ՀԱՄԱՁԱՅՆԱԳԻՐ ՀՀ ԿԱՌԱՎԱՐՈՒԹՅԱՆ ԵՎ ՄԻՋԱԶԳԱՅԻՆ ԳԻՏԱՏԵ ...

ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ՄԻՋԱԶԳԱՅԻՆ ԳԻՏԱՏԵԽՆԻԿԱԿԱՆ ԿԵՆՏՐՈՆԻ ՄԻՋԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՄԻՋԱԶԳԱՅԻՆ ԳԻՏԱՏԵԽՆԻԿԱԿԱՆ ԿԵՆՏՐՈՆԻ ՀԱՅԿԱԿԱՆ ՏԱՐԱԾԱՇՐՋԱՆԱՅԻՆ ԲԱԺԱՆՄՈՒՆՔԻ ՏԵՂԱԿԱՅՄԱՆ ՊԱՅՄԱՆՆԵՐԻ ՄԱՍԻՆ

Հայաստանի Հանրապետության Ազգային ժողովի 1997 թվականի նոյեմբերի 18-ի որոշման հիման վրա Միջազգային գիտատեխնիկական կենտրոնի հիմնադրման մասին Համաձայնագրին Հայաստանի Հանրապետության միանալուց բխող պարտավորությունների համաձայն` Հայաստանի Հանրապետության կառավարությունը և Միջազգային գիտատեխնիկական կենտրոնը, այսուհետ` Կողմեր,

նպատակ ունենալով ավելի լայնորեն ընդգրկել Հայաստանի Հանրապետության գիտնականներին և մասնագետներին այն նախագծերի նախապատրաստման և իրացման գործում, որոնք իրականացվում են Միջազգային գիտատեխնիկական կենտրոնի (այսուհետ` ՄԳՏԿ) գործունեության շրջանակներում, պայմանավորվեցին Հայաստանի Հանրապետությունում ՄԳՏԿ Հայկական տարածաշրջանային բաժանմունքի (այսուհետ` ՄԳՏԿ ՀՏԲ) ստեղծման, տեղակայման պայմանների և գործունեության ապահովման մասին:

ՀՈԴՎԱԾ 1. ՄԳՏԿ ՀՏԲ ԿԱՐԳԱՎԻՃԱԿԸ ԵՎ ԽՆԴԻՐՆԵՐԸ

ՄԳՏԿ ՀՏԲ-ն ՄԳՏԿ-ի տարածաշրջանային ներկայացուցչությունն է, որը հանդիսանում է միջկառավարական կազմակերպություն: ՄԳՏԿ ՀՏԲ-ն գործում է համաձայն Միջազգային գիտատեխնիկական կենտրոնի հիմնադրման մասին Համաձայնագրի և ՄԳՏԿ Կանոնադրության, ինչպես նաև համաձայն սույն Համաձայնագրի: Իր անձեռնմխելիությունների և արտոնությունների ծավալով ՄԳՏԿ ՀՏԲ-ն հավասար կլինի դիվանագիտական առաքելությանը: ՄԳՏԿ ՀՏԲ-ն կլինի իրավաբանական անձ և կունենա իր կնիքը, ընթացիկ և այլ հաշվեհամարներ բանկային հաստատություններում:

ՄԳՏԿ ՀՏԲ հիմնական խնդիրներն են.

- աջակցություն ՄԳՏԿ փաստաթղթերի տարածման գործում,

- նախագծերի վերաբերյալ առաջարկությունների ձևավորման և նրանց իրագործման շուրջ խորհրդատվությունների անցկացում,

- հայ գիտնականների և մասնագետների մասնակցությամբ հայտերի և ֆինանսավորվող նախագծերի վերաբերյալ տվյալների բազայի ստեղծում և պահպանում,

- ուսումնական կուրսերի, գիտատեխնիկական սեմինարների, ինչպես նաև ՄԳՏԿ գործողություններին առնչվող այլ միջոցառումների կազմակերպում և անցկացում,

- աջակցություն նախագծեր իրականացնողներին սարքավորումների ձեռքբերման և ՄԳՏԿ ֆինանսավորմամբ նախագծերի իրականացման գործում Հայաստանի Հանրապետություն առաքվող սարքավորումների մաքսային փաստաթղթերի ձևակերպման գործում,

- ՄԳՏԿ պարտականությունների, ինչպես նաև տեխնիկական և աուդիտորական ստուգումներ իրականացնելու նպատակով ժամանող պատվիրակությունների հետ հանդիպումների կազմակերպում և նրանց ուղեկցում:

ՀՈԴՎԱԾ 2. ՄԳՏԿ ՀՏԲ-Ի ՖԻՆԱՆՍԱԿԱՆ, ՆՅՈՒԹԱԿԱՆ ԵՎ ՏԵԽՆԻԿԱԿԱՆ ԱՋԱԿՑՈՒԹՅՈՒՆ

2.1 Ֆինանսավորումը

ՄԳՏԿ ՀՏԲ-ի գործունեությանը կաջակցեն երկու Կողմերը:

ՄԳՏԿ ՀՏԲ-ի գործունեության համար հայկական Կողմի ծախսերը կատարվում են ամեն տարի գիտության համար Հայաստանի Հանրապետության պետական բյուջեով նախատեսված միջոցներից:

ՄԳՏԿ-ի բյուջեն կծածկի ՄԳՏԿ ՀՏԲ-ի ծախսերի մի մասը, այդ թվում` ՄԳՏԿ ՀՏԲ-ի գործուղումների վճարման, կապի ծառայությունների, համակարգչային տեխնիկայի և ծրագրային ապահովման, ինչպես նաև` գրասենյակային նյութերի, և սարքավորումների վերանորոգման և տեխնիկական սպասարկման ծախսերը:

2.2 Գրասենյակի տարածքները և նյութական ու տեխնիկական աջակցությունը

Հայկական կողմը ՄԳՏԿ ՀՏԲ-ին տրամադրում է կահավորված, հեռախոսակապով ապահովված, բարվոք վիճակում գտնվող ծառայողական տարածքներ, ինչպես նաև ապահովում է այդ տարածքների կոմունալ ծառայությունները և անվտանգությունը: ՄԳՏԿ ՀՏԲ-ն տեղակայվում է Հայաստանի գիտությունների ազգային ակադեմիայի նախագահության շենքում` հետևյալ հասցեով. Հայաստանի Հանրապետություն, ք. Երևան, Մարշալ Բաղրամյան պող. 24, սենյակներ 7 և 8:

ՄԳՏԿ միջոցներով նշված տարածքներում կարող են իրականացնել ներքին վերափոխումներ /որոնք չպետք է փոփոխեն շենքի կառուցվածքային տարրերը/, որոնք ՄԳՏԿ ղեկավարության կարծիքով անհրաժեշտ են ՄԳՏԿ ՀՏԲ գործունեության համար:

Գրասենյակի համար տրամադրված տարածքը ունի 50 քմ ընդհանուր մակերես, որն ապահովում է այցելուներ ընդունելու, ինչպես նաև համակարգչային և բազմացնող տեխնիկայի արդյունավետ օգտագործման և ՄԳՏԿ ՀՏԲ աշխատակիցների ոչ պակաս, քան երեք աշխատատեղի հնարավորություն:

ՀՀ գիտությունների ազգային ակադեմիան ապահովում է ՄԳՏԿ ՀՏԲ տարածքների անվտանգությունը` համաձայն այն շենքի պահպանման ռեժիմի, որտեղ տեղակայված է ՄԳՏԿ ՀՏԲ-ն: ՄԳՏԿ ՀՏԲ ղեկավարը և նրա կողմից լիազորված ՄԳՏԿ ՀՏԲ աշխատակիցներն իրավունք ունեն այցելուներ ընդունել ՄԳՏԿ ՀՏԲ տարածքում` ըստ ՄԳՏԿ ՀՏԲ ղեկավարի և ՀՀ գիտությունների ազգային ակադեմիայի ղեկավարության կողմից պատրաստված հրահանգների: ՄԳՏԿ ՀՏԲ այցելուների համար պատասխանատվությունը կրում է ՄԳՏԿ ՀՏԲ ղեկավարը:

2.3 Տրանսպորտային ծառայություններ

Հայկական Կողմը /սույն Համաձայնագրի 2.1 հոդվածի համաձայն նախատեսված միջոցներից/ ապահովում է ՄԳՏԿ ՀՏԲ-ի տրանսպորտային սպասարկումը` հատկացնելով ավտոմեքենա («Վոլգա» կամ «Ռաֆ» մակնիշի)` համաձայն Հայաստանի Հանրապետությունում տրանսպորտային միջոցների օգտագործման և գրանցման գործող կանոնների:

2.4 Ավտոտրանսպորտի, տարածքների, սարքավորումների և կահույքի օգտագործման

նկատմամբ հսկողությունը

ՄԳՏԿ ՀՏԲ ղեկավարը կամ նրա կողմից նշանակված անձը, համաձայն սույն Համաձայնագրի, կիրականացնի ՄԳՏԿ ՀՏԲ-ին տրամադրված կամ ՄԳՏԿ ՀՏԲ կողմից այլ ճանապարհով ձեռք բերված ավտոտրանսպորտային միջոցների, տարածքների, սարքավորումների և կահույքի օգտագործման նկատմամբ հսկողություն:

2.5 Սարքավորումների շահագործումը, սպասարկումը և վերանորոգումը

Հայաստանի Հանրապետության գիտությունների ազգային ակադեմիան ապահովում է ՄԳՏԿ ՀՏԲ-ին հատկացված տարածքում նրա անձնակազմի համար աշխատանքային լավ պայմաններ:

ՄԳՏԿ ՀՏԲ աշխատակիցների մեղքով ՄԳՏԿ ՀՏԲ տարածքին հասցված վնասի դեպքում վերանորոգումն իրականացվում է ՄԳՏԿ միջոցների հաշվին:

ՄԳՏԿ ՀՏԲ աշխատակիցների մեղքով պիտանիությունը կորցրած սարքավորումների վերանորոգումն իրականացվում է ՄԳՏԿ միջոցների հաշվին:

ՄԳՏԿ ՀՏԲ տարածքներին, սարքավորումներին և տրանսպորտային միջոցներին երրորդ կողմից հասցված վնասի հատուցումը կատարվում է Հայաստանի Հանրապետության գործող օրենսդրությամբ սահմանված կարգով:

2.6 Ապահովագրումը և Կորուստների փոխհատուցումը

ՀՀ գիտությունների ազգային ակադեմիայի կողմից ՄԳՏԿ ՀՏԲ-ին տրամադրված տարածքների և սարքավորումների ապահովագրումն իրականացվում է սույն Համաձայնագրի 2.1 հոդվածի համաձայն` հայկական Կողմից տրամադրվող միջոցների հաշվին: ՄԳՏԿ ՀՏԲ-ի կողմից ձեռք բերված սարքավորումների ապահովագրումն իրականացվում է ՄԳՏԿ-ի հաշվին:

2.7 ՄԳՏԿ ՀՏԲ-ի նյութական աջակցության համար ծախսերը

Հայկական Կողմը 1998 թվականի մայիսի դրությամբ ՄԳՏԿ ՀՏԲ-ին ցուցաբերում է նյութական առաջնային աջակցություն 10.000.000 /տասը միլիոն/ դրամ (1998թ. մայիսի դրությամբ ՀՀ կենտրոնական բանկի կողմից դոլարի նկատմամբ հաստատված կուրսի համաձայն` 20.000 ԱՄՆ դոլար) գումարի չափով:

ՀՈԴՎԱԾ 3. ՄԳՏԿ ՀՏԲ-Ի ԱՆՁՆԱԿԱԶՄԸ

3.1 Անձնակազմի վարձատրությունը

Հայաստանի Հանրապետության կրթության և գիտության նախարարությունը սույն Համաձայնագրի 2.1 հոդվածին համապատասխան` հայկական Կողմից հատկացվող միջոցների հաշվին ժամանակին ապահովում է Հայաստանի Հանրապետության քաղաքացիներ հանդիսացող ՄԳՏԿ ՀՏԲ աշխատակիցների աշխատավարձային ֆոնդի ամբողջական ֆինանսավորումը: ՀՀ քաղաքացիներ հանդիսացող ՄԳՏԿ ՀՏԲ-ի աշխատակիցների վարձատրության պայմանները որոշվում են ՀՀ սոցիալական ապահովության նախարարության համապատասխան դրույթներով` նախատեսելով աշխատանքի բարդության դիմաց դրամական պարգևատրման հնարավորություն:

3.2 Անձնակազմի նշանակումը

ՄԳՏԿ գործադիր տնօրենը ՄԳՏԿ կենտրոնակայանի միջոցով ՄԳՏԿ ՀՏԲ աշխատանքի կարող է ուղարկել ցանկացած աշխատակցի:

ՄԳՏԿ ՀՏԲ աշխատանքային խմբում ընդգրկելու համար Հայաստանի Հանրապետության քաղաքացիների թեկնածությունները Հայաստանի Հանրապետության կրթության և գիտության նախարարության և Հայաստանի Հանրապետության գիտությունների ազգային ակադեմիայի կողմից համատեղ ներկայացվում են ՄԳՏԿ գործադիր տնօրենին: Նշանակումն ուժի մեջ է մտնում ՄԳՏԿ գործադիր տնօրենի հաստատումից հետո:

Անձնակազմի Հայաստանի Հանրապետության քաղաքացի հանդիսացող աշխատակիցների գործունեության հետ կապված բոլոր հարցերը որոշվում են Հայաստանի Հանրապետության օրենսդրությանը համապատասխան:

3.3 Գործունեության հսկողությունը և կարգավորումը

ՄԳՏԿ ՀՏԲ աշխատակիցները ենթարկվում են ՄԳՏԿ գործադիր տնօրենի կարգադրություններին և ցուցումներին, որի լիազորված անձն է հանդիսանում ՄԳՏԿ ՀՏԲ ղեկավարը:

ՄԳՏԿ ՀՏԲ աշխատակիցները ղեկավարվում են ՄԳՏԿ դրույթներով և կանոններով, ինչպես նաև Հայաստանի Հանրապետության աշխատանքային օրենսդրությամբ:

ՀՈԴՎԱԾ 4. ՀԱՄԱՁԱՅՆԱԳՐԻ ԳՈՐԾՈՂՈՒԹՅՈՒՆԸ

Սույն Համաձայնագիրն ուժի մեջ է մտնում դրա ուժի մեջ մտնելու համար անհրաժեշտ հայկական Կողմի ներպետական ընթացակարգերի ավարտի մասին գրավոր ծանուցման պահից:

Սույն Համաձայնագիրը գործում է Միջազգային գիտատեխնիկական կենտրոնի հիմնադրման մասին Համաձայնագրի գործողության ամբողջ ժամանակահատվածի ընթացքում կամ մինչև ՄԳՏԿ Ղեկավարների խորհրդի ՄԳՏԿ ՀՏԲ-ի փակման մասին որոշման ընդունումը կամ մինչև ՄԳՏԿ հիմնադրման մասին համաձայնագրից Հայաստանի Հանրապետության դուրս գալը` կախված նրանից, թե որն է ավելի վաղ տեղի ունեցել:

Միջազգային գիտատեխնիկական կենտրոնի ստեղծման մասին Համաձայնագրի և սույն Համաձայնագրի իրականացման համար հայկական Կողմի հսկողությունը դրվում է Հայաստանի Հանրապետության կրթության և գիտության նախարարության և Հայաստանի Հանրապետության գիտությունների ազգային ակադեմիայի վրա, որոնք համատեղ ՄԳՏԿ-ի հետ կկնքեն լրացուցիչ համաձայնագրեր, որոնք չեն հակասի սույն Համաձայնագրին և կճշգրտեն Կողմերի պարտավորությունները ՄԳՏԿ ՀՏԲ-ի գործունեության աջակցության գործընթացում:

Սույն Համաձայնագրում փոփոխություններ կարող են կատարվել Կողմերից յուրաքանչյուրի նախաձեռնությամբ և երկու Կողմերի համաձայնության առկայության դեպքում:

Սույն Համաձայնագրի որևիցե հոդված կամ մաս չի կարող մեկնաբանվել կամ օգտագործվել ՄԳՏԿ-ի կողմից իրականացվող կամ մատուցվող ծրագրերի հայցողների կամ նախագծեր իրականացնողների, ինչպես նաև Միջազգային գիտատեխնիկական կենտրոնի ստեղծման մասին Համաձայնագրով, ՄԳՏԿ Կանոնադրությամբ, այլ միջազգային համաձայնագրերով և Հայաստանի Հանրապետության օրենսդրությամբ ՄԳՏԿ և ՄԳՏԿ ՀՏԲ ներկայացված անձնակազմի հնարավորությունների և իրավունքների սահմանափակման նպատակով:

Կատարված է Երևան քաղաքում 1998 թվականի հունիսի 15-ին, երկու բնօրինակով, յուրաքանչյուրը` հայերեն, ռուսերեն և անգլերեն: Բոլոր օրինակները հավասարազոր են:

Տեքստերի անհամապատասխանության դեպքում հիմք է ընդունվում Համաձայնագրի անգլերեն տարբերակը:

Համաձայնագիրն ուժի մեջ է մտել 1998 թվականի նոյեմբերի 5-ից: