(ուժը կորցրել է 30.05.02 թիվ 634 որոշում)
i
040.0325.070897
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀ
Լ. ՏԵՐ-ՊԵՏՐՈՍՅԱՆ
«7» ՕԳՈՍՏՈՍԻ 1997 Թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
7 օգոստոսի 1997 թ. թիվ 325
i
ՆԱԽԱԶՈՐԱԿՈՉԱՅԻՆ ԵՎ ԶՈՐԱԿՈՉԱՅԻՆ ՏԱՐԻՔԻ ԱՆՁԱՆՑ ԱՌՈՂՋԱԿԱՆ ՎԻՃԱԿԻ ԳՆԱՀԱՏՄԱՆ, ԲԺՇԿԱԿԱՆ ՓՈՐՁԱՔՆՆՈՒԹՅԱՆ ԱՆՑԿԱՑՄԱՆ ԵՎ ԲԺՇԿԱԿԱՆ ՕԳՆՈՒԹՅԱՆ ՈՒ ՍՊԱՍԱՐԿՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
Համաձայն Հայաստանի Հանրապետության կառավարության 1997 թվականի մայիսի 6-ի «Զինվորական ծառայության նախապատրաստվող անձանց առողջարարական և բուժական միջոցառումների մասին» թիվ 121 որոշման 1-ին կետի «ա» ենթակետի` Հայաստանի Հանրապետության կառավարությունը որոշում է.
1. Հաստատել նախազորակոչային և զորակոչային տարիքի անձանց առողջական վիճակի գնահատման, բժշկական փորձաքննության անցկացման և բժշկական օգնության ու սպասարկման կարգը (կցվում է):
2. Հայաստանի Հանրապետության պաշտպանության նախարարությանը` Հայաստանի Հանրապետության առողջապահության նախարարության հետ համատեղ երկամսյա ժամկետում հաստատել այն հիվանդությունների ցանկը որոնցով տառապող անձինք ազատվում կամ տարկետում են ստանում ժամկետային զինվորական ծառայությունից:
ՀԱՍՏԱՏՎԱԾ Է
ՀՀ ԿԱՌԱՎԱՐՈՒԹՅԱՆ 1997 ԹՎԱԿԱՆԻ
ՕԳՈՍՏՈՍԻ 7-Ի ԹԻՎ 325 ՈՐՈՇՄԱՄԲ
ԿԱՐԳ
i
ՆԱԽԱԶՈՐԱԿՈՉԱՅԻՆ ԵՎ ԶՈՐԱԿՈՉԱՅԻՆ ՏԱՐԻՔԻ ԱՆՁԱՆՑ ԱՌՈՂՋԱԿԱՆ ՎԻՃԱԿԻ ԳՆԱՀԱՏՄԱՆ, ԲԺՇԿԱԿԱՆ ՓՈՐՁԱՔՆՆՈՒԹՅԱՆ ԱՆՑԿԱՑՄԱՆ ԵՎ ԲԺՇԿԱԿԱՆ ՕԳՆՈՒԹՅԱՆ ՈՒ ՍՊԱՍԱՐԿՄԱՆ
1. Սույն կարգի համաձայն բժշկական հսկողության և հաշվառման ենթակա են նախազորակոչային (16-17 տարեկան) և զորակոչային (18-20 տարեկան) տարիքի արական սեռի բոլոր անձինք:
2. 15 տարին լրացած արական սեռի անձինք բժշկական հաշվառման են վերցվում պոլիկլինիկաներում կամ ամբուլատորիաներում ընդհանուր պրակտիկայի թերապևտի կողմից` ըստ բնակության վայրի:
3. 15 տարին լրացած, ինչպես նաև նախազորակոչային և զորակոչային տարիքի անձանց` պոլիկլինիկաներում կամ ամբուլատորիաներում պետական պատվերի շրջանակներում կատարվող բժշկական քննությունները (համաձայն հավելվածի) կազմակերպում են ընդհանուր պրակտիկայի թերապևտները:
4. Ընդհանուր պրակտիկայի թերապևտն իրականացնում է իր կողմից հաշվառման վերցված 15 տարին լրացած, ինչպես նաև նախազորակոչային տարիքի անձանց պարբերական բժշկական քննությունը` դրանց անցկացման ժամանակացույցը համաձայնեցնելով զինվորական կոմիսարիատի, ուսումնական հաստատությունների, անհրաժեշտության դեպքում` տեղական ինքնակառավարման մարմինների, ձեռնարկությունների, հիմնարկների, կազմակերպությունների ղեկավարների հետ:
5. Պարբերական բժշկական քննության ընթացքում հիվանդություն կամ ֆիզիկական թերզարգացում հայտնաբերելու դեպքում 15 տարին լրացած, ինչպես նաև նախազորակոչային տարիքի անձինք ընդհանուր պրակտիկայի թերապևտի կողմից վերցվում են առանձին հաշվառման: Նշված անձանց բուժումը կատարվում է պետական պատվերի շրջանակներում: Հիվանդանոցային պայմաններում բուժումը կազմակերպելու համար հիմք է հանդիսանում ընդհանուր պրակտիկայի թերապևտի կողմից տրված և պոլիկլինիկայի կամ ամբուլատորիայի տնօրենի կողմից կնքված ուղեգիրը:
6. Մինչև զորակոչը տարածքային զինվորական կոմիսարիատը պոլիկլինիկաների կամ ամբուլատորիաների հետ ճշտում է զորակոչի ենթակա անձանց ցուցակները, որոնց հիման վրա պոլիկլինիկաները կամ ամբուլատորիաները զորակոչիկների բժշկական քարտերն ուղարկում են կոմիսարիատ` զորակոչիկների բժշկական քննության անցկացման համար:
7. Զորակոչիկների բժշկական քննության ավարտից հետո զինվորական կոմիսարիատը հիվանդ զորակոչիկների քարտերը վերադարձնում է պոլիկլինիկա կամ ամբուլատորիա` կցելով այն անձանց ցուցակները, որոնք`
ա) Հայաստանի Հանրապետության օրենսդրությամբ սահմանված կարգով առողջական վիճակի պատճառով ճանաչվել են զինվորական ծառայության համար լիովին ոչ պիտանի և հանվել զինվորական հաշվառումից.
բ) Հայաստանի Հանրապետության օրենսդրությամբ սահմանված կարգով առողջական վիճակի պատճառով ճանաչվել են զինվորական ծառայության համար ժամանակավորապես ոչ պիտանի և որոնց տրվել է տարկետում` 3 տարի ժամկետով.
գ) Հայաստանի Հանրապետության օրենսդրությամբ սահմանված կարգով առողջական վիճակի պատճառով ճանաչվել են զինվորական ծառայության համար ժամանակավորապես ոչ պիտանի և որոնց տրվել է տարկետում մինչև 1 տարի ժամկետով:
8. Զորակոչային տարիքի անձանց բժշկական օգնությունը և սպասարկումն իրականացվում է պետական բյուջեի միջոցների հաշվին: Բուժման համար հիմք է հանդիսանում զինվորական կոմիսարիատի բժշկական հանձնաժողովի կողմից տրված և զինվորական կոմիսարի կողմից կնքված ուղեգիրը:
9. 15 տարին լրացած, ինչպես նաև նախազորակոչային և զորակոչային տարիքի անձանց բժշկական հաշվառման, առողջական վիճակի գնահատման, բժշկական փորձաքննության անցկացման, բժշկական օգնության և սպասարկման կազմակերպման համար պատասխանատվությունը կրում են պոլիկլինիկաների կամ ամբուլատորիաների տնօրենները:
10. Սույն կարգի կիրարկման վերաբերյալ գերատեսչական նորմատիվ ակտերը հաստատում են Հայաստանի Հանրապետության առողջապահության նախարարությունը և Հայաստանի Հանրապետության պաշտպանության նախարարությունը:
Հավելված
i
նախազորակոչային և զորակոչային
տարիքի անձանց առողջական վիճակի
գնահատման, բժշկական փորձաքննության
անցկացման և բժշկական օգնության ու
սպասարկման կարգի
Պոլիկլինիկաներում կամ ամբուլատորիաներում պետական պատվերի
շրջանակներում կատարվող բժշկական քննությունները
(հավելվածը խմբ. 08.05.99 թիվ 300 որոշում)
.________________________________________________________________________.
| Տարիքը | Մասնագետները | Հետազոտությունները |
|___________________|_____________________|______________________________|
| 15 տարեկան |Ընդհանուր պրակտիկայի |Ընդհանուր բժշկական զննում, |
| պատանիներ | թերապևտ |մարդաչափություն, պատվաստում, |
| | |շնչաչափություն (սպիրոմետրիա), |
| | |ուժաչափություն (դինամոմետրիա) |
|___________________|_____________________|______________________________|
| 16 տարեկան անձինք |Ընդհանուր պրակտիկայի |Համալիր բժշկական քննություն, |
| (նախազորակոչային |թերապևտ, վիրաբույժ, |մարդաչափություն, պատվաստում, |
| տարիք) | քիթ-կոկորդ-ականջի |շնչաչափություն (սպիրոմետրիա), |
| |մասնագետ, նյարդաբան, |ուժաչափություն (դինամոմետրիա),|
| |ստոմատոլոգ, հոգեբույժ|ֆլյուորոգրաֆիա, արյան խումբ, |
| | մաշկավեներաբան |RH, ցուցումների դեպքում` մեզի |
| | |և արյան կլինիկական քննություն|
|___________________|_____________________|______________________________|
| 17 տարեկան անձինք |Ընդհանուր պրակտիկայի |Համալիր բժշկական քննություն, |
| (նախազորակոչային | թերապևտ |մարդաչափություն, պատվաստում, |
| տարիք) | |շնչաչափություն (սպիրոմետրիա), |
| | |ուժաչափություն (դինամոմետրիա) |
|___________________|_____________________|______________________________|
| 18 տարեկան անձինք |Ընդհանուր պրակտիկայի |Համալիր բժշկական քննություն, |
|(զորակոչային տարիք)|թերապևտ, վիրաբույժ, |մարդաչափություն, պատվաստում, |
| | քիթ-կոկորդ-ականջի |շնչաչափություն (սպիրոմետրիա), |
| |մասնագետ, նյարդաբան, |ուժաչափություն (դինամոմետրիա),|
| |ստոմատոլոգ, հոգեբույժ|ֆլյուորոգրաֆիա, ՄՊՌ, արյան |
| | |խումբ, RH, արյան և մեզի |
| | |ընդհանուր քննություն |
.________________________________________________________________________.