոյացման,մնացորդները դասակարգվում են համապատասխան հաշիվներին: Եթե դա անհնար է, ապա անհրաժեշտ է առաջացած մնացորդը գրանցել 19314 կամ 43008 հաշիվների վրա: Հաջորդ օրը մնացորդը վերականգնվում է այս հաշվին:

 

ԲԱԺԻՆ 19
«ՍՏԱՑՎԵԼԻՔ ԳՈՒՄԱՐՆԵՐ»

 

Բաժին 19-ը ներառում է հետևյալ ենթաբաժինները` 190 «Դեբիտորական պարտքեր», 191 «Կանխավճարներ», 192 «Ստացվելիք շահաբաժիններ», 193 «Ստացվելիք այլ գումարներ», 194 «Դեբիտորական պարտքերի և այլ ակտիվների հնարավոր կորուստների պահուստ»:

Ենթաբաժին 190
«Դեբիտորական պարտքեր»

 

Ենթաբաժին 190-ում ընդգրկված հաշիվները նախատեսված են բյուջեի և այլ անձանց նկատմամբ դեբիտորական պարտքերի հաշվառման համար: Ենթաբաժին 190-ը ներառում է հետևյալ 1-ին կարգի հաշիվները` 1900 «Դեբիտորական պարտքեր»: Արտարժույթով արտահայտված ակտիվները վերագնահատվում են ՀՀ կենտրոնական բանկի կողմից հայտարարված ֆինանսական շուկայում ձևավորված փոխարժեքով` համաձայն ՀՀՄՍ 21-ի:

 

Ենթաբաժին 191
«Կանխավճարներ»

 

Ենթաբաժին 191-ում ընդգրկված հաշիվները նախատեսված են բյուջեի սոցիալական ապահովագրության գծով, ինչպես նաև այլ անձանց վճարած կանխավճարների հաշվառման համար:

Ենթաբաժին 191-ը ներառում է հետևյալ 1-ին կարգի հաշիվները` 1910 «Կանխավճարներ աշխատակիցներին և մատակարարներին», 1911 «Կանխավճարներ և գերավճարներ բյուջեի և պարտադիր սոցիալական ապահովագրության վճարումների գծով», 1911 «Ապագա ժամանակաշրջանի ծախսեր»:

 

1-ին կարգի հաշիվ 1910

«Կանխավճարներ աշխատակիցներին և մատակարարներին»

 

1-ին կարգի հաշիվ 1910-ում ընդգրկված 2-րդ կարգի հաշիվներն ակտիվային են` դեբետում արտացոլվում են աշխատակիցներին և մատակարարներին տրված կանխավճարների գումարները, իսկ կրեդիտում` նրանց դուրս գրումը:

 

19100 «Կանխավճարված աշխատավարձ» - հաշիվը նախատեսված է կազմակերպության աշխատակիցներին կանխավճարային կարգով վճարված աշխատավարձի հաշվառման համար:

Հաշիվը դեբետագրվում է կանխավճարը տալիս`

Դտ - 19100

Կտ - Դրամական միջոցներ

Հաշիվը կրեդիտագրվում է կանխավճարված աշխատավարձի գծով դեբիտորական պարտքը ծախսերով փակելիս`

Դտ - 71100, 71101

Կտ - 19100:

 

19101 «Կազմակերպության աշխատակիցներին տրված առհաշիվ գումարներ» - հաշիվը նախատեսված է կազմակերպության աշխատակիցներին առհաշիվ տրված այնպիսի գումարների հաշվառման համար, ինչպիսիք են` գործուղումների հետ կապված կանխավճարները, վճարներն ապրանքների և ծառայությունների ձեռքբերման համար և այլն:

Հաշիվը դեբետագրվում է առհաշիվ գումարներ տրամադրելիս`

Դտ - 19101

Կտ - Դրամական միջոցներ

 

Հաշիվը կրեդիտագրվում է առհաշիվ տրված գումարի օգտագործման վերաբերյալ հաշվետվություն ստանալիս: 19101 հաշվի գումարը դուրս է գրվում այն հաշիվների վրա, որոնց գծով օգտագործվել են այդ միջոցները`

Դտ - Ծախսեր, ակտիվային հաշիվներ և պասիվային հաշիվներ

Կտ - 19101:

 

19102 «Կանխավճարներ մատակարարներին» - հաշիվը նախատեսված է մատակարարներին ապրանքների և ծառայությունների համար տրված կանխավճարների հաշվառման համար: Ապրանքների ստացման կամ ծառայությունների մատուցման դեպքում կանխավճարներն այս հաշվից փոխանցվում են համապատասխան ակտիվի կամ ծախսի հաշիվ:

Հաշիվը դեբետագրվում է կանխավճար տալիս`

Դտ - 19102

Կտ - Դրամական միջոցներ

Հաշիվը կրեդիտագրվում է համապատասխան ապրանքները կամ ծառայությունները ստանալիս`

Դտ - Ծախսեր, ակտիվային հաշիվներ

Կտ - 19102:

 

1-ին կարգի հաշիվ 1911

«Կանխավճարներ և գերավճարներ բյուջեի և պարտադիր

սոցիալական ապահովագրության վճարումների գծով»

 

1-ին կարգի հաշիվ 1911-ում ընդգրկված հաշիվները նախատեսված են շահութահարկի, եկամտահարկի, ԱԱՀ-ի, պետական տուրքերի և պարտադիր սոցիալական ապահովագրության գծով վճարված կանխավճարների և գերավճարների հաշվառման համար:

 

19110 «Կանխավճարներ շահութահարկի գծով» - հաշիվը նախատեսված է շահութահարկի գծով բյուջեին վճարված կանխավճարների և գերավճարների հաշվառման համար:

Կանխավճար կամ գերավճար կատարելիս ձևակերպվում է`

Դտ - 19110

Կտ - Դրամական միջոցներ

Պարտավորության ժամկետը լրանալիս կանխավճարները դուրս են գրվում այս հաշվից` թղթակցելով պարտավորությունների համապատասխան հաշվի հետ`

Դտ - 39100

Կտ - 19110:

 

Ենթաբաժիններ 192-ի և 193-ի մնացած հաշիվների հաշվառումը տարվում է նույն սկզբունքով, ինչ որ հաշիվ 19102-ի դեպքում: Ենթաբաժին 194-ում ընդգրկված հաշիվները կոնտրակտիվային են և նախատեսված են վարկերի հնարավոր կորուստների համար ստեղծվող պահուստներին հատկացումների հաշվառման համար:

 

ԲԱԺԻՆ 20
«ՆԵՐԴՐՈՒՄՆԵՐ»

 

Բաժին 20-ը ներառում է հետևյալ ենթաբաժինները` 200 «Ասոցիացված և դուստր կազմակերպություններում ինքնարժեքի մեթոդով հաշվառվող ներդրումներ», 201 «Այլ անձանց կանոնադրական կապիտալներում ինքնարժեքով հաշվառվող ներդրումների հնարավոր կորուստների պահուստ», «202 «Ասոցիացված և դուստր կազմակերպություններում բաժնեմասնակցության մեթոդով հաշվառվող ներդրումներ», «203 Այլ անձանց կանոնադրական կապիտալներում բաժնեմասնակցության մեթոդով հաշվառվող ներդրումների հնարավոր կորուստների պահուստ»:

 

Ենթաբաժին 200
«Ասոցիացված և դուստր կազմակերպություններում ինքնարժեքի մեթոդով հաշվառվող ներդրումներ»

 

Ենթաբաժին 200-ում ներառված հաշիվները նախատեսված են կապակցված կազմակերպություններում ինքնարժեքի մեթոդով հաշվառվող ներդրումների հաշվառման համար:

 

1-ին կարգի հաշիվ 2000

«Ասոցիացված կազմակերպություններում ինքնարժեքի մեթոդով հաշվառվող

ներդրումներ»

 

20000 «Ասոցիացված բանկերում ինքնարժեքի մեթոդով հաշվառվող ներդրումներ»- հաշիվը նախատեսված է կազմակերպության կողմից բանկերի կանոնադրական կապիտալում նշանակալի ազդեցություն ձևավորող մասնակցությունների հաշվառման համար:

Ինքնարժեքի մեթոդի կիրառման դեպքում ներդրումը գրանցվում է ինքնարժեքով (ձեռքբերման արժեքով): Ֆինանսական արդյունքների մասին հաշվետվությունում ներդրումներից եկամուտներն արտացոլվում են միայն այն չափով, որքանով որ բանկը շահաբաժին է ստանում ներդրման օբյեկտի` ձեռքբերման ամսաթվից հետո կուտակված չբաշխված զուտ շահույթից:

Հաշիվը դեբետագրվում է կապակցված կազմակերպություններում ներդրում կատարելիս, ձեռքբերման արժեքով`

Դտ - 20000

Կտ - Դրամական միջոցներ

 

Եթե ներդրումը ձեռք է բերվել այլ ակտիվների կամ բանկի բաժնետոմսերի փոխանակման միջոցով`

 

Դտ - 20000

Կտ - Այլ ակտիվներ, 50 «Կանոնադրական հիմնադրամ»

Ասոցիացված կազմակերպություն հանդիսացող բանկի կողմից շահաբաժինները հայտարարելուց հետո դրանք գրանցվում են 19200 «Ասոցիացված բանկերում ինքնարժեքի մեթոդով հաշվառվող ներդրումներից ստացվելիք շահաբաժիններ» հաշիվներում:

Այս ներդրումների արժեզրկման հաշվառումը տարվում է ՀՀՄՍ 36 «Ակտիվների արժեզրկում» ստանդարտի համաձայն:

 

Ենթաբաժիններ 200-ի մնացած հաշիվների հաշվառումը տարվում է նույն սկզբունքով, ինչ որ հաշիվ 20000-ի դեպքում:

 

Ենթաբաժին 202
«Ասոցիացված և դուստր կազմակերպություններում բաժնեմասնակցության մեթոդով հաշվառվող ներդրումներ»

 

Ենթաբաժին 202-ում ներառված հաշիվները նախատեսված են կապակցված կազմակերպություններում բաժնեմասնակցության մեթոդով հաշվառվող ներդրումների հաշվառման համար:

 

1-ին կարգի հաշիվ 2020

«Ասոցիացված կազմակերպություններում բաժնեմասնակցության մեթոդով

հաշվառվող ներդրումներ»

 

20200 «Ասոցիացված բանկերում բաժնեմասնակցության մեթոդով հաշվառվող ներդրումներ» - հաշիվը նախատեսված է կազմակերպության կողմից բանկերի կանոնադրական կապիտալում նշանակալի ազդեցություն ձևավորող մասնակցությունների հաշվառման համար:

Բաժնեմասնակցության մեթոդի կիրառման դեպքում ներդրումը գրանցվում է ինքնարժեքով (ձեռքբերման արժեքով): Ֆինանսական արդյունքների մասին հաշվետվությունում ներդրումներից եկամուտներն արտացոլվում են ներդրման օբյեկտի սեփական կապիտալի փոփոխությանը համապատասխան` կապիտալի ավելացման դեպքում ներդրողի մոտ ներդրման ծավալի ավելացմանը զուգահեռ կարձանագրվի եկամուտ և հակառակը: Ներդրման օբյեկտի կողմից շահաբաժինների բաշխման վերաբերյալ որոշումը կհանգեցնի ներդրման ծավալի նվազմանը:

Հաշիվը դեբետագրվում է ներդրման օբյեկտում ներդրում կատարելիս, ձեռքբերման արժեքով`

Դտ - 20200

Կտ - Դրամական միջոցներ

Եթե ներդրումը ձեռք է բերվել այլ ակտիվների կամ բանկի բաժնետոմսերի փոխանակման միջոցով`

Դտ - 20200

Կտ - Այլ ակտիվներ, 50 «Կանոնադրական հիմնադրամ»

Ներդրման օբյեկտի արդյունավետ գործունեության արդյունքում նրա կապիտալի ավելացման դեպքում`

Դտ - 20200

Կտ - 6100

Ներդրման օբյեկտի գործունեության արդյունքում նրա կապիտալի նվազման դեպքում`

Դտ - 7140

Կտ - 20200

Ներդրման օբյեկտի կողմից շահաբաժիններ հայտարարելու դեպքում`

Դտ - 1923, 1924, 1925

Կտ - 20200

 

ԲԱԺԻՆ 21
«ՀԻՄՆԱԿԱՆ ՄԻՋՈՑՆԵՐ»

 

Բաժին 21-ը ներառում է հետևյալ ենթաբաժինները` 210 «Շահագործման մեջ գտնվող հիմնական միջոցներ», 211 «Շահագործումից դուրս գտնվող հիմնական միջոցներ»: Այս բաժնում ընդգրկված է հաշիվների հաշվառումը տարվում է ՀՀՄՍ 16 «Հիմնական միջոցներ» և ՀՀՄՍ 36 «Ակտիվների արժեզրկում» ստանդարտների համաձայն: Համաձայն ՀՀՄՍ 21-ի` արտարժույթով ձեռք բերված հիմնական միջոցները ձեռքբերման ամսաթվին գրանցվում են ՀՀ կենտրոնական բանկի կողմից հայտարարված ֆինանսական շուկայում ձևավորված տվյալ օրվա փոխարժեքով, իսկ հետագայում չեն ենթարկվում արտարժութային վերագնահատման:

 

Ենթաբաժին 210
«Շահագործման մեջ գտնվող հիմնական միջոցներ»

 

Ենթաբաժին 210-ում ընդգրկված հաշիվները նախատեսված են հիմնական միջոցների, նրանց մաշվածության և արժեզրկման հաշվառման համար:

Ենթաբաժին 210-ը ներառում է հետևյալ 1-ին կարգի հաշիվները` 2100 «Շահագործման մեջ գտնվող հիմնական միջոցներ», 2101 «Շահագործման մեջ գտնվող հիմնական միջոցների կուտակված մաշվածություն», 2102 «Շահագործման մեջ գտնվող հիմնական միջոցների արժեզրկում»:

 

1-ին կարգի հաշիվ 2100

«Շահագործման մեջ գտնվող հիմնական միջոցներ»

 

1-ին կարգի հաշիվ 2100-ում ընդգրկված հաշիվները նախատեսված են շահագործման մեջ գտնվող հիմնական միջոցների հաշվառման համար:

 

21000 «Հողամասեր» - հաշիվը նախատեսված է կազմակերպության պատկանող հողամասերի, այդ թվում` շինարարական նպատակներով, հաշվառման համար: Հողի արժեքը դուրս չի գրվում (ամորտիզացվում), որովհետև այս տեսակի ակտիվի ծառայության ժամկետը անսահմանափակ է:

Հաշիվը դեբետագրվում է հողամասի (հողի) ձեռքբերման դեպքում կամ վերագնահատման արդյունքում` հողի իրական և հաշվեկշռային արժեքների դրական տարբերության չափով:

Հաշիվը կրեդիտագրվում է հողամասի (հողի) օտարման դեպքում` հաշվեկշռային արժեքի չափով և հողի վերագնահատման արդյունքում` հողի իրական և հաշվեկշռային արժեքների բացասական տարբերության չափով:

 

21001 «Շենքեր, շինություններ» - հաշիվը նախատեսված է կազմակերպության շենքերում (տարածքում) կատարված ընդհանուր ներդրումների հաշվառման համար:

Հաշիվը դեբետագրվում է շենքի և շինությունների ձեռքբերման և կապիտալ ներդրումների կատարման դեպքում, ինչպես նաև շենքի և շինությունների վերագնահատման արդյունքում` շենքի և շինությունների իրական հաշվեկշռային արժեքների դրական տարբերության չափով:

Հաշիվը կրեդիտագրվում է շենքի և շինությունների օտարման և դուրսգրման դեպքում: Հաշիվը կրեդիտագրվում է նաև շենքի և շինությունների վերագնահատման արդյունքում` դրանց իրական հաշվեկշռային արժեքների բացասական տարբերության չափով:

 

21002 «Գույք և գրասենյակային սարքավորումներ» - հաշիվը նախատեսված է կազմակերպության գործունեության համար օգտագործվող գույքի և գրասենյակային սարքավորումների (օրինակ` սեղան, աթոռ, պահարան, բազկաթոռ, դարակաշար, չհրկիզվող պահարան և այլն) համար կատարված ներդրումների հաշվառման համար:

Հաշվի հաշվառումն իրականացվում է նույն սկզբունքով, ինչ որ հաշիվ 21001-ի դեպքում:

 

21003 «Համակարգչային և այլ տեխնիկա» - հաշիվը նախատեսված է կազմակերպության գործունեության համար օգտագործվող համակարգիչների և հաղորդակցման սարքավորումների համար կատարված ներդրումների հաշվառման համար:

Հաշվի հաշվառումն իրականացվում է նույն սկզբունքով, ինչ որ հաշիվ 21001-ի դեպքում:

 

21004 «Փոխադրամիջոցներ» - հաշիվը նախատեսված է կազմակերպության գործունեության համար օգտագործվող փոխադրամիջոցների համար կատարված ներդրումների հաշվառման համար:

Հաշվի հաշվառումն իրականացվում է նույն սկզբունքով, ինչ որ հաշիվ 21001-ի դեպքում:

 

21005 «Այլ հիմնական միջոցներ» - հաշիվը նախատեսված է կազմակերպության գործունեության համար օգտագործվող այն հիմնական միջոցների համար կատարված ներդրումներ ի հաշվառման համար, որոնց համար առանձին հաշիվներ նախատեսված չեն:

Հաշվի հաշվառումն իրականացվում է նույն սկզբունքով, ինչ որ հաշիվ 21001-ի դեպքում:

 

21006 «Ֆինանսական վարձակալությամբ ստացված հիմնական միջոցներ» - հաշիվը նախատեսված է կազմակերպության կողմից ֆինանսական վարձակալության վերցված հիմնական միջոցները: Հաշվի հաշվառումն իրականացվում է համաձայն ՀՀՄՍ 17-ի:

Հաշիվը դեբետագրվում է հիմնական միջոցների վարձակալության վերցման դեպքում`

Դտ - 21006

Կտ - ենթաբաժին 380-ի համապատասխան հաշիվ:

Հաշիվը դեբետագրվում է նաև վարձակալության վերցված հիմնական միջոցների վերագնահատման, նաև դրանցում կապիտալ ներդրումների կատարման դեպքում:

Վարձակալության վերցված հիմնական միջոցների գնման դեպքում հաշիվը կրեդիտագրվում է`

Դտ - Հիմնական միջոցներ

Կտ - 21006:

 

1-ին կարգի հաշիվ 2101

«Շահագործման մեջ գտնվող հիմնական միջոցների կուտակված

մաշվածություն»

 

1-ին կարգի հաշիվ 2101-ում ընդգրկված հաշիվները նախատեսված են շահագործման մեջ գտնվող հիմնական միջոցների մաշվածության հաշվառման համար: Հիմնական միջոցների մաշվածությունը իրականացվում է դրանց օգտակար ծառայության ընթացքում` բանկի կողմից ընտրված մեթոդով: Հաշիվների կրեդիտում գրանցվում են հիմնական միջոցների մաշվածության ծախսերի կուտակումները:

 

21010 «Շենքերի և շինությունների կուտակված մաշվածություն» - հաշիվը նախատեսված է կազմակերպության շենքերի կուտակված մաշվածության հաշվառման համար:

Դտ - 71130

Կտ - 21010

 

Մնացած հաշիվների հաշվառումը իրականացվում է նույն սկզբունքով, ինչ որ 21001-ի դեպքում:

 

1-ին կարգի հաշիվ 2102

«Շահագործման մեջ գտնվող հիմնական միջոցների արժեզրկում»

 

1-ին կարգի հաշիվ 2102-ում ընդգրկված հաշիվները նախատեսված են շահագործման մեջ գտնվող հիմնական միջոցների արժեզրկման հաշվառման համար:

 

21020 «Հողամասերի կուտակված արժեզրկում» - հաշիվը նախատեսված է կազմակերպությանը պատկանող հողամասերի կուտակված արժեզրկման հաշվառման համար:

Հաշիվները կրեդիտագրվում են հիմնական միջոցի արժեզրկման դեպքում`

Դտ - 72200

Կտ - 21020

բաժնի համապատասխան հաշիվները:

Հաշիվը դեբետագրվում է`

ա) արժեզրկման հակադարձման դեպքում`

Դտ - 21020

Կտ - 66200 կարգի համապատասխան հաշիվը,

բ) ակտիվների լրիվ արժեզրկման ժամանակ`

Դտ - 21020

Կտ - Ակտիվների համապատասխան հաշիվներ

 

Ենթաբաժին 211
«Շահագործումից դուրս գտնվող հիմնական միջոցներ»

 

Ենթաբաժին 211-ում ընդգրկված հաշիվները նախատեսված են շահագործումից դուրս գտնվող հիմնական միջոցների, նրանց մաշվածության և արժեզրկման հաշվառման համար:

Ենթաբաժին 211-ը ներառում է հետևյալ 1-ին կարգի հաշիվները` 2110 «Շահագործումից դուրս գտնվող հիմնական միջոցներ», 2111 «Շահագործումից դուրս գտնվող հիմնական միջոցների կուտակված մաշվածություն», 2112 «Շահագործումից դուրս գտնվող հիմնական միջոցների արժեզրկում»: Ենթաբաժնում ընդգրկված հաշիվների հաշվառումը իրականացվում է նույն սկզբունքով, ինչ որ ենթաբաժին 210-ում ընդգրկված հաշիվների դեպքում:

 

ԲԱԺԻՆ 22
«ՈՉ ՆՅՈՒԹԱԿԱՆ ԱԿՏԻՎՆԵՐ»

 

Բաժին 22-ը ներառում է հետևյալ ենթաբաժինները` 220 «Շահագործման մեջ գտնվող որոշակի ծառայության ժամկետով ոչ նյութական ակտիվներ», 221 «Շահագործումից դուրս գտնվող որոշակի ծառայության ժամկետով ոչ նյութական ակտիվներ», 222 «Շահագործման մեջ գտնվող անորոշ ծառայության ժամկետով ոչ նյութական ակտիվներ», 223 «Շահագործումից դուրս գտնվող անորոշ ծառայության ժամկետով ոչ նյութական ակտիվներ», «224 «Գուդվիլ»: Ոչ նյութական ակտիվների և դրանց ամորտիզացիայի ու արժեզրկման հաշվառումը տարվում է ՀՀՄՍ 38 «Ոչ նյութական ակտիվներ» և ՀՀՄՍ 36 «Ակտիվների արժեզրկում» համաձայն: Համաձայն ՀՀՄՍ 21-ի` արտարժույթով ձեռք բերված հիմնական միջոցները ձեռքբերման ամսաթվին գրանցվում են ՀՀ կենտրոնական բանկի կողմից հայտարարված ֆինանսական շուկայում ձևավորված տվյալ օրվա փոխարժեքով, իսկ հետագայում չեն ենթարկվում արտարժութային վերագնահատման:

Բաժին 22-ում ընդգրկված հաշիվները հաշվառվում են նույն սկզբունքով, ինչ որ բաժին 21-ում ընդգրկված հաշիվների դեպքում:

 

224 «Գուդվիլ»

 

Ենթաբաժին 224-ում ներառված հաշիվը նախատեսված է գուդվիլի հաշվառման համար, որը հանդիսանում է կազմակերպությանը մեկ այլ կազմակերպության միացման գործընթացի արդյունքում առաջացող ներդրման գումարի և միացվող կազմակերպության զուտ ակտիվների հաշվեկշռային արժեքի դրական տարբերությունը: Գուդվիլի ճանաչման համար կազմակերպությանը անհրաժեշտ է առանձնացնել դրամաստեղծ միավորը: Գուդվիլը ենթակա է արժեզրկման դրամաստեղծ միավորի արժեզրկման փորձաքննության արդյունքում:

 

ԲԱԺԻՆ 23
«ՎԱՃԱՌՔԻ ՀԱՄԱՐ ՊԱՀՎՈՂ ՈՉ ԸՆԹԱՑԻԿ ԱԿՏԻՎՆԵՐ»

 

Բաժին 23-ը ներառվող հաշիվների հաշվառումը իրականացվում է համաձայն ՖՀՄՍ 5 «Վաճառքի համար պահվող ոչ ընթացիկ ակտիվներ»: Համաձայն ՀՀՄՍ 21-ի` արտարժույթով ձեռք բերված հիմնական միջոցները ձեռքբերման ամսաթվին գրանցվում են ՀՀ կենտրոնական բանկի կողմից հայտարարված ֆինանսական շուկայում ձևավորված տվյալ օրվա փոխարժեքով, իսկ հետագայում չեն ենթարկվում արտարժութային վերագնահատման:

 

--------------------------------------------------------

ԻՐՏԵԿ - շարունակությունը հաջորդ մասերում

 

 

pin
Կենտրոնական բանկի խորհուրդ
30.11.2011
N 322-Ն
Որոշում