(ուժը կորցրել է 20.08.02 թիվ ՆԿ-1170-Ն կարգադրություն)
i
031.0206.171298
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ
ԿԱՐԳԱԴՐՈՒԹՅՈՒՆԸ
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ ԱՇԽԱՏԱԿԱԶՄԻ ԳՈՐԾԵՐԻ ԿԱՌԱՎԱՐՉՈՒԹՅԱՆ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ
Հիմք ընդունելով Հայաստանի Հանրապետության Նախագահի 1998 թվականի օգոստոսի 5-ի «Հայաստանի Հանրապետության Նախագահի աշխատակազմի կանոնադրության և կազմակերպական կառուցվածքի մասին» ՆՀ-97 հրամանագիրը` որոշում եմ.
1. Հաստատել Հայաստանի Հանրապետության Նախագահի աշխատակազմի գործերի կառավարչության կանոնադրությունը` համաձայն հավելվածի:
2. Սույն կարգադրությունն ուժի մեջ է մտնում պաշտոնական հրապարակման պահից:
17 դեկտեմբերի 1998թ.
ՆԿ-206
Հավելված
Հայաստանի Հանրապետության Նախագահի
1998 թվականի դեկտեմբերի 17-ի
ՆԿ-206 կարգադրության
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ ԱՇԽԱՏԱԿԱԶՄԻ ԳՈՐԾԵՐԻ ԿԱՌԱՎԱՐՉՈՒԹՅԱՆ
ԿԱՆՈՆԱԴՐՈՒԹՅՈՒՆ
I. ԸՆԴՀԱՆՈՒՐ ԴՐՈՒՅԹՆԵՐ
1. Հայաստանի Հանրապետության Նախագահի աշխատակազմի (այսուհետ` Աշխատակազմ) գործերի կառավարչությունը (այսուհետ` Գործերի կառավարչություն) Աշխատակազմի կառուցվածքային ստորաբաժանում է:
2. Գործերի կառավարչությունն իր գործունեության ընթացքում ղեկավարվում է Հայաստանի Հանրապետության Սահմանադրությամբ, Հայաստանի Հանրապետության օրենքներով, Հայաստանի Հանրապետության Նախագահի հրամանագրերով և կարգադրություններով, Աշխատակազմի կանոնադրությամբ, սույն կանոնադրությամբ, ինչպես նաև Աշխատակազմի ղեկավարի հրամաններով:
3. Գործերի կառավարչության կանոնադրությունը հաստատում և փոփոխում է Հայաստանի Հանրապետության Նախագահը` Աշխատակազմի ղեկավարի ներկայացմամբ:
4. Գործերի կառավարչության ներքին կառուցվածքը և հաստիքացուցակը հաստատում և փոփոխում է Աշխատակազմի ղեկավարը` Գործերի կառավարչի ներկայացմամբ:
5. Գործերի կառավարչությունն ունի իր անվանմամբ ձևաթուղթ, կնիք և դրոշմակնիք:
II. ԳՈՐԾԵՐԻ ԿԱՌԱՎԱՐՉՈՒԹՅԱՆ ԽՆԴԻՐԸ ԵՎ ԳՈՐԾԱՌՈՒՅԹՆԵՐԸ
1. Գործերի կառավարչության խնդիրն է` իր իրավասության շրջանակներում ապահովել Հայաստանի Հանրապետության օրենսդրությամբ Հայաստանի Հանրապետության Նախագահին և Աշխատակազմին վերապահված լիազորությունների լիարժեք և արդյունավետ իրականացումը:
2. Գործերի կառավարչության գործառույթներն են`
- Աշխատակազմի վարչական համալիրի, այդ թվում` Սևանի թերակղզու պետական ամառանոցի, Գործերի կառավարչության ավտոտնտեսության շահագործումը.
- ընթացիկ և կապիտալ շինարարության ապահովումը.
- Աշխատակազմի վարչական շենքի և հարող տարածքների բարեկարգումը.
- Աշխատակազմի ավտոտրանսպորտային և բժշկական սպասարկումը.
- Աշխատակազմի աշխատողների աշխատանքային անհրաժեշտ պայմանների ապահովումը.
- ռադիոհանգույցի, հեռախոսակապի, կապի համապատասխան բաժանմունքի անխափան և աշխատանքի ապահովումը.
- Աշխատակազմին սպասարկող ճաշարանին աջակցելը և դրա աշխատանքների վերահսկումը.
- համապատասխան այլ մարմինների, Աշխատակազմի կառուցվածքային ստորաբաժանումների հետ համատեղ Հայաստանի Հանրապետության Նախագահի ղեկավարած պատվիրակությունների այցելությունների, Հայաստանի Հանրապետության Նախագահի, Աշխատակազմի ղեկավարի, Աշխատակազմի այլ պաշտոնատար անձանց մասնակցությամբ անցկացվող միջազգային բնույթի, արարողակարգային և այլ միջոցառումների նախապատրաստման և կազմակերպման ֆինանսատնտեսական, նյութատեխնիկական և տրանսպորտային ապահովումը.
- Հայաստանի Հանրապետության Նախագահի հրամանագրերով, կարգադրություններով և Աշխատակազմի ղեկավարի հրամաններով իրեն վերապահված այլ գործառույթներ:
3. Գործերի կառավարչությունն իր գործառույթներն իրականացնելիս`
- իր իրավասության շրջանակներում նախապատրաստում, համաձայնեցնում և սահմանված կարգով Աշխատակազմի ղեկավարին է ներկայացնում իր գործունեության վերաբերյալ համապատասխան փաստաթղթերի նախագծեր` եզրակացություններով և տեղեկանքներով.
- իր իրավասության շրջանակներում հրավիրում է խորհրդակցություններ` դրանց մասնակից դարձնելով համապատասխան պաշտոնատար անձանց, մասնագետների, փորձագետների.
- իր իրավասության շրջանակներում վերահսկում է Հայաստանի Հանրապետության Նախագահի, Աշխատակազմի ղեկավարի հանձնարարականների կատարումը և Աշխատակազմի ղեկավարին առաջարկություններ է ներկայացնում` դրանք ժամանակին և ճիշտ կատարելու համար միջոցներ ձեռնարկելու և հայտնաբերված խախտումները վերացնելու միջնորդություններ հարուցելու մասին.
- իր իրավասության շրջանակներում համագործակցում է համապատասխան մարմինների կառուցվածքային ստորաբաժանումների և պաշտոնատար անձանց հետ.
- Աշխատակազմի ղեկավարի հանձնարարությամբ զեկուցումներ է ներկայացնում իր կողմից սպասարկվող բնագավառի հետ առնչվող համապատասխան մարմիններում, կազմակերպություններում, ինչպես նաև պաշտոնատար անձանց կողմից կատարվող աշխատանքների վիճակի մասին.
- Աշխատակազմի համապատասխան կառուցվածքային ստորաբաժանման հետ նախապատրաստում և Աշխատակազմի ղեկավարին է ներկայացնում Աշխատակազմի համապատասխան ֆինանսական տարվա ծախսերի նախահաշվի նախագիծը, համապատասխան ֆինանսական հաշվետվությունները, ապահովում է ընթացիկ տարվա ֆինանսական հատկացումների խնայողական օգտագործումը.
- սահմանված կարգով կատարում է բանկային գործարքներ, կնքում է համապատասխան պայմանագրեր:
III. ԳՈՐԾԵՐԻ ԿԱՌԱՎԱՐՉՈՒԹՅԱՆ ԱՇԽԱՏԱՆՔՆԵՐԻ ԿԱԶՄԱԿԵՐՊՈՒՄԸ ԵՎ ՂԵԿԱՎԱՐՈՒՄԸ
1. Գործերի կառավարիչն անմիջականորեն ենթարկվում է Աշխատակազմի ղեկավարին:
2. Գործերի կառավարիչը պաշտոնի է նշանակվում և պաշտոնից ազատվում Հայաստանի Հանրապետության Նախագահի կարգադրությամբ` Աշխատակազմի ղեկավարի ներկայացմամբ:
3. Գործերի կառավարիչը`
- իրականացնում է Գործերի կառավարչության անմիջական ղեկավարումը.
- իրականացնում է Գործերի կառավարչության ներքին կառուցվածքային ստորաբաժանումների աշխատանքների համակարգումը.
- Աշխատակազմի ղեկավարին առաջարկություններ է ներկայացնում Գործերի կառավարչության կանոնադրության, դրանում փոփոխություններ կատարելու վերաբերյալ.
- Աշխատակազմի ղեկավարին առաջարկություններ է ներկայացնում Գործերի կառավարչության ներքին կառուցվածքային ստորաբաժանումների ղեկավարներին և մյուս աշխատողներին պաշտոնի նշանակելու և պաշտոնից ազատելու, նրանց խրախուսելու վերաբերյալ.
- Գործերի կառավարչության աշխատողների միջև բաշխում է պարտականությունները.
- իր իրավասության շրջանակներում այլ մարմիններից, պաշտոնատար անձանցից պահանջում է անհրաժեշտ տեղեկատվություն և նյութեր.
- իր իրավասության շրջանակներում ապահովում է Գործերի կառավարչության և այլ մարմինների փոխհարաբերությունները.
- ստորագրում է Գործերի կառավարչության անունից պատրաստվող փաստաթղթերը.
- Գործերի կառավարչության իրավասության շրջանակներում նախապատրաստում է առաջարկություններ, տեղեկանքներ, հաշվետվություններ, զեկուցագրեր և այլ գրություններ.
- պատասխանատվություն է կրում Գործերի կառավարչության առջև դրված խնդիրների լուծման համար.
- կատարում է Հայաստանի Հանրապետության Նախագահի և Աշխատակազմի ղեկավարի հանձնարարականները.
- իրականացնում է Հայաստանի Հանրապետության Նախագահի և Աշխատակազմի ղեկավարի կողմից իրեն վերապահված այլ լիազորություններ:
4. Գործերի կառավարչության ներքին կառուցվածքային ստորաբաժանումների ղեկավարներն անմիջականորեն ենթարկվում են Գործերի կառավարչին:
5. Գործերի կառավարչության ներքին կառուցվածքային ստորաբաժանումների ղեկավարները պաշտոնի են նշանակվում և պաշտոնից ազատվում Աշխատակազմի ղեկավարի հրամանով` Գործերի կառավարչի ներկայացմամբ:
6. Գործերի կառավարչության ներքին կառուցվածքային ստորաբաժանումների ղեկավարները`
- իրականացնում են համապատասխան ստորաբաժանման անմիջական ղեկավարումը.
- ապահովում են իրենց ղեկավարած ստորաբաժանման աշխատանքի պատշաճ կազմակերպումը.
- Գործերի կառավարչին են զեկուցում իրենց ղեկավարած ստորաբաժանման կողմից կատարվող աշխատանքների ընթացքի մասին.
- Գործերի կառավարչի հանձնարարությամբ, իրենց իրավասության շրջանակներում այլ մարմիններից, պաշտոնատար անձանցից պահանջում են իրենց ղեկավարած ստորաբաժանման գործունեության հետ առնչվող անհրաժեշտ տեղեկատվություն և նյութեր.
- պատասխանատվություն են կրում իրենց ղեկավարած ստորաբաժանման առջև դրված խնդիրների լուծման համար.
- կատարում են Գործերի կառավարչի հանձնարարականները: