ՀՀ ՏԱՐԱԾՔՈՒՄ ԳՈՐԾՈՂ ՎԱՐԿԱՅԻՆ ԲՅՈՒՐՈՆԵՐԻՆ ՏՐԱՄԱԴՐՎՈ ...

050.0231.061213

ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ

                                      «06»        12            2013 Թ.

                                        ՊԵՏԱԿԱՆ ԳՐԱՆՑՄԱՆ ԹԻՎ 05013472

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

ՈՐՈՇՈՒՄ

1 հոկտեմբերի 2013 թվականի թիվ 231-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ԳՈՐԾՈՂ ՎԱՐԿԱՅԻՆ ԲՅՈՒՐՈՆԵՐԻՆ ՏՐԱՄԱԴՐՎՈՂ ՎԱՐԿԱՅԻՆ ՏԵՂԵԿԱՏՎՈՒԹՅԱՆ ՆՎԱԶԱԳՈՒՅՆ ՑԱՆԿԸ ՍԱՀՄԱՆԵԼՈՒ ՄԱՍԻՆ

Նպատակ ունենալով վարկային ռեգիստրի և վարկային բյուրոների համար սահմանել բանկերի և վարկային կազմակերպությունների կողմից տրամադրվող տեղեկատվության միասնական հաշվետվական ձև,

հաշվի առնելով Համաշխարհային բանկի կողմից առաջարկված «Զարգացման քաղաքականության գործառնությունների ծրագրի» պահանջները,

հիմք ընդունելով «Վարկային տեղեկատվության շրջանառության և վարկային բյուրոների գործունեության մասին» Հայաստանի Հանրապետության օրենքի 11-րդ հոդվածի 2-րդ մասը և «Իրավական ակտերի մասին» Հայաստանի Հանրապետության օրենքի 16-րդ հոդվածը` Հայաստանի Հանրապետության կենտրոնական բանկի խորհուրդը որոշում է.

1. Հաստատել «Վարկային բյուրոներին տրամադրվող վարկային տեղեկատվության նվազագույն ցանկը»` համաձայն սույն որոշման Հավելվածի (կցվում է):

2. Սույն որոշումն ուժի մեջ է մտնում 2016 թվականի հունվարի 25-ին:

(2-րդ կետը փոփ. 11.03.14 թիվ 51-Ն, 18.04.15 թիվ 94-Ն որոշումներ)

-------------------------------------------------------------------

ԻՐՏԵԿ -  սույն որոշումն արդեն իսկ ուժի մեջ էր մտել 2014 թվականի

մարտի 1-ից և գործել է մինչև 2014 թվականի մայիսի 15, այս իսկ

պատճառով 11.03.14 թիվ 51-Ն որոշմամբ ուժի մեջ մտած

իրավական ակտի համար չի կարող սահմանվել նոր ուժի մեջ

մտնելու ժամկետ

18.04.15 թիվ 94-Ն որոշման համաձայն սույն որոշման 2-րդ կետում

«2015 թվականի մայիսի 1-ին» բառերը պետք է փոխարինել «2016 թվականի

հունվարի 25-ին» բառերով: Սակայն 18.04.15 թվականի թիվ 94-Ն

որոշումն ուժի մեջ է մտել 14.05.15 թվականի, երբ արդեն

ուժի մեջ էր մտել սույն որոշման 2-րդ կետը: Փաստորեն փոփոխվել է

արդեն իսկ ուժի մեջ մտած նորմատիվ իրավական ակտի ուժի մեջ

մտնելու ժամկետը, որը իրավական տեխնիկայի առումով անընդունելի է:

-------------------------------------------------------------------

2.1 Սահմանել, որ Հայաստանի Հանրապետության տարածքում գործող բանկերը, վարկային կազմակերպությունները, օտարերկրյա բանկերի մասնաճյուղերը վարկային բյուրոներին սույն որոշման հավելվածով սահմանված տեղեկատվությունը տրամադրում են 2017 թվականի սեպտեմբերի 2-ից:

(2.1-ին կետը լրաց. 11.07.17 թիվ 158-Ն որոշում)

Հավելված

Հաստատված է

ՀՀ կենտրոնական բանկի խորհրդի

2013 թվականի հոկտեմբերի 1-ի

թիվ 231-Ն որոշմամբ

ՑԱՆԿ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ԳՈՐԾՈՂ ՎԱՐԿԱՅԻՆ ԲՅՈՒՐՈՆԵՐԻՆ ՏՐԱՄԱԴՐՎՈՂ ՎԱՐԿԱՅԻՆ ՏԵՂԵԿԱՏՎՈՒԹՅԱՆ ՆՎԱԶԱԳՈՒՅՆ

1. Հայաստանի Հանրապետության տարածքում գործող բանկերի, վարկային կազմակերպությունների, օտարերկրյա բանկերի մասնաճյուղերի կողմից վարկային բյուրոներին (այսուհետ` Բյուրո) տրամադրվող տեղեկատվությունը սահմանված է Հայաստանի Հանրապետության կենտրոնական բանկի խորհրդի 2005 թվականի մարտի 29-ի թիվ 142-Ն որոշմամբ հաստատված «Հայաստանի Հանրապետության տարածքում գործող բանկերի, վարկային կազմակերպությունների, օտարերկրյա բանկերի մասնաճյուղերի հաճախորդների վարկարժանության տեղեկատվական համակարգի` վարկային ռեգիստրի ստեղծման և վարկային ռեգիստրին Հայաստանի Հանրապետության տարածքում գործող բանկերի, վարկային կազմակերպությունների, օտարերկրյա բանկերի մասնաճյուղերի մասնակցության կարգով» (այսուհետ` Կարգ):

2. Հայաստանի Հանրապետության տարածքում գործող բանկերը, վարկային կազմակերպությունները, օտարերկրյա բանկերի մասնաճյուղերը Բյուրոյին տեղեկատվություն տրամադրում են Վարկային ռեգիստրին տրամադրվող տեղեկատվության նույն ձևաչափով` համաձայն Կարգի:

3. Հայաստանի Հանրապետության տարածքում գործող բանկերի, վարկային կազմակերպությունների, օտարերկրյա բանկերի մասնաճյուղերի կողմից Բյուրոյին տրամադրվող տվյալների անվանումների և ֆորմատների նկատմամբ պահանջները սահմանվում են Հայաստանի Հանրապետության կենտրոնական բանկի կողմից: