(ուժը կորցրել է 05.06.08 թիվ 853-Ն որոշում)
i
040.0556.130900
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«13» սեպտեմբերի 2000 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
13 սեպտեմբերի 2000 թվականի N 556
i
ԳՆՈՒՄՆԵՐԻ ՄԱՍԻՆ ՏԵՂԵԿՈՒԹՅՈՒՆՆԵՐԻ ՀՐԱՊԱՐԱԿՄԱՆ ԵՎ ԳՆՈՒՄՆԵՐԻ ԲՆՈՒԹԱԳՐԵՐԻ ՀԱՍՏԱՏՄԱՆ ՈՒ ՆԱԽՆԱԿԱՆ ՀՍԿՈՂՈՒԹՅԱՆ ԿԱՐԳԵՐԸ ՀԱՍՏԱՏԵԼՈՒ ՄԱՍԻՆ
«Գնումների մասին» Հայաստանի Հանրապետության օրենքի 5 հոդվածին համապատասխան` Հայաստանի Հանրապետության կառավարությունը որոշում է.
1. Հաստատել`
ա) գնումների մասին տեղեկությունների հրապարակման կարգը (կցվում է).
բ) (1-ին կետի բ ենթակետն ուժը կորցրել է 27.12.01 թիվ 1267 որոշում)
i
2. Սույն որոշումն ուժի մեջ է մտնում 2000 թվականի սեպտեմբերի 13-ից:
Հաստատված է
ՀՀ կառավարության 2000 թ.
սեպտեմբերի 13-ի N 556 որոշմամբ
ԿԱՐԳ
i
ԳՆՈՒՄՆԵՐԻ ՄԱՍԻՆ ՏԵՂԵԿՈՒԹՅՈՒՆՆԵՐԻ ՀՐԱՊԱՐԱԿՄԱՆ
I. ԸՆԴՀԱՆՈՒՐ ԴՐՈՒՅԹՆԵՐ
1. Սույն կարգը «Գնումների մասին» Հայաստանի Հանրապետության օրենքի (այսուհետև` օրենք) 10 հոդվածի 4-րդ կետին համապատասխան սահմանում է գնումների մասին տեղեկատվության հրապարակման կարգը:
2. Օրենքով սահմանված հասկացությունները սույն կարգում գործածվում են նույն իմաստով:
3. Սույն կարգի նպատակն է`
ա) գնումների հրապարակայնության և գնումների մասին տեղեկատվության մատչելիության ապահովումը.
բ) գնումների պաշտոնական տեղեկագրի հրատարակման հետ կապված հիմնական հարաբերությունների կարգավորումը:
II. ԳՆՈՒՄՆԵՐԻ ՄԱՍԻՆ ՏԵՂԵԿԱՏՎՈՒԹՅԱՆ ՀՐԱՊԱՐԱԿՈՒՄԸ
4. Հայաստանի Հանրապետության նախարարությունների, գերատեսչությունների, պետական կառավարման տարածքային և տեղական ինքնակառավարման մարմինների (այսուհետև` կառավարման մարմիններ), ինչպես նաև դրանց ենթակա հիմնարկների տրամադրության տակ գտնվող` գնումների մասին տեղեկատվությունը, բացառությամբ պետական գաղտնիք կազմող տեղեկատվության, սույն կարգի 5-րդ կետի համաձայն տրամադրվում է ցանկացած անձի` վերջինիս կողմից մնան պահանջ ներկայացվելուց հետո երեք աշխատանքային օրվա ընթացքում:
5. Կառավարման մարմիններից և դրանց ենթակա հիմնարկներից գնումների մասին տեղեկատվություն ստանալու պահանջը վերջիններիս պետք է ներկայացվի գրավոր: Նման պահանջի պատասխանը տրվում է գրավոր, որն ստորագրում է կառավարման մարմնի կամ դրա ենթակա հիմնարկի ղեկավարը կամ նրա կողմից լիազորված անձը: Ընդ որում, տեղեկատվությունը տրամադրվում է կառավարման մարմնի կամ դրա ենթակա հիմնարկի տրամադրության տակ գտնվող ձևով` առանց ձևափոխման կամ վերամշակման:
III. ՊԱՇՏՈՆԱԿԱՆ ՏԵՂԵԿԱԳՐԻ ՀՐԱՏԱՐԱԿՈՒՄԸ
6. Պաշտոնական տեղեկագիրը հրատարակում է լիազոր մարմինը` այդ նպատակով Հայաստանի Հանրապետության պետական բյուջեով նախատեսված հատկացումների հաշվին: Ընդ որում, պաշտոնական տեղեկագրի հրատարակման նպատակով օրենքով սահմանված կարգով կնքվում է պայմանագիր:
i
7. Պաշտոնական տեղեկագրում հրապարակվում են օրենքով սահմանված տեղեկությունները, գնումների մասին իրավական ակտերը, ինչպես նաև այլ տեղեկություններ` լիազոր մարմնի հայեցողությամբ:
(7-րդ կետը փոփ. 05.05.01 թիվ 386 որոշում)
i
8. Լիազոր մարմնի կողմից ընդունված և Հայաստանի Հանրապետության օրենսդրությամբ սահմանված կարգով`
ա) պետական գրանցման ենթակա գնումների մասին այլ իրավական ակտերը հրապարակվում են պաշտոնական տեղեկագրում, այդ ակտերի պետական գրանցումը կատարված լինելու մասին Հայաստանի Հանրապետության արդարադատության նախարարության գրավոր ծանուցումը Հայաստանի Հանրապետության ֆինանսների և էկոնոմիկայի նախարարություն մուտքագրման օրվանից հետո հրատարակվող պաշտոնական տեղեկագրի հերթական համարում.
բ) նորմատիվ բնույթ չունեցող գնումների մասին այլ իրավական ակտերը հրապարակվում են պաշտոնական տեղեկագրում, այդ ակտերի հաստատման օրվանից հետո հրատարակվող պաշտոնական տեղեկագրի հերթական համարում: Սույն ենթակետում նշված իրավական ակտերն ուժի մեջ են մտնում պաշտոնական տեղեկագրում հրապարակման օրվան հաջորդող երրորդ աշխատանքային օրը, եթե տվյալ իրավական ակտով ավելի ուշ ժամկետ սահմանված չէ:
(8-րդ կետը լրաց. 05.05.01 թիվ 386 որոշում)
9. Սույն կարգի 8-րդ կետում չնշված գնումների մասին այլ իրավական ակտերը, ինչպես նաև գնումներին վերաբերող Հայաստանի Հանրապետության օրենքները, Հայաստանի Հանրապետության Ազգային ժողովի որոշումները, Հայաստանի Հանրապետության Նախագահի հրամանագրերը, Հայաստանի Հանրապետության կառավարության և Հայաստանի Հանրապետության վարչապետի որոշումները հրապարակվում են պաշտոնական տեղեկագրում, դրանց` Հայաստանի Հանրապետության ֆինանսների և էկոնոմիկայի նախարարություն մուտքագրման օրվանից հետո հրատարակվող պաշտոնական տեղեկագրի հերթական համարում:
(9-րդ կետը լրաց. 05.05.01 թիվ 386 որոշում)
10. Սույն կարգի 8-րդ կետի «ա» ենթակետում և 9-րդ կետում նշված ակտերն ուժի մեջ են մտնում Հայաստանի Հանրապետության օրենսդրությամբ սահմանված կարգով:
(10-րդ կետը լրաց. 05.05.01 թիվ 386 որոշում)
Հաստատված է
ՀՀ կառավարության 2000 թ.
սեպտեմբերի 13-ի N 556 որոշմամբ
ԿԱՐԳ
i
ԳՆՈՒՄՆԵՐԻ ԲՆՈՒԹԱԳՐԵՐԻ ՀԱՍՏԱՏՄԱՆ ԵՎ ՆԱԽՆԱԿԱՆ ՀՍԿՈՂՈՒԹՅԱՆ
(կարգն ուժը կորցրել է 27.12.01 թիվ 1267 որոշում)
I. ԸՆԴՀԱՆՈՒՐ ԴՐՈՒՅԹՆԵՐ
1. Սույն կարգը «Գնումների մասին» Հայաստանի Հանրապետության օրենքի (այսուհետև` օրենք) 5 և 14 հոդվածներին համապատասխան սահմանում է գնումների բնութագրերի հաստատման և նախնական հսկողության կարգը:
2. Օրենքով սահմանված հասկացությունները սույն կարգում գործածվում են նույն իմաստով:
3. Սույն կարգի նպատակն է ապահովել`
ա) գնումների տեխնիկական բնութագրերի, ապրանքների ձեռքբերման, աշխատանքների կատարման և ծառայությունների մատուցման ու դրանց դիմաց վճարումների իրականացման ժամանակացույցերի հաստատումը` օրենքին և այլ իրավական ակտերին համապատասխան.
բ) գնումների տեխնիկական բնութագրերի, ապրանքների ձեռքբերման, աշխատանքների կատարման և ծռայությունների մատուցման ու դրանց դիմաց վճարումների կատարման համապատասխանությունը` սույն կետի «ա» ենթակետի համաձայն:
II. ԳՆՈՒՄՆԵՐԻ ԲՆՈՒԹԱԳՐԵՐԻ ՀԱՍՏԱՏՈՒՄԸ
4. Գնումների բնութագրերը հաստատում և գնումների նախնական հսկողությունն իրականացնում է պատվիրատուի ղեկավարը կամ նրա կողմից լիազորված անձը պատվիրատուի համապատասխան ստորաբաժանման կամ ստորաբաժանումների (այսուհետև` պատասխանատու ստորաբաժանում), իսկ սույն կարգով նախատեսված դեպքերում` տեխնիկական հսկողության հանձնաժողովի (այսուհետև` հանձնաժողով) առաջարկությունների և եզրակացությունների հիման վրա:
i
5. Գնման գործընթացն սկսվելուց առաջ պատվիրատուի ղեկավարի հրամանով սահմանվում է պատասխանատու ստորաբաժանումը, որն իրականացնում է հետևյալ գործառույթները`
ա) նախագծում և պատվիրատուի ղեկավարի հաստատմանն է ներկայացնում ձեռքբերման ենթակա ապրանքների, աշխատանքների ու ծառայությունների տեխնիկական բնութագրերը, ապրանքների ձեռքբերման, աշխատանքների կատարման և ծառայությունների մատուցման, ինչպես նաև դրանց դիմաց վճարումների իրականացման ժամանակացույցերը.
բ) եզրակացություն է տալիս պատվիրատուի հետ պայմանագիր կնքած անձի կատարած աշխատանքների, մատակարարած ապրանքների կամ մատուցած ծառայությունների սույն կետի «ա» ենթակետի համաձայն հաստատված տեխնիկական բնութագրերի և ապրանքների ձեռքբերման, աշխատանքների կատարման և ծառայությունների մատուցման ժամանակացույցի (այսուհետև` գնման ժամանակացույց) համապատասխանության վերաբերյալ.
գ) ձեռնարկում է սույն կարգով նախատեսված միջոցներ ապրանքների ձեռքբերման, աշխատանքների կատարման և ծառայությունների մատուցման դիմաց պայմանագրով նախատեսված վճարումները սույն կետի «ա» ենթակետի համաձայն հաստատված ապրանքների ձեռքբերման, աշխատանքների կատարման և ծառայությունների մատուցման դիմաց վճարումների կատարման ժամանակացույցին (այսուհետև` վճարման ժամանակացույց) համապատասխան իրականացնելու համար:
Վճարման ժամանակացույցի ձևը սահմանում է Հայաստանի Հանրապետության ֆինանսների և էկոնոմիկայի նախարարությունը:
Պատասխանատու ստորաբաժանման` գնումներին վերաբերող փաստաթղթերն ստորագրում է դրա ղեկավարը:
6. Պատասխանատու ստորաբաժանման աշխատանքներին խորհրդատվական ձայնի իրավունքով կարող են մասնակցել այլ անձինք (այսուհետև` խորհրդատու): Խորհրդատուների անվանացանկը հաստատվում է պատվիրատուի ղեկավարի հրամանով: Ընդ որում, եթե պատասխանատու ստորաբաժանումը որոշում է ընդունում խորհրդատուի եզրակացության հիման վրա, ապա այդ որոշման համար պատասխանատվություն է կրում պատասխանատու ստորաբաժանման ղեկավարը Հայաստանի Հանրապետության օրենսդրությամբ սահմանված կարգով, եթե այլ բան նախատեսված չէ խորհրդատուի և պատվիրատուի միջև կնքված պայմանագրով (եթե այդպիսին առկա է):
7. Պատասխանատու ստորաբաժանումը որոշում է ընդունում ձեռք բերվելիք ապրանքների, աշխատանքների և ծառայությունների տեխնիկական բնութագրերի վերաբերյալ առաջարկը հաստատելու մասին:
8. Տեխնիկական բնութագրերը պետք է ամբողջությամբ նկարագրեն գնվող ապրանքները, աշխատանքները, ծառայությունները, որպեսզի դրանք սահմանվեն հստակ բացառելով այլընտրանքային մեկնաբանությունը:
9. Տեխնիկական բնութագրերը ներառում են գնվող ապրանքների, աշխատանքների, ծառայությունների որակի, ստանդարտների, աշխատանքի արդյունքների, թեստավորման, անվտանգության, չափերի, պայմանական նշանների, տերմինաբանության, փաթեթավորման, բեռնաթափման, ինչպես նաև դրանց հետ կապված այլ պահանջների և ընթացակարգերի հստակ նկարագրությունը: Տեխնիկական բնութագրերը, գծագրերը, էսքիզները կամ նկարագրերը (եթե այդպիսիք պահանջվում են) պետք է նաև պարունակեն`
ա) գնվող ապրանքների, աշխատանքների, ծառայությունների անմիջական նկարագրությունը հիմնված Հայաստանի Հանրապետության կողմից սահմանված տեխնիկական և որակական բնութագրերի (ստանդարտների) վրա.
բ) ստանդարտները, ցուցանիշները, պահանջները, պայմանական նշանները և տերմինները, գնվող ապրանքների, աշխատանքների, ծառայությունների տեխնիկական և որակական բնութագրերին վերաբերող գործարքների պայմանների ստանդարտները:
10. Տեխնիկական բնութագրերը չպետք է պարունակեն հղումներ կոնկրետ առևտրային նշաններին, ֆիրմային անվանումներին, պատենտներին, էսքիզներին կամ մոդելներին, ծագման կոնկրետ աղբյուրին կամ արտադրողին, բացառությամբ այն դեպքերի, երբ անհնար է պայմանագրի առարկայի բնորոշումն առանց դրանց: Համարժեք հղումների օգտագործման դեպքում տեխնիկական բնութագրերը պետք է պարունակեն «կամ համարժեք» բառերը:
11. Տեխնիկական բնութագրերը սահմանվում են Հայաստանի Հանրապետությունում գործող ստանդարտներին համապատասխան:
12. Ելնելով գնումների առանձնահատկություններից` պատվիրատուի ղեկավարը կարող է սույն կարգով նախատեսված` պատասխանատու ստորաբաժանման գործառույթների կատարման համար ստեղծել առնվազն 4 անդամից կազմված տեխնիկական հսկողության հանձնաժողով (այսուհետև` հանձնաժողով): Հանձնաժողովի անդամների անհատական կազմը հաստատվում է պատվիրատուի ղեկավարի հրամանով:
Հանձնաժողովի կազմավորումից հետո հանձնաժողովի որոշմամբ ընտրվում են հանձնաժողովի նախագահ և քարտուղար: Հանձնաժողովի կազմը մնում է անփոփոխ մինչև սույն կարգի 5-րդ կետով նախատեսված աշխատանքների իրականացման վերջին օրը, բացառությամբ այն դեպքերի, երբ անհնար է դառնում հանձնաժողովի անդամների կամ նրանց մի մասի կողմից իրենց պարտավորությունների կատարումը:
Հանձնաժողովի գործունեությունն իրականացվում է կոլեգիալության սկզբունքով: Հանձնաժողովի նիստն իրավազոր է, եթե նիստին ներկա են հանձնաժողովի անդամների երեք քառորդը և ավելին: Հանձնաժողովի որոշումը համարվում է ընդունված, եթե դրա օգտին քվեարկել է հանձնաժողովի անդամների կեսից ավելին: Հանձնաժողովի յուրաքանչյուր անդամ ունի մեկ ձայնի իրավունք, իսկ ձայների հավասարության դեպքում հանձնաժողովի նախագահի (նիստը վարողի) ձայնը վճռորոշ է:
Հանձնաժողովի որոշումներն ստորագրում են հանձնաժողովի նախագահը և անդամները:
13. Կենտրոնացված գնումների դեպքում` սույն կարգով պատվիրատուին վերապահված լիազորություններն իրականացվում են Հայաստանի Հանրապետության այն նախարարությունների, գերատեսչությունների, պետական կառավարման տարածքային և տեղական ինքնակառավարման մարմինների (այսուհետև` կառավարման մարմիններ) կողմից, որոնց կարիքները հոգալու համար կատարվում են (պետք է կատարվեն) գնումներ: Ընդ որում, մեկից ավելի կառավարման մարմնի կարիքները հոգալու համար կենտրոնացված գնումներ կատարելու դեպքում սույն կարգով պատվիրատուի ղեկավարին վերապահված լիազորություններն իրականացնում են կառավարման մարմինների ղեկավարները` յուրաքանչյուրն առանձին:
III. ԳՆՄԱՆ ԵՎ ՎՃԱՐՄԱՆ ԺԱՄԱՆԱԿԱՑՈՒՅՑԵՐԻ ՀԱՍՏԱՏՈՒՄԸ
14. Սույն կարգի 7-րդ կետում նշված որոշմամբ հաստատվում են նաև գնման և վճարման ժամանակացույցերը:
15. Վճարման ժամանակացույցը հաստատելիս հաշվի է առնվում այն, որ դրամով նախատեսվող հատկացումները պետք է ներառված լինեն սահմանված կարգով հաստատված և վճարման պահին գործող ծախսերի նախահաշվում: Ընդ որում, մինչև վճարման ժամանակացույցի հաստատումը այն ներկայացվում է պատվիրատուին սպասարկող Հայաստանի Հանրապետության ֆինանսների և էկոնոմիկայի նախարարության տեղական գանձապետական բաժանմունք (այսուհետև` ՏԳԲ) համաձայնեցման:
ՏԳԲ-ն իր կնիքով վավերացնում է վճարման ժամանակացույցը, եթե դրանով նախատեսված հատկացումները և դրանց վճարման ժամանակացույցը համապատասխանում են սահմանված կարգով հաստատված ու գործող ծախսերի նախահաշվին: Հակառակ դեպքում վճարման ժամանակացույցը վերադարձվում է:
IV. ԳՆՈՒՄՆԵՐԻ ԲՆՈՒԹԱԳՐԵՐԸ ՀԱՍՏԱՏԵԼՈՒ ՄԱՍԻՆ ՈՐՈՇՈՒՄԸ ԵՎ ՊԱՅՄԱՆԱԳԻՐԸ
16. Սույն կարգի 7-րդ և 14-րդ կետերի համաձայն հաստատված տեխնիկական բնութագրերը, գնման և վճարման ժամանակացույցերը հաստատվելուց հետո 3 աշխատանքային օրվա ընթացքում կից գրությամբ ներկայացվում են պատվիրատուի ղեկավարին: Ներկայացված առաջարկությանը համաձայնելու դեպքում պատվիրատուի ղեկավարը հաստատում է այն և օրենքով սահմանված կարգով կնքում պայմանագիր: Կենտրոնացված գնումների դեպքում կառավարման մարմնի ղեկավարը պատասխանատու ստորաբաժանման առաջարկությունը հաստատելուց հետո 3 աշխատանքային օրվա ընթացքում այն սահմանված կարգով ներկայացնում է պետական գնումների գործակալություն:
17. Պայմանագրով նախատեսված տեխնիկական բնութագրերը, ինչպես նաև գնման և վճարման ժամանակացույցերը պետք է համապատասխանեն սույն որոշման 16-րդ կետի համաձայն հաստատված տեխնիկական բնութագրերին և գնման ու վճարման ժամանակացույցերին:
V. ՊԱՅՄԱՆԱԳՐԻ ԿԱՏԱՐՄԱՆ ՄԱՍԻՆ ԵԶՐԱԿԱՑՈՒԹՅՈՒՆԸ
18. Պայմանագրի կամ դրա մի մասի կատարման արդյունքներն ամփոփվում են պատվիրատուի ղեկավարի կամ նրա կողմից լիազորված անձի և պատվիրատուի հետ պայմանագիր կնքած անձի միջև հանձնման-ընդունման արձանագրության ստորագրմամբ, որն ստորագրվում է պատասխանատու ստորաբաժանման եզրակացության (այսուհետև` եզրակացություն) հիման վրա: Ընդ որում, պայմանագրով սահմանված գնումների դիմաց վճարելու պատվիրատուի պարտավորությունը համարվում է կատարման ենթակա, եթե առկա են պատասխանատու ստորաբաժանման դրական եզրակացությունը և դրա հիման վրա ստորագրված հանձնման-ընդունման արձանագրությունը:
19. Պատասխանատու ստորաբաժանումը դրական եզրակացություն է տալիս պայմանագրի կամ դրա մի մասի կատարման արդյունքների վերաբերյալ, եթե մատակարարված ապրանքները, կատարված աշխատանքները և մատուցված ծառայությունները համապատասխանում են պայմանագրով նախատեսված տեխնիկական բնութագրերին և գնման ժամանակացույցին: Հակառակ դեպքում տրվում են բացասական եզրակացություն և պատվիրատուի հետ պայմանագիր կնքած անձին առաջարկվում է պայմանագրով սահմանված կարգով շտկել արձանագրված անհամապատասխանությունը:
20. Դրական եզրակացության դեպքում պատասխանատու ստորաբաժանումը կից գրությամբ այն ներկայացնում է պատվիրատուի ղեկավարին` հանձնման-ընդունման արձանագրությունն ստորագրելու նպատակով, ինչպես նաև առաջարկում է ապահովել պայմանագրով նախատեսված վճարումների կատարումը` վճարման ժամանակացույցին համապատասխան:
Պատասխանատու ստորաբաժանման դրական եզրակացությունն ստանալուց հետո և դրան համաձայնելու դեպքում պատվիրատուի ղեկավարը կամ նրա կողմից լիազորված անձը պատվիրատուի հետ պայմանագիր կնքած անձի հետ 3 աշխատանքային օրվա ընթացքում ստորագրում է հանձնման-ընդունման արձանագրությունը: