ԸՍՏ ԳԵՏԱՎԱԶԱՆՆԵՐԻ ՀՀ ՋՐԱՅԻՆ ՀԱՇՎԵԿՇՌԻ ՈՐՈՇՄԱՆ ՄԵԹՈԴԻՆ ՀԱՎԱՆՈՒԹՅՈՒՆ ՏԱԼՈՒ ՄԱՍԻՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՆԻՍՏԻ
ԱՐՁԱՆԱԳՐՈՒԹՅՈՒՆԻՑ ՔԱՂՎԱԾՔ

16 նոյեմբերի 2017 թվականի N 48

11. ԸՍՏ ԳԵՏԱՎԱԶԱՆՆԵՐԻ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՋՐԱՅԻՆ ՀԱՇՎԵԿՇՌԻ ՈՐՈՇՄԱՆ ՄԵԹՈԴԻՆ ՀԱՎԱՆՈՒԹՅՈՒՆ ՏԱԼՈՒ ՄԱՍԻՆ

Հավանություն տալ ըստ գետավազանների Հայաստանի Հանրապետության ջրային հաշվեկշռի որոշման մեթոդին` համաձայն հավելվածի:

ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ 2017 ԹՎԱԿԱՆԻ ԴԵԿՏԵՄԲԵՐԻ 15-ԻՆ

Հավելված

ՀՀ կառավարության

2017 թ. նոյեմբերի 16-ի նիստի

N 48 արձանագրային որոշման

ԸՍՏ ԳԵՏԱՎԱԶԱՆՆԵՐԻ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՋՐԱՅԻՆ ՀԱՇՎԵԿՇՌԻ ՈՐՈՇՄԱՆ ՄԵԹՈԴԸ

1. Յուրաքանչյուր գետավազանի ջրային հաշվեկշիռը ցույց է տալիս գետավազան ջրի մուտքի և ելքի հարաբերակցությունը և դրանցով պայմանավորված ջրի պաշարի փոփոխությունը:

2. Գետավազանի ջրային հաշվեկշռի մուտքի հիմնական տարրերն են մթնոլորտային տեղումները, այլ ավազանից ներհոսքը և ստորերկրյա հոսքը, իսկ ելքի տարրերը` գոլորշիացումը և արտահոսքն ավազանից:

3. Ջրային հաշվեկշռի բոլոր տարրերը որոշվում են չափման կամ գնահատման որոշակի անճշտություններով, հետևաբար ջրային հաշվեկշռի հավասարումը պետք է ներառի նաև անկապքի գործակից (բ):

4. Յուրաքանչյուր գետավազանի համար յուրաքանչյուր ժամանակահատվածում ջրային հաշվեկշռի հավասարումը ունի հետևյալ տեսքը`

P+Qսհ-E-Qմա-Qսա-/\S-բ=0

որտեղ.

P - ջրհավաք ավազանում տեղացող մթնոլորտային տեղումներն են,

Qսհ - գետավազանում ստորերկրյա ջրերի հոսքն է,

E - գոլորշիացումն է ավազանի մակերևույթից,

Qմա և Qսա - գետավազանից մակերևութային և ստորերկրյա ջրերի արտահոսքն է,

/\S - ջրի ծավալի փոփոխությունն է (որը կախված մուտքի և ելքի բաղադրիչների հարաբերակցությունից կարող է լինել դրական և բացասական),

բ - անկապքի գործակիցն է:

5. Ջրային հաշվեկշռի հաշվարկման համար պետք է 30 և ավելի տարիների տեղումների դիտարկման տվյալների շարքեր, իսկ եթե տվյալ գետավազանում տվյալները բավարար չեն կամ բացակայում են, անհրաժեշտ է դրանք վերականգնել կամ երկարացնել կոռելյացիայի մեթոդով` օգտագործելով համարժեք օդերևութաբանական կայանների դիտարկման տվյալները:

6. Գետային հոսքը հաշվարկվում է բազմամյա մշտադիտարկումների տվյալների հիման վրա, ինչպես նաև հաշվի է առնվում գետավազանի ֆիզիկաաշխարհագրական առանձնահատկություններն, որն ազդում է հոսքի ձևավորման վրա:

7. Գոլորշիացումը մակերևութային ջրային ռեսուրսներից հաշվարկվում է ըստ գոլորշաչափի տվյալների, իսկ դրանց բացակայության դեպքում օգտագործվում են ջրային և ջերմային հաշվեկշռի, աերոդինամիկ կամ էմպիրիկ մեթոդները:

8. Ջրային հաշվեկշռի տարրերի հաշվարկման միավորն է մմ կամ մ3: