ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ ՄՈՒՏՔ ԳՈՐԾԵԼԻՍ ԵՎ ՀԱՅԱՍՏ ...

18.08.2020 -

ՊԱՐԵՏԻ ՈՐՈՇՈՒՄ

18 մարտի 2020 թվականի N 5

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ ՄՈՒՏՔ ԳՈՐԾԵԼԻՍ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱԿԱՆ ՍԱՀՄԱՆՆԵՐՈՒՄ ԿԻՐԱՌՎՈՂ ՍԱՀՄԱՆԱՓԱԿՈՒՄՆԵՐԻ ՎԵՐԱԲԵՐՅԱԼ

(Որոշումը խմբ. 21.04.20 թիվ 49, 21.05.20 թիվ 81 (որոշումն ունի անցումային դրույթ) որոշումներ)

Ղեկավարվելով Հայաստանի Հանրապետության կառավարության 2020 թվականի մարտի 16 N 298-Ն որոշմամբ`

1. Սահմանել, որ`

1.1 Հայաստանի Հանրապետության ողջ տարածքում ինքնամեկուսացման պահանջ է սահմանվում արտերկրից ՀՀ ժամանող անձանց, ինչպես նաև COVID-19 վարակակիր անձի հետ համատեղ ապրող անձանց կամ նրա հետ սերտ շփում ունեցած կոնտակտավորների (այսուհետ` կոնտակտավորներ) համար:

1.2 ՀՀ ժամանող անձանց, ՀՀ առողջապահական և աշխատանքի տեսչական մարմնի սահմանային բժշկասանիտարական հսկիչ կետերի (այսուհետ` ՍԲՀԿ)հերթապահների կողմից տրամադրվում է 14-օրյա ժամկետով ինքնամեկուսացման ծանուցում, ՀՀ առողջապահական և աշխատանքի տեսչական մարմնի ղեկավարի կողմից հաստատված, ինքնամեկուսացման ծանուցագրում (այսուհետ` Ծանուցագիր) իրենց կողմից նշված ինքնամեկուսացման վայրում, որը չեն կարող լքել ինքնամեկուսացման ողջ ընթացքում, բացառությամբ 1.2.2 կետով նախատեսված դեպքերում:↩

(1.2-րդ կետը փոփ. 18.08.20 թիվ 254-Ն որոշում)

1.2.1.  (1.2.1-ին կետն ուժը կորցրել է 18.08.2020 թվականից` 18.08.20 թիվ 254-Ն որոշում)↩

1.2.2. Հայաստանի Հանրապետության տարածք մուտք գործելուց հետո սույն որոշմամբ սահմանված կարգով ինքնամեկուսացված անձը կարող է ինքնամեկուսացման 14-օրյա ժամկետի ընթացքում վճարովի հիմունքներով անցնել կորոնավիրուսային հիվանդության (COVID-19) ախտորոշման պոլիմերազային շղթայական ռեակցիայի հետազոտություն (այսուհետ` ՊՇՌ հետազոտություն): ՊՇՌ հետազոտության բացասական պատասխանի դեպքում անձը դուրս է գալիս ինքնամեկուսացումից:

ՀՀ ժամանած և ինքնամեկուսացման մեջ գտնվող անձից նմուշառումը կարող է իրականացվել բացառապես իր ինքնամեկուսացման վայրում` լաբորատորիայի աշխատակիցների այցի միջոցով:

Համապատասխան ենթակառուցվածքների առկայության պարագայում նմուշառումը կարող է իրականացվել նաև անմիջապես ՀՀ տարածք մուտք գործելուց հետո, օդանավակայանների, ինչպես նաև սահմանային անցման կետերի տարածքում տեղակայված նմուշառման կենտրոնների մասնագետների կողմից:

(1.2.2-րդ կետը լրաց. 18.08.20 թիվ 254-Ն որոշում)

1.2.3. ՀՀ ժամանող անձանց տվյալները ԱՐՄԵԴ համակարգ են մուտքագրվում հատուկ նշումով: Լաբորատորիաների կողմից թեստավորում անցած լաբորատոր հետազոտության բացասական արդյունքի մասին տեղեկատվությունը ԱՐՄԵԴ համակարգ մուտքագրվելուց հետո տվյալ անձինք ենթակա են ինքնամեկուսացումից անհապաղ ազատման: Մինչև լաբորատորիայի կողմից ԱՐՄԵԴ համակարգ բացասական պատասխանի մուտքագրումն անձը ստանում է ինքնամեկուսացման ցուցում:

(1.2.3-րդ կետը լրաց. 18.08.20 թիվ 254-Ն որոշում)

1.3 Անչափահաս երեխաների ինքնամեկուսացման պահանջի պահպանման պատասխանատվությունը կրում են Ծանուցագիրը ստորագրած անձինք:

1.4 Սույն որոշման 1.2-րդ կետից բացառություն են կազմում օդաչուների հանգիստը կազմակերպելու նպատակով ՀՀ տարածք ժամանող օդանավի անձնակազմի անդամները, միջպետական բեռնափոխադրումներ իրականացնող վարորդները, բեռնատար գնացքների շարժակազմի մեքենավարները (այդ թվում` նրանք, ովքեր բեռնատար ավտոմեքենաների, գնացքների շարժակազմերի բեռնաթափումից հետո լքում են ՀՀ տարածքը):

1.5 Վարակի ախտանշանները չհայտնաբերելու դեպքում` օդաչուների հանգիստը կազմակերպելու նպատակով ՀՀ տարածք ժամանող օդանավի անձնակազմի անդամները, ինչպես նաև միջպետական բեռնափոխադրումներ իրականացնող վարորդները Հայաստանի Հանրապետության տարածք մուտք գործելուց հետո ինքնամեկուսացվում են մինչև հաջորդ մեկնումը, իսկ գնացքների մեքենավարները և նրանց ուղեկցողները հերթափոխից հետո մինչև հաջորդ հերթափոխ:

1.6 Վարակակիր անձի հետ համատեղ ապրող անձանց կամ նրա հետ սերտ շփում ունեցած կոնտակտավորների նկատմամբ ինքնամեկուսացման պահանջ ներկայացվում է, իսկ բոլոր ինքնամեկուսացված անձանց նկատմամբ, անկախ ինքնամեկուսացման հիմքից, ինքնամեկուսացման ռեժիմի պահպանման նկատմամբ վերահսկողություն իրականացվում է ՀՀ կառավարության 298-Ն որոշման Հավելվածի 8-րդ բաժնով սահմանված կարգով:

1.7 ՀՀ ժամանող անձինք մինչև ՀՀ սահմանը հատելը պարտավոր են սահմանային անցակետ ներկայացվող այլ փաստաթղթերի հետ միասին ներկայացնել իրենց կողմից ստորագրված Ծանուցագիրը` ինքնամեկուսացման կանոնները խախտելու համար սահմանված պատասխանատվության մասին:

1.8 ՀՀ ժամանող անձինք պարտավոր են ստորագրել ինքնամեկուսացման կանոնները խախտելու համար նախատեսված պատասխանատվության մասին ստորագրված Ծանուցումը:

1.9 Ինքնամեկուսացման ժամանակահատվածում ՀՀ ժամանող անձանց կողմից Ինքնամեկուսացման կանոնները խախտելու դեպքում Առողջապահության նախարարության որոշմամբ ՀՀ ժամանող անձանց ինքնամեկուսացումը կարող է փոխարինվել Առողջապահության նախարարության կողմից սահմանված պարտադիր մեկուսացմամբ` վարակի հնարավոր տարածումը կանխելու նպատակով:

2. Ինքնամեկուսացման և սահմանային անցման գործընթացների կազմակերպման նպատակով`

ՀՀ առողջապահության նախարար Արսեն Թորոսյանին`

2.1 (2.1-ին կետն ուժը կորցրել է 08.07.2020 թվականից` 08.07.20 թիվ 183-Ն որոշում)↩

2.2 ապահովել սահմանային անցակետերում ՍԲՀԿ աշխատակիցների կողմից ժամանած անձանց տրամադրման ենթակա պաշտպանիչ միջոցների առկայությունը` օրվա թողունակության միջին թվին համապատասխան քանակով, մի քանի օրվա հաշվարկով,

2.3 օդային, ցամաքային սահմանային անցակետերում ՍԲՀԿ-ի աշխատակիցների, ինչպես նաև ՀՀ առողջապահական և աշխատանքի տեսչական մարմնի կենտրոնական ապարատի աշխատակիցների համար ապահովել հասանելիություն ԱՐՄԵԴ համակարգին:↩

(2.3-րդ կետը փոփ. 08.07.20 թիվ 183-Ն որոշում)

ՀՀ տարածքային կառավարման և ենթակառուցվածքների նախարար Սուրեն Պապիկյանին`

2.4 (2.4-րդ կետն ուժը կորցրել է 08.07.2020 թվականից` 08.07.20 թիվ 183-Ն որոշում)↩

Առողջապահական և աշխատանքի տեսչական մարմնի ղեկավար Հակոբ Ավագյանին`

2.5 ապահովել սահմանային ՍԲՀԿ-ների աշխատակիցների կողմից ՀՀ ժամանող անձանց հատուկ բժշկական զննությունը` այդ թվում հեռահար ջերմաչափումը, արտաքին զննությունը, վարակին բնորոշ կլինիկական ախտանիշների դեպքում լրացուցիչ հարցումների իրականացումը, և վերջիններիս անհատական պաշտպանության միջոցների` դիմակների տրամադրումը ՀՀ սահմանային անցման բոլոր կետերում,↩

(2.5-րդ կետը փոփ. 08.07.20 թիվ 183-Ն որոշում)

2.6 ապահովել սույն որոշման 2.5 կետով սահմանված գործընթացի արդյունքում արձանագրված ախտանշանների առկայության դեպքում, այդ թվում 37 աստիճան և բարձր ջերմության, անձի անհապաղ հոսպիտալացումը ՍԲՀԿ-ից և ՀՀ առողջապահության նախարարությանը շտապ հաղորդման տրամադրումը` հոսպիտալացումից հետո ոչ ուշ քան տասներկու ժամվա ընթացքում, ինչպես նաև հասցեական քարտերի լրացումը և տրամադրումը ՀՀ առողջապահական և աշխատանքի տեսչական մարմնի կենտրոնական ապարատ,↩

(2.6-րդ կետը փոփ. 08.07.20 թիվ 183-Ն որոշում)

2.7 ապահովել ՀՀ ժամանող անձանց` սույն որոշման 3-րդ հավելվածով հաստատված 14 օրյա ինքնամեկուսացման վերաբերյալ ձևաչափով ծանուցումը և 24 ժամվա ընթացքում ԱՐՄԵԴ համակարգ մուտքագրումը, իսկ ԱՐՄԵԴ համակարգի աշխատանքների խափանման դեպքում ոչ ուշ քան 36 ժամվա ընթացքում: Սույն ենթակետով բացառություն են կազմում բեռնափոխադրող վարորդները, գնացքավարները, նրանց օգնականները և օդանավի անձնակազմի, որոնց ծանուցումը տրվում է և ԱՐՄԵԴ համակարգ է մուտքագրվում նրանց ՀՀ տարածքում կացության օրվան համապատասխան:↩

(2.7-րդ կետը խմբ. 08.07.20 թիվ 183-Ն,  փոփ. 18.08.20 թիվ 254-Ն որոշումներ)

ՀՀ զբոսաշրջության կոմիտեի ղեկավար Սուսաննա Սաֆարյանին`

2.8 (2.8-րդ կետն ուժը կորցրել է 08.07.2020 թվականից` թիվ 183-Ն որոշում)↩

Քաղաքացիական ավիացիայի կոմիտեի նախագահի տեղակալ Գալուստ Պողոսյանին`

2.9. Սույն որոշման 3-րդ հավելվածով սահմանված հասցեական քարտերը տրամադրել ՀՀ օդային սահմանով ՀՀ ժամանող անձանց, ինչպես նաև ապահովել սույն որոշման 3-րդ հավելվածով հաստատված ձևաչափերի լրացումը:

(2.9-րդ կետը լրաց. 08.07.20 թիվ 183-Ն որոշում)

3. Հաստատել ինքնամեկուսացման ենթակա անձանց ինքնամեկուսացումը կազմակերպելու կանոնները` համաձայն հավելված 1-ի:

4. Հաստատել ինքնամեկուսացման կանոնները խախտելու համար նախատեսված պատասխանատվության վերաբերյալ ծանուցագրի ձևը` համաձայն հավելված 2-ի:

4.1. Հաստատել հանրային առողջության պահպանման նպատակով ուղևորի բնակավայրի հասցեական քարտերի ձևերը համաձայն հավելված 3-ի:

(4.1-ին կետը լրաց. 08.07.20 թիվ 183-Ն որոշում)

5. Սույն որոշումն ուժի մեջ է մտնում հրապարակման պահից և տարածվում է 2020 թվականի մայիսի 18-ից ծագած հարաբերությունների նկատմամբ:

Հավելված 1

Ինքնամեկուսացման ենթակա անձանց ինքնամեկուսացումը կազմակերպելու կանոններ

ՀՀ ժամանող անձանց ինքնամեկուսացումը կազմակերպելու նպատակով իրավասու գերատեսչությունները պարտավոր են ապահովել սույն հավելվածով սահմանված կանոններին համապատասխան գործընթացի կազմակերպումն ու իրականացումը:

Թռիչքների կազմակերպման գործընթաց`

1. ՀՀ քաղաքացիների վերադարձը ՀՀ կառավարության կողմից կազմակերպվելու պարագայում ժամանող քաղաքացիների վերաբերյալ տվյալները սահմանված ձևաչափի համաձայն հավաքագրվում և թռիչքից առնվազն 10 ժամ առաջ էլեկտրոնային եղանակով փոխանցվում է ՀՀ պարետին, ՀՀ առողջապահության նախարարություն, ՀՀ ազգային անվտանգության ծառայություն, ՀՀ ոստիկանություն, ՀՀ քաղաքացիական ավիացիայի կոմիտե, ՀՀ ԷՆ զբոսաշրջության կոմիտե, ՀՀ առողջապահական և աշխատանքի տեսչական մարմին:

2. Սահմանված կարգով առևտրային թռիչքներ կազմակերպելու և իրականացնելու թույլտվություն ստացած ավիաընկերություններից սահմանված ձևաչափով տեղեկատվության ստացումը և սույն հավելվածի 1-ին կետով սահմանված ժամկետում նշված մարմիններին, ինչպես նաև ՀՀ արտաքին գործերի նախարարություն ներկայացնելու պարտականությունը կրում է ՀՀ քաղաքացիական ավիացիայի կոմիտեն:

3. Մինչև թռիչքների կազմակերպումը ՀՀ արտաքին գործերի նախարարությունը և ՀՀ քաղաքացիական ավիացիայի կոմիտեն միջոցներ են ձեռնարկում ապահովելու ՀՀ քաղաքացիների և ՀՀ տարածք մուտք գործելու ցանկություն ունեցող անձանց իրազեկումն ինքնամեկուսացման կանոնների և սահմանված ձևաչափով լրացման ենթակա տեղեկատվությունը նախապես տրամադրելու անհրաժեշտության վերաբերյալ:

4. ՀՀ քաղաքացիական ավիացիայի կոմիտեն պարտավոր է բոլոր կոմերցիոն ավիափոխադրողներին տրամադրել ծանուցման թերթիկը և այլ տեղեկատվության թերթիկները չվերթի ժամանակ լրացնելու համար:

Ինքնամեկուսացման կազմակերպման գործընթաց`

5. Առողջապահական և աշխատանքի տեսչական մարմինը, ապահովում է սահմանային բժշկասանիտարական հսկիչ կետերի աշխատակիցների կողմից ՀՀ տարածք մուտք գործող անձանց հատուկ բժշկական զննությունը, այդ թվում իրականացնում է հեռահար ջերմաչափում, արտաքին զննություն, վարակին բնորոշ կլինիկական ախտանիշների դեպքում լրացուցիչ հարցումների իրականացում:

6. Բժշկական զննությունից հետո տեսչական մարմնի ներկայացուցիչների կողմից ուղևորները ծանուցվում են ինքնամեկուսացման կանոնների և դրանց խախտման հետևանքների մասին և վերջիններիս ստորագրման նպատակով տրամադրվում է սահմանված ձևաչափով հաստատված Ծանուցագիր:

7. ՀՀ ԱԱԾ սահմանապահ զորքերի կողմից անձի մուտքը թույլատրվում է բացառապես ստորագրված Ծանուցագրի առկայության դեպքում: Վերջինիս բացակայության պարագայում ՀՀ ժամանած անձը վերադառնում է սպասասրահ և նրան առաջարկվում է ծանոթանալ և ստորագրել Ծանուցագիրը:

8. ՀՀ Առողջապահության նախարարության կողմից ՀՀ բոլոր սահմանային հսկիչ կետերի ժամանման սրահում ապահովվում է վերջինիս ներկայացուցիչների կողմից ՀՀ ժամանած ուղևորների ինքնամեկուսացման գրանցման գործընթաց Արմեդ համակարգի միջոցով, լրացնելով անհրաժեշտ բոլոր դաշտերը:

9. ՀՀ բարձր տեխնոլոգիական արդյունաբերության նախարարությունն ապահովում է ՀՀ բջջային օպերատորների կողմից քարտերի տրամադրումը ՀՀ ժամանող հայկական բջջային քարտ չունեցող բոլոր անձանց:

Օդանավակայանում իրականացվող ծառայությունների գործընթաց

10. «Զվարթնոց» միջազգային օդանավակայանի և «Շիրակի» օդանավակայանի (այսուհետ` Օդանավակայանի) ժամանման սրահում Առողջապահության նախարարությանը տրամադրվում են տարածքներ ՀՀ մուտք գործած անձանց ինքնամեկուսացումը կազմակերպելու համար:

11. Օդանավակայանի տարածք այլ քաղաքացիների և ուղևորների հարազատների մուտքն արգելվում է և մուտքը արգելափակվում է ՀՀ ճանապարհային ոստիկանության կողմից ժամանումից առնվազն 2 ժամ առաջ:

12. Չվերթների իրականացման ընթացքում Օդանավակայանի վարչակազմն ապահովում է ուղևորահոսքերի և հերթերի կառավարումը` ապահովվելով համապատասխան հեռավորություններ ՀՀ առողջապահության նախարարության ներկայացուցիչներից:

13. ՀՀ ԷՆ Զբոսաշրջության կոմիտեն ապահովում է համապատասխան տրանսպորտային միջոցների առկայությունը, լոգիստիկ բաշխվածությունը և ուղեկցողների առկայությունը յուրաքանչյուր ՀՀ ժամանող ուղևորի համար, նրանց ուղեկցում դեպի նախապես նշված ինքնամեկուսացման վայր և գրանցում վերջիններիս իրենց ինքնամեկուսացման տեղանքում, սույն տեղեկատվությունը առցանց ռեժիմով փոխանցելով ՀՀ Առողջապահության նախարարությանը, հիմք ընդունելով, որ Արցախի Հանրապետություն մեկնող քաղաքացիները տեղափոխվում են մինչև ՀՀ և ԱՀ սահման:

Հավելված 2

ԾԱՆՈՒՑԱԳԻՐ
Ինքնամեկուսացման կամ մեկուսացման կանոնները խախտելու համար նախատեսված պատասխանատվության վերաբերյալ

Դուք ծանուցվում եք, որ ինքնամեկուսացման կամ մեկուսացման կանոնները խախտելը առաջացնում է ՀՀ քրեական կամ Վարչական իրավախախտումների վերաբերյալ օրենսգրքերով նախատեսված պատասխանատվություն:

ՀՀ քրեական օրենսգրքի 277.1 հոդվածի և Վարչական իրավախախտումների վերաբերյալ օրենսգրքի 182.3-րդ հոդվածի 10-րդ մասի համաձայն`

Մեկուսացում է համարվում անձանց, այդ թվում` հիվանդի կամ վարակվածի կամ նրանց հետ շփված անձանց (կոնտակտավորների) առանձնացումը դրա համար նախատեսված որոշակի տարածքում` այլ անձանց հետ անմիջական շփումը բացառելու և վարակի տարածումը կանխելու նպատակով:

Ինքնամեկուսացում է համարվում անձանց, այդ թվում` հիվանդի կամ վարակվածի կամ նրանց հետ շփված անձանց (կոնտակտավորների) առանձնացումն իրենց մշտական բնակության կամ իր նախընտրությամբ մեկ այլ վայրում` այլ անձանց հետ անմիջական շփումը սահմանափակելու և վարակի տարածումը կանխելու նպատակով:

ՀՀ քրեական օրենսգրքի 277.1 հոդվածի համաձայն`

Արտակարգ իրավիճակի հիմքով հայտարարված արտակարգ դրության ընթացքում մեկուսացման կամ ինքնամեկուսացման կանոնները կամ ազատ տեղաշարժվելու իրավունքի այլ սահմանափակումները խախտելը` պայմանավորված առաջացրած հետևանքներից (օրինակ` մեկ կամ մի քանի անձի վարակում, վարակելու արդյունքում մարդու առողջությանը ծանր վնասի պատճառում կամ մարդու մահ):

Կարող է պատժվել.

• տուգանքով` առավելագույնը 700.000 ՀՀ դրամի չափով,

• կալանքով` առավելագույնը 3 ամիս ժամկետով,

• ազատազրկմամբ` առավելագույնը 4 տարի ժամկետով,

• կալանքը և ազատազրկումն ուղեկցվում են որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով:

Վարչական իրավախախտումների վերաբերյալ օրենսգրքի 182.3-րդ հոդվածի 10-րդ մասի համաձայն`

Արտակարգ իրավիճակի հիմքով հայտարարված արտակարգ դրության ընթացքում որպես սահմանափակում նախատեսված մեկուսացման կամ ինքնամեկուսացման կանոնները կամ ազատ տեղաշարժվելու իրավունքի այլ սահմանափակումները խախտելը`

• առաջացնում է տուգանքի նշանակում` 100.000-250.000 ՀՀ դրամի չափով:

Ինքնամեկուսացման ռեժիմի խախտման դեպքում ինքնամեկուսացումը կարող է փոխարինվել մեկուսացմամբ` դրա համար նախատեսված որոշակի տարածքում:

ՀՀ սահմանը հատող անձինք պատասխանատվություն են կրում նաև իրենց հետ ժամանող մինչև 16 տարեկան անչափահաս անձանց կողմից ինքնամեկուսացման կանոնները չպահպանելու համար:

Ծանուցումը ներկայացրած պաշտոնատար անձ`

անուն, ազգանուն, ստորագրություն

__________________________________________________

Ծանուցումը ստացող անձ`

անուն, ազգանուն, ստորագրություն

__________________________________________________

ամսաթիվ (օր-ամիս-տարի), հեռախոսահամար, բնակության հասցե « _____» 2020թ.

__________________________________________________________________________

Հավելված N 3
ՀՀ պարետի
2020 թվականի մարտի 18-ի
N 5 որոշման

Ձև 1

Ձև 2

(3-րդ հավելվածը լրաց. 08.07.20 թիվ 183-Ն որոշում)

Ստորագրվել է Տ. Ավինյանի կողմից

18.03.2020 թ.