ՀՀ ԿԵՆՏՐՈՆԱԿԱՆ ԲԱՆԿԻ ՆԱԽԱԳԱՀԻ ՀՐԱՄԱՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԿԵՆՏՐՈՆԱԿԱՆ ԲԱՆԿԻ ՆԱԽԱԳԱՀԻ ՀՐԱՄԱՆԸ

29 օգոոստոսի 1996 թվականի թիվ 400

Հիմք ընդունելով Հայաստանի Հանրապետության կենտրոնական բանկի վարչության 1996 թվականի օգոստոսի 2-ի թիվ 130 «Հայաստանի Հանրապետության կենտրոնական բանկի կողմից բանկերին տրամադրվող վարկերի և բանկերից ներգրավվող ավանդների մասին» որոշումը` հրամայում եմ.

1. Հաստատել «Հայաստանի Հանրապետության տարածքում գործող բանկերի զարգացման, տեխնիկական վերազինման և նոր տեխնոլոգիաների ներդրման նպատակով վարկային գծի բացման» կարգը (կցվում է):

2. Սույն հրամանով հաստատված կարգն ուժի մեջ է մտնում ստորագրման պահից:

ՀԱՍՏԱՏՎԱԾ Է

Հայաստանի Հանրապետության կենտրոնական բանկի նախագահի

1996 թվականի օգոստոսի 29-ի թիվ 400 որոշմամբ

Կ Ա Ր Գ

Հայաստանի Հանրապետության կենտրոնական բանկի կողմից Հայաստանի

Հանրապետության տարածքում գործող բանկերի զարգացման, տեխնիկական

վերազինման նոր տեխնոլոգիաների ներդրման նպատակով վարկային գծի բացման

1. Հայաստանի Հանրապետության կենտրոնական բանկի (այսուհետև` ՀԱՅԱՍՏԱՆԻ ԲԱՆԿ) կողմից Հայաստանի Հանրապետության տարածքում գործող բանկերի (այսուհետև` ԲԱՆԿԵՐ) զարգացման, տեխնիկական և նոր տեխնոլոգիաների ներդրման նպատակով վարկային գիծը բացվում է համաձայն Հայաստանի Հանրապետության կենտրոնական բանկի վարչության (խորհրդի) վարկի հատկացման վերաբերյալ որոշման, սույն կարգի և վարկային գծի բացման գլխավոր պայմանագրի:

2. Վարկային գիծը օգտագործվում է ԲԱՆԿԻ կողմից պայմանագրով սահմանված վարկավորման առավելագույն սահմանաչափի շրջանակներում` վարկային գծի գործելու ցանկացած ժամանակահատվածում:

3. ՀԱՅԱՍՏԱՆԻ ԲԱՆԿԻ վարչության կողմից ԲԱՆԿԻ զարգացման, տեխնիկական վերազինման և նոր տեխնոլոգիաների ներդրման նպատակով վարկի հատկացման վերաբերյալ դրական որոշում ընդունելուց հետո ՀԱՅԱՍՏԱՆԻ ԲԱՆԿԻ և ԲԱՆԿԻ միջև կնքվում է վարկային գծի բացման գլխավոր պայմանագիր, որի անբաժանելի մասն է կազմում կատարվելիք ծախսերի նախահաշիվը: Գրավի առկայության դեպքում կնքվում է նաև գրավադրման պայմանագիր:

4. Յուրաքանչյուր փուլում օգտագործվելիք վարկի գումարի համար ԲԱՆԿԸ ներկայացնում է դիմում և պահանջվող գումարի անհրաժեշտությունը հիմնավորող և իր կողմից կատարված (կատարվելիք) նպատակային ծախսերը հաստատող փաստաթղթեր: Յուրաքանչյուր փուլի համար կնքվում է առանձին վարկային պայմանագիր, որը հանդիսանում է գլխավոր պայմանագրի անբաժանելի մասը:

5. Վարկային գծի գործելու ամբողջ ժամանակահատվածում տոկոսադրույքը կարող է փոփոխվել միայն Հայաստանի Հանրապետության կենտրոնական բանկի վարչության որոշմամբ: Տոկոսադրույքի փոփոխության դեպքում կատարվում է համապատասխան փոփոխություն վարկային գծի բացման գլխավոր պայմանագրում:

6. Վարկի տոկոսագումարների գանձումը կատարվում է փաստացի օգտագործված օրերի դիմաց համաձայն համապատասխան պայմանագրի`

- վարկային գծի ժամկետի վերջին,

- վարկի օգտագործման յուրաքանչյուր փուլի վերջին,

- յուրաքանչյուր եռամսյակը մեկ,

- յուրաքանչյուր ամիսը մեկ:

7. Վարկի և դրա օգտագործման դիմաց հաշվարկված տոկոսագումարների մարման ժամկետը լրանալուց, բանկի թղթակցային հաշվին միջոցների բացակայության կամ անբավարարության դեպքում վարկի չմարված մասը ձևավորվում է որպես ժամկետանց վարկ, իսկ տոկոսագումարների չմարված մասը` ժամկետանց տոկոսագումար:

8. Վարկի տոկոսագումարների հաշվարկը և գանձումը կատարվում է Հայաստանի Հանրապետության կենտրոնական բանկի վարչության 1996 թ. օգոստոսի 2-ի թիվ 130 որոշմամբ հաստատված «Հայաստանի Հանրապետության տարածքում գործող բանկերի զարգացման, տեխնիկական վերազինման և նոր տեխնոլոգիաների ներդրման նպատակով Հայաստանի Հանրապետության կենտրոնական բանկի կողմից վարկերի տրամադրման» կարգի համաձայն:

9. Վարկային գծի պայմանագրի գործողությունը կարող է դադարեցվել`

- կողմերի համաձայնությամբ,

- ՀՀ կենտրոնական բանկի վարչության 1996 թ. օգոստոսի 2-ի թիվ 130

որոշմամբ հաստատված «Հայաստանի Հանրապետության տարածքում գործող

բանկերի զարգացման, տեխնիկական վերազինման և նոր տեխնոլոգիաների

ներդրման նպատակով Հայաստանի Հանրապետության կենտրոնական բանկի

կողմից վարկերի տրամադրման» կարգի 10-րդ կետի համաձայն:

- Հայաստանի Հանրապետության օրենսդրությամբ սահմանված այլ դեպքերում: