ՕՐԳԱՆԱԿԱՆ ԳՅՈՒՂԱՏՆՏԵՍՈՒԹՅԱՆ ԱՆՑՈՒՄԱՅԻՆ ՇՐՋԱՆԻ ՏԵՎՈ ...

040.0715.020709

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

26 հունիսի 2009 թվականի N 715-Ն

ՕՐԳԱՆԱԿԱՆ ԳՅՈՒՂԱՏՆՏԵՍՈՒԹՅԱՆ ԱՆՑՈՒՄԱՅԻՆ ՇՐՋԱՆԻ ՏԵՎՈՂՈՒԹՅՈՒՆԸ, ԴՐԱ ԿՐՃԱՏՄԱՆ ԿԱՄ ԵՐԿԱՐԱՁԳՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

«Օրգանական գյուղատնտեսության մասին» Հայաստանի Հանրապետության օրենքի 5-րդ հոդվածի 1-ին մասի 9-րդ կետին համապատասխան` Հայաստանի Հանրապետության կառավարությունը որոշում է.

1. Սահմանել օրգանական գյուղատնտեսության անցումային շրջանի տևողությունը, դրա կրճատման կամ երկարաձգման կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ

2009 ԹՎԱԿԱՆԻ ՀՈՒԼԻՍԻ 2-ԻՆ

Հավելված

ՀՀ կառավարության

2009 թվականի հունիսի 26-ի

N 715-Ն որոշման

ՕՐԳԱՆԱԿԱՆ ԳՅՈՒՂԱՏՆՏԵՍՈՒԹՅԱՆ ԱՆՑՈՒՄԱՅԻՆ ՇՐՋԱՆԻ ՏԵՎՈՂՈՒԹՅՈՒՆԸ, ԴՐԱ ԿՐՃԱՏՄԱՆ ԿԱՄ ԵՐԿԱՐԱՁԳՄԱՆ ԿԱՐԳԸ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է Հայաստանի Հանրապետությունում օրգանական գյուղատնտեսության անցումային շրջանի տևողությունը, դրա կրճատման կամ երկարաձգման կարգը:

II. ՕՐԳԱՆԱԿԱՆ ԳՅՈՒՂԱՏՆՏԵՍՈՒԹՅԱՆ ԱՆՑՈՒՄԱՅԻՆ ՇՐՋԱՆԻ ՏԵՎՈՂՈՒԹՅՈՒՆԸ

2. Օրգանական գյուղատնտեսության անցումային շրջանն սկսվում է օրգանական գյուղատնտեսությամբ զբաղվող տնտեսավարողի կողմից օրգանական գյուղատնտեսության միավորում Հայաստանի Հանրապետության օրենսդրության պահանջներին համապատասխան արտադրություն սկսելու վերաբերյալ սերտիֆիկացման մարմին հայտ ներկայացնելու պահից:

3. Անցումային շրջանի տևողությունն օրգանական բուսաբուծություն իրականացնող միավորում սահմանվում է`

1) միամյա և երկամյա մշակաբույսերի համար` 24 ամիս, նախքան օրգանական մշակաբույսի ցանքը կամ տնկումը.

2) արոտավայրերի համար` 24 ամիս, նախքան խոտի օրգանական արածեցման նպատակով օգտագործումը.

3) բազմամյա մշակաբույսերի և խոտհարքների համար (բացի արոտավայրերից)` 36 ամիս, մինչև առաջին օրգանական բերքի հավաքը:

4. Սովորական (ավանդական) գյուղատնտեսական արտադրական միավորից օրգանական բուսաբուծություն իրականացնող միավոր գյուղատնտեսական կենդանիների և թռչունների ներմուծման դեպքում անցումային շրջանի տևողությունը սահմանվում է`

1) խոշոր եղջերավոր անասունների և ձիերի համար`

ա. լիահասակ կենդանիներ, աճեցված մսի արտադրության նպատակով` 12 ամիս կամ իրենց կյանքի տևողության առնվազն երեք քառորդը,

բ. հորթեր, աճեցված մսի արտադրության նպատակով` 6 ամիս, եթե ներմուծվել են մինչև 6 ամսական հասակը, անմիջապես կաթնային շրջանի ավարտից հետո,

գ. կաթ և կաթնամթերք արտադրելու նպատակով` 9 ամիս.

2) ոչխարի և այծի համար`

ա. աճեցված մսի արտադրության նպատակով` 6 ամիս,

բ. կաթ և կաթնամթերք արտադրելու նպատակով` 9 ամիս.

3) խոզերի համար` աճեցված մսի արտադրության նպատակով` 6 ամիս,

4) թռչունների համար`

ա. աճեցված մսի արտադրության նպատակով` ամբողջ կյանքի ընթացքում.

բ. ձվի արտադրության նպատակով` 6 շաբաթ.

5) մեղվաբուծության համար` 12 ամիս: Այդ ընթացքում ամբողջ մեղրամոմը պետք է փոխարինվի օրգանական մեղրամոմով.

6) ձկնաբուծության համար` կենդանի օրգանիզմի կյանքի տևողության չափով, կամ նվազագույնը 12 ամիս:

III. ՕՐԳԱՆԱԿԱՆ ԳՅՈՒՂԱՏՆՏԵՍՈՒԹՅԱՆ ԱՆՑՈՒՄԱՅԻՆ ՇՐՋԱՆԻ ՏԵՎՈՂՈՒԹՅԱՆ ԿՐՃԱՏՄԱՆ ԿԱՄ ԵՐԿԱՐԱՁԳՄԱՆ ԿԱՐԳԸ

5. Օրգանական գյուղատնտեսության անցումային շրջանի տևողությունը կարող է երկարաձգվել կամ կրճատվել լիազոր մարմնի որոշմամբ` սերտիֆիկացման մարմնի առաջարկության հիման վրա:

6. Սերտիֆիկացման մարմինն օրգանական գյուղատնտեսության միավորի օրգանական գյուղատնտեսության անցումային շրջանի տևողության կրճատման կամ երկարաձգման վերաբերյալ առաջարկությունը` հիմնավորումներով, պատշաճ կարգով ներկայացնում է լիազոր մարմին:

7. Լիազոր մարմինը սերտիֆիկացման մարմնի առաջարկությունն ստանալուց հետո` 15-օրյա ժամկետում, ընդունում է որոշում օրգանական գյուղատնտեսության անցումային շրջանի տևողության կրճատման կամ երկարաձգման մասին:

8. Լիազոր մարմնի որոշումը եռօրյա ժամկետում պատշաճ ձևով տրամադրվում է սերտիֆիկացման մարմնին:

9. Լիազոր մարմնի` օրգանական գյուղատնտեսության անցումային շրջանի տևողության կրճատման կամ երկարաձգման մասին որոշումը 10-օրյա ժամկետում կարող է բողոքարկվել օրենքով սահմանված կարգով:

10. Օրգանական գյուղատնտեսության անցումային շրջանի տևողությունը կարող է կրճատվել 12 ամսով միայն օրգանական բուսաբուծություն իրականացնող միավորում` ելնելով հողատարածքի նախկինում օգտագործման վիճակից` հողը երկու կամ ավելի տարիներ մշակված չլինելու դեպքում:

11. Օրգանական գյուղատնտեսության անցումային շրջանի տևողությունը մեղվաբուծության համար կարող է երկարաձգվել 12 ամսով, եթե անցումային շրջանի 12 ամսվա ընթացքում մեղրամոմն ամբողջությամբ չի փոխարինվել օրգանական մեղրամոմով: