https://petekamutner.am/shared/Information/Irazekum%205.pdf
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ
ԻՐԱԶԵԿՄԱՆ ԹԵՐԹԻԿ
22 հունիսի 2020 թվականի N 5
ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅԱՆ ԿՈՂՄԻՑ ԱԱՀ-Ի ՇԵՄԸ ՈՐՈՇԵԼՈՒ ՎԵՐԱԲԵՐՅԱԼ
Հարց
Ոչ առևտրային կազմակերպության կողմից ստացված դրամաշնորհները ներառվում են արդյո՞ք ԱԱՀ-ի շեմը որոշելիս իրացման շրջանառության մեջ և ո՞ր գումարներից է ոչ առևտրային կազմակերպությունը հաշվարկելու և վճարելու ԱԱՀ` 115-ը գերազանցած մասի համար, թե ամբողջ:
Պատասխան
ՀՀ հարկային օրենսգրքի`
i
- 4-րդ հոդվածի 1-ին մասի 41-րդ կետի համաձայն` ապրանքի մատակարարումը ապրանքի նկատմամբ սեփականության իրավունքի փոխանցումն է մեկ անձից մեկ այլ անձի` որևէ ձևով կատարվող հատուցմամբ (այդ թվում` մասնակի հատուցմամբ կամ դրամաշնորհների կամ սուբսիդիաների ձևով հատուցմամբ) կամ անհատույց,
i
- 4-րդ հոդվածի 47-րդ կետի համաձայն` աշխատանքի կատարումը աշխատանքի կատարման արդյունքի սեփականության իրավունքի փոխանցումն է մեկ անձից մեկ այլ անձի` որևէ ձևով կատարվող հատուցմամբ (այդ թվում` մասնակի հատուցմամբ կամ դրամաշնորհների կամ սուբսիդիաների ձևով հատուցմամբ) կամ անհատույց,
i
- 4-րդ հոդվածի 48-րդ կետի համաձայն` ծառայության մատուցումը մեկ անձի կողմից մեկ այլ անձի օգտին գործողության իրականացումն է` որևէ ձևով կատարվող հատուցմամբ (այդ թվում` մասնակի հատուցմամբ կամ դրամաշնորհների կամ սուբսիդիաների ձևով հատուցմամբ) կամ անհատույց,
i
- 59-րդ հոդվածի 2-րդ մասով սահմանված են ոչ առևտրային կազմակերպություններին ԱԱՀ վճարող համարվելու դեպքերն ու ժամկետները: Մասնավորապես, նույն մասի 2-րդ կետի համաձայն` նույն հոդվածի 4-րդ մասի 1-ին կետին համապատասխան հարկային մարմնում որպես ԱԱՀ վճարող հաշվառված ոչ առևտրային կազմակերպությունները ԱԱՀ վճարողներ են հարկային տարվա այն պահից մինչև տվյալ հարկային տարվա ավարտը, որ պահին կազմակերպության կամ անհատ ձեռնարկատիրոջ` օրենսգրքի 254-րդ հոդվածի 2-րդ մասով սահմանված կարգով հաշվարկվող` գործունեության բոլոր տեսակների մասով իրացման շրջանառությունը գերազանցում է 115 միլիոն դրամը: Ընդ որում, հարկային տարվա ընթացքում գործունեության բոլոր տեսակների մասով իրացման շրջանառության 115 միլիոն դրամի շեմը գերազանցելու հիմքով ԱԱՀ վճարող համարվելու դեպքում ԱԱՀ-ն հաշվարկվում և վճարվում է ԱԱՀ-ի շեմը գերազանցող մասով: Գործունեության բոլոր տեսակների մասով իրացման շրջանառության 115 միլիոն դրամը գերազանցելու օրվանից մինչև այդ օրվան հաջորդող 20-րդ օրը ներառյալ ոչ առևտրային կազմակերպությունը հարկային մարմին է ներկայացնում հայտարարություն` նշելով ԱԱՀ-ի շեմը գերազանցելու օրը:
Հաշվի առնելով վերոգրյալը` հայտնում ենք, որ.
1) ԱԱՀ-ի շեմը (115 մլն դրամը) որոշելիս հաշվի է առնվում ապրանքների մատակարարման, աշխատանքների կատարման կամ ծառայությունների մատուցման իրացման շրջանառությունը, այդ թվում` դրամաշնորհների կամ սուբսիդիաների ձևով հատուցմամբ իրականացված,
i
2) ոչ առևտրային կազմակերպության ընթացիկ հարկային տարվա ընթացքում գործունեության բոլոր տեսակների մասով իրացման շրջանառությունը ԱԱՀ-ի շեմը (115 մլն դրամը) գերազանցելու դեպքում ոչ առևտրային կազմակերպությունը համարվում է ԱԱՀ վճարող: Ընդ որում, ԱԱՀ վճարող համարվելու դեպքում ոչ առևտրային կազմակերպությունն ԱԱՀ-ն հաշվարկում և վճարում է ԱԱՀ-ի շեմը գերազանցող մասով` ՀՀ հարկային օրենսգրքի 4-րդ բաժնով սահմանված կարգավորումներին համապատասխան, հաշվի առնելով իրականացվող գործարքների մասով օրենսգրքի 64-րդ հոդվածի 2-րդ մասով սահմանված ԱԱՀ-ից ազատման արտոնությունները: Միաժամանակ, նշված դեպքում ոչ առևտրային կազմակերպությունը գործունեության բոլոր տեսակների մասով իրացման շրջանառության 115 միլիոն դրամը գերազանցելու օրվանից մինչև այդ օրվան հաջորդող 20-րդ օրը ներառյալ պարտավոր է հարկային մարմին ներկայացնել ԱԱՀ վճարող համարվելու և որպես ԱԱՀ վճարող հաշվառվելու վերաբերյալ հայտարարություն` նշելով ԱԱՀ-ի շեմը գերազանցելու օրը:
ՀՀ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ