ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎ
ՈՐՈՇՈՒՄ
21 դեկտեմբերի 2007 թվականի N 187
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԸՆՏՐԱԿԱՆ ՕՐԵՆՍԳՐՔԻ 41-ՐԴ ՀՈԴՎԱԾԻ 1-ԻՆ ԿԵՏԻ 18-ՐԴ ԵՆԹԱԿԵՏԻ ԵՎ 72-ՐԴ ՀՈԴՎԱԾԻ 2-ՐԴ ԿԵՏԻ ՏԱՐԱԲՆՈՒՅԹ ԸՆԿԱԼՈՒՄԸ ԲԱՑԱՌԵԼՈՒ ՆՊԱՏԱԿՈՎ ՊԱՇՏՈՆԱԿԱՆ ՊԱՐԶԱԲԱՆՄԱՆ ՄԱՍԻՆ
Հայաստանի Հանրապետության ընտրական օրենսգրքի 41-րդ հոդվածի 1-ին կետի 18-րդ ենթակետի և 72-րդ հոդվածի 2-րդ կետի դրույթների տարաբնույթ ընկալումը բացառելու նպատակով և հիմք ընդունելով այն, որ.
1. Հանրապետության Նախագահի թեկնածու առաջադրված քաղաքացիները, Հանրապետության Նախագահի թեկնածուի կարգավիճակ ստանում են Հայաստանի Հանրապետության ընտրական օրենսգրքի 89-րդ հոդվածի 3-րդ կետով սահմանված ժամկետում որպես Հանրապետության Նախագահի թեկնածու գրանցվելու վերաբերյալ Հայաստանի Հանրապետության կենտրոնական ընտրական հանձնաժողովի համապատասխան որոշումն ուժի մեջ մտնելուց հետո:
2. Հայաստանի Հանրապետության ընտրական օրենսգրքի 67-րդ և 68-րդ հոդվածները սահմանում են այն փաստաթղթերի ցանկը, որ անհրաժեշտ է ներկայացնել Հանրապետության Նախագահի թեկնածու առաջադրվելու համար, իսկ Հայաստանի Հանրապետության ընտրական օրենսգրքի 72-րդ հոդվածը սպառիչ թվարկում է Հանրապետության Նախագահի թեկնածու առաջադրված քաղաքացիների իրավունքները, որպես Հանրապետության Նախագահի թեկնածու գրանցվելու համար անհրաժեշտ փաստաթղթերի ցանկը:
3. Հայաստանի Հանրապետության Սահմանադրության 5-րդ հոդվածի համաձայն Հայաստանի Հանրապետության կենտրոնական ընտրական հանձնաժողովն իրավասու է Հանրապետության Նախագահի թեկնածու առաջադրված քաղաքացիներից պահանջել և ստանալ Հայաստանի Հանրապետության ընտրական օրենսգրքի 72-րդ հոդվածի 2-րդ կետում ամրագրված փաստաթղթերը, իսկ թեկնածու առաջադրված քաղաքացիներին Հայաստանի Հանրապետության ընտրական օրենսգրքով սահմանված կարգով և ժամկետներում որպես Հանրապետության Նախագահի թեկնածու գրանցելու վերաբերյալ որոշումներն ուժի մեջ մտնելուց հետո Հայաստանի Հանրապետության ընտրական օրենսգրքի 41-րդ հոդվածի 1-ին կետի 18-րդ ենթակետի համաձայն կազմակերպել նրանց կենսագրական տվյալների հրապարակումը:
Հայաստանի Հանրապետության կենտրոնական ընտրական հանձնաժողովը «Իրավական ակտերի մասին» Հայաստանի Հանրապետության օրենքի 87-րդ հոդվածի 2-րդ մասի «դ» կետի համաձայն պարզաբանում է.
1. Հայաստանի Հանրապետության ընտրական օրենսգրքի 41-րդ հոդվածի 1-ին կետի 18-րդ ենթակետի դրույթը չի կարող վերաբերել Հանրապետության Նախագահի թեկնածու առաջադրված քաղաքացիներին:
2. Հայաստանի Հանրապետության ընտրական օրենսգրքի 72-րդ հոդվածի 2-րդ կետի դրույթները պետք է ընկալել դրանցում պարունակող բառերի տառացի նշանակությամբ` հաշվի առնելով Հայաստանի Հանրապետության ընտրական օրենսգրքի պահանջները և չփոխելով դրանց իմաստը: