(ուժը կորցրել է 10.09.15 թիվ 1035-Ն որոշում)
i
040.1369.061006
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«6» հոկտեմբերի 2006 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
22 սեպտեմբերի 2006 թվականի N 1369-Ն
ՎԵՐԱԿԱՆԳՆՈՂԱԿԱՆ ՕԳՆՈՒԹՅԱՆ ՏՐԱՄԱԴՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
i
Համաձայն «Սոցիալական աջակցության մասին» Հայաստանի Հանրապետության օրենքի 9-րդ հոդվածի` Հայաստանի Հանրապետության կառավարությունը որոշում է.
1. Հաստատել վերականգնողական օգնության տրամադրման կարգը` համաձայն հավելվածի:
2. Հայաստանի Հանրապետության աշխատանքի և սոցիալական հարցերի նախարարին` մեկամսյա ժամկետում հաստատել սոցիալ-հոգեբանական անհատական վերականգնողական ծրագրի ձևը:
3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2006 ԹՎԱԿԱՆԻ ՀՈԿՏԵՄԲԵՐԻ 4-ԻՆ
Հավելված
ՀՀ կառավարության
2006 թվականի սեպտեմբերի 22-ի
N 1369-Ն որոշման
ԿԱՐԳ
ՎԵՐԱԿԱՆԳՆՈՂԱԿԱՆ ՕԳՆՈՒԹՅԱՆ ՏՐԱՄԱԴՐՄԱՆ
I. ԸՆԴՀԱՆՈՒՐ ԴՐՈՒՅԹՆԵՐ
1. Սույն կարգով սահմանվում են կյանքի դժվարին իրավիճակում հայտնված քաղաքացիների (այսուհետ` հաճախորդ) վերականգնողական օգնության տրամադրման հետ կապված հարաբերությունները:
i
2. Պրոթեզաօրթոպեդիկ պարագաների, վերականգնողական տեխնիկական կամ այլ միջոցների տրամադրումն իրականացվում է համաձայն Հայաստանի Հանրապետության կառավարության 2003 թվականի դեկտեմբերի 24-ի «Պրոթեզաօրթոպեդիկ պարագաների, վերականգնողական տեխնիկական կամ այլ միջոցների տրամադրման կարգը հաստատելու մասին» N 1780-Ն որոշման:
3. Վերականգնողական օգնությունը տրամադրվում է հաճախորդին սոցիալ-հոգեբանական անհատական վերականգնողական ծրագրի համաձայն:
4. Սոցիալական ծառայությունների տարածքային գործակալությունը (այսուհետ` գործակալություն) անձի կամ նրա ներկայացուցչի դիմումի հիման վրա, Հայաստանի Հանրապետության օրենսդրությամբ սահմանված կարգով, սոցիալական աջակցություն տրամադրելու մասին որոշում ընդունելու դեպքում կազմում է հաճախորդի սոցիալ-հոգեբանական վերականգնողական անհատական ծրագիր (այսուհետ` ծրագիր)` ղեկավարվելով «Սոցիալական աջակցության մասին» Հայաստանի Հանրապետության օրենքով սահմանված սոցիալական աջակցության կազմակերպման և տրամադրման սկզբունքներով:
5. Գործակալությունը ծրագրերը հաշվառում է սոցիալ-հոգեբանական վերականգնողական անհատական ծրագրերի հաշվառման գրանցամատյանում, որտեղ նշվում են ծրագրի հերթական համարը, ծրագրի կազմման ամսաթիվը, հաճախորդի անունը, ազգանունը և բնակության վայրը:
6. Գործակալությունը հաճախորդին կամ նրա օրինական ներկայացուցչին ծանոթացնում է ծրագրով նախատեսված միջոցառումների, հաճախորդի իրավունքների և պարտականությունների հետ:
7. Հաճախորդը ծրագրից կամ ծրագրով նախատեսված որոշակի ծառայություններն ստանալիս կարող է հրաժարվել միայն գրավոր, որի մասին ծրագրում կատարվում է գրառում: Միաժամանակ հաճախորդին զգուշացվում է դրա հնարավոր հետևանքների մասին:
8. Ծրագիրն ընդգրկում է հաճախորդի սոցիալական խնդիրների նկարագիրը և դրանց լուծման հնարավոր ուղիներն ու եղանակները:
9. Ծրագրում առաջարկվող սոցիալական ծառայությունների տեսակներն ու ձևերն ընտրվում են անձի պահանջմունքներին համապատասխան և համարժեք` ապահովելով դրանց շարունակականությունը:
10. Ծրագրի նպատակը հաճախորդի հիմնական պահանջմունքները հնարավորինս բավարարելն է, նրա ինքնօգնության և խնդիրներն ինքնուրույն լուծելու ունակությունների զարգացմանը խթանելն է, ինչպես նաև նրա սոցիալական և ֆինանսական խնդիրների լուծմանն օժանդակելն է:
11. Գործակալությունը ծրագիրն իրականացնում է ինքնուրույն կամ համագործակցելով համապատասխան կազմակերպությունների հետ, որի մասին նշվում է ծրագրում:
II. ՍՈՑԻԱԼ-ՀՈԳԵԲԱՆԱԿԱՆ ԱՆՀԱՏԱԿԱՆ ՎԵՐԱԿԱՆԳՆՈՂԱԿԱՆ ԾՐԱԳՐԻ ԿԱԶՄՈՒՄԸ
12. Գործակալությունը հաճախորդի դիմելուց հետո 15-օրյա ժամկետում կազմակերպում է տնային այցելություն և գնահատում նրա սոցիալական խնդիրներն ու կարիքները և դրանք ամրագրում ծրագրում:
13. Գործակալությունը պարզում է հաճախորդի`
ա) կենսաթոշակի իրավունքի հարցը, այն իրացված չլինելու դեպքում, հաճախորդին է ուղղորդում Հայաստանի Հանրապետության սոցիալական ապահովագրության պետական հիմնադրամի տարածքային մարմին.
բ) գործազրկության դեպքում սոցիալական պաշտպանության իրավունքի հետ կապված հարցը և այն իրացված չլինելու դեպքում նրան ուղղորդում է զբաղվածության պետական ծառայություն.
գ) խնամք ստանալու իրավունքի հարցը և դրա կարիքն ունենալու դեպքում կազմակերպում է խնամքի տրամադրումը տնային պայմաններում կամ բնակչության սոցիալական պաշտպանության հաստատություններում կամ սոցիալ-վերականգնողական ցերեկային կենտրոններում` Հայաստանի Հանրապետության օրենսդրությամբ սահմանված կարգով.
դ) կրթության առանձնահատուկ պայմանների կարիք ունենալու հանգամանքը և նրան ներկայացնում է բժշկահոգեբանամանկավարժական գնահատման.
ե) Հայաստանի Հանրապետության օրենսդրությամբ սահմանված արտոնություններից օգտվելու կամ դրանց դիմաց դրամական օգնություն ստանալու իրավունքը և այն իրացված չլինելու դեպքում նրան ուղղորդում է իրավասու մարմին.
զ) առողջապահական կազմակերպություններում պետության կողմից երաշխավորված ամենամյա առողջապահական պետական նպատակային ծրագրերի շրջանակներում անվճար բժշկական օգնություն ու սպասարկում ստանալու իրավունքի հարցը և տրամադրում տեղեկանք ընտանիքի անապահովության միավորի մասին:
14. Հաճախորդի մոտ օրգանիզմի ֆունկցիաների խանգարումների առկայության դեպքում գործակալությունը նրան ուղղորդում է իր բնակության վայրի ամբուլատոր-պոլիկլինիկական բժշկական հաստատություն` բժշկասոցիալական փորձաքննության ուղեգրման համար:
i
15. Ընտանեկան նպաստի համար հաճախորդի դիմելու դեպքում գործակալությունն իրականացնում է Հայաստանի Հանրապետության կառավարության 2006 թվականի հունվարի 12-ի «Ընտանեկան նպաստի և միանվագ դրամական օգնության նշանակման և վճարման կարգը հաստատելու մասին» N 110-Ն որոշմամբ սահմանված լիազորությունները:
i
16. Գործակալությունը պարզում է հաճախորդի բնաիրային օգնություն ստանալու իրավունքի հարցը և իրականացնում Հայաստանի Հանրապետության կառավարության 2006 թվականի հունիսի 22-ի «Բնաիրային օգնության տրամադրման կարգը սահմանելու մասին» N 958-Ն որոշմամբ իրեն վերապահված լիազորությունները:
i
17. Գործակալությունն ուսումնասիրում է առանց ծնողական խնամքի մնացած երեխաների թվին պատկանող հաճախորդի բնակարանային ապահովության իրավունքը և իրականացնում Հայաստանի Հանրապետության կառավարության 2003 թվականի հուլիսի 23-ի «Առանց ծնողական խնամքի մնացած երեխաներին բնակարան տրամադրելու կարգը հաստատելու մասին» N 983-Ն որոշմամբ սահմանված լիազորությունները:
i
18. Գործակալությունն ուսումնասիրում է Հայաստանի Հանրապետությունում բնակվող փախստականների բնակարանային պայմանները և իրականացնում Հայաստանի Հանրապետության կառավարության 1997 թվականի օգոստոսի 9-ի «Հայաստանի Հանրապետությունում բնակարանի կարիք ունեցող փախստականների հաշվառման և բնակելի տարածությունների հատկացման կարգը հաստատելու մասին» N 330 որոշմամբ սահմանված լիազորությունները:
19. Գործակալությունը սույն կարգի 13-18-րդ կետերով սահմանված լիազորությունների իրականացման մասին համապատասխան գրառումներ է կատարում ծրագրում:
20. Գործակալությունը հաշմանդամ հաճախորդի սոցիալ-հոգեբանական վերականգնողական անհատական ծրագրում ներառում է հաշմանդամի համար Հայաստանի Հանրապետության բժշկասոցիալական փորձաքննության գործակալության հաստատած վերականգնողական անհատական ծրագիրը:
21. Հաճախորդի` սույն կարգի 20-րդ կետով սահմանված ծրագրով տրամադրվող սոցիալական ծառայություններից գրավոր հրաժարվելու դեպքում գործակալությունը մեկշաբաթյա ժամկետում գրավոր տեղեկացնում է բժշկասոցիալական փորձաքննության գործակալության համապատասխան տարածքային մարմնին:
22. Ծրագրում նշվում են սոցիալական ծառայության տեսակը, տրամադրման ժամկետի սկիզբը, եթե այն տրամադրվում է ժամկետով, ապա դրա ավարտը, կատարողը, ծառայության տրամադրման արդյունքը, այն չիրականացվելու դեպքում դրա պատճառը, առաջարկություն այլ ծառայություններ տրամադրելու մասին, շարունակական վերահսկման ժամկետները:
23. Ծրագրով սահմանված շարունակական վերահսկման ժամկետներում գործակալությունն ուսումնասիրում է ծրագրով նախատեսված միջոցառումների իրականացման ընթացքը և արդյունքների մասին նշում ծրագրում:
III. ՍՈՑԻԱԼ-ՀՈԳԵԲԱՆԱԿԱՆ ՎԵՐԱԿԱՆԳՆՈՂԱԿԱՆ ԱՆՀԱՏԱԿԱՆ ԾՐԱԳՐԻ ԻՐԱԿԱՆԱՑՈՒՄԸ
24. Գործակալությունը կազմակերպում է ծրագրով նախատեսված միջոցառումների իրականացումն ամբուլատոր-պոլիկլինիկական բժշկական հաստատության, կրթություն իրականացնող կազմակերպությունների, սոցիալական ապահովագրության տարածքային մարմինների, Հայաստանի Հանրապետության աշխատանքի և սոցիալական հարցերի նախարարության «Զբաղվածության պետական ծառայություն» գործակալության տարածքային կենտրոնների հետ:
25. Գործակալությունը ծրագրով նախատեսված միջոցառումների իրականացման ընթացքի մասին տեղեկանում է ծրագրով շարունակական վերահսկողության սահմանված ժամկետներում` հաճախորդի և (կամ) համապատասխան կազմակերպությունների հետ հանդիպումների ժամանակ` դրա մասին ծրագրում կատարելով գրառումներ:
26. Հաշմանդամի վերականգնողական անհատական ծրագրով նախատեսված միջոցառումների իրականացման մասին դրանք իրականացրած կազմակերպությունները հաշմանդամի վերականգնողական անհատական ծրագրում կատարում են համապատասխան գրառում:
IV. ՎԵՐԱԿԱՆԳՆՈՂԱԿԱՆ ԱՆՀԱՏԱԿԱՆ ԾՐԱԳՐԻ ԻՐԱԿԱՆԱՑՈՒՄԸ ՍՈՑԻԱԼԱԿԱՆ ԾԱՌԱՅՈՒԹՅՈՒՆՆԵՐ ՄԱՏՈՒՑՈՂ ԿԱԶՄԱԿԵՐՊՈՒԹՅՈՒՆՆԵՐԻ ԿՈՂՄԻՑ
27. Հաճախորդի պահանջմունքներին համապատասխան` պետական ծրագրերում չներառված սոցիալական ծառայության տրամադրման անհրաժեշտության դեպքում, գործակալությունը տվյալ հաճախորդի ծրագիրը ներկայացնում է սոցիալական աջակցության խորհրդի քննարկմանը և դիմում սոցիալական ծառայություններ մատուցող այն կազմակերպությանը, որը կարող է մատուցել անհրաժեշտ ծառայությունը:
28. Գործակալությունը հաճախորդի սոցիալական խնդիրների լուծման ընթացքում համագործակցում է նրա բնակության վայրի տեղական ինքնակառավարման մարմնի հետ, որն իր լիազորությունների շրջանակներում նպաստում է հաճախորդի հասարակությանն ինտեգրվելուն, սոցիալական մեկուսացման կանխարգելմանը և նմանատիպ այլ խնդիրների լուծմանը:
V. ՎԵՐԱԿԱՆԳՆՈՂԱԿԱՆ ՕԳՆՈՒԹՅՈՒՆ ՏՐԱՄԱԴՐՈՂ ԿԱԶՄԱԿԵՐՊՈՒԹՅՈՒՆՆԵՐԸ
29. Բժշկական վերականգնման օգնությունը տրամադրվում է համապատասխան բուժօգնության տեսակ իրականացնող հանրապետական, մարզային, քաղաքային և համայնքային բժշկական հաստատություններում, վերականգնողական կենտրոններում և առողջարաններում` անկախ դրանց կազմակերպական-իրավական ձևից:
30. Հոգեբանական վերականգնման օգնությունը տրամադրվում է հոգեբանական օգնություն տրամադրող մասնագիտացված հաստատություններում, ինչպես նաև հանրապետական, մարզային, քաղաքային և համայնքային բժշկական հաստատություններում և վերականգնողական կենտրոններում (անկախ դրանց կազմակերպական-իրավական ձևից) գործող հոգեբանական ծառայությունների կողմից:
31. Մասնագիտական վերականգնման օգնությունը տրամադրվում է`
ա) Հայաստանի Հանրապետության աշխատանքի և սոցիալական հարցերի նախարարության «Զբաղվածության պետական ծառայություն» գործակալությունում և նրա տարածքային մարմիններում.
բ) միջին մասնագիտական և պետական բարձրագույն ուսումնական հաստատություններում.
գ) կադրերի վերապատրաստման և որակավորման բարձրացման գործառույթներ իրականացնող կազմակերպություններում: