(ուժը կորցրել է 23.06.05 թիվ 932-ն որոշում)
i
040.0559.040999
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«4» սեպտեմբերի 1999 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
4 սեպտեմբերի 1999 թվականի թիվ 559
i
ՓԱՍՏԱԹՂԹԵՐԻ ՓՈՐՁԱԳԻՏԱԿԱՆ ԱՐԺԵՔԱՎՈՐՄԱՆ ԵՎ ՀԱՅԱՍՏԱՆԻ ԱԶԳԱՅԻՆ ԱՐԽԻՎԱՅԻՆ ՖՈՆԴԻ ԿԱԶՄՈՒՄ ԸՆԴԳՐԿՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
«Հայաստանի ազգային արխիվային ֆոնդի մասին» Հայաստանի Հանրապետության օրենքի 16 հոդվածին համապատասխան` Հայաստանի Հանրապետության կառավարությունը որոշում է.
1. Հաստատել փաստաթղթերի փորձագիտական արժեքավորման և Հայաստանի ազգային արխիվային ֆոնդի կազմում ընդգրկման կարգը (կցվում է):
i
2. Ուժը կորցրած ճանաչել Հայաստանի Հանրապետության կառավարության 1994 թվականի օգոստոսի 16-ի «Հայաստանի ազգային արխիվային ֆոնդի կազմում փաստաթղթերի ընդգրկման կարգի հաստատման մասին» N 376 որոշումը:
Հաստատված է
ՀՀ կառավարության 1999 թ.
սեպտեմբերի 4-ի N 559 որոշմամբ
ԿԱՐԳ
փաստաթղթերի փորձագիտական արժեքավորման եվ Հայաստանի
ազգային արխիվային ֆոնդի կազմում ընդգրկման
1. Սույն կարգով կանոնակարգվում է փաստաթղթերի փորձագիտական արժեքավորման և Հայաստանի ազգային արխիվային ֆոնդի (այսուհետև` ՀԱԱՖ) կազմում ընդգրկման կարգը:
2. ՀԱԱՖ-ի կազմում փաստաթղթերն ընդգրկվում են փորձագիտական արժեքավորման սկզբունքներին և չափանիշներին համապատասխան:
3. Փաստաթղթերի փորձագիտական արժեքավորման սկզբունքներն են` պատմականությունը, համակողմանիությունն ու համալիրությունը:
4. Փաստաթղթերի փորձագիտական արժեքավորման սկզբունքները կիրառվում են «Փաստաթղթի ծագում», «Փաստաթղթի բովանդակություն», «Փաստաթղթի արտաքին առանձնահատկություն» չափանիշների համադրմամբ:
5. «Փաստաթղթի ծագում» չափանիշին են վերաբերում`
ա) հասարակության կյանքում կազմակերպության (հիմնարկի) կամ անձի զբաղեցրած տեղն ու դերը.
բ) փաստաթղթում արտացոլված իրադարձության, երևույթի, փաստի, առարկայի նշանակությունը.
գ) փաստաթղթի առաջացման (ծագման) տեղն ու ժամանակը:
6. «Փաստաթղթի բովանդակություն» չափանիշին են վերաբերում`
ա) փաստաթղթում արտացոլված տեղեկատվության նշանակությունը.
բ) տեղեկատվության կրկնվածությունն ուրիշ փաստաթղթերում.
գ) փաստաթղթի տեսակն ու տարատեսակը:
7. «Փաստաթղթի արտաքին առանձնահատկություն» չափանիշին են վերաբերում`
ա) փաստաթղթի իսկությունը (ստորագրությունների, կնիքների, տարեթվի առկայությունը).
բ) փաստաթղթի վրա մակագրության, նշագրման և նշումների առկայությունը.
գ) փաստաթղթի բովանդակության հաղորդման ձևը.
դ) փաստաթղթի ձևակերպման ու վավերացման եղանակը (այդ թվում` փաստաթղթի գեղարվեստական, հնագրագիտական, լեզվական առանձնահատկությունները և այլն).
ե) փաստաթղթի ֆիզիկական վիճակը:
8. Փաստաթղթերի փորձագիտական արժեքավորումն անցկացվում է`
ա) կազմակերպության գործավարությունում`
գործերի անվանակարգ կազմելիս,
գործերը ձևակերպելիս և փաստաթղթերը գործերում տեղադրելու ճշտությունն ստուգելիս,
գործերը գերատեսչական արխիվում պահպանության հանձնելու համար նախապատրաստելիս.
բ) գերատեսչական արխիվում`
գործերը պետական պահպանության հանձնելու համար նախապատրաստելիս.
գ) պետական արխիվում`
չկարգավորված ֆոնդերը մշակելիս,
փաստաթղթերի նպատակային փորձագիտական արժեքավորման անցկացնելիս,
գործերը նկարագրելիս,
արխիվային գործերի ցուցակները վերամշակելիս:
9. Փաստաթղթերի փորձագիտական արժեքավորումն իրականացնելու համար ստեղծվում են`
ա) կազմակերպություններում փորձագիտական հանձնաժողովներ (ՓՀ)
փաստաթղթերի փորձագիտական արժեքավորումը, պահպանության նպատակով դրանց ընտրությունն իրականացնելու համար.
բ) Հայաստանի Հանրապետության նախարարություններում և գերատեսչություններում` գերատեսչական փորձագիտական հանձնաժողովներ (ԳՓՀ) փաստաթղթերի փորձագիտական արժեքավորումն ու պետական պահպանության համար ՀԱԱՖ-ի փաստաթղթերի առանձնացումը, ինչպես նաև ճյուղի և համակարգի կազմակերպություններում փաստաթղթերի փորձագիտական արժեքավորման անցկացման նկատմամբ հսկողությունն ու մեթոդական օգնության կազմակերպումն իրականացնելու համար.
գ) պետական արխիվներում` մեթոդական փորձագիտական հանձնաժողովներ (ՄՓՀ)` ՀԱԱՖ-ի փաստաթղթերի փորձագիտական արժեքավորումը, պետական ու գերատեսչական արխիվների համալրումը փաստաթղթերով, համալրման աղբյուրների գործավարությունում փաստաթղթերի հետ տարվող աշխատանքների կազմակերպումը, ինչպես նաև դրանցում գործող ԳՓՀ-ների մեթոդական օգնությունն ու դրանց նկատմամբ հսկողությունն իրականացնելու համար:
10. ՀԱԱՖ-ի փաստաթղթերի կազմի որոշման, փաստաթղթերի փորձագիտական արժեքավորման իրականացման, ՀԱԱՖ-ի փաստաթղթերի պետական պահպանության համար ընտրության հետ կապված գիտամեթոդական հարցերի քննարկումը, ինչպես նաև պետական արխիվներում փաստաթղթերի փորձագիտական արժեքավորման նկատմամբ հսկողությունը և մեթոդական օգնության կազմակերպումն իրականացնում է Հայաստանի Հանրապետության կառավարությանն առընթեր արխիվային գործի վարչությունում ստեղծված կենտրոնական փորձագիտական հանձնաժողովը (ԿՓՀ):
11. Փորձագիտական հանձնաժողովների իրավասությունը սահմանվում է Հայաստանի Հանրապետության կառավարությանն առընթեր արխիվային գործի վարչության հաստատած կանոնադրություններով: