040.0814.190814
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
31 հուլիսի 2014 թվականի N 814-Ն
ԵՐԵՎԱՆ ՔԱՂԱՔԻ ԹՈՒՄԱՆՅԱՆ, ՆԱԼԲԱՆԴՅԱՆ, ԱՎԱԳ ՊԵՏՐՈՍՅԱՆ ՓՈՂՈՑՆԵՐՈՎ ԵՎ ՍԱՅԱԹ-ՆՈՎԱՅԻ ՊՈՂՈՏԱՅՈՎ ՊԱՐՓԱԿՎԱԾ ՏԱՐԱԾՔԻ ՆԿԱՏՄԱՄԲ ԲԱՑԱՌԻԿ` ԳԵՐԱԿԱ ՀԱՆՐԱՅԻՆ ՇԱՀ ՃԱՆԱՉԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2010 ԹՎԱԿԱՆԻ ՄԱՐՏԻ 18-Ի N 316-Ա ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ
Ղեկավարվելով Հայաստանի Հանրապետության հողային օրենսգրքի 61-րդ հոդվածով, «Հասարակության և պետության կարիքների համար սեփականության օտարման մասին» Հայաստանի Հանրապետության օրենքի 4-րդ, 5-րդ, 7-րդ ու 18-րդ հոդվածների և 16-րդ հոդվածի 1-ին մասի դրույթներով և հիմք ընդունելով Երևան քաղաքի գլխավոր հատակագիծն ու դրա հիման վրա առաջացած քաղաքի զարգացման հեռանկարները` Հայաստանի Հանրապետության կառավարությունը որոշում է.
1. Երևան քաղաքի Թումանյան, Նալբանդյան, Ավագ Պետրոսյան փողոցներով և Սայաթ-Նովայի պողոտայով պարփակված տարածքի նկատմամբ` համաձայն հավելվածի, ճանաչել բացառիկ` գերակա հանրային շահ` հետևյալ հիմնավորումներով`
1) սույն որոշման հավելվածում նշված տարածքում իրականացվող քաղաքաշինական ծրագրի իրականացման շահը գերակայում է օտարվող սեփականության սեփականատերերի շահերից, քանի որ`
ա. սույն որոշման հավելվածում նշված տարածքում քաղաքաշինական ծրագրի իրականացմամբ Երևանի կենտրոնից կվերանա ներկայումս առկա խառը, անկանոն կառուցապատումը` հին և ոչ ֆունկցիոնալ շինություններով, տարերայնորեն տեղադրված մետաղյա և քարե ավտոտնակներով, որոնց փոխարեն պետք է կառուցվեն բազմաֆունկցիոնալ կառույց և ստորգետնյա ավտոկայանատեղի: Ամբողջ բակային տարածքը կառուցապատման քաղաքաշինական ծրագրերի շրջանակներում պետք է բարեկարգվի, համալրվի կանաչապատ տարածքներով և խաղահրապարակներով, ինչպես նաև հիմնովին նորացվելու են ինժեներատեխնիկական ենթակառուցվածքները,
բ. համաձայն Երևան քաղաքի գլխավոր հատակագծի, Կենտրոն վարչական շրջանի համաձայնեցված գոտևորման նախագծի և դրա հիման վրա մշակված բակային տարածքների վերականգնման հայեցակարգի` տվյալ տարածքի համար նախատեսված է բակային տարածքում գտնվող մանկապարտեզի և խարխուլ շենքերի, շինությունների իրացում` տեղում նոր կառույցի իրականացմամբ` ապահովելով ներդաշնակ կառուցապատում, ինչպես նաև Երևան քաղաքի կենտրոնում փողոցների ծանրաբեռնվածության նվազեցում` կառուցվող ստորգետնյա ավտոկայանատեղի միջոցով.
2) նշված ծրագրի արդյունավետ իրականացումը չի կարող ապահովվել` առանց նշված սեփականության օբյեկտների օտարման, քանի որ`
ա. վերջիններիս անմիջական հարևանությամբ գտնվող տարածքների համար նախագծվել և մասնակիորեն իրականացվել են համաքաղաքային ենթակառուցվածքների անբաժանելի մաս կազմող հանգույցներ, արդեն իսկ մասնակիորեն իրականացվել է բակային տարածքի օտարման գործընթացը,
բ. անհնար է ապահովել տարածքների ջրամատակարարումը, ջրահեռացումը և քաղաքի համար կենսական նշանակություն ունեցող այլ պայմաններ, որոնք նախատեսված են Երևան քաղաքի գլխավոր հատակագծով:
2. Սահմանել, որ`
1) սույն որոշման 1-ին կետում նշված տարածքը ձեռք բերողը «ԱՎԱԳ ՇԻՆ» սահմանափակ պատասխանատվությամբ ընկերությունն է (այսուհետ` ձեռք բերող).
2) նախատեսված օտարման գործառույթների իրականացման աշխատանքները համակարգող լիազոր մարմինը Երևանի քաղաքապետն է.
3) սեփականության օտարման գործընթացն սկսելու վերջնական ժամկետը 2015 թվականի հունվարի 1-ն է.
4) սույն որոշմամբ բացառիկ` գերակա հանրային շահ ճանաչված տարածքի և դրանում առկա սեփականության օբյեկտների նկարագրության արձանագրության կազմման գործառույթներն իրականացնում է Երևանի քաղաքապետը.
5) սույն որոշմամբ բացառիկ` գերակա հանրային շահ ճանաչված տարածքի և դրանում առկա սեփականության օբյեկտների նկարագրության արձանագրության կազմման աշխատանքներն իրականացվում են Հայաստանի Հանրապետության կառավարության 2007 թվականի հունվարի 25-ի N 108-Ն որոշմամբ սահմանված կարգով և որոշմամբ սահմանված նկարագրության արձանագրության օրինակելի ձևով:
3. Ընդունել ի գիտություն, որ`
i
1) սույն որոշման հավելվածում նշված տարածքում կառուցվելու է բազմաֆունկցիոնալ կառույց` մինչև 9 վերգետնյա հարկով և 1 ետնահանջ վերնահարկով.
2) լիազոր մարմինը կարող է սահմանված կարգով Երևան քաղաքի Թումանյան, Նալբանդյան, Ավագ Պետրոսյան փողոցներով և Սայաթ-Նովայի պողոտայով պարփակված տարածքում ձեռք բերողին սեփականության իրավունքով պատկանող հողամասերը համարժեքորեն փոխանակել տարածքում ձեռք բերողի կողմից կառուցվող շենքի և դրա սպասարկման համար անհրաժեշտ հողամասի սահմաններում ընդգրկված պետական և համայնքային սեփականություն հանդիսացող հողամասերի հետ.
3) հողամասերի փոխանակությունից հետո տարածքում ձեռք բերողի սեփականությունը հանդիսացող հողամասերի օգտագործման արդյունավետությունը բարձրացնելու և մասնատվածությունը վերացնելու նպատակով այդ հողամասերը կարող են միավորվել և փոխանակվել տարածքում ձեռք բերողի կողմից կառուցվող շենքի և դրա սպասարկման համար անհրաժեշտ հողամասին կից պետական կամ համայնքային սեփականություն հանդիսացող հողամասերի հետ.
4) քաղաքաշինական ծրագրի վերջնաժամկետ է սահմանվում 2018 թվականի հունվարի 1-ը:
(4-րդ կետը փոփ. 28.04.16 թիվ 452-Ն որոշում)
4. Լիազորել Երևանի քաղաքապետին`
1) սույն որոշման 1-ին կետում նշված տարածքում առկա` պետական սեփականություն հանդիսացող անշարժ գույքի` պետության և հասարակության կարիքների համար գույքի օտարման գործառույթների իրականացման ընթացքում հանդես գալ Հայաստանի Հանրապետության անունից` Հայաստանի Հանրապետության օրենսդրությամբ սահմանված կարգով.
2) սույն որոշումն ուժի մեջ մտնելուն հաջորդող յոթ օրվա ընթացքում սույն որոշումը պատշաճ ձևով ուղարկել օտարվող սեփականության սեփականատերերին և օտարվող սեփականության նկատմամբ պետական գրանցում ունեցող գույքային իրավունքներ ունեցող անձանց:
5. Հայաստանի Հանրապետության կառավարության 2010 թվականի մարտի 18-ի «ԱՎԱԳ ՇԻՆ» սահմանափակ պատասխանատվությամբ ընկերությանը գույք օտարելու մասին» N 316-Ա որոշման մեջ կատարել հետևյալ փոփոխությունները`
1) որոշման 1-ին կետում և 3-րդ կետի 2-րդ ենթակետում «1796.9» թիվը փոխարինել «1296» թվով.
2) որոշման 3-րդ կետի 1-ին ենթակետի «բ» պարբերության մեջ «պայմանագրի կնքումից հետո չորս տարվա ընթացքում» բառերը փոխարինել «պայմանագրի կնքումից հետո յոթ տարվա ընթացքում» բառերով.
3) որոշման 3-րդ կետի 2-րդ ենթակետի «ա» պարբերության մեջ «նախնական առուվաճառքի պայմանագիր կնքելուց հետո չորս տարվա ընթացքում» բառերը փոխարինել «նախնական առուվաճառքի մասին պայմանագիր կնքելուց հետո յոթ տարվա ընթացքում» բառերով.
4) ուժը կորցրած ճանաչել որոշման 3-րդ կետի 1-ին ենթակետի «գ» պարբերությունը:
6. Հայաստանի Հանրապետության կառավարությանն առընթեր Հայաստանի Հանրապետության ոստիկանության պետին` սույն որոշումն ուժի մեջ մտնելուց հետո երկշաբաթյա ժամկետում «ԱՎԱԳ ՇԻՆ» սահմանափակ պատասխանատվությամբ ընկերության հետ կնքել Հայաստանի Հանրապետության, ի դեմս Հայաստանի Հանրապետության կառավարությանն առընթեր Հայաստանի Հանրապետության ոստիկանության, և «ԱՎԱԳ ՇԻՆ» սահմանափակ պատասխանատվությամբ ընկերության միջև 2010 թվականի մայիսի 19-ին կնքված անշարժ գույքի առուվաճառքի և նախնական առուվաճառքի մասին պայմանագրերում սույն որոշումից բխող համապատասխան փոփոխություններ կատարելու մասին համաձայնագրեր:
7. Ընդունել ի գիտություն, որ սույն որոշումից բխող համաձայնագրերի նոտարական վավերացման և դրանից բխող գույքային իրավունքների պետական գրանցման հետ կապված ծախսերը կատարվում են «ԱՎԱԳ ՇԻՆ» սահմանափակ պատասխանատվությամբ ընկերության միջոցների հաշվին:
8. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2014 ԹՎԱԿԱՆԻ ՕԳՈՍՏՈՍԻ 19-ԻՆ
Հավելված
ՀՀ կառավարության
2014 թվականի հուլիսի 31-ի
N 814-Ն որոշման
ՑԱՆԿ
ԵՐԵՎԱՆ ՔԱՂԱՔԻ ԹՈՒՄԱՆՅԱՆ, ՆԱԼԲԱՆԴՅԱՆ, ԱՎԱԳ ՊԵՏՐՈՍՅԱՆ ՓՈՂՈՑՆԵՐՈՎ ԵՎ ՍԱՅԱԹ-ՆՈՎԱՅԻ ՊՈՂՈՏԱՅՈՎ ՊԱՐՓԱԿՎԱԾ ՏԱՐԱԾՔԻ, ՈՐԻ ՆԿԱՏՄԱՄԲ ՃԱՆԱՉՎԵԼ Է ԲԱՑԱՌԻԿ` ԳԵՐԱԿԱ ՀԱՆՐԱՅԻՆ ՇԱՀ
.___________________________________________________________________.
|NN |Գտնվելու վայրը և նկարագիրը |Նկարագրության |
|ը/կ| |արձանագրության |
| | |կազմման ժամկետը|
|___|_______________________________________________|_______________|
|1. |Թումանյան փողոց, N 13/1 ավտոտնակ. Թումանյան | 4 ամիս |
| |փողոց, N 13/3 ավտոտնակ. Թումանյան փողոց, N 14 | |
| |շենքի բակում գտնվող ավտոտնակ. Թումանյան փողոց, | |
| |N 16/1 հասցեում գտնվող ավտոտնակ. Թումանյան 1-ին| |
| |նրբանցք, N 13 շենքի բակում հողատարածք. Ավագ | |
| |Պետրոսյան (նախկին Մետաղագործների) փողոց, N 21 | |
| |հասցեում գտնվող բնակելի տներ, Սայաթ-Նովայի | |
| |պողոտա, N 18/1 ավտոտնակ (սխեման կցվում է) | |
.___________________________________________________________________.
ՍԽԵՄԱ
ԱՅՆ ՏԱՐԱԾՔԻ, ՈՐԻ ՆԿԱՏՄԱՄԲ ՃԱՆԱՉՎԵԼ Է ԲԱՑԱՌԻԿ` ԳԵՐԱԿԱ ՀԱՆՐԱՅԻՆ ՇԱՀ
(ԵՐԵՎԱՆ ՔԱՂԱՔԻ ԿԵՆՏՐՈՆ ՎԱՐՉԱԿԱՆ ՇՐՋԱՆԻ ՍԱՀՄԱՆՆԵՐՈՒՄ ԹՈՒՄԱՆՅԱՆ, ՆԱԼԲԱՆԴՅԱՆ,ԱՎԱԳ ՊԵՏՐՈՍՅԱՆ ՓՈՂՈՑՆԵՐՈՎ ԵՎ ՍԱՅԱԹ-ՆՈՎԱՅԻ ՊՈՂՈՏԱՅՈՎ
ՊԱՐՓԱԿՎԱԾ ՏԱՐԱԾՔ, S=9054 քառ. մ)
__________________________
ԻՐՏԵԿ - սխեման չի բերվում