ԱՄՐԱԿՑՎԱԾ ՑԱՆՑԵՐՈՎ ԵԼՔԱՅԻՆ ՁԱՅՆԱՅԻՆ ԾԱՌԱՅՈՒԹՅՈՒՆՆԵ ...

600.0032.180315

ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ

                                      «18»        03            2015 Թ.

                                        ՊԵՏԱԿԱՆ ԳՐԱՆՑՄԱՆ ԹԻՎ 60015090

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎ

ՈՐՈՇՈՒՄ

4 մարտի 2015 թվականի N 32-Ն

ԱՅԼ ԿԱՐԳԱՎՈՐՎՈՂ ԱՆՁԱՆՑ ՀԱՆՐԱՅԻՆ ԷԼԵԿՏՐՈՆԱՅԻՆ ՀԱՂՈՐԴԱԿՑՈՒԹՅԱՆ ԱՄՐԱԿՑՎԱԾ ՑԱՆՑԵՐՈՎ ԵԼՔԱՅԻՆ ՁԱՅՆԱՅԻՆ ԾԱՌԱՅՈՒԹՅՈՒՆՆԵՐԻ ՄԱՏՈՒՑՄԱՆ ԿԱՐԳԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎԻ 2013 ԹՎԱԿԱՆԻ ՀՈՒԼԻՍԻ 31-Ի N 281-Ն ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

Հիմք ընդունելով «Էլեկտրոնային հաղորդակցության մասին» Հայաստանի Հանրապետության օրենքի 1-ին հոդվածի 1-ին մասի 1-ին, 2-րդ, 4-րդ կետերը, 5-րդ հոդվածի 1-ին մասի 1-ին կետի «ա» ենթակետը, 2-րդ մասի «ե» ենթակետը և «Իրավական ակտերի մասին» Հայաստանի Հանրապետության օրենքի 72-րդ հոդվածի 1-ին մասի 1-ին կետի «բ» ենթակետը` Հայաստանի Հանրապետության հանրային ծառայությունները կարգավորող հանձնաժողովը որոշում է.

1. Հաստատել այլ կարգավորվող անձանց հանրային էլեկտրոնային հաղորդակցության ամրակցված ցանցերով ելքային ձայնային ծառայությունների մատուցման կարգը` համաձայն հավելվածի:

2. ՈՒժը կորցրած ճանաչել Հայաստանի Հանրապետության հանրային ծառայությունները կարգավորող հանձնաժողովի 2013 թվականի հուլիսի 31-ի «Այլ կարգավորվող անձանց հանրային էլեկտրոնային հաղորդակցության ցանցերով ելքային ձայնային ծառայությունների մատուցման կարգը հաստատելու և Հայաստանի Հանրապետության հանրային ծառայությունները կարգավորող հանձնաժողովի մի շարք որոշումներն ուժը կորցրած ճանաչելու մասին» N 281-Ն որոշումը:

3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրվանից:

Հավելված

Հաստատված է

ՀՀ հանրային ծառայությունները

կարգավորող հանձնաժողովի

2015 թվականի մարտի 4-ի

N 32-Ն որոշմամբ

ԿԱՐԳ

ԱՅԼ ԿԱՐԳԱՎՈՐՎՈՂ ԱՆՁԱՆՑ ՀԱՆՐԱՅԻՆ ԷԼԵԿՏՐՈՆԱՅԻՆ ՀԱՂՈՐԴԱԿՑՈՒԹՅԱՆ ԱՄՐԱԿՑՎԱԾ ՑԱՆՑԵՐՈՎ ԵԼՔԱՅԻՆ ՁԱՅՆԱՅԻՆ ԾԱՌԱՅՈՒԹՅՈՒՆՆԵՐԻ ՄԱՏՈՒՑՄԱՆ

1. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգը սահմանում է ծանուցում ներկայացրած ձայնային ծառայություններ մատուցող անձանց (այսուհետ` Ծառայություն մատուցող) կողմից այլ կարգավորվող անձանց հանրային էլեկտրոնային հաղորդակցության ամրակցված ցանցերով ելքային ձայնային ծառայությունների մատուցման հետ կապված հարաբերությունները:

2. Ծառայություն մատուցողը այլ կարգավորվող անձանց հանրային էլեկտրոնային հաղորդակցության ամրակցված ցանցերով ելքային ձայնային ծառայությունների մատուցման համար պարտավոր է ունենալ Հայաստանի Հանրապետության հանրային ծառայությունները կարգավորող հանձնաժողովի (այսուհետ` Հանձնաժողով) կողմից տրամադրված համարների (այսուհետ` համար) զբաղեցման թույլտվություն (այսուհետ` Թույլտվություն):

3. Հանձնաժողովը համարի զբաղեցման թույլտվությունը տրամադրում է հանրային էլեկտրոնային հաղորդակցության ցանցի լիցենզիա ունեցող անձի (այսուհետ` Օպերատոր) զբաղեցրած համարային ռեսուրսից առանձնացված աշխարհագրական կամ ոչ աշխարհագրական կոդով (բացառությամբ շարժական բջջային կապի) համարներից:

2. ՀԱՄԱՐՆԵՐԻ ԳՈՐԾԱՐԿՈՒՄ

4. Հանձնաժողովի կողմից Ծառայություն մատուցողին տրամադրված համարը կարող է գործարկվել միայն այն Օպերատորի ցանցում, որն առանձնացրել է տվյալ համարը իր զբաղեցրած համարային ռեսուրսից:

5. Թույլտվություն ստանալուց հետո Հանձնաժողովի կողմից իրեն հատկացված համարը գործարկելու համար Ծառայություն մատուցողը ձայնային ծառայություններ մատուցող Օպերատորին ներկայացնում է գրավոր դիմում, որը ներառում է Թույլտվության պատճենը, պահանջվող ծառայության մատուցման համար անհրաժեշտ միացման ենթակա վերջնակետային սարքավորման տեսակի և համապատասխան ինտերֆեյսի տեխնիկական պայմանների վերաբերյալ տեղեկություններ:

6. Օպերատորը դիմումի ստացման պահից 15 աշխատանքային օրվա ընթացքում բավարարում է Ծառայություն մատուցողի ներկայացրած դիմումը, բացառությամբ այն դեպքերի, երբ`

1) դիմումը չի համապատասխանում սույն կարգի 5-րդ կետով սահմանված պահանջներին,

2) կոնկրետ դիմումը բավարարելու համար լրացուցիչ ժամկետն արդարացնող հատուկ կառուցման աշխատանքներ են պահանջվում:

7. Դիմումը բավարարելու դեպքում Օպերատորի և Ծառայություն մատուցողի միջև կնքվում է պայմանագիր, որն ուժի մեջ մտնելու պահից Օպերատորն ապահովում է Ծառայություններ մատուցողի համարի անխափան գործարկումը:

8. Համարի գործարկման պայմանագրի կնքման պահից Ծառայություններ մատուցողին տրամադրված համարը Օպերատորի և այլ օպերատորների հանրային էլեկտրոնային հաղորդակցության ցանցերի փոխկապակցման ծառայությունների մատուցման տեսանկյունից դիտարկվում են որպես Օպերատորի հանրային էլեկտրոնային հաղորդակցության ցանցի մաս կազմող անմիջական ռեսուրս:

9. Սույն կարգի 6-րդ կետի 1-ին ենթակետով նախատեսված դեպքում Օպերատորը 5 աշխատանքային օրվա ընթացքում մերժում է Ծառայություն մատուցողի դիմումը, ինչի մասին գրավոր տեղեկացնում է վերջինիս` նշելով մերժման պատճառները:

10. Սույն կարգի 6-րդ կետի 2-րդ ենթակետով նախատեսված դեպքում Օպերատորը դիմումը և հատուկ կառուցման աշխատանքների իրականացման անհրաժեշտության վերաբերյալ հիմնավորումները դիմումը ստանալու պահից 10 աշխատանքային օրվա ընթացքում ներկայացնում է Հանձնաժողով` այդ մասին տեղեկացնելով Ծառայություններ մատուցողին:

11. Հանձնաժողովը, հաշվի առնելով Ծառայություններ մատուցողի պահանջարկի կանխատեսումները, պահանջվող հատուկ կառուցման աշխատանքների ծավալը և համարի գործարկման տեխնիկական հնարավորությունը, 15 աշխատանքային օրվա ընթացքում ընդունում է հետևյալ որոշումներից մեկը`

1) ազատել Օպերատորին համարի գործարկման պարտականությունից,

2) սահմանել Օպերատորի կողմից համարի գործարկման համար նոր ժամկետ,

3) պահանջել Ծառայություն մատուցողից ամբողջությամբ կամ մասամբ վճարել համարի գործարկմանն ուղղակիորեն առնչվող ծախսերը:

3. ԾԱՌԱՅՈՒԹՅՈՒՆ ՄԱՏՈՒՑՈՂԻ ԳՈՐԾՈՒՆԵՈՒԹՅԱՆ ՊԱՅՄԱՆՆԵՐԸ

12. Ծառայություն մատուցողի` ձայնային ծառայությունների մատուցման համար անհրաժեշտ սարքավորումների տեղադրման վայրը պետք է համապատասխանի Ծառայություն մատուցողի կողմից Հանձնաժողով ներկայացրած ծանուցման ձևաթղթում և Թույլտվությամբ ամրագրված գործունեության վայրին:

13. Ծառայություններ մատուցողը պարտավոր է իր հաճախորդների կողմից օգտագործվող ծառայությունների տեսակի, վայրի, նպատակի, նպատակակետի, քանակի և տեխնիկական պայմանների վերաբերյալ տեղեկությունները համարել և պահել գաղտնի:

14. Ծառայություններ մատուցողը պարտավոր է սույն կարգի 13-րդ կետում նշված տեղեկությունները արխիվացնել 1 տարի ժամկետով:

15. Ծառայություններ մատուցողն իրավասու է բացահայտել սույն կարգի 13-րդ կետում նշված տեղեկությունները`

1) օրենքով նախատեսված դեպքերում և կարգով` քրեական հանցագործության կամ ազգային անվտանգության նկատմամբ որևէ սպառնալիքի հետախուզման, հետաքննման կամ քրեական հետապնդման առնչությամբ.

2) հաճախորդի գրավոր համաձայնության հիման վրա.

3) եթե բացահայտումն անհրաժեշտ է ի պաշտպանություն Ծառայություն մատուցողի (ընթանում են վարույթներ ընդդեմ այդ Ծառայություն մատուցողի): Հաճախորդը կարող է պահանջել, որպեսզի բացահայտումը կատարվի գաղտնիության կարգով` դռնփակ վարույթների միջոցով:

16. Ծառայություն մատուցողը պատասխանատվություն չի կրում սույն կարգի 15-րդ կետի համաձայն տեղեկությունների բացահայտման հետևանքով պատճառված որևէ վնասի համար:

17. Ծառայություն մատուցողը պարտավոր է ազգային անվտանգության մարմինների պահանջով իր ապարատային միջոցների կազմում ընդգրկել լրացուցիչ սարքավորումներ և ծրագրային միջոցներ, ինչպես նաև անհրաժեշտ պայմաններ ստեղծել ազգային անվտանգության մարմինների կողմից օպերատիվ-տեխնիկական միջոցառումներ անցկացնելու համար:

18. Ծառայություն մատուցողը պարտավոր է օրենքով նախատեսված դեպքերում և կարգով ապահովել իրավապահ և ազգային անվտանգության աշխատակիցների մուտքը հաղորդակցության սարքավորումներին, ենթակառուցվածքներին, միացնող-անջատող, ուղղորդող և նմանատիպ այլ սարքերին, ներառյալ` գաղտնալսումների իրականացման համար անհրաժեշտ սարքերին:

19. Ծառայություն մատուցողը պարտավոր է հաճախորդներին տրամադրել ճշգրիտ հաշիվներ (bills): Հաշիվները պետք է տրամադրվեն անվճար, արտացոլեն միայն այն ծառայությունները, որոնցից հաճախորդը փաստացի օգտվել է` վճարների բացվածքը ներկայացնելով ըստ ծառայությունների տեսակների, իսկ հաճախորդի պահանջի դեպքում պետք է պարունակեն բավարար տեղեկատվություն յուրաքանչյուր զանգի ժամի, տևողության և նպատակակետի մասին:

20. Ծառայություն մատուցողը պարտավոր է ձայնային ծառայությունները մատուցել եվրոպական լավագույն փորձին համապատասխանող հաշիվների վարման (billiոg) ժամանակակից համակարգով:

21. Հեռախոսավարի օգնությամբ կամ ավտոմատ կերպով մատուցված միջքաղաքային, միջազգային ձայնային ծառայությունները վճարվում են ըստ հեռախոսային միացման տևողության, որը հաշվարկվում է յուրաքանչյուր անձի կամ բաժանորդային սարքի պատասխանի պահից մինչև կանչվող անձի կամ բաժանորդային սարքի անջատման պահն ընկած ժամանակահատվածի համար:

22. Բաժանորդային սարքերի շարքին, որոնց պատասխանի ազդանշանը հավասարվում է կանչվող անձի պատասխանին և ծառայում իբրև ձայնային ծառայության տևողության հաշվարկի սկիզբ, դասվում են`

1) տվյալների փոխանցման սարքերը,

2) ֆաքսիմիլային սարքը,

3) ավտոմատ պատասխանիչով բաժանորդային սարքը,

4) հեռախոսահամարի ավտոմատ որոշիչով հեռախոսային սարքը,

5) բաժանորդային այլ սարքերը, որոնք փոխարինում են բաժանորդին նրա բացակայության ընթացքում և ապահովում տեղեկատվության փոխանակումը:

23. Հեռախոսավարի օգնությամբ միջքաղաքային, միջազգային ձայնային ծառայությունների մատուցման դեպքում Ծառայություն մատուցողը պարտավոր է պատվերները գրանցել գրանցամատյանում:

24. Համաձայնեցնելով Հանձնաժողովի հետ Ծառայություն մատուցողը, ելնելով օգտագործվող կոմուտացիոն սարքավորումների հնարավորություններից, սահմանում է նվազագույն սակագրման միավորը տեղական, միջքաղաքային և միջազգային ձայնային ծառայությունների համար (վայրկյաններով կամ րոպեներով): Սակագրման միավորը չի կարող գերազանցել 1 րոպեն:

25. Ծառայություններ մատուցողի հետ համարի գործարկման պայմանագիր կնքած Օպերատորը իր ցանցից Ծառայություններ մատուցողին ուղղված զանգերի համար կիրառում է նույն սակագինը, որը կիրառում է իր բաժանորդների կողմից կատարվող ներցանցային զանգերի համար` բաժանորդի կողմից ընտրված և գործող սակագնային փաթեթի շրջանակում:

26. Այլ Օպերատորները իրենց ցանցերից դեպի Ծառայություններ մատուցողին ուղղված զանգերի համար կիրառում են նույն սակագինը, որը կիրառում են իրենց բաժանորդների կողմից դեպի Ծառայություններ մատուցողի հետ համարի գործարկման պայմանագիր կնքած Օպերատորի ցանց կատարվող միջցանցային զանգերի համար:

27. (27-րդ կետն ուժը կորցրել է 05.10.16 թիվ 279-Ն որոշում)

28. Ծառայություն մատուցողը ձայնային ծառայությունները գովազդող քարտերի (կանխավճարային կամ հետվճարային) վրա պետք է նշի ընկերության անվանումը (ֆիզիկական անձի դեպքում` անուն, ազգանուն) կամ ապրանքանիշի (brand) անվանումը, իսկ կանխավճարային եղանակով ձայնային ծառայությունների մատուցման դեպքում նաև կանխավճարային քարտի հերթական համարը:

29. Հանձնաժողովի կողմից սահմանված կարգով Ծառայություն մատուցողը պարտավոր է ներկայացնել հաշվետվություններ:

30. Ծառայություններ մատուցողին արգելվում է ձայնային ծառայությունները մատուցել համարի կամ կոդի զբաղեցման թույլտվության մեջ չնշված համարով կամ կոդով:

31. Ծառայություններ մատուցողի կողմից համարի կամ կոդի զբաղեցման թույլտվության մեջ չնշված համարով կամ կոդով ձայնային ծառայությունների մատուցման հայտնաբերման պարտավորությունը կրում է Օպերատորը, որի վերաբերյալ դիմում է ներկայացնում Հանձնաժողովին: Հանձնաժողովը քննարկում է դիմումը և ընդունում համապատասխան որոշում:

32. Ծառայություն մատուցողին տրամադրված համարներն Օպերատորի կողմից գործարկվում են միայն դրանց մուտքային զանգի հնարավորությամբ:

4. ԾԱՌԱՅՈՒԹՅՈՒՆՆԵՐ ՄԱՏՈՒՑՈՂԻ ԳՈՐԾՈՒՆԵՈՒԹՅԱՆ ՎԵՐԱՀՍԿՈՒՄԸ

33. Համարի կամ կոդի զբաղեցման թույլտվության պայմանների պահպանման վերահսկումն իրականացնում է Հանձնաժողովը:

34. Հանձնաժողովը կամ նրա լիազոր ներկայացուցիչներն իրավունք ունեն ազատ մուտք գործել Ծառայություններ մատուցողի տարածք:

35. Վերահսկումն իրականացնելու ընթացքում Ծառայություններ մատուցողը պարտավոր է լիովին համագործակցել և աջակցել Հանձնաժողովին կամ նրա լիազոր ներկայացուցիչներին:

5. ԱՆՑՈՒՄԱՅԻՆ ԴՐՈՒՅԹՆԵՐ

36. Օպերատորի կողմից միջազգային ելքային ձայնային ծառայությունների մատուցումն իրականացվում է իր հանրային էլեկտրոնային հաղորդակցության ցանցով և Հանձնաժողովի կողմից տրամադրված համարներով: Մինչև սույն կանոններն ուժի մեջ մտնելու պահը` Հանձնաժողովի կողմից Օպերատորներին աշխարհագրական սկզբունքով տրամադրված համարները, որոնցով Օպերատորները ծառայություններ են մատուցում այլ Օպերատորների հանրային էլեկտրոնային հաղորդակցության ցանցերով, շարունակում են օգտագործվել նույն պայմաններով` մինչև Հանձնաժողովի կողմից այլ պայմաններ սահմանելը: