(ուժը կորցրել է 28.02.08 թիվ 146-Ն հրաման)
i
118.0287.040899
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՖԻՆԱՆՍՆԵՐԻ ՆԱԽԱՐԱՐՈՒԹՅՈՒՆ
ՀՐԱՄԱՆ
29 հուլիսի 1999 թվականի թիվ 287
i
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԸՆԴՀԱՆՈՒՐ ԱՈՒԴԻՏԻ ԳԾՈՎ ԱՈՒԴԻՏՈՐՆԵՐԻ ՈՐԱԿԱՎՈՐՄԱՆ ԿԱՐԳԸ, ՈՐԱԿԱՎՈՐՄԱՆ ՀԱՆՁՆԱԺՈՂՈՎԻ ԱՆՀԱՏԱԿԱՆ ԿԱԶՄԸ ԵՎ ԿԱՆՈՆԱԿԱՐԳԸ ՀԱՍՏԱՏԵԼՈՒ ՄԱՍԻՆ
Հայաստանի Հանրապետության կառավարության 1998 թ. դեկտեմբերի 9-ի «Հայաստանի Հանրապետությունում աուդիտորական գործունեության կանոնադրությունը և լիցենզավորման կարգը հաստատելու մասին» թիվ 782 որոշմամբ հաստատված Հայաստանի Հանրապետությունում աուդիտորական գործունեության կանոնադրության 48-րդ կետի և 59-րդ կետի «ա» ենթակետի պահանջներին համապատասխան, Հայաստանի Հանրապետությունում ընդհանուր աուդիտի գծով աուդիտորների որակավորման հետ կապված հարցերի օրենսդրական կարգավորումն ապահովելու և այդ բնագավառի աշխատանքները բարելավելու նպատակով`
ՀՐԱՄԱՅՈՒՄ ԵՄ
1. Հաստատել`
ա) «Հայաստանի Հանրապետությունում ընդհանուր աուդիտի գծով աուդիտորների որակավորման կարգը»` համաձայն հավելված 1-ի.
բ) «Հայաստանի Հանրապետությունում ընդհանուր աուդիտի գծով աուդիտորների որակավորման հանձնաժողովի անհատական կազմը»` համաձայն հավելված 2-ի.
գ) «Հայաստանի Հանրապետությունում ընդհանուր աուդիտի գծով աուդիտորների որակավորման հանձնաժողովի կանոնակարգը»` համաձայն հավելված 3-ի.
դ) «Օտարերկրյա պետություններում սահմանված կարգով աուդիտորի որակավորում ստացած հայտատուի որակավորման կարգը»` համաձայն հավելված 4-ի:
2. Սահմանել, որ աուդիտորների որակավորման հանձնաժողովը իր կատարած աշխատանքների վերաբերյալ տարեկան հաշվետվությունը Հայաստանի Հանրապետության ֆինանսների նախարարությանն է ներկայացնում մինչև հաշվետու տարվան հաջորդող տարվա փետրվարի 25-ը` համաձայն հավելված 5-ի:
i
3. Ուժը կորցրած ճանաչել Հայաստանի Հանրապետության ֆինանսների և էկոնոմիկայի նախարարության 1998 թ. հուլիսի 15-ի թիվ 226 հրամանը:
Հավելված 1
ՀԱՍՏԱՏՎԱԾ Է ՀՀ ՖԻՆԱՆՍՆԵՐԻ
ՆԱԽԱՐԱՐԻ 1999 Թ. ՀՈՒԼԻՍԻ 29-Ի
ԹԻՎ 287 ՀՐԱՄԱՆՈՎ
ԿԱՐԳ
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԸՆԴՀԱՆՈՒՐ ԱՈՒԴԻՏԻ ԳԾՈՎ ԱՈՒԴԻՏՈՐՆԵՐԻ ՈՐԱԿԱՎՈՐՄԱՆ
1. Սույնով կարգավորվում են Հայաստանի Հանրապետությունում ընդհանուր աուդիտի գծով աուդիտորների որակավորման հետ կապված հարցերը:
2. Որակավորման քննությունը աուդիտորի որակավորում ստանալու համար հայտ ներկայացրած անձանց (այսուհետև` հայտատուներ) գիտելիքների ստուգման ընթացակարգ է:
3. Ընդհանուր աուդիտի գծով հայտատուների որակավորման քննությունների անցկացումն իրականացվում է Հայաստանի Հանրապետությունում ընդհանուր աուդիտի գծով աուդիտորների որակավորման հանձնաժողովի (այսուհետև` հանձնաժողով) կողմից:
4. Աուդիտորների որակավորման քննությունների ծրագիրը մշակվում և հաստատվում է Հայաստանի Հանրապետության օրենքների և այլ նորմատիվ իրավական ակտերի պահանջների շրջանակներում` Հայաստանի Հանրապետության ֆինանսների նախարարության կողմից:
Որակավորման քննությունների ծրագիրը պարբերաբար վերանայվում է` Հայաստանի Հանրապետության օրենքներում և այլ նորմատիվ իրավական ակտերում կատարված փոփոխություններին և լրացումներին համապատասխան:
5. Աուդիտորների որակավորման քննություններին կարող են մասնակցել Հայաստանի Հանրապետության քաղաքացիները, օտարերկրյա քաղաքացիները և քաղաքացիություն չունեցող այն անձինք, որոնք ունեն բարձրագույն կրթություն (ներառյալ լիցենզավորված ոչ պետական բարձրագույն ուսումնական հաստատություններում ստացած կրթությունը) կամ աուդիտորի մասնագիտացմամբ միջնակարգ կրթություն և աուդիտորի որակավորման վկայական ստանալու համար հայտ ներկայացնելու օրվան նախորդող վերջին հինգ տարվա ընթացքում առնվազն երեք տարվա մասնագիտական (տնտեսագետի, ֆինանսիստի, հաշվապահի, վերստուգիչի, հարկային տեսուչի, աուդիտորի կամ աուդիտորական կազմակերպությունում` որպես մասնագետի, այդպիսի կազմակերպության ղեկավարի (տնօրեն, նախագահ կամ նրանց տեղակալ), տնտեսագիտական մասնագիտությամբ գիտական աշխատողի կամ դասախոսի) աշխատանքի փորձ:
6. Աուդիտորների որակավորման քննություններին մասնակցել չի թույլատրվում ֆինանսատնտեսական հարաբերությունների իրականացման բնագավառում որոշակի պաշտոն զբաղեցնելու կամ որոշակի գործունեությամբ զբաղվելու իրավունքից դատավճռով զրկված անձանց:
7. Աուդիտորների որակավորման քննություններին մասնակցելու համար հայտատուի կողմից ներկայացվում է հայտ, որին կցվում են`
ա) բարձրագույն (միջնակարգ-մասնագիտական) կրթության դիպլոմի պատճենը.
բ) աշխատանքային գրքույկից կատարված քաղվածքը կամ դրա պատճենը և (կամ) քաղաքացիաիրավական պայմանագրի պատճենը և պայմանագրի կատարումը հաստատող տեղեկանքը.
գ) երկու լուսանկար` 3 x 4 չափսի.
դ) դատավճռի պատճենը (դատավճռով դատապարտված անձինք):
Հայտատուն պարտավոր է մինչև քննությանը ներկայանալը վճարել պետական տուրքը և պետական տուրքի վճարումը հաստատող փաստաթղթի բնօրինակը ներկայացնել Հայաստանի Հանրապետության ֆինանսների նախարարության կենտրոնական ապարատի համապատասխան կառուցվածքային ստորաբաժանմանը, որն իր հերթին, մինչև քննության սկսվելը հանձնաժողովին է ներկայացնում վերջինիս կողմից սահմանված ձևի տեղեկանք` պետական տուրքի վճարումների մասին: Պետական տուրքը չվճարած հայտատուին արգելվում է մասնակցել քննությանը:
Հայաստանի Հանրապետությունում կամ օտարերկրյա պետություններում սահմանված կարգով աուդիտորի որակավորում ստացած և վերջին հինգ տարվա ընթացքում առնվազն երեք տարվա մասնագիտական (աուդիտորի կամ աուդիտորական կազմակերպությունում` որպես մասնագետի, այդպիսի կազմակերպության ղեկավարի (տնօրեն, նախագահ կամ նրանց տեղակալ) աշխատանքի փորձ ունեցող հայտատուն (անկախ քաղաքացիությունից) սույն կետում նշված փաստաթղթերի հետ միասին ներկայացնում է նաև որակավորման վկայականի (հավաստագրի) նոտարական կարգով հաստատված պատճենը և իր վերջին աշխատավայրի ղեկավարի կողմից տրված համապատասխան երաշխավորագիրը, որում նշվում է նաև հայտատուի կողմից կատարված աշխատանքների հիմնական ոլորտը և աուդիտի տեսակը:
8. Հայտերը քննարկվում են հանձնաժողովի քարտուղարի կողմից` անհրաժեշտ փաստաթղթերի ներկայացման պահից ոչ ուշ, քան 10 օրվա ընթացքում: Ներկայացվող պահանջներին չհամապատասխանելու դեպքում, փաստաթղթերը վերադարձվում են հայտատուին` համապատասխան հիմնավորումներով, այդ մասին տեղյակ պահելով հանձնաժողովին:
9. Աուդիտորների որակավորման քննություններն անցկացվում են պարբերաբար` հանձնաժողովի որոշմամբ սահմանված ժամկետներում, սակայն ոչ ուշ, քան ամսական մեկ անգամ: Որակավորման քննության անցկացման օրվա, ժամի և տեղի մասին հայտատուին տեղեկացվում է որակավորման քննությունից 15 օր առաջ:
10. Հայտատուին թույլատրվում է մասնակցել քննությանը` միայն անձնագրի կամ նրա անձը հաստատող այլ փաստաթղթի առկայության դեպքում: Իր անձը հաստատող որևէ փաստաթուղթ չունեցող, ինչպես նաև քննության ուշացումով ներկայացած հայտատուն համարվում է չներկայացած և նրան արգելվում է մասնակցել տվյալ օրվա քննությանը:
11. Որակավորման քննություններն անց են կացվում հայերեն լեզվով` գրավոր: Քննության հարցաթերթիկները կազմվում են հետևյալ 3. բաժիններից`
I բաժին - տեսական հարցեր,
II բաժին - տեստեր,
III բաժին - խնդիրներ:
Հարցաթերթիկի I բաժնում ներառվում են 3 հարցեր, որոնցից յուրաքանչյուրը պետք է ընտրվի հաշվապահական հաշվառմանը, հարկային օրենսդրությանը և աուդիտորական գործունեությանը վերաբերող բաժիններից, II բաժնում` 30 հարցեր (տեստեր) հանձնաժողովի կողմից սահմանված համամասնությամբ, իսկ III բաժնում` որոնցից 3-ը` ֆինանսական վերլուծության վերաբերյալ և նույն թվով` հարկային օրենսդրության: Վերջիններիս ընտրությունը կատարվում է, հաշվի առնելով դրանց բարդության աստիճանը, այսինքն` ընտրվում է համապատասխանաբար 2, 3 և 4 առավելագույն միավորով գնահատվող 1 - ական խնդիր:
12. Հարցաթերթիկում ներառված հարցերի (այդ թվում` խնդիրների) ցանկը կազմվում է սույն կարգի 4-րդ կետով սահմանված կարգով հաստատված ծրագրի հիման վրա և հաստատվում հանձնաժողովի որոշմամբ, իսկ այդ հարցերից բաղկացած առանձին հարցաթերթիկները կազմվում են յուրաքանչյուր քննությունից մեկ օր առաջ և պահվում հանձնաժողովի քարտուղարի մոտ` փակ, հանձնաժողովի նախագահի և քարտուղարի ստորագրություններով վավերացված ծրարում: Վերջինս բացվում է քննության ժամանակ` հանձնաժողովի անդամների և հայտատուների ներկայությամբ: Յուրաքանչյուր քննության համար կազմվում են առանձին հարցաթերթիկներ:
13. Հարցաթերթիկի հարցերին պատասխանելու համար հայտատուին տրվում է չորս ժամ: Քննության ընթացքում հայտատուին չի թույլատրվում օգտվել օրենքներից, այլ նորմատիվ իրավական ակտերից, մասնագիտական գրականությունից, տեղեկատուներից, երկխոսության մեջ մտնել մյուս հայտատուների հետ: Հարցաթերթիկի հարցերին պատասխանելու համար հատկացված ժամանակը լրանալուն պես, հայտատուն պարտավոր է հարցաթերթիկը և իր գրած պատասխանները հանձնել հանձնաժողովին: Նշված պահանջներից որևէ մեկի խախտման դեպքում հայտատուն հեռացվում է քննությունից: Երկրորդ անգամ որակավորման քննություններին նա կարող է մասնակցել ընդհանուր հիմունքներով:
Կողմնակի անձանց արգելվում է ներկա գտնվել որակավորման քննությանը:
Որակավորման քննություններն անց են կացվում մեկ փուլով` գրավոր, որի ընդհանուր արդյունքները գնահատվում են 60 միավորի սահմաններում: Ընդ որում, տեսական հարցերի բաժնում ներառված 3 հարցերի պատասխանները գնահատվում են առավելագույնը` 15 միավոր (յուրաքանչյուրը` 0-5 միավորի սահմաններում), 30 տեստերինը` 30 միավոր (յուրաքանչյուրը` 0 կամ 1 միավոր), 6 խնդիրները` 15 միավոր, այդ թվում` վերլուծությանը վերաբերող 3 խնդիրներինը` 6 միավոր (յուրաքանչյուրը 0-2 միավոր), իսկ հարկային օրենսդրությանը վերաբերող 3 խնդիրներինը` 9 միավոր (յուրաքանչյուրը` 0-2, 0-3 և 0-4 միավոր):
14. Քննության պատասխաններն ամփոփվում են հանձնաժողովի որոշմամբ հաստատված ձևով, որը ստորագրում են հանձնաժողովի նախագահը և բոլոր անդամները (ներկա գտնվող): Քննության արդյունքում 46 և ավելի միավոր հավաքած հայտատուները համարվում են որակավորված:
15. Հանձնաժողովը հայտատուի հավաքած միավորների հանրագումարի հիման վրա որոշում է ընդունում նրան աուդիտորի որակավորում շնորհելու վերաբերյալ, հաշվի առնելով սույն կարգի 13-րդ և 14-րդ կետերի պահանջները:
16. Հայաստանի Հանրապետությունում կամ օտարերկրյա պետություններում սահմանված կարգով աուդիտորի որակավորում ստացած և վերջին հինգ տարվա ընթացքում առնվազն երեք տարվա մասնագիտական (աուդիտորի կամ աուդիտորական կազմակերպությունում` որպես մասնագետի, այդպիսի կազմակերպության ղեկավարի (տնօրեն, նախագահ կամ նրանց տեղակալ) աշխատանքի փորձ ունեցող հայտատուի (անկախ քաղաքացիությունից) որակավորման կարգի առանձնահատկությունները սահմանվում են առանձին:
17. Հանձնաժողովի որոշման հիման վրա որակավորված հայտատուին տրվում է աուդիտորի որակավորման վկայական, որի ձևը հաստատում է Հայաստանի Հանրապետության ֆինանսների նախարարությունը:
18. Աուդիտորի որակավորման վկայականը լրացվում և տարվում է հանձնաժողովի կողմից որոշման ընդունման օրվանից ոչ ուշ, քան երեք աշխատանքային օրվա ընթացքում: Աուդիտորի կողմից չստացված որակավորման վկայականը հանձնաժողովի կողմից պահպանվում է մինչև վկայականի գործողության ժամկետի լրանալը:
19. Աուդիտորի որակավորման վկայականը տրվում է երկու տարի վեց ամիս ժամկետով:
Հանձնաժողովը կարող է հաշվի առնել աուդիտորների հաշվետվությունների քննարկման արդյունքների հիման վրա Հայաստանի Հանրապետության ֆինանսների նախարարության կենտրոնական ապարատի համապատասխան կառուցվածքային ստորաբաժանման կողմից ներկայացված առաջարկությունները և աուդիտորի որակավորման վկայականի գործողության ժամկետը երկարաձգել ևս մեկ տարով:
20. Հայտատուի կողմից հանձնաժողովին ոչ հավաստի տեղեկություններ ներկայացվելու դեպքում, հայտատուին չի թույլատրվում մասնակցել քննությանը, իսկ եթե այդպիսի փաստերը հայտնաբերվում են որակավորման վկայականը տալուց հետո, ապա այն ուժը կորցրած է ճանաչվում:
21. Քննության արդյունքներով որակավորում չստացած, ինչպես նաև քննության հրավիրված, սակայն չներկայացած հայտատուն որակավորման քննություններին կրկին կարող է մասնակցել ընդհանուր հիմունքներով` այն տարբերությամբ, որ նա կարող է հայտին կից չներկայացնել սույն կարգի 7-րդ կետի «ա» և «գ» ենթակետերում նշված փաստաթղթերը, եթե դրանց ներկայացման օրվանից չի անցել մեկ տարի:
22. Հայտատուի կողմից որակավորման քննության արդյունքները կարող են գանգատարկվել Հայաստանի Հանրապետության ֆինանսների նախարարությանը` քննության արդյունքները հայտնելու (հրապարակելու) օրվանից 15 օրվա ընթացքում, ինչպես նաև` դատական կարգով:
23. Որակավորման վկայականը կորցնելու դեպքում, աուդիտորը պարտավոր է 10-օրյա ժամկետում այդ մասին գրավոր հայտնել հանձնաժողովին: Կորցրած վկայականը հանձնաժողովի որոշմամբ համարվում է անվավեր, իսկ դրա փոխարեն սահմանված կարգով տրվում է նոր վկայական «Կրկնօրինակ» նշագրումով:
24. Հանձնաժողովը վարում է հայտերի և տրված որակավորման վկայականների գրանցամատյաններ: Հայտերի գրանցամատյանում լրացվում են հայտատուի անունը, ազգանունը, հասցեն, անձնագրային տվյալները և նշում է կատարվում որակավորվելու կամ չորակավորվելու մասին: Տրված որակավորման վկայականների գրանցամատյանում լրացվում են աուդիտորի անունը, ազգանունը, հայտի գրանցման համարը, հանձնաժողովի համապատասխան որոշման ամսաթիվը և համարը, որակավորման վկայականի տրման ամսաթիվը և համարը:
25. Հանձնաժողովի անդամներն իրենց պարտականությունները կատարում են հասարակական հիմունքներով: Հանձնաժողովի տնտեսական ծախսերի ֆինանսավորումն իրականացվում է Հայաստանի Հանրապետության ֆինանսների նախարարության կենտրոնական ապարատի պահպանման ծախսերի հաշվին:
26. Հանձնաժողովը, իր նիստերի նախապատրաստումը և որոշումների կատարումը, հայտատուների վերաբերյալ անհրաժեշտ տեղեկատվության ստացումն ապահովելու հետ կապված աշխատանքներն իրականացնելու նպատակով համագործակցում է Հայաստանի Հանրապետության ֆինանսների նախարարության կենտրոնական ապարատի համապատասխան կառուցվածքային ստորաբաժանման հետ:
27. Քննությունների պատասխանները հանձնաժողովի կողմից պահպանվում են երեք տարի:
Հավելված 2
ՀԱՍՏԱՏՎԱԾ Է ՀՀ ՖԻՆԱՆՍՆԵՐԻ
ՆԱԽԱՐԱՐԻ 1999 Թ. ՀՈՒԼԻՍԻ 29-Ի
ԹԻՎ 287 ՀՐԱՄԱՆՈՎ
ԱՆՀԱՏԱԿԱՆ ԿԱԶՄ
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԸՆԴՀԱՆՈՒՐ ԱՈՒԴԻՏԻ ԳԾՈՎ ԱՈՒԴԻՏՈՐՆԵՐԻ ՈՐԱԿԱՎՈՐՄԱՆ ՀԱՆՁՆԱԺՈՂՈՎԻ
1. ԱՍԼԻԿՅԱՆ ԱՐԱ - ՀՀ ֆինանսների նախարարի առաջին
տեղակալ (հանձնաժողովի նախագահ)
2. ՊԵՏՐՈՍՅԱՆ ՀՈՎՀԱՆՆԵՍ - ՀՀ ֆինանսների նախարարության
հաշվապահական հաշվառման և աուդիտի
մեթոդաբանության գլխավոր վարչության
պետ
3. ՍԱՐԳՍՅԱՆ ԱՂԱՍԻ - ԵրԺՏԻ պրոռեկտոր, տնտ. գիտ. դոկտոր,
պրոֆեսոր
4. ԿԱՐԱՊԵՏՅԱՆ ՏԻԳՐԱՆ - ՀՀ արժեթղթերի շուկայի տեսչության պետ
5. ԽԱՉԱՏՐՅԱՆ ՏԻԳՐԱՆ - ՀՀ ֆինանսների նախարարության պետական
եկամուտների քաղաքականության գլխավոր
վարչության պետ
6. ՔԱՌՅԱՆ ԱՐԱ - ՀՀ ֆինանսների նախարարության
ապահովագրական տեսչության (գլխավոր
վարչության) պետ
7. ԲԱԴԱՆՅԱՆ ՎԱՐՈՒԺԱՆ - ՀՀ ֆինանսների նախարարության ՖՎԳՎ
նախարարության համակարգի
գործունեության վերահսկողության
վարչության պետ
8. ՄԿՐՏՉՅԱՆ ԱԲԳԱՐ - ՀՀ ֆինանսների նախարարության
աուդիտորական գործունեության
կարգավորման վարչության պետ
9. ՄԵԼԻՔՅԱՆ ՌԱԶՄԻԿ - ՀՀ ֆինանսների նախարարության
աուդիտորական գործունեության
կարգավորման վարչության պետի տեղակալ
(հանձնաժողովի քարտուղար)
10. ՄԵԼԻՔՅԱՆ ԱՐԹՈՒՐ - ՀՀ ֆինանսների նախարարության
իրավաբանական գլխավոր վարչության
փաստաթղթերի տեսչության վարչության
պետ
11. ԱԴԱՄՅԱՆ ՍՈՒՐԵՆ - ՀՀ պետական եկամուտների նախարարության
բաժնի պետ
12. ԻԳԻԹՅԱՆ ԹԱԴԵՎՈՍ - ՀՀ պետական եկամուտների
նախարարության բաժնի պետ
13. ՎԱՐԴԱՊԵՏՅԱՆ ՀԱՅԿ - Հայաստանի հաշվապահների և
աուդիտորների ասոցիացիայի խորհրդի
անդամ
14. ԳՐԻԳՈՐՅԱՆ ՎԱՐԴԻԹԵՐ - Հայաստանի հաշվապահների և
աուդիտորների ասոցիացիայի խորհրդի
անդամ
15. ԴԱՎԹՅԱՆ ԱՆԱՀԻՏ - Հայաստանի հաշվապահների և
աուդիտորների ասոցիացիայի խորհրդի
անդամ
Հավելված 3
ՀԱՍՏԱՏՎԱԾ Է ՀՀ ՖԻՆԱՆՍՆԵՐԻ
ՆԱԽԱՐԱՐԻ 1999 Թ. ՀՈՒԼԻՍԻ 29-Ի
ԹԻՎ 287 ՀՐԱՄԱՆՈՎ
ԿԱՆՈՆԱԿԱՐԳ
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԸՆԴՀԱՆՈՒՐ ԱՈՒԴԻՏԻ ԳԾՈՎ ԱՈՒԴԻՏՈՐՆԵՐԻ ՈՐԱԿԱՎՈՐՄԱՆ ՀԱՆՁՆԱԺՈՂՈՎԻ
Սույն կանոնակարգը համակարգում է Հայաստանի Հանրապետությունում ընդհանուր աուդիտի գծով աուդիտորների որակավորման հանձնաժողովի (այսուհետև` հանձնաժողով) հիմնական խնդիրները, պարտականությունները, իրավունքները, անհատական կազմի ձևավորման հիմնադրույթները և աշխատակարգը:
I. ՀԱՆՁՆԱԺՈՂՈՎԻ ՀԻՄՆԱԿԱՆ ԽՆԴԻՐՆԵՐԸ
1. Հանձնաժողովի հիմնական խնդիրներն են`
ա) Հայաստանի Հանրապետությունում ընդհանուր աուդիտի գծով աուդիտորների որակավորման կարգի (այսուհետև` որակավորման կարգի) պահանջներին համապատասխան, հայտատուների որակավորման քննությունների կազմակերպումը և անցկացումը.
բ) հանձնաժողովի գործունեության և հայտատուների որակավորման քննությունների (այսուհետև` քննություն) կազմակերպման, միջազգային փորձի հիման վրա որակավորման կարգի և սույն կանոնակարգի կատարելագործման և հստակեցման վերաբերյալ առաջարկությունների նախապատրաստումը.
գ) աուդիտորի որակավորման վկայականը ուժը կորցրած ճանաչելու կամ վկայականի գործողությունը կասեցնելու մասին հարցերի քննարկումը և որոշումների ընդունումը:
II. ՀԱՆՁՆԱԺՈՂՈՎԻ ՊԱՐՏԱԿԱՆՈՒԹՅՈՒՆՆԵՐԸ ԵՎ ԻՐԱՎՈՒՆՔՆԵՐԸ
2. Հանձնաժողովի պարտականությունները և իրավունքներն են`
ա) ղեկավարվել Հայաստանի Հանրապետության օրենքներով, այլ նորմատիվ իրավական ակտերով, ինչպես նաև սույն կանոնակարգով.
բ) քննարկել Հայաստանի Հանրապետության օրենքների, այլ նորմատիվ իրավական ակտերի պահանջներին հայտատուի կողմից ներկայացված փաստաթղթերի համապատասխանության հարցը և ընդունել որոշում` նրան քննության հրավիրելու, նրա հայտը մերժելու կամ լրացուցիչ տեղեկություններ պահանջելու անհրաժեշտության վերաբերյալ.
գ) հաշվի առնել աուդիտորական կազմակերպությունների և անհատ աուդիտորների հաշվետվությունների քննարկման արդյունքների հիման վրա Հայաստանի Հանրապետության ֆինանսների նախարարության կենտրոնական ապարատի համապատասխան կառուցվածքային ստորաբաժանման կողմից ներկայացված առաջարկությունները և որակավորման վկայականի գործողության ժամկետը երկարաձգել ևս մեկ տարով.
դ) քննության արդյունքների հիման վրա հայտատուների որակավորման վերաբերյալ համապատասխան որոշում ընդունելուց հետո երեք աշխատանքային օրվա ընթացքում լրացնել և աուդիտորներին հանձնել սահմանված ձևի որակավորման վկայականները.
ե) քննարկել նիստերին երեք անգամ անընդմեջ չմասնակցած հանձնաժողովի անդամին հանձնաժողովի կազմում թողնելու հարցը և համապատասխան առաջարկություններ ներկայացնել Հայաստանի Հանրապետության ֆինանսների նախարարին.
զ) վարել հայտերի և տրված որակավորման վկայականների գրանցամատյաններ.
է) Հայաստանի Հանրապետության ֆինանսների նախարարության կողմից սահմանված կարգով ներկայացնել տարեկան հաշվետվություն` հանձնաժողովի կատարած աշխատանքների մասին.
ը) ձեռնարկել միջոցներ որակավորման կարգի 12-րդ կետի համաձայն քննությունից մեկ օր առաջ կազմված հարցաթերթիկների գաղտնիությունն ապահովելու ուղղությամբ.
թ) մինչև քննության սկսվելը ստանալ Հայաստանի Հանրապետության ֆինանսների նախարարության կենտրոնական ապարատի համապատասխան կառուցվածքային ստորաբաժանման տեղեկանքը` պետական տուրքի վճարումների մասին.
ժ) մերժել հայտատուի հայտը, եթե նրա ներկայացրած փաստաթղթերը չեն համապատասխանում Հայաստանի Հանրապետության որևէ օրենքի, այլ նորմատիվ իրավական ակտի, նույն թվում` որակավորման կարգի պահանջներին.
ի) հայտատուին համարել չորակավորված, եթե նա քննության արդյունքում չի հավաքել որակավորման կարգով սահմանված համապատասխան միավորը.
լ) որակավորման կարգով սահմանված դեպքերում, ընդունել համապատասխան որոշում` հայտատուի չներկայացած համարելու կամ քննությունից հեռացնելու մասին.
խ) սահմանված դեպքերում կասեցնել աուդիտորի որակավորման վկայականի գործողությունը կամ այն ճանաչել ուժը կորցրած.
ծ) պետական տուրքը չվճարած հայտատուին արգելել մասնակցելու քննությանը.
կ) քննարկել և ներկայացնել առաջարկություններ` հանձնաժողովի անհատական կազմում փոփոխություններ կատարելու մասին:
3. Հանձնաժողովի պարտականությունների բաշխումը անդամների միջև կատարվում է հանձնաժողովի որոշմամբ:
III. ՀԱՆՁՆԱԺՈՂՈՎԻ ԿԱԶՄԸ ԵՎ ԱՇԽԱՏԱԿԱՐԳԸ
4. Հանձնաժողովի անհատական կազմը հաստատվում է Հայաստանի Հանրապետության ֆինանսների նախարարության հրամանով:
5. Հանձնաժողովում կարող են ընդգրկվել Հայաստանի Հանրապետության ֆինանսների նախարարության, Հայաստանի Հանրապետության նախարարությունների և գերատեսչությունների համապատասխան կառուցվածքային ստորաբաժանումների մասնագետները, ինչպես նաև հաշվապահների և աուդիտորների հասարակական կազմակերպությունների անդամները` կազմակերպությունների ներկայացմամբ:
6. Ի պաշտոնե հանձնաժողովի նախագահ է նշանակվում Հայաստանի Հանրապետության ֆինանսների նախարարի համապատասխան տեղակալը:
7. Հանձնաժողովի աշխատանքներն իրականացվում են նիստերի միջոցով, որոնք գումարվում են առնվազն ամիսը մեկ անգամ` հանձնաժողովի որոշմամբ սահմանված ժամկետներում: Անհրաժեշտության դեպքում հանձնաժողովի նախագահը կարող է հրավիրել լրացուցիչ նիստ:
8. Հանձնաժողովի նիստը համարվում է կայացած, եթե նիստին մասնակցում են հանձնաժողովի անդամների կեսից ավելին: Նիստը վարում է հանձնաժողովի նախագահը, իսկ նախագահի բացակայության դեպքում` նրա կողմից լիազորված հանձնաժողովի անդամը:
9. Հանձնաժողովում որոշումներն ընդունվում են ձայների պարզ մեծամասնությամբ: Ձայների հավասարության դեպքում, վճռորոշ է հանդիսանում նախագահի ձայնը:
10. Հանձնաժողովի կողմից ընդունված որոշումներն արձանագրվում են, որի մեկ օրինակը տրվում է Հայաստանի Հանրապետության ֆինանսների նախարարության համապատասխան կառուցվածքային ստորաբաժանմանը:
Հավելված 4
ՀԱՍՏԱՏՎԱԾ Է ՀՀ ՖԻՆԱՆՍՆԵՐԻ
ՆԱԽԱՐԱՐԻ 1999 Թ. ՀՈՒԼԻՍԻ 29-Ի
ԹԻՎ 287 ՀՐԱՄԱՆՈՎ
ԿԱՐԳ
ՕՏԱՐԵՐԿՐՅԱ ՊԵՏՈՒԹՅՈՒՆՆԵՐՈՒՄ ՍԱՀՄԱՆՎԱԾ ԿԱՐԳՈՎ ԱՈՒԴԻՏՈՐԻ ՈՐԱԿԱՎՈՐՈՒՄ ՍՏԱՑԱԾ ՀԱՅՏԱՏՈՒԻ ՈՐԱԿԱՎՈՐՄԱՆ
1. Սույնով կանոնակարգվում են օտարերկրյա պետություններում սահմանված կարգով աուդիտորի որակավորում ստացած և վերջին հինգ տարվա ընթացքում առնվազն երեք տարվա մասնագիտական (աուդիտորի կամ աուդիտորական կազմակերպությունում` որպես մասնագետի` այդպիսի կազմակերպության ղեկավարի (տնօրեն, նախագահ կամ նրանց տեղակալ) աշխատանքի փորձ ունեցող հայտատուի (անկախ քաղաքացիությունից) ընդհանուր աուդիտի գծով որակավորման առանձնահատկությունների հետ կապված հարցերը:
2. Սույն կարգի 1-ին կետում նշված հայտատուն (այսուհետև` հայտատու) կարող է որակավորման քննությունը հանձնել հարցազրույցի միջոցով, որն անց է կացվում Հայաստանի Հանրապետության ֆինանսների նախարարության կողմից հաստատված աուդիտորների որակավորման քննությունների ծրագրի շրջանակներում, հաշվի առնելով սույն կարգի դրույթները:
Հարցազրույցի ընթացքում հարցեր կարող են տրվել նաև հայտատուի կողմից կատարված մասնագիտական աշխատանքների բնույթի և բովանդակության վերաբերյալ:
3. Հայտատուի որակավորման ժամանակ հաշվի են առնվում նրա մասնագիտական կարողությունների գնահատման չափանիշները, այդ թվում`
- կրթությունը,
- օտարերկրյա պետությունում որակավորում ստանալու ժամանակ որակավորմանը ներկայացված պահանջները, մասնավորապես` որակավորման ծրագրում հաշվապահական հաշվառման և աուդիտի միջազգային ստանդարտների կամ հաշվապահական հաշվառման միջազգային ճանաչում ունեցող այլ համակարգերի ներառված լինելու հանգամանքը,
- մասնագիտական փորձառությունը և Հայաստանի Հանրապետության կամ ԱՊՀ երկրների հաշվապահական հաշվառման, հարկային և տնտեսական օրենսդրությանը տիրապետելու աստիճանը:
4. Հարցազրույցի ընդհանուր տևողությունը սահմանվում է մինչև մեկ ժամ:
5. Հայտատուի պատասխանները գնահատելիս հանձնաժողովի անդամների կողմից օգտագործվում են «դրական» կամ «բացասական» բառերը, որի մասին նրանք կատարում են գրառում` հանձնաժողովի որոշմամբ հաստատված ձևում:
6. Հայտատուն համարվում է որակավորված, եթե հարցազրույցի արդյունքում հանձնաժողովի անդամների կողմից նշանակված «դրական» գնահատականների թիվը գերազանցում է «բացասական» գնահատականների թվին, իսկ դրանց հավասար լինելու դեպքում վճռորոշ է համարվում հանձնաժողովի նախագահի (նիստը նախագահողի) կողմից նշանակված գնահատականը:
7. Հարցազրույցի արդյունքներով որակավորում չստացած, ինչպես նաև հարցազրույցի հրավիրված, սակայն չներկայացած հայտատուն նույն հիմունքներով կրկին կարող է մասնակցել որակավորման քննություններին` առանց ներկայացնելու բարձրագույն (միջնակարգ-մասնագիտական) կրթության դիպլոմի պատճենը և լուսանկարները, եթե նրա կողմից համապատասխան փաստաթղթերի ներկայացման օրվանից չի անցել մեկ տարի:
8. Հայտատուի որակավորման հետ կապված մյուս հարցերը կանոնակարգվում են «Հայաստանի Հանրապետությունում ընդհանուր աուդիտի գծով աուդիտորների որակավորման կարգի» դրույթներով:
Հավելված 5
ՀԱՍՏԱՏՎԱԾ Է ՀՀ ՖԻՆԱՆՍՆԵՐԻ
ՆԱԽԱՐԱՐԻ 1999 Թ. ՀՈՒԼԻՍԻ 29-Ի
ԹԻՎ 287 ՀՐԱՄԱՆՈՎ
ՀԱՇՎԵՏՎՈՒԹՅՈՒՆ
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԸՆԴՀԱՆՈՒՐ ԱՈՒԴԻՏԻ ԳԾՈՎ
ԱՈՒԴԻՏՈՐՆԵՐԻ ՈՐԱԿԱՎՈՐՄԱՆ ՀԱՆՁՆԱԺՈՂՈՎԻ Թ.
ԱՇԽԱՏԱՆՔՆԵՐԻ ՎԵՐԱԲԵՐՅԱԼ
.______________________________________________________________________.
|Հ/Հ| Կազմված արձանագրության | Ընդունված որոշման| Ծանոթություն |
| | համառոտ բովանդակությունը | բովանդակությունը | (որոշման N, |
| | | | ամսաթիվը և |
| | | | այլն) |
|___|___________________________|_____________________|________________|
| 1 | 2 | 3 | 4 |
|___|___________________________|_____________________|________________|
| | | | |
| | | | |
| | | | |
| | | | |
| | | | |
| | | | |
Հանձնաժողովի նախագահ`
Հանձնաժողովի քարտուղար`
Ծանոթություն: Հաշվետվությանը կից ներկայացվում է`
ա) տեղեկանք հաշվետվության վերաբերյալ (հանձնաժողովի կանոնակարգի պահանջների ապահովման, հանձնաժողովի կողմից իրականացված աշխատանքներում տեղ գտած թերությունների, օրենսդրական կարգավորում պահանջող հարցերի մասին և այլն),
բ) առաջարկություններ` տեղ գտած թերությունների վերացման, հանձնաժողովի աշխատանքների բարելավման և կատարելագործման, հանձնաժողովի անհատական կազմում փոփոխություններ կատարելու ուղղությամբ:
ԳՐԱՆՑՎԱԾ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ «04» 08 1999 Թ. ՊԵՏԱԿԱՆ ԳՐԱՆՑՄԱՆ ԹԻՎ 11899125