040.1230.061216
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
1 դեկտեմբերի 2016 թվականի N 1230-Ն
ԲՅՈՒՋԵՏԱՅԻՆ ՎԱՐԿ ՏՐԱՄԱԴՐԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ 2016 ԹՎԱԿԱՆԻ ՊԵՏԱԿԱՆ ԲՅՈՒՋԵՈՒՄ ՈՒ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2015 ԹՎԱԿԱՆԻ ԴԵԿՏԵՄԲԵՐԻ 24-Ի N 1555-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ
Հիմք ընդունելով «Հայաստանի Հանրապետության բյուջետային համակարգի մասին» Հայաստանի Հանրապետության օրենքի 10-րդ հոդվածը և «Հայաստանի Հանրապետության 2016 թվականի պետական բյուջեի մասին» Հայաստանի Հանրապետության օրենքի 11-րդ հոդվածի 16-րդ կետը` Հայաստանի Հանրապետության կառավարությունը որոշում է.
1. Հայաստանի Հանրապետության ֆինանսների նախարարին` «Նաիրիտ Գործարան» փակ բաժնետիրական ընկերության աշխատողների 2016 թվականի հուլիս ամսվա աշխատավարձերի և դրան հավասարեցված վճարումների, օգոստոսի 1-ի դրությամբ կատարված վերջնահաշվարկների գծով կետանցված պահանջների գնման նպատակով «Նաիրիտ-2» փակ բաժնետիրական ընկերությանը տրամադրել 41334,0 հազ. դրամ գումարի չափով բյուջետային վարկ` Հայաստանի Հանրապետության 2016 թվականի պետական բյուջեի հաշվին` մինչև 2020 թվականի դեկտեմբերի 10-ը մարման ժամկետով, տարեկան 1.0 տոկոս տոկոսադրույքով` առանց պարտավորության կատարման ապահովման միջոցի` պայմանով որ վարկը ենթակա է վաղաժամկետ մարման վարկառուին փոխանցված աշխատավարձերի և դրան հավասարեցված աշխատավարձերի, վերջնահաշվարկների գծով պահանջների իրավունքի բավարարման գումարները «Նաիրիտ Գործարան» փակ բաժնետիրական ընկերության սնանկության վարույթով օրենքով սահմանված հերթում ստանալուց հետո 10-օրվա ընթացքում:
2. «Հայաստանի Հանրապետության 2016 թվականի պետական բյուջեի մասին» Հայաստանի Հանրապետության օրենքում և Հայաստանի Հանրապետության կառավարության 2015 թվականի դեկտեմբերի 24-ի «Հայաստանի Հանրապետության 2016 թվականի պետական բյուջեի կատարումն ապահովող միջոցառումների մասին» N 1555-Ն որոշման մեջ կատարել փոփոխություն` համաձայն հավելվածի:
3. Հայաստանի Հանրապետության ֆինանսների նախարարին` սույն որոշումն ուժի մեջ մտնելուց հետո 15-օրյա ժամկետում «Նաիրիտ-2» փակ բաժնետիրական ընկերության հետ կնքել սույն որոշման 1-ին կետով նախատեսված վարկի տրամադրման մասին պայմանագիր:
4. Հայաստանի Հանրապետության էներգետիկ ենթակառուցվածքների և բնական պաշարների նախարարին`
1) կազմակերպել «Նաիրիտ-2» փակ բաժնետիրական ընկերության և «Նաիրիտ Գործարան» փակ բաժնետիրական ընկերության աշխատողների միջև պահանջի իրավունքի զիջման պայմանագրերի կնքումը` սույն որոշման 1-ին կետում նշված 2016 թվականի հուլիս ամսվա աշխատավարձերի և դրան հավասարեցված վճարումների, օգոստոսի 1-ի դրությամբ կատարված վերջնահաշվարկների գծով աշխատողների լրիվ ծավալով պահանջի իրավունքը հիմնական գումարին հավասար գնով գնելու և միանվագ վճարելու պայմաններով.
2) ապահովել հսկողություն «Նաիրիտ-2» փակ բաժնետիրական ընկերության կողմից վարկային պայմանագրով սահմանված ժամկետներում բյուջետային վարկի մարման նկատմամբ:
5. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2016 ԹՎԱԿԱՆԻ ԴԵԿՏԵՄԲԵՐԻ 6-ԻՆ
------------------------------------------
ԻՐՏԵԿ - հավելվածը չի բերվում