ՀԱՄԱՁԱՅՆԱԳԻՐ ՏՐԱՆՍՊՈՐՏԱՅԻՆ ՍԱԿԱԳՆԵՐԻ ՈՐՈՇՄԱՆ ԲՆԱԳԱ ...

ՀԱՄԱՁԱՅՆԱԳԻՐ
ՏՐԱՆՍՊՈՐՏԱՅԻՆ ՍԱԿԱԳՆԵՐԻ ՈՐՈՇՄԱՆ ԲՆԱԳԱՎԱՌՈՒՄ ՀԱՄԱՁԱՅՆԵՑՎԱԾ ՔԱՂԱՔԱԿԱՆՈՒԹՅՈՒՆ ԱՆՑԿԱՑՆԵԼՈՒ ՄԱՍԻՆ

Սույն Համաձայնագրի մասնակից պետությունները ի դեմս Կառավարությունների, այսուհետ` Կողմեր,

ղեկավարվելով Տնտեսական միության ստեղծման մասին 1993 թվականի սեպտեմբերի 24-ի` Պայմանագրի դրույթներով,

գիտակցելով Համագործակցության մասնակից պետությունների ընդհանուր տնտեսական տարածքի արդյունավետ տրանսպորտային ապահովման օբյեկտիվ անհրաժեշտությունը, որը հիմնված է ապրանքների, ծառայությունների, աշխատուժի և կապիտալի ազատ տեղաշարժման վրա,

ձգտելով կիրառվող սակագներով խթանել Համագործակցության մասնակից պետությունների տնտեսությունների աճը,

գիտակցելով փոխընդունելի գործողությունների անցկացման կարևորությունը և անհրաժեշտությունը ուղևորների և բեռների փոխադրման արդյունավետ ապահովման համար,

համաձայնեցին ներքոհիշյալի մասին.

ՀՈԴՎԱԾ 1

Սույն Համաձայնագրի նպատակների համար ներքոհիշյալ հասկացություններն ունեն հետևյալ նշանակությունը.

«միջազգային հաղորդակցություն ԱՊՀ մասնակից պետությունների հետ»` բեռների և ուղևորների փոխադրում սույն Համաձայնագրի մասնակից պետությունների միջև,

«միջազգային հաղորդակցություն երրորդ երկրների հետ»` բեռների և ուղևորների փոխադրում սույն Համաձայնագրի մասնակից պետություններից դեպի երրորդ երկրներ և հետ:

ՀՈԴՎԱԾ 2

Սույն Համաձայնագրի մասնակից պետությունների սակագների տարածքի տակ հասկացվում է այն տարածքը, որտեղ գործում են միջազգային փոխադրումների համար սակագնային քաղաքականության ձևավորման և կիրառման համաձայնեցված սկզբունքները:

ՀՈԴՎԱԾ 3

ԱՊՀ մասնակից պետությունների հետ միջազգային հաղորդակցության մեջ տրանսպորտային սակագների բնագավառում համաձայնեցված քաղաքականության մշակման նպատակով, Կողմերը համապատասխան մարմիններին կհանձնարարեն.

սակագների քաղաքականության կարգավորման համար միջոցառումների համալիրի մշակումը` ուղղված ապրանքների և ուղևորների ազատ տեղաշարժի ապահովմանը,

հաշվի առնելով տրանսպորտային շուկայի կոնյուկտուրան և ճանապարհատրանսպորտային համալիրի տնտեսական շահերը և փոխհաշվարկների համակողմանի կարգավորման անհրաժեշտությունը, սակագների ձևավորումը` ելնելով Կողմերի ազգային շահերից,

սակագների միջանցքների սահմանումը, հաշվի առնելով Կողմերի օրենսդրությունները, առանձին բեռների փոխադրման համար:

Երկաթուղային տրանսպորտի բնագավառում գործում է ԱՊՀ Կառավարությունների ղեկավարների Խորհրդի 1996 թվականի հոկտեմբերի 18-ի` Որոշումը ԱՊՀ մասնակից պետությունների երկաթուղային տրանսպորտում համաձայնեցված սակագների քաղաքականության հաստատման մասին հայեցակարգը:

ՀՈԴՎԱԾ 4

Որպես ԱՊՀ մասնակից պետությունների հետ միջազգային հաղորդակցության սակագների կառավարման համակարգի իրականացմանն ուղղված առաջնահերթ միջոցառումներ, Կողմերը.

մշակում են համապատասխան նորմատիվ-իրավական հիմք, որը կարգավորում է ԱՊՀ մասնակից պետությունների միջև միջազգային հաղորդակցության տրանսպորտի ծառայությունների գնագոյացման սկզբունքները,

իրականացնում են բեռների փոխադրման պայմանների դյուրացմանն ուղղված մաքսային քաղաքականություն:

ՀՈԴՎԱԾ 5

Համաձայնեցված սակագների քաղաքականության ապահովման նպատակով Կողմերը ձեռնարկում են միջոցառումներ, ուղղված`

փոխհատուցման հիմունքներով փոխադրումների վճարմանը, այդ թվում` տրանսպորտի զարգացման համար բեռնատերերի կատարած ներդրումների մասնակցության հաշվին,

բեռնատար փոխադրումների շահագործման տրանսպորտային ծախսերի նվազեցմանը և ուղևորատար փոխադրումների ծախսածածկմանը, որոնք ստացվում են ֆինանսական տարբեր աղբյուրների հաշվին,

հետադարձ վճարումների մեխանիզմի մշակմանը և համաձայնեցմանը:

ՀՈԴՎԱԾ 6

Համաձայնեցված սակագների քաղաքականության ձևավորումը իրականացվում է փուլերով` վճարման դրույքների ստեղծման, դրանց տարբերակման սկզբունքների, չափերի համաձայնեցման, կիրառման կանոնների միասնականացման ընթացակարգերի կատարելագործման նկատմամբ ընդհանուր մոտեցումների հիման վրա:

ՀՈԴՎԱԾ 7

Տրանսպորտային սակագների որոշման բնագավառում համաձայնեցված քաղաքականության համակարգող մարմիններն են Անկախ Պետությունների Համագործակցության Կառավարությունների ղեկավարների Խորհուրդը, Տնտեսական միության Միջպետական տնտեսական կոմիտեն, տրանսպորտի բնագավառում միջպետական (միջկառավարական) համագործակցության մարմինները, երկաթուղային փոխադրումների համար` Համագործակցության մասնակից պետությունների երկաթուղային փոխադրողների սակագնային Համաժողովը:

ՀՈԴՎԱԾ 8

Կողմերը միջոցներ են ձեռնարկում գնագոյացման բնագավառում ազգային օրենսդրական ակտերի ներդաշնակեցման ուղղությամբ:

ՀՈԴՎԱԾ 9

Կողմերն իրենց իրավունք են վերապահում անկախ և ինքնուրույն որոշելու սակագների քաղաքականության պայմաններն ու ձևերը սույն Համաձայնագրին չմասնակցող պետությունների հետ:

ՀՈԴՎԱԾ 10

Կողմերի փոխադարձ համաձայնությամբ սույն Համաձայնագրում կարող են կատարվել փոփոխություններ և լրացումներ:

ՀՈԴՎԱԾ 11

Սույն Համաձայնագիրն ուժի մեջ է մտնում այն ստորագրած Կողմերի կողմից Համաձայնագրի ուժի մեջ մտնելու համար բոլոր անհրաժեշտ` ներպետական ընթացակարգերի կատարման մասին երրորդ ծանուցումը ավանդապահին ի պահ հանձնելու օրվանից:

Ներպետական ընթացակարգերն ավելի ուշ կատարած Կողմերի համար այն ուժի մեջ է մտնում ծանուցումը ավանդապահին ի պահ հանձնելու օրվանից:

ՀՈԴՎԱԾ 12

Բոլոր Կողմերի համաձայնությամբ սույն Համաձայնագրին կարող է միանալ ցանկացած պետություն, որն ընդունում է սույն Համաձայնագրի նպատակներն ու սկզբունքները` ավանդապահին այդպիսի միացման փաստաթղթերի հանձնման միջոցով: Միացումը համարվում է ուժի մեջ մտած ավանդապահի կողմից նման միացման համաձայնության վերաբերյալ վերջին հաղորդագրությունը ստանալու օրվանից:

ՀՈԴՎԱԾ 13

Սույն Համաձայնագրի կիրառման կամ մեկնաբանման հետ կապված վիճելի հարցերը կարգավորվում են շահագրգիռ Կողմերի միջև խորհրդակցությունների և բանակցությունների միջոցով:

ՀՈԴՎԱԾ 14

Յուրաքանչյուր Կողմ կարող դուրս գալ սույն Համաձայնագրից` այդ մասին դուրս գալուց առնվազն վեց ամիս առաջ գրավոր ծանուցում ուղարկելով ավանդապահին:

ՀՈԴՎԱԾ 15

Սույն Համաձայնագիրը գործում է այն ուժի մեջ մտնելուց հետո հինգ տարվա ընթացքում: Այդ ժամկետի լրանալուց հետո Համաձայնագիրը ինքնաբերաբար կերկարաձգվի հետագա հինգ տարիների համար, եթե Կողմերը այլ որոշում չընդունեն:

Կատարված է Մոսկվա քաղաքում 1997 թվականի հունվարի 17-ին, մեկ բնօրինակով` ռուսերեն: Բնօրինակը պահվում է Անկախ Պետությունների Համագործակցության Գործադիր քարտուղարությունում, որը սույն Համաձայնագիրը ստորագրած յուրաքանչյուր պետությանը կուղարկի դրա հաստատված պատճենը:

* Համաձայնագիրը Հայաստանի Հանրապետության համար ուժի մեջ է մտել 2000 թվականի նոյեմբերի 9-ից: