Սեղմել Esc փակելու համար:
ՇՐՋԱՆԱԿԱՅԻՆ ՀԱՄԱՁԱՅՆԱԳԻՐ ՀՀ ԿԱՌԱՎԱՐՈՒ...
Քարտային տվյալներ

Տեսակ
Գործում է
Ընդունող մարմին
Ընդունման ամսաթիվ
Համար

ՈՒժի մեջ մտնելու ամսաթիվ
ՈՒժը կորցնելու ամսաթիվ
Ընդունման վայր
Սկզբնաղբյուր

Ժամանակագրական տարբերակ Փոփոխություն կատարող ակտ

Որոնում:
Բովանդակություն

Հղում իրավական ակտի ընտրված դրույթին X
irtek_logo

ՇՐՋԱՆԱԿԱՅԻՆ ՀԱՄԱՁԱՅՆԱԳԻՐ ՀՀ ԿԱՌԱՎԱՐՈՒԹՅԱՆ ԵՎ ԱՄԵՐԻԿԱՅԻ ՄԻԱՑՅԱԼ ՆԱՀԱՆԳՆԵՐԻ ԿԱՌԱՎԱ ...

 

 

i

ՇՐՋԱՆԱԿԱՅԻՆ ՀԱՄԱՁԱՅՆԱԳԻՐ
 ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԱՄԵՐԻԿԱՅԻ ՄԻԱՑՅԱԼ ՆԱՀԱՆԳՆԵՐԻ ԿԱՌԱՎԱՐՈՒԹՅԱՆ ՄԻՋԵՎ ԱՌԵՎՏՐԻ ԵՎ ՆԵՐԴՐՈՒՄՆԵՐԻ ՄԱՍԻՆ

 

Հայաստանի Հանրապետության Կառավարությունը և Ամերիկայի Միացյալ Նահանգների Կառավարությունը (առանձին` Կողմ, միասին` Կողմեր),

ցանկանալով խորացնել բարեկամական կապերը և համագործակցության ոգին, ընդլայնել առևտուրը և ամրացնել Կողմերի միջև տնտեսական հարաբերությունները,

գիտակցելով միջազգային առևտրի և ներդրումների համար բաց և կանխատեսելի միջավայրի խրախուսման կարևորությունը,

գիտակցելով օգուտները, որ Կողմերը կարող են ձեռք բերել ընդլայնվող միջազգային առևտրից և ներդրումներից, և որ առևտուրը խաթարող ներդրումային միջոցներն ու հովանավորչական առևտրային արգելքները կարող են նվազեցնել այդ օգուտները,

ձգտելով խթանել թափանցիկությունը և վերացնել կաշառակերությունն ու կոռուպցիան միջազգային առևտրում և ներդրումներում,

գիտակցելով ինչպես ներքին, այնպես էլ օտարերկրյա մասնավոր ներդրումների էական դերը` աճի ապահովման, աշխատատեղերի ստեղծման, առևտրի ընդլայնման, տեխնոլոգիաների բարելավման և տնտեսական զարգացման ընդլայնման գործում,

գիտակցելով իրենց տնտեսությունների միջև ծառայությունների առևտրի աճող կարևորությունը,

հաշվի առնելով Կողմերի միջև ընդլայնված առևտրի դյուրացման նպատակով ոչ սակագնային առևտրային արգելքների նվազեցման ցանկալիությունը,

գիտակցելով մտավոր սեփականության իրավունքներին համապատասխան և արդյունավետ պաշտպանության ու կիրառման, ինչպես նաև մտավոր սեփականության իրավունքների կոնվենցիաներին անդամակցելու և հավատարիմ մնալու կարևորությունը,

գիտակցելով ԱՄԿ` «Աշխատանքի ոլորտում հիմնարար սկզբունքների և իրավունքների հռչակագրում և դրա իրականացման մեխանիզմում» (1998) թվարկված հիմնարար աշխատանքային իրավունքները յուրաքանչյուր Կողմի օրենքներում և գործելակերպում հարգելու, խթանելու և իրականացնելու, ինչպես նաև ապահովելով Կողմերի համապատասխան աշխատանքային օրենքների արդյունավետ կիրարկումը,

գիտակցելով Կողմերի բնապահպանական օրենքներին համապատասխան, շրջակա միջավայրի պաշտպանության և պահպանման, ինչպես նաև Կողմերի բնապահպանական օրենքների արդյունավետ կիրառման ապահովման կարևորությունը, և ցանկանալով ապահովել, որ առևտրատնտեսական և շրջակա միջավայրի պաշտպանության քաղաքականությունները երկուստեք աջակցեն համագործակցության հետագա զարգացմանը,

գիտակցելով, որ տեղական և գլոբալ տնտեսության մեջ կանանց, ներառյալ աշխատող կանանց, ձեռնարկատերերի և ձեռնարկությունների սեփականատերերի մասնակցության հնարավորությունների ընդլայնումը նպաստում է տնտեսական զարգացմանը, ինչպես նաև` ներքին և գլոբալ տնտեսության մեջ մասնակցության հարցում գենդերով պայմանավորված արգելքների բացառման կարևորությունը,

ցանկանալով միմյանց տարածքներում խրախուսել և դյուրացնել կապերը ձեռնարկությունների և մասնավոր հատվածի այլ խմբերի միջև,

գիտակցելով նրանց միջև առևտրային և ներդրումային խնդիրների հնարավորինս արագ լուծման ցանկալիությունը,

ցանկանալով ամրապնդել բազմակողմ առևտրային համակարգը` Առևտրի Համաշխարհային կազմակերպության (ԱՀԿ) շրջանակներում հետագա երկուստեք և փոխշահավետ համաձայնությունների կողմ դառնալով,

նկատի առնելով, որ Կողմերը ԱՀԿ-ի անդամ են, և հաստատելով, որ սույն Համաձայնագիրը չի վնասում Կողմերի` ԱՀԿ-ին առնչվող կամ դրա շրջանակներում կնքված համաձայնագրերով, համաձայնություններով և այլ փաստաթղթերով ստանձնած իրավունքներին և պարտականություններին,

i

նկատի ունենալով «Ամերիկայի Միացյալ Նահանգների և Հայաստանի Հանրապետության միջև Ներդրումների խրախուսման և փոխադարձ պաշտպանության մասին» պայմանագիրը, Կողմերի միջև ստորագրված 1992թ. սեպտեմբերի 23-ին, և հաստատելով, որ սույն Համաձայնագիրը չի վնասում Պայմանագրով ստանձնած` Կողմերի իրավունքներին և պարտականություններին,

ձգտելով համագործակցության խորացման և ավելի համապարփակ համաձայնագրերի միջոցով ստեղծել առևտրատնտեսական նախաձեռնությունների ընդլայնման հետագա երկխոսության մի մեխանիզմ,

համաձայնեցին հետևյալի մասին.

 

Հոդված 1

 

Կողմերը հաստատում են իրենց ցանկությունը` Կողմերի միջև խթանել գրավիչ ներդրումային միջավայրը և ընդլայնել ու բազմազան դարձնել ապրանքների ու ծառայությունների առևտուրը:

 

Հոդված 2

 

1. Կողմերը սույնով հիմնում են Միացյալ Նահանգներ-Հայաստան` Առևտրի և ներդրումների խորհուրդ (Խորհուրդ)` կազմված յուրաքանչյուր Կողմի ներկայացուցիչներից: Հայաստանի կողմից պետք է նախագահի Էկոնոմիկայի նախարարությունը, իսկ Միացյալ Նահանգների կողմից պետք է նախագահի` ԱՄՆ Առևտրի ներկայացուցչի գրասենյակը («ԱՄՆԱՆ»): Կողմերին, ըստ անհրաժեշտության, կարող են աջակցել իրենց կառավարությունների ներկայացուցիչները:

2. Խորհուրդը պետք է հանդիպի Կողմերի միջև համաձայնեցված ժամկետներում, վայրերում և միջոցներով: Կողմերը պետք է ձգտեն հանդիպել ոչ պակաս, քան տարին մեկ անգամ:

 

Հոդված 3

 

Խորհուրդը պետք է`

1. վերահսկի Կողմերի միջև առևտրային և ներդրումային հարաբերությունները, պետք է բացահայտի առևտրի և ներդրումների ընդլայնման հնարավորությունները, պետք է բացահայտի համապատասխան հարցերը, ինչպիսիք են օրենքի գերակայության ապահովումն ու թափանցիկ և կոռուպցիայից զերծ հանրային հաստատությունների խթանումը, մտավոր սեփականության իրավունքների պաշտպանությունը, աշխատողների իրավունքները, ինչպես նաև շրջակա միջավայրը` որոնց շուրջ նպատակահարմար է բանակցել համապատասխան ֆորումում.

2. քննության առնի Կողմերի համար հետաքրքրություն ներկայացնող` առևտրային և ներդրումային կոնկրետ խնդիրներ.

3. բացահայտի և աշխատի վերացնել Կողմերի միջև առևտրի և ներդրումների խոչընդոտները, և

4. անհրաժեշտության դեպքում, Խորհրդի աշխատանքներին վերաբերող հարցերով, խորհրդատվության կարգով դիմի մասնավոր հատվածին և քաղաքացիական հասարակությանը:

 

Հոդված 4

 

Կողմերից մեկը կարող է դիմել Խորհրդին առևտրին կամ ներդրումներին առնչվող կոնկրետ խնդրով` մյուս Կողմին խնդրի նկարագրությամբ գրավոր հարցում կատարելով: Խորհուրդը, հարցումը ստանալուց հետո անհապաղ պետք է այն քննարկի, եթե հարցում ներկայացնող Կողմը չհամաձայնի հետաձգել հարցման քննարկումը: Կողմերից յուրաքանչյուրը պետք է ջանա Խորհրդին հնարավորություն տալ քննության առնել ցանկացած խնդիր` նախքան որոշումներ կայացնելը, որոնք կարող են անբարենպաստ ազդեցություն ունենալ մյուս Կողմի առևտրական կամ ներդրումային շահերի վրա:

 

Հոդված 5

 

Սույն Համաձայնագիրը չի վնասում երկու Կողմերի օրենսդրությամբ կամ որևէ այլ համաձայնագրով Կողմերի ստանձնած իրավունքները և պարտականությունները:

 

Հոդված 6

 

Կողմերը փոխադարձ համաձայնությամբ կարող են գրավոր փոփոխել և լրացնել սույն Համաձայնագիրը: Ցանկացած այդպիսի փոփոխություն ուժի մեջ կմտնի այն օրվանից, երբ Կողմերը միմյանց կծանուցեն, որ իրենք ավարտել են պայմանագրի ուժի մեջ մտնելու համար անհրաժեշտ ցանկացած ներքին ընթացակարգերը: Եթե Կողմերը միմյանց այդպիսի ծանուցում են ներկայացնում տարբեր օրերի, ապա փոփոխությունը ուժի մեջ կմտնի վերջին ծանուցման ստացման օրը:

 

Հոդված 7

 

Սույն Համաձայնագիրն ուժի մեջ կմտնի այն օրվանից, երբ Կողմերը միմյանց կծանուցեն, որ իրենք ավարտել են սույն Համաձայնագրի ուժի մեջ մտնելու համար բոլոր անհրաժեշտ ներքին ընթացակարգերը: Եթե Կողմերը միմյանց այդպիսի ծանուցում են ներկայացնում տարբեր օրերի, ապա Համաձայնագիրն ուժի մեջ կմտնի վերջին ծանուցման ստացման օրը:

 

Հոդված 8

 

Ցանկացած Կողմ կարող է դադարեցնել սույն Համաձայնագիրը` դադարեցնելու մասին գրավոր ծանուցում ներկայացնելով մյուս Կողմին: Սույն Համաձայնագիրը դադարեցվում է Կողմերի միջև համաձայնեցված օրը կամ, եթե Կողմերը չեն կարող համաձայնվել` գրավոր ծանուցումից 180 օր հետո:

 

Ի ՎԿԱՅՈՒՄՆ ՎԵՐԸ ՆՇՎԱԾԻ` ներքոստորագրյալները, լինելով պատշաճ կերպով լիազորված, ստորագրեցին սույն Համաձայնագիրը:

ԿԱՏԱՐՎԱԾ Է անգլերեն լեզվով, բնագիր տեքստի երկու օրինակով` Վաշինգտոն քաղաքում, Կ. Շ., 2015թ. մայիսի 7-ին: Համաձայնագրի հայերեն լեզվով տարբերակը կպատրաստվի և կհամարվի Համաձայնագրին հավասարազոր բնագիր տեքստ` Կողմերի միջև Համաձայնագրի անգլերեն լեզվով ստորագրված տեքստին հայերեն լեզվով տարբերակի համապատասխանությունը հաստատող նամակների փոխանակմամբ:

 

Համաձայնագիրն ուժի մեջ է մտել 2015թ. նոյեմբերի 13-ին

 

pin
ՀՀ կառավարություն
07.05.2015
Համաձայնագիր