(ուժը կորցրել է 01.01.99թ` 17.06.98 թիվ ՀՕ-229 օրենք)
i
030.0129.180797
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՕՐԵՆՔԸ
Ընդունված է Ազգային Ժողովի կողմից
«24» հունիսի 1997 թ.
«ԳՐԱՎԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄ ԿԱՏԱՐԵԼՈՒ ՄԱՍԻՆ
i
Հոդված 1. «Գրավի մասին» Հայաստանի Հանրապետության օրենքի 8 հոդվածի առաջին մասը «պայման» բառից հետո լրացնել «/ներառյալ գրավի առարկայի իրացման իրավունքի փոխանցումը գրավառուին և գրավի առարկայի իրացման կարգը գրավառուի կողմից/» բառերով:
Հոդված 2. Օրենքի 46 հոդվածը շարադրել հետևյալ խմբագրությամբ.
i
«Հոդված 46. Գրավի առարկայի վրա բռնագանձում տարածելու,
գրավի առարկայի իրացման իրավունքը փոխանցելու
և գրավի առարկան իրացնելու կարգը
Գրավի առարկայի վրա բռնագանձում տարածվում է դատարանի վճռով` գրավատուի կամ գրավառուի հայցադիմումի հիման վրա:
Առանց դատարանի վճռի, գրավի առարկայի իրացման իրավունքի փոխանցումը և գրավառուի կողմից գրավի առարկայի իրացման կարգը գրավի մասին պայմանագրով նախատեսված լինելու դեպքում, գրավի առարկայի իրացման իրավունքը նոտարական կարգով փոխանցվում է գրավառուին:
Սույն հոդվածով նախատեսված դեպքերում գրավի առարկայի իրացումը կատարվում է մրցութային վաճառքի /աճուրդի/ կամ կոմիսիոն հիմունքներով` օրենքով կամ այլ իրավական ակտերով սահմանված կարգով:
Սույն հոդվածով նախատեսված դեպքերում գրավի առարկայի իրացումից հետո պահանջները բավարարվում են հետևյալ հերթականությամբ`
փոխհատուցվում են գրավի առարկայի բռնագանձման և իրացման հետ կապված ծախսերը.
բավարարվում են գրավառուի պահանջները:
Մնացած միջոցները վերադարձվում են գրավատուին»:
Հոդված 3. Օրենքի 47 հոդվածի տեքստը շարադրել հետևյալ խմբագրությամբ.
i
«Եթե դատարանի որոշմամբ բռնագանձված գրավի առարկայի մրցութային վաճառքը /աճուրդը/ հայտարարվում է չկայացած, ապա գրավառուն իրավունք ունի պահանջել`
ա/ անցկացնել կրկնակի աճուրդ կամ վաճառել գրավի առարկան կոմիսիոն հիմունքներով` գրավի առարկայի գնի իջեցմամբ.
բ/ գրավի պայմանագրում նախատեսված գնով գրավի առարկան հանձնել իրեն կամ իր կողմից նշված անձին` որպես սեփականություն:
Եթե դատարանի որոշմամբ բռնագանձված գրավի առարկան 30 օրվա ընթացքում կոմիսիոն հիմունքներով չի վաճառվում, ապա գրավառուն իրավունք ունի պահանջել`
ա/ երկարաձգել կոմիսիոն վաճառքի ժամկետը ևս 30 օրով կամ վաճառել գրավի առարկան աճուրդով` գրավի առարկայի գնի իջեցմամբ.
բ/ գրավի պայմանագրում նախատեսված գնով գրավի առարկան հանձնել իրեն կամ իր կողմից նշված անձին` որպես սեփականություն:
Սույն հոդվածի առաջին և երկրորդ մասերով նախատեսված դեպքերում գրավի առարկայի գինը յուրաքանչյուր անգամ իջեցվում է գրավի պայմանագրով նախատեսված գնի կամ վերջին աճուրդում առաջարկված գնի կամ վերջին կոմիսիոն գնի 10 տոկոսով, եթե գրավի պայմանագրով գնի իջեցման այլ չափ սահմանված չէ»:
Հոդված 4. Օրենքի 51 հոդվածը հանել:
i
Այդ կապակցությամբ օրենքի 52, 53 և 54 հոդվածները համապատասխանաբար համարել օրենքի 51, 52 և 53 հոդվածներ:
18 հուլիսի 1997 թ.
ՀՕ-129