040.2146.200103
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«20» հունվարի 2003 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
19 դեկտեմբերի 2002 թվականի N 2146-Ն
i
ՄԱՔՍԱՅԻՆ ԾԱՌԱՅՈՂԻ ԾԱՌԱՅՈՂԱԿԱՆ ՔՆՆՈՒԹՅԱՆ ԱՆՑԿԱՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
«Մաքսային ծառայության մասին» Հայաստանի Հանրապետության օրենքի 23-րդ հոդվածի առաջին մասի 8-րդ կետին համապատասխան` Հայաստանի Հանրապետության կառավարությունը որոշում է.
Հաստատել մաքսային ծառայողի ծառայողական քննության անցկացման կարգը` համաձայն հավելվածի:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2003 ԹՎԱԿԱՆԻ ՀՈՒՆՎԱՐԻ 15-ԻՆ
Հավելված
Հայաստանի Հանրապետության
կառավարության 2002 թվականի
դեկտեմբերի 19-ի N 2146-Ն որոշման
ԿԱՐԳ
ՄԱՔՍԱՅԻՆ ԾԱՌԱՅՈՂԻ ԾԱՌԱՅՈՂԱԿԱՆ ՔՆՆՈՒԹՅԱՆ ԱՆՑԿԱՑՄԱՆ
1. Սույն կարգով սահմանվում է մաքսային ծառայողի ծառայողական քննության անցկացման կարգը:
2. Ծառայողական քննությունը Հայաստանի Հանրապետության օրենսդրությամբ և մաքսային ծառայողի պաշտոնի նկարագրով սահմանված մաքսային ծառայողի կողմից պարտականությունների ու լիազորությունների խախտման, թերացման, չկատարման կամ վերազանցման բացահայտման միջոցառումների ամբողջությունն է:
3. Ծառայողական քննությունն անցկացվում է մաքսային ծառայողի ստորաբաժանման ղեկավարի զեկուցագրի կամ մաքսային ծառայողի «Մաքսային ծառայության մասին» Հայաստանի Հանրապետության օրենքի 23-րդ հոդվածի առաջին մասի 8-րդ կետով նախատեսված պահանջի հիման վրա` վերադաս մաքսային մարմնի ղեկավարի որոշմամբ:
4. Ծառայողական քննություն կարող է անցկացվել նաև մամուլում կամ զանգվածային լրատվության մյուս միջոցներով հրապարակված քննադատության, ինչպես նաև կազմակերպությունների, քաղաքացիների դիմումների և բողոքների հիման վրա` վերադաս մաքսային մարմնի ղեկավարի որոշմամբ:
5. Վերադաս մաքսային մարմնի ծառայողական քննություններ անցկացնող հանձնաժողովի (այսուհետ` հանձնաժողով) նախագահի որոշմամբ` ծառայողական քննության վարույթն իրականացնում է վերադաս մաքսային մարմնի վերահսկողություն իրականացնող ստորաբաժանման աշխատողը կամ աշխատանքային խումբը` ելնելով գործի բնույթից:
6. Կարգապահական պատասխանատվության ենթարկվող մաքսային ծառայողն իրավունք ունի իմանալու, թե ինչում է մեղադրվում, ծանոթանալու իր իրավունքներին և պարտականություններին, ներկայացնելու ապացույցներ, հարուցելու միջնորդություններ, ստանալու իրավաբանական օգնություն:
7. Կարգապահական պատասխանատվության ենթարկվող մաքսային ծառայողը պարտավոր է ժամանակին ներկայանալ հանձնաժողովի, վարույթ իրականացնող աշխատողի (աշխատանքային խմբի) կանչով, տալ ճշմարտացի բացատրություններ:
8. Ծառայողական քննության վարույթ իրականացնող աշխատողը (աշխատանքային խումբը) ծառայողական քննություն անցկացնելիս, անհրաժեշտության դեպքում, հարցումների միջոցով կարող է տեղեկատվություն ստանալ նաև ծառայողական քննության հետ առնչվող այլ անձանցից:
9. Ծառայողական քննության վարույթ իրականացնող աշխատողը (աշխատանքային խումբը) ծառայողական քննության վարույթ անցկացնելիս ծառայողական քննության հետ առնչվող անձանցից վերցնում է բացատրություններ, ուսումնասիրում է գործին վերաբերող փաստաթղթերը, տեղեկանքներն ու այլ նյութեր, անհրաժեշտության դեպքում` պատճենահանում դրանք, կազմում է առաջարկություն և ներկայացնում հանձնաժողովին:
10. Առաջարկությունը քննարկվում է հանձնաժողովի նիստում և տրվում է համապատասխան եզրակացություն, որը ներկայացվում է վերադաս մաքսային մարմնի ղեկավարին:
11. Հանձնաժողովի եզրակացության հիման վրա վերադաս մաքսային մարմնի ղեկավարը ընդունում է համապատասխան որոշում:
12. Ծառայողական քննության կատարման ժամկետը սահմանվում է մինչև 60 օր` հանձնաժողովի որոշմամբ:
Հանձնաժողովի նախագահի առաջարկությամբ վերադաս մաքսային մարմնի ղեկավարի որոշմամբ ծառայողական քննության կատարման ժամկետը, կապված լրացուցիչ ուսումնասիրությունների հետ, կարող է երկարաձգվել մինչև երեսուն օր:
13. Հանձնաժողովի որոշման հիման վրա վերադաս մաքսային մարմնի ղեկավարի որոշումը կարող է բողոքարկվել դատական կարգով: