050.0293.280605
ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«28» 06 2005 Թ.
ՊԵՏԱԿԱՆ ԳՐԱՆՑՄԱՆ ԹԻՎ 05005230
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ
ՈՐՈՇՈՒՄ
8 հունիսի 2005 թվականի N 293-Ն
i
ՄԱՍՆԱԳԻՏԱՑՎԱԾ ԱՆՁԱՆՑ ԿՈՂՄԻՑ ՀԱՃԱԽՈՐԴՆԵՐԻՆ ԱՐՏԱՐԺՈՒՅԹԻ ԱՌՔ ՈՒ ՎԱՃԱՌՔԻ ԳՈՐԾԱՌՆՈՒԹՅՈՒՆՆԵՐԸ ՀԱՎԱՍՏԻԱՑՆՈՂ ՓԱՍՏԱԹՂԹԵՐԻ ՏՐԱՄԱԴՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
Հիմք ընդունելով «Արժութային կարգավորման և արժութային վերահսկողության մասին» Հայաստանի Հանրապետության օրենքի 7-րդ հոդվածի 9-րդ մասը, «Իրավական ակտերի մասին» Հայաստանի Հանրապետության օրենքի 16-րդ հոդվածը, ղեկավարվելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածով` Հայաստանի Հանրապետության կենտրոնական բանկի խորհուրդը որոշում է.
1. Հաստատել «Մասնագիտացված անձանց կողմից հաճախորդներին արտարժույթի առք ու վաճառքի գործառնությունները հավաստիացնող փաստաթղթերի տրամադրման կարգը»` համաձայն հավելված 1-ի (կցվում է):
i
2. Սույն որոշումն ուժի մեջ մտնելու պահից ուժը կորցրած ճանաչել Հայաստանի Հանրապետության կենտրոնական բանկի խորհրդի 2000 թվականի հոկտեմբերի 11-ի «Հայաստանի Հանրապետության տարածքում գործող բանկերի կողմից հաճախորդներին տրամադրվող անդորրագրերի և դրանց պարտադիր վավերապայմանների մասին» թիվ 259 որոշումը:
3. Սույն որոշումն ուժի մեջ է մտնում 2005 թվականի օգոստոսի 1-ից:
ՍՏՈՐԱԳՐՎԵԼ Է ՀՀ ԿԵՆՏՐՈՆԱԿԱՆ ԲԱՆԿԻ ՆԱԽԱԳԱՀԻ ԿՈՂՄԻՑ
2005 ԹՎԱԿԱՆԻ ՀՈՒՆԻՍԻ 10-ԻՆ
Հավելված 1
Հաստատված է
ՀՀ կենտրոնական բանկի խորհրդի
2005 թվականի հունիսի 8-ի
թիվ 293-Ն որոշմամբ
ՄԱՍՆԱԳԻՏԱՑՎԱԾ ԱՆՁԱՆՑ ԿՈՂՄԻՑ ՀԱՃԱԽՈՐԴՆԵՐԻՆ ԱՐՏԱՐԺՈՒՅԹԻ ԱՌՔ ՈՒ ՎԱՃԱՌՔԻ ԳՈՐԾԱՌՆՈՒԹՅՈՒՆՆԵՐԸ ՀԱՎԱՍՏԻԱՑՆՈՂ ՓԱՍՏԱԹՂԹԵՐԻ ՏՐԱՄԱԴՐՄԱՆ ԿԱՐԳԸ
ԳԼՈՒԽ 1. |
ԸՆԴՀԱՆՈՒՐ ԴՐՈՒՅԹՆԵՐ |
i
1. Սույն կարգը սահմանում է Հայաստանի Հանրապետության տարածքում արտարժույթի առք ու վաճառքի կանխիկ գործառնություններ իրականացնող մասնագիտացված անձանց կողմից արտարժույթի առք ու վաճառքի գործառնությունները հավաստիացնող փաստաթղթերը (այսուհետև` անդորրագիր) հաճախորդներին տրամադրելու կարգը և ձևը, ինչպես նաև անդորրագրերի նվազագույն վավերապայմանները:
(1-ին կետը փոփ. 17.04.07 թիվ 120-Ն որոշում)
i
2. Սույն կարգի իմաստով մասնագիտացված անձ են համարվում «Արժութային կարգավորման և արժութային վերահսկողության մասին» Հայաստանի Հանրապետության օրենքի 3-րդ հոդվածի 13-րդ մասով սահմանված անձինք` բացառությամբ արտարժույթի դիլերային-բրոքերային առուվաճառք իրականացնողների:
(2-րդ կետը փոփ. 17.04.07 թիվ 120-Ն որոշում)
3. (3-րդ կետն ուժը կորցրել է 17.04.07 թիվ 120-Ն որոշում)
i
(3-րդ կետը փոփ. 12.09.06 թիվ 536-ն որոշում)
ԳԼՈՒԽ 2. |
ԱՆԴՈՐՐԱԳՐԵՐԻ ՆՎԱԶԱԳՈՒՅՆ ՎԱՎԵՐԱՊԱՅՄԱՆՆԵՐԸ |
4. Մասնագիտացված անձանց կողմից հաճախորդներին տրամադրվող արտարժույթի առք ու վաճառքի գործառնությունները հաստատող անդորրագիրը առնվազն պետք է պարունակի հետևյալ վավերապայմանները (տեղեկատվությունը).
ա) մասնագիտացված անձի անվանումը (մասնաճյուղերի կողմից իրականացվող գործարքների դեպքում նաև մասնաճյուղի անվանումը),
բ) մասնագիտացված անձի (մասնաճյուղերի կողմից իրականացվող գործարքների դեպքում` մասնաճյուղի) գտնվելու վայրը,
գ) մասնագիտացված անձի լիցենզիայի համարը,
դ) հարկ վճարողի հաշվառման համարը,
ե) հերթական համարը,
զ) համակարգչի գրանցման համարը,
է) գործարքի կատարման ամսաթիվը և ժամը,
ը) գործարքի տեսակը («արտարժույթի առք» կամ «արտարժույթի վաճառք»),
թ) գործարքի փոխարժեքը ՀՀ դրամով,
ժ) գնված գումարը (գումարը թվերով և բառերով), արժույթը (արտարժույթի կոդ),
ժա) վաճառված գումարը (գումարը թվերով և բառերով), արժույթը (արտարժույթի կոդ),
ժբ) հաճախորդի անունը, ազգանունը (իրավաբանական անձանց ներկայացուցիչների համար նաև կազմակերպության անվանումը, գտնվելու վայրը և կազմակերպության դրոշմակնիքը),
ժգ) հաճախորդի անձը հաստատող փաստաթղթի տվյալները,
ժդ) հաճախորդի ստորագրությունը,
ժե) կատարողի/աշխատակցի ստորագրությունը և/կամ մասնագիտացված անձի դրոշմակնիքը:
i
5. Սույն կարգի 4-րդ կետի «ժբ», «ժգ» և «ժդ» ենթակետերով սահմանված տեղեկատվության առկայությունը անդորրագրերի վրա պարտադիր է մեկ հարյուր հազար դրամ գումարը գերազանցող առք ու վաճառքի գործառնությունների համար: Ընդ որում, սույն կարգի 4-րդ կետի «ժդ» ենթակետի պահանջը կհամարվի բավարարված նաև այն դեպքում, եթե բացակայում է անդորրագրի ձևաթերթիկի «հաճախորդի ստորագրություն» դաշտը, սակայն անդորրագրի վրա առկա է հաճախորդի ստորագրությունը:
(5-րդ կետը փոփ. 12.09.06 թիվ 536-ն, 12.03.15 թիվ 49-Ն, 27.12.2022 թիվ 249-Ն որոշումներ)
6. Սույն կարգի 4-րդ կետում նշված վավերապայմաններից բացի մասնագիտացված անձինք կարող են իրենց ներքին ակտերով սահմանել անդորրագրերի լրացուցիչ վավերապայմաններ:
i
6.1. Չի թույլատրվում արժութային գործարքը բաժանել երկու կամ ավելի մասերի` սույն կարգով նախատեսված պահանջներից խուսափելու կամ դրանք չկատարելու նպատակով: Արժութային վերահսկողություն իրականացնելու ընթացքում բաժանված գործարքները կարող են դիտարկվել որպես մեկ գործարք:
(6.1-րդ կետը լրաց. 12.09.06 թիվ 536-ն որոշում)
ԳԼՈՒԽ 3. |
ԱՆԴՈՐՐԱԳՐԵՐԻ ՏՐԱՄԱԴՐՈՒՄԸ ՀԱՃԱԽՈՐԴՆԵՐԻՆ |
7. Մասնագիտացված անձը պարտավոր է հաճախորդին տրամադրել արտարժույթի առք ու վաճառքի յուրաքանչյուր գործարքի կատարման վերաբերյալ անդորրագիր:
8. Անդորրագրերը պետք է կազմվեն էլեկտրոնային եղանակով` համակարգիչների կամ հսկիչ-դրամարկղային մեքենաների միջոցով: Ընդ որում, սույն կարգի 4-րդ կետի «ա», «բ», «գ», «դ», «ե», «զ», «է» ենթակետերով սահմանված տվյալների առկայությունը անդորրագրում մասնագիտացված անձի համակարգչային ծրագիրը կարող է ապահովել ավտոմատ կերպով (ենթակա չէ մուտքագրման արտարժույթի առք ու վաճառքի յուրաքանչյուր գործառնություն իրականացնելիս): Անդորրագրի հերթական համարը, համակարգչի գրանցման համարը, գործարքի կատարման ամսաթիվը և ժամը պետք է ֆիքսվեն համակարգչի կողմից և ենթակա չլինեն փոփոխման:
9. Արտարժույթի առք ու վաճառքի գործարքի փոխարժեքը ՀՀ դրամով կարող է մուտքագրվել համակարգ կամ փոփոխվել միայն մասնագիտացված անձի լիազորված աշխատակցի կողմից, ընդ որում` բանկերի, օտարերկրյա բանկերի Հայաստանի Հանրապետության տարածքում գործող մասնաճյուղերի և վարկային կազմակերպությունների դեպքում սույն կետով նշված լիազորված աշխատակիցը չպետք է հանդիսանա հաճախորդին սպասարկող աշխատակից:
10. Արտարժույթի առք ու վաճառքի գործարքը իրականացնելիս մասնագիտացված անձի աշխատակցի կողմից անհրաժեշտ տվյալները մուտքագրվում են համակարգ և այնուհետև անդորրագիրը տպվում է երկու օրինակից:
11. Անդորրագրի մեկ օրինակը պետք է տրամադրվի հաճախորդին:
12. Արտարժույթի առք ու վաճառքի կանխիկ գործառնությունների իրականացման ժամանակ անդորրագրի օրինակը պետք է տրամադրվի հաճախորդին նախքան վաճառված կանխիկի տրամադրումը, կամ առնվազն կանխիկի հետ միաժամանակ:
i
13. Անդորրագրի երկրորդ օրինակը պահպանվում է լիցենզավորված անձի մոտ թղթային և (կամ) էլեկտրոնային տարբերակով` լազերային կրիչի վրա` 3 տարի ժամկետով` բացառությամբ փոխանակման կետերի և արժութային դիլերների: Փոխանակման կետերի և արժութային դիլերների մոտ անդորրագրերի երկրորդ օրինակը պահպանվում է թղթային և (կամ) էլեկտրոնային տարբերակով` լազերային կրիչի վրա` 1 տարի ժամկետով:
(13-րդ կետը փոփ. 06.07.06 թիվ 226-Ն, 18.09.07 թիվ 295-Ն որոշումներ)