040.0920.260710
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
22 հուլիսի 2010 թվականի N 920-Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2006 ԹՎԱԿԱՆԻ ՆՈՅԵՄԲԵՐԻ 9-Ի N 1791-Ն ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2003 ԹՎԱԿԱՆԻ ՕԳՈՍՏՈՍԻ 28-Ի N 1184-Ն ՈՐՈՇՈՒՄՆԵՐՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ
Հայաստանի Հանրապետության կառավարությունը որոշում է.
1. Հայաստանի Հանրապետության կառավարության 2006 թվականի նոյեմբերի 9-ի «Հայաստանի Հանրապետության ոստիկանության ակադեմիա» պետական հիմնարկը վերակազմակերպելու և «Հայաստանի Հանրապետության ոստիկանության ակադեմիա» պետական ոչ առևտրային կազմակերպության կանոնադրությունը հաստատելու մասին» N 1791-Ն որոշման մեջ կատարել հետևյալ լրացումները և փոփոխությունները`
1) որոշման 6-րդ կետը շարադրել հետևյալ խմբագրությամբ.
i
«6. Թույլատրել «Հայաստանի Հանրապետության ոստիկանության ակադեմիա» պետական ոչ առևտրային կազմակերպությանն իրականացնել ձեռնարկատիրական գործունեության հետևյալ տեսակները`
ա) բարձրագույն, միջին և հետբուհական մասնագիտական կրթության կազմակերպում.
բ) ուսուցման կենտրոնների գործունեություն, դասընթացների և խմբակների կազմակերպում.
գ) գիտական հետազոտություններ և փորձարարական մշակումներ հասարակական և հումանիտար գիտությունների բնագավառում.
դ) խորհրդատվական, փորձագիտական ծառայություններ.
ե) հրատարակչական գործունեության իրականացում և դրա արդյունքների իրացում.
զ) սովորողների և ակադեմիայի անձնակազմի համար հանրային սննդի կազմակերպում:».
2) որոշման 2-րդ կետով հաստատված` «Հայաստանի Հանրապետության ոստիկանության ակադեմիա» պետական ոչ առևտրային կազմակերպության կանոնադրության`
ա. 9-րդ կետը շարադրել հետևյալ խմբագրությամբ.
i
«9. Ակադեմիան իրականացնում է ձեռնարկատիրական գործունեության հետևյալ տեսակները`
ա) բարձրագույն, միջին և հետբուհական մասնագիտական կրթության կազմակերպում.
բ) ուսուցման կենտրոնների գործունեություն, դասընթացների և խմբակների կազմակերպում.
գ) գիտական հետազոտություններ և փորձարարական մշակումներ հասարակական և հումանիտար գիտությունների բնագավառում.
դ) խորհրդատվական, փորձագիտական ծառայություններ.
ե) հրատարակչական գործունեության իրականացում և դրա արդյունքների իրացում.
զ) սովորողների և ակադեմիայի անձնակազմի համար հանրային սննդի կազմակերպում:»,
i
բ. 21-րդ կետի «ա» ենթակետում «դրա» բառը փոխարինել «ոստիկանության ուսումնական հաստատությունում ուսման մասին կանոնագրքի, դրանց» բառերով,
գ. ուժը կորցրած ճանաչել 21-րդ կետի «գ», «դ», «է» ենթակետերը,
i
դ. լրացնել հետևյալ բովանդակությամբ նոր` 22.1-ին, 22.2-րդ, 22.3-րդ, 22.4-րդ և 22.5-րդ կետերով.
«22.1. Ակադեմիայի գիտական խորհուրդը (այսուհետ` գիտական խորհուրդ) լուծում է ակադեմիայի ուսումնամեթոդական և գիտահետազոտական գործունեության կազմակերպման, պլանավորման և կառավարման հիմնահարցերը:
22.2. Գիտական խորհրդի լիազորությունների ժամկետը 5 տարի է: Գիտական խորհրդի նիստերը գումարվում են առնվազն յուրաքանչյուր ամիսը մեկ անգամ:
22.3. Գիտական խորհրդի կազմի մեջ ի պաշտոնե մտնում են ակադեմիայի պետը (գիտական խորհրդի նախագահ), ակադեմիայի պետի տեղակալները, ֆակուլտետների պետերը, ամբիոնների պետերը, ուսումնական և գիտական այլ ստորաբաժանումների պետերը, ոստիկանության կադրերի վարչության պետի տեղակալը, ուսանողական խորհրդի նախագահը, ինչպես նաև ընտրովի անդամներ, որոնք ընտրվում են գիտական խորհրդի կանոնակարգի համաձայն: Գիտական խորհրդի անդամների ընդհանուր թիվը չի կարող գերազանցել 50-ը: Ի պաշտոնե նշանակվող անդամների թիվը չի կարող գերազանցել գիտական խորհրդի անդամների 50 տոկոսը: Գիտական խորհրդի անդամների 25 տոկոսը կազմում են ակադեմիայի սովորողները:
22.4. Գիտական խորհրդի նիստը համարվում է իրավազոր, եթե դրան մասնակցում է խորհրդի անդամների երկու երրորդը: Որոշումներն ընդունվում են ձայների պարզ մեծամասնությամբ:
22.5. Գիտական խորհուրդը`
ա) հաստատում է իր կանոնակարգը.
բ) առաջարկություն է ներկայացնում պետական կառավարման լիազորված մարմին դիմորդների ընդունելության կանոնների վերաբերյալ.
գ) մշակում է ակադեմիայի սովորողների ավարտական որակավորման պայմանները, մագիստրատուրայի, ասպիրանտուրայի, դոկտորանտուրայի, հայցորդության կանոնները.
դ) ակադեմիայի պետին ներկայացնում է առաջարկություններ ֆակուլտետների, ամբիոնների, կառուցվածքային ստորաբաժանումների ստեղծման, վերակազմակերպման կամ լուծարման վերաբերյալ.
ե) Հայաստանի Հանրապետության ոստիկանության պետին առաջարկություններ է ներկայացնում հեռակա և վճարովի (առանց պարտադիր զինվորական ծառայության զորակոչից տարկետման իրավունքի) ուսուցման տեղերի թիվը, պետական պատվերով սահմանված տեղերի թվից դուրս, սահմանելու վերաբերյալ.
զ) քննարկում է ակադեմիայի գիտական գործունեության գլխավոր և հեռանկարային ուղղությունները, լսում զեկույցներ գիտահետազոտական և գիտամեթոդական աշխատանքների վերաբերյալ.
է) ակադեմիայի պետին է ներկայացնում մասնագիտությունների և մասնագիտացումների անվանացանկի վերաբերյալ առաջարկությունները` Հայաստանի Հանրապետության ոստիկանության միջոցով` սահմանված կարգով Հայաստանի Հանրապետության կառավարություն ներկայացնելու համար.
ը) ակադեմիայի գիտամանկավարժական գործունեություն իրականացնող անձանց սահմանված կարգով պրոֆեսորի և դոցենտի գիտական կոչումներ է շնորհում և ներկայացնում Հայաստանի Հանրապետության բարձրագույն որակավորման հանձնաժողովի հաստատմանը.
թ) սահմանված կարգով հաստատում է ակադեմիայի ասպիրանտների և հայցորդների գիտական ղեկավարների թեկնածությունները և ատենախոսությունների թեմաները.
ժ) քննարկում և մշակում է ակադեմիայի միջբուհական համագործակցության ծրագրերը.
ժա) իրականացնում է Հայաստանի Հանրապետության օրենսդրությամբ սահմանված` ակադեմիայի ուսումնամեթոդական և գիտահետազոտական գործունեության հետ կապված այլ լիազորություններ:»:
2. Հայաստանի Հանրապետության կառավարության 2003 թվականի օգոստոսի 28-ի «Ոստիկանության ուսումնական հաստատությունում ուսման մասին կանոնագիրքը հաստատելու մասին» N 1184-Ն որոշման 1-ին կետով հաստատված` ոստիկանության ուսումնական հաստատությունում ուսման մասին կանոնագրքում կատարել հետևյալ լրացումները և փոփոխությունները`
1) 4-րդ կետը շարադրել հետևյալ խմբագրությամբ.
«4. Առկա ուսուցման դիմորդների տարիքը հաշվարկվում է ընդունելության տարվա օգոստոսի 31-ի դրությամբ, իսկ հեռակա ուսուցման դիմորդների տարիքը և ծառայության մեկ տարվա ստաժը հաշվարկվում է ընդունելության տարվա սեպտեմբերի 31-ի դրությամբ:».
2) 9-րդ կետի «դ» ենթակետից հանել «կամ զինակոչիկի կցագրման վկայական, բացառությամբ 16 տարին չլրացած` միջնակարգ կրթությամբ դիմորդների» բառերը.
3) ուժը կորցրած ճանաչել 18-րդ կետի «գ» ենթակետը.
4) 19-րդ կետը լրացնել հետևյալ բովանդակությամբ նոր`»ե» ենթակետով.
«ե) իրենց ծառայողական պարտականությունների կատարման ժամանակ հաշմանդամ դարձած ոստիկանության ծառայողների երեխաները:».
5) 165-րդ կետից հանել «` հաստատելով ատենախոսության թեման և գիտական ղեկավարին» բառերը.
6) լրացնել հետևյալ բովանդակությամբ նոր` 165.1-ին կետով.
«165.1. Ակադեմիայի խորհուրդը քննարկում է հայցորդի ատենախոսության թեման, գիտական ղեկավարի թեկնածությունը և ներկայացնում գիտական խորհուրդ` հաստատման:».
7) 167-րդ կետից հանել «և ատենախոսության թեման» բառերը.
8) 167-րդ կետի երկրորդ պարբերությունը շարադրել հետևյալ խմբագրությամբ.
«Անհրաժեշտության դեպքում, գիտական խորհրդի երաշխավորությամբ, հայցորդի ատենախոսության թեման հաստատում է ԲՈՀ-ի կողմից արտոնված այլ հաստատության գիտական խորհուրդը:»:
3. Սույն որոշումն ուժի մեջ է մտնում պաշտոնական հրապարակման օրվան հաջորդող օրվանից:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2010 ԹՎԱԿԱՆԻ ՀՈՒԼԻՍԻ 26-ԻՆ