(ուժը կորցրել է ՀՀ վարչապետի 2020 թվականի մարտի 6-ի թիվ 310-Ն որոշում)
i
030.1080.100402
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ
ՀՐԱՄԱՆԱԳԻՐԸ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՈՍՏԻԿԱՆՈՒԹՅԱՆ ԴՐՈՇԻ ՄԱՍԻՆ
i
Հայաստանի Հանրապետության ներքին գործերի մարմինների ավանդույթների զարգացման, ոստիկանության անձնակազմի ծառայողական պարտքի կատարման հանդեպ պատասխանատվությունն ավելի բարձրացնելու նպատակով որոշում եմ.
1. Հիմնել Հայաստանի Հանրապետության ոստիկանության դրոշ:
2. Հաստատել Հայաստանի Հանրապետության ոստիկանության դրոշի մասին կանոնադրությունն ու դրոշի նկարագրությունը (կցվում են):
3. Սույն հրամանագիրն ուժի մեջ է մտնում պաշտոնական հրապարակման պահից:
(հրամանագիրը փոփ. 15.04.03 ՆՀ-5-Ն հրամանագիր)
10 ապրիլի 2002 թ.
ՆՀ-1080
Հաստատված է
ՀՀ Նախագահի
2002 թ. ապրիլի 10-ի
ՆՀ-1080 հրամանագրով
ԿԱՆՈՆԱԴՐՈՒԹՅՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՈՍՏԻԿԱՆՈՒԹՅԱՆ ԴՐՈՇԻ ՄԱՍԻՆ
1. Հայաստանի Հանրապետության ոստիկանության դրոշը պատվի և արժանապատվության, արիության և նվիրումի խորհրդանիշ է: Դրոշը ոստիկանության յուրաքանչյուր աշխատակցի սրբազան պարտքի հիշեցումն է` Հայրենիքին անձնուրաց ծառայելու, յուրաքանչյուր մարդու կյանքը, իրավունքները, ազատությունները և օրինական շահերը պաշտպանելու, հասարակական կարգը պահպանելու և հասարակական անվտանգությունն ապահովելու մասին:
2. Դրոշը ոստիկանությանը հանձնում է Հայաստանի Հանրապետության Նախագահը կամ նրա կողմից լիազորված անձը:
3. Դրոշի հետ միասին հանձնվում է նաև Հայաստանի Հանրապետության Նախագահի ստորագրությամբ վկայագիր:
4. Դրոշը մշտապես պահվում է Հայաստանի Հանրապետության ոստիկանությունում:
5. Դրոշի պահման, պահպանման և օգտագործման կարգը սահմանում է ոստիկանության պետը:
6. Հայաստանի Հանրապետության ոստիկանության անձնակազմը պարտավոր է պահպանել և պաշտպանել դրոշը:
Հաստատված է
ՀՀ Նախագահի
2002 թ. ապրիլի 10-ի
ՆՀ-1080 հրամանագրով
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՈՍՏԻԿԱՆՈՒԹՅԱՆ ԴՐՈՇԻ ՆԿԱՐԱԳՐՈՒԹՅՈՒՆԸ
Հայաստանի Հանրապետության ոստիկանության դրոշը բաղկացած է երկդեմ պաստառից և ծոպափնջերով քուղերից:
Դրոշի պաստառն ուղղանկյունաձև է, երկարությունը` 1450 մմ, լայնությունը` 1150 մմ:
Կարված է երկտակ մետաքսե մուգ բալագույն կտորից (կտորի գույնի համակարգչային հարաբերակցությունն` M = 100 տոկոս, Y = 20 տոկոս, K = 50 տոկոս)` երեք կողմից երիզված ոսկեգույն ծոպերով: Պաստառի երեսի կողմի վերին ձախ անկյունում պատկերված է Հայաստանի Հանրապետության պետական դրոշը` 500 մմ երկարությամբ և 400 մմ բարձրությամբ: Պաստառի կենտրոնական մասում ոսկեգույն մետաքսաթելով ասեղնագործված են «Հայաստանի Հանրապետության ոստիկանություն» բառերը, տառերի բարձրությունը 7 մմ է, լայնությունը` 5 մմ:
Պաստառի հակառակ կողմի կենտրոնական մասում պատկերված է Հայաստանի Հանրապետության ոստիկանության մետաքսակար խորհրդանիշը` 450 մմ բարձրությամբ և 250 մմ լայնությամբ: Խորհրդանիշի կենտրոնում Հայաստանի Հանրապետության պետական զինանշանն է, որի վերին մասում մակագրված է «ՀՀ» հապավումը, իսկ ստորին մասում` «ՈՍՏԻԿԱՆՈՒԹՅՈՒՆ» հապավումը: Խորհրդանիշի տակ, պաստառի երկայնքով, ոսկեգույն մետաքսաթելով ասեղնագործված են «Հանուն իրավակարգի և օրինականության» բառերը, տառերի բարձրությունը 4 մմ է, լայնությունը` 3 մմ: