ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ՎՃՌԱԲԵԿ ԴԱՏԱՐԱՆ
ՀՀ քաղաքացիական Քաղաքացիական գործ թիվ 3-1332(ՎԴ)
վերաքննիչ դատարանի որոշում 2007 թ.
Քաղաքացիական գործ թիվ 07-1048/2007 թ.
Նախագահող դատավոր` Ա. Խառատյան
Կ. Հակոբյան
Լ. Գրիգորյան
ՈՐՈՇՈՒՄ ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀՀ վճռաբեկ դատարանի քաղաքացիական պալատը (այսուհետ` Վճռաբեկ դատարան)
նախագահությամբ Հ. ՄԱՆՈՒԿՅԱՆԻ
մասնակցությամբ դատավորներ Ա. ՄԿՐՏՈՒՄՅԱՆԻ
Վ. ԱԲԵԼՅԱՆԻ
Ս. ԱՆՏՈՆՅԱՆԻ
Ս. ԳՅՈՒՐՋՅԱՆԻ
Է. ՀԱՅՐԻՅԱՆԻ
Ս. ՍԱՐԳՍՅԱՆԻ
2007 թվականի օգոստոսի 1-ին
դռնբաց դատական նիստում, քննելով Վճռաբեկ դատարանում հավատարմագրված փաստաբան Արթուր Դավթյանի միջոցով «Ֆինքա» բարեգործական հիմնադրամի (այսուհետ` հիմնադրամ) կողմից ներկայացրած վճռաբեկ բողոքը ՀՀ քաղաքացիական վերաքննիչ դատարանի (այսուհետ` վերաքննիչ դատարան) «Քաղաքացիական գործի վարույթը կասեցնելու մասին» 2007 թվականի ապրիլի 17-ի որոշման դեմ` ըստ հիմնադրամի հայցի ընդդեմ Գովական Մինասյանի, Միհրան Օհանյանի, Ալբերտ Քերոբյանի, Արմեն Մաթևոսյանի և Արսեն Հովհաննիսյանի` գումար բռնագանձելու պահանջի մասին,
ՊԱՐԶԵՑ
1. Գործի դատավարական նախապատմությունը.
ՀՀ քաղաքացիական վերաքննիչ դատարանի 2007 թվականի ապրիլի 17-ի որոշմամբ կայացվել է թիվ 07-1048 քաղաքացիական գործի վարույթն ըստ հիմնադրամի հայցի ընդդեմ Գովական Մինասյանի, Միհրան Օհանյանի, Ալբերտ Քերոբյանի, Արմեն Մաթևոսյանի և Արսեն Հովհաննիսյանի` նպատակային փոխառության պայմանագրով չվճարված 645 277,72 ՀՀ դրամ բռնագանձելու պահանջի մասին:
Սույն գործով վճռաբեկ բողոք է ներկայացրել «Ֆինքա» բարեգործական հիմնադրամը Վճռաբեկ դատարանում հավատարմագրված փաստաբան Արթուր Դավթյանի միջոցով:
Վճռաբեկ բողոքին պատասխան չի ներկայացվել:
2. Վճռաբեկ բողոքի հիմքերը, փաստարկները և պահանջը.
Սույն վճռաբեկ բողոքը քննվում է հետևյալ հիմքի սահմաններում` ներքոհիշյալ հիմնավորումներով.
Վերաքննիչ դատարանը խախտել է ՀՀ քաղաքացիական դատավարության օրենսգրքի 105-րդ հոդվածի 1-ին մասի 1-ին կետը, որի արդյունքում խախտվել է ՀՀ Սահմանադրության 18-րդ հոդվածը:
Բողոք բերած անձը նշված պնդումը պատճառաբանում է հետևյալ փաստարկներով.
Վերաքննիչ դատարանը քաղաքացիական գործի վարույթը կասեցնելու մասին որոշմամբ նշել է, որ քրեական դատավարության շրջանակներում քննություն է կատարվում քաղաքացիական գործով պատասխանողներից հայցով վիճարկվող գումարների վերաբերյալ:
Վերաքննիչ դատարանը նման որոշում կայացնելիս հիմք է ընդունել քրեական գործի շրջանակներում հիմնադրամում ֆինանսական գործունեության ստուգում իրականացնելու հանգամանքը` առանց հիմնավորելու այդ հարցով կայացվելիք որոշման սույն քաղաքացիական գործի քննության հետ պատճառահետևանքային կապը:
Վերաքննիչ դատարանի նման որոշումն առաջացրել է նաև հայցվորի` ՀՀ Սահմանադրության 18-րդ հոդվածով երաշխավորված` իրավունքների և ազատությունների դատական պաշտպանության արդյունավետ միջոցի իրավունքի խախտում:
Վերոգրյալի հիման վրա բողոք բերած անձը պահանջել է վերացնել ՀՀ քաղաքացիական վերաքննիչ դատարանի 2007 թվականի ապրիլի 17-ի քաղաքացիական գործի վարույթը կասեցնելու մասին որոշումը:
3. Վճռաբեկ դատարանի պատճառաբանությունները և եզրահանգումները.
Քննելով վճռաբեկ բողոքը նշված հիմքի սահմաններում` Վճռաբեկ դատարանը գտնում է, որ բողոքն հիմնավոր է հետևյալ պատճառաբանությամբ.
ՀՀ քաղաքացիական դատավարության օրենսգրքի 105-րդ հոդվածի 1-ին մասի համաձայն` դատարանը պարտավոր է կասեցնել գործի վարույթը, եթե անհնարին է տվյալ գործի քննությունը մինչև սահմանադրական, քաղաքացիական, քրեական կամ վարչական դատավարության կարգով քննվող այլ գործով կամ հարցով որոշում կայացնելը:
i
ՀՀ քաղաքացիական դատավարության օրենսգրքի 144-րդ հոդվածի 2-րդ մասի 4-րդ կետի համաձայն` առանձին ակտի ձևով կայացված որոշման մեջ պետք է նշվեն այն շարժառիթները, որոնցով դատարանը հանգել է հետևությունների` օրենքների, այլ իրավական ակտերի վկայակոչմամբ:
Վճռաբեկ դատարանը հարկ է համարում նշել, որ յուրաքանչյուր դեպքում դատարանը պարտավոր է տալ որոշման իրավական հիմնավորումը:
Որոշման իրավական հիմնավորումը կայանում է հաստատված փաստերի և իրավահարաբերությունների նկատմամբ նյութական իրավունքի համապատասխան նորմի կամ նորմերի ընտրության և կիրառման մեջ, այն նորմի (նորմերի), որի հիման վրա դատարանն եզրակացություն է անում վիճելի իրավահարաբերության առկայության կամ բացակայության մասին:
Որոշման մեջ ոչ միայն պետք է ցույց տալ նորմատիվ ակտի այս կամ այն հոդվածը, որում ամրագրված է կիրառման ենթակա նորմը, այլ պետք է պատճառաբանվի, թե հատկապես ինչու պետք է կիրառվի հենց այդ նորմը:
Տվյալ դեպքում, վերաքննիչ դատարանը չի նշել այն շարժառիթները, որոնց հիման վրա հանգել է հետևության այն մասին, որ քրեական դատավարության շրջանակներում կատարվող ֆինանսատնտեսական գործունեության ստուգումն անհնարին է դարձնում սույն քաղաքացիական գործի քննությունը և բավարարել է ներկայացված միջնորդությունը:
Վերը նշված հիմնավորումներով, վճռաբեկ բողոքի հիմքի առկայությունը Վճռաբեկ դատարանը համարում է բավարար ՀՀ քաղաքացիական դատավարության օրենսգրքի 236-րդ հոդվածի 1-ին մասի 7-րդ կետի համաձայն` վերաքննիչ դատարանի որոշումը վերացնելու համար:
Ելնելով վերոգրյալից և ղեկավարվելով ՀՀ քաղաքացիական դատավարության օրենսգրքի 236-239-րդ հոդվածներով` Վճռաբեկ դատարանը
ՈՐՈՇԵՑ
1. Վճռաբեկ բողոքը բավարարել: Վերացնել ՀՀ քաղաքացիական վերաքննիչ դատարանի «Քաղաքացիական գործի վարույթը կասեցնելու մասին» 2007 թվականի ապրիլի 17-ի որոշումը:
2. Սույն որոշումն օրինական ուժի մեջ է մտնում հրապարակման պահից և ենթակա չէ բողոքարկման:
ՆԱԽԱԳԱՀՈՂ` Հ. ՄԱՆՈՒԿՅԱՆ ԴԱՏԱՎՈՐՆԵՐ` Ա. ՄԿՐՏՈՒՄՅԱՆ Վ. ԱԲԵԼՅԱՆ Ս. ԱՆՏՈՆՅԱՆ Ս. ԳՅՈՒՐՋՅԱՆ Է. ՀԱՅՐԻՅԱՆ Ս. ՍԱՐԳՍՅԱՆ