«ԱՍՏՐԱԴԵԶ-ՕՊ» ՄԱՇԿԱՅԻՆ ՀԱԿԱՆԵԽԻՉ ԱԽՏԱՀԱՆԻՉ ՄԻՋՈՑԻ ԿԻՐԱՌՄԱՆ ՀՐԱՀԱՆԳԸ ՀԱՍՏԱՏԵԼՈՒ ՄԱՍԻՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌՈՂՋԱՊԱՀՈՒԹՅԱՆ ՆԱԽԱՐԱՐ
ՀՐԱՄԱՆ

23 մայիսի 2019 թվականի N 1308-Լ

«ԱՍՏՐԱԴԵԶ-ՕՊ» ՄԱՇԿԱՅԻՆ ՀԱԿԱՆԵԽԻՉ ԱԽՏԱՀԱՆԻՉ ՄԻՋՈՑԻ ԿԻՐԱՌՄԱՆ ՀՐԱՀԱՆԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության վարչապետի 2018 թվականի հունիսի 11-ի թիվ 728-Լ որոշմամբ հաստատված Հայաստանի Հանրապետության առողջապահության նախարարության կանոնադրության 18-րդ կետի 20-րդ ենթակետը և Հայաստանի Հանրապետության առողջապահության նախարարի 2015 թվականի սեպտեմբերի 10-ի թիվ 48-Ն հրամանի հավելվածի 20-րդ կետը`

ՀՐԱՄԱՅՈՒՄ ԵՄ`

1. Հաստատել` «Աստրադեզ-ՕՊ» մաշկային հականեխիչ ախտահանիչ միջոցի կիրառման հրահանգը` համաձայն հավելվածի:

2. Սույն հրամանն ուժի մեջ է մտնում հրապարակմանը հաջորդող օրվանից:

Ա. ԹՈՐՈՍՅԱՆ

Հավելված

ՀՀ առողջապահության նախարարի

2019 թ. մայիսի 23-ի

N 1308-Լ հրամանի

ՀՐԱՀԱՆԳ «ԱՍՏՐԱԴԵԶ-ՕՊ» ՄԱՇԿԱՅԻՆ ՀԱԿԱՆԵԽԻՉ ԱԽՏԱՀԱՆԻՉ ՄԻՋՈՑԻ ԿԻՐԱՌՄԱՆ

1. ԸՆԴՀԱՆՈՒՐ ԴՐՈՒՅԹՆԵՐ

1. «Աստրադեզ-ՕՊ» մաշկային հականեխիչ ախտահանիչ միջոցը (այսուհետ` միջոց) իրենից ներկայացնում է օգտագործման համար պատրաստ մաշկային հականեխիչ` յուրահատուկ հոտով կարմրա-նարնջագույն թափանցիկ հեղուկի տեսքով:

2. Որպես ազդող նյութ` պարունակում է. իզոպրոպիլային սպիրտ (պրոպանոլ-2)` 69,0+-2,0%, դիդեցիլդիմեթիլամոնիումի քլորիդ` 0,22+-0,02%, ինչպես նաև ֆունկցիոնալ հավելումներ, այդ թվում` սննդային ներկանյութեր:

3. Միջոցը թողարկվում է 0,1, 0,5, 1,0 դմ3 տարողությամբ պլաստիկ սրվակներով:

4. Միջոցի պիտանելիության ժամկետը 3 տարի է` արտադրողի փակ փաթեթավորմամբ:

5. Միջոցը պահվում է արտադրողի փակ փաթեթավորմամբ` համաձայն դյուրավառ հեղուկների պահման պայմանների` +5oC-ից մինչև +30oC ջերմաստիճանում:

6. Միջոցն օժտված է հակամանրէային ակտիվությամբ գրամբացասական և գրամդրական մանրէների (այդ թվում` տուբերկուլյոզի միկոբակտերիաների), վիրուսասպան ակտիվությամբ ընդերային և արտաընդերային հեպատիտների (այդ թվում` հեպատիտներ Ա-ի, Բ-ի, Ց-ի), ՄԻԱՎ-վարակի, պոլիոմիելիտի, ադենովիրուսների, էնտերովիրուսների, ռոտավիրուսների, SARS վիրուսների, H5N1 գրիպի, A/H1N1 գրիպի, մարդու սեզոնային գրիպի, հերպեսի վիրուսների նկատմամբ, սնկասպան ակտիվությամբ կանդիդոզ և տրիխոֆիտիա հարուցող ախտածին սնկերի նկատմամբ: Միջոցն օժտված է երկարացված մանրէասպան ակտիվությամբ 3 ժամվա ընթացքում:

7. Օգտագործման ժամանակ միջոցն ինտենսիվ գունավորում է մաշկը և հստակ նշում է մշակմանը ենթակա մաշկի հատվածի սահմանները:

8. Միջոցն օժտված է մաշկը փափկացնող և խոնավեցնող հատկություններով:

9. Միջոցն ըստ սուր թունավորության չափանիշների, ստամոքսի մեջ և մաշկի վրա լցվելիս, համաձայն ԳՕՍՏ 12.1.007-76-ի պատկանում է քիչ վտանգավոր նյութերի 4-րդ դասին: Կիրառման առաջարկվող ռեժիմների ժամանակ չի ցուցաբերում տեղային գրգռող, մաշկային-ռեզորբտիվ և գերզգայունացնող հատկություններ: Կիրառման ռեժիմներում ներշնչական (ինհալյացիոն) վտանգավորությունը քիչ հավանական է:

10. Սահմանային թույլատրելի խտությունը (ՍԹԽ) աշխատանքային գոտու օդում.

1) դիդեցիլդիմեթիլամոնիումի քլորիդ` 1 մգ/մ3 (վտանգավորության 2-րդ դաս),

2) իզոպրոպիլային սպիրտի (պրոպանոլ-2) համար` 10 մգ/մ3 (վտանգավորության 3-րդ դաս):

11. Միջոցը նախատեսված է բժշկական օգնություն և սպասարկում իրականացնող կազմակերպություններում (այսուհետ` ԲԿ) (այդ թվում` արյան փոխներարկման կայաններում, շտապ բուժօգնության կայաններում և մեքենաներում), սոցիալական ծառայություններ տրամադրող կազմակերպություններում, հոսպիսներում և այլն.

1) վիրահատական և ներարկման դաշտերի մշակման համար,

2) դոնորների արմնկային ծալքի մշակման համար,

3) կաթետերների տեղադրումից և հոդերի պունկցիայից առաջ մաշկի մշակման համար:

12. Միջոցն իրենից ներկայացնում է օգտագործման համար պատրաստ միջոց և օգտագործումից առաջ ենթակա չէ նոսրացման:

2. ՄԻՋՈՑԻ ԿԻՐԱՌՈՒՄԸ

13. Հիվանդների վիրահատական դաշտի մաշկի, կաթետերների տեղադրումից և հոդերի պունկցիայից առաջ մաշկի մշակում. իրականացվում է միջոցով առատորեն թրջված առանձին մանրէազերծ խծուծներով մաշկի կրկնակի շփման եղանակով: Միջոցով մշակումից հետո պահաժամը 2 րոպե է: Վիրահատության նախօրեին հիվանդն ընդունում է ցնցուղ (լոգանք), փոխում սպիտակեղենը:

14. Դոնորների արմնկային ծալքի մաշկի մշակում. իրականացվում է միջոցով առատորեն թրջված առանձին մանրէազերծ խծուծով մաշկի կրկնակի շփման եղանակով: Միջոցով մշակումից հետո պահաժամը 2 րոպե է (կամ մինչև միջոցի վերջնական չորանալը մաշկի վրա):

15. Ներարկման դաշտի մաշկի մշակում. իրականացվում է միջոցով առատորեն թրջված մանրէազերծ խծուծով մաշկի միանվագ շփման եղանակով: Միջոցով մշակումից հետո պահաժամը 1 րոպե է:

3. ՆԱԽԱԶԳՈՒՇԱԿԱՆ ՄԻՋՈՑԱՌՈՒՄՆԵՐ

16. Կիրառել միայն արտաքին օգտագործման համար: Չօգտագործել ներքին ընդունման համար:

17. Չքսել վերքերի և լորձաթաղանթների վրա:

18. Խուսափել միջոցն աչքերի մեջ լցվելուց:

19. Դյուրավառ է: Չծխել: Չթույլատրել շփում բաց կրակի և միացրած տաքացուցիչ սարքերի հետ:

20. Միջոցը պահել սերտ փակված սրվակների մեջ` դեղամիջոցներից առանձին, երեխաների համար անհասանելի տեղերում:

21. Պիտանելիության ժամկետն անցնելուց հետո միջոցի օգտագործումն արգելվում է:

22. Չնոսրացված վիճակում չլցնել կոյուղի և ձկնատնտեսական ջրամբարներ:

23. Միջոցի մեծ քանակության թափվելու դեպքում վրան լցվում է ավազ կամ հող, որից հետո հավաքվում տարայի մեջ` հետագա օգտահանման համար: Չօգտագործել այրվող նյութեր (օրինակ` թեփ, տաշեղ): Հավաքելու ժամանակ օգտագործել պաշտպանության անհատական միջոցներ (խալաթ, ճտքակոշիկներ, ռետինե կամ պոլիէթիլենային ձեռնոցներ), շնչառական օրգանների պաշտպանության համար` ՌՊԳ-67 կամ ՌՈՒ-60Մ տեսակի Ա մակնիշի պատրոնով ունիվերսալ շնչադիմակներ, կամ արդյունաբերական հակագազ:

4. ԱՌԱՋԻՆ ՕԳՆՈՒԹՅԱՆ ՄԻՋՈՑԱՌՈՒՄՆԵՐ ՊԱՏԱՀԱԿԱՆ ԹՈՒՆԱՎՈՐՄԱՆ ԺԱՄԱՆԱԿ

24. Միջոցն աչքերի մեջ լցվելու դեպքում դրանք առատորեն լվանալ հոսող ջրով և կաթեցնել նատրիումի սուլֆացիլի 20%-30% լուծույթ: Անհրաժեշտության դեպքում դիմել ակնաբույժի:

25. Ստամոքսի մեջ պատահական լցվելու դեպքում ստամոքսն առատորեն լվանալ սենյակային ջերմաստիճանի ջրով: Այնուհետև ընդունել մի քանի բաժակ ջուր ադսորբենտների ավելացմամբ (օրինակ` ակտիվացված ածուխի 10-15 մանրացված հաբ մեկ բաժակ ջրին): Անհրաժեշտության դեպքում դիմել բժշկի:

5. ՓՈԽԱԴՐՈՒՄ ԵՎ ՊԱՀՊԱՆՈՒՄ

26. Միջոցը փոխադրվում է վերգետնյա տրանսպորտի ծածկ ունեցող տրանսպորտի բոլոր տեսակներով` վտանգավոր բեռների (իզոպրոպիլային սպիրտի) փոխադրման կանոնների համաձայն, որոնք գործում են տրանսպորտի այդ տեսակների վրա և երաշխավորում են միջոցի և տարողության անվնասությունը: Տուփը մակնշում են համաձայն 19433-88 ԳՕՍՏ-ի` նշելով վտանգավորության 3-րդ դասը (դյուրավառ հեղուկ):

27. Միջոցը պահպանում են արտադրողի սերտ փակված տարայի մեջ, դեղամիջոցներից առանձին, երեխաների համար անհասանելի տեղերում, օդափոխվող ծածկած պահեստային սենքերում, +5oC-ից մինչև +30oC ջերմաստիճանում, արևի ուղիղ ճառագայթներից, տաքացուցիչ սարքերից և բաց կրակից հեռու:

6. ՈՐԱԿԻ ՀՍԿՈՂՈՒԹՅԱՆ ՖԻԶԻԿԱ-ՔԻՄԻԱԿԱՆ ԵՎ ԱՆԱԼԻՏԻԿ ՄԵԹՈԴՆԵՐ

28. Որակի ցուցանիշներով միջոցը պետք է համապատասխանի սույն հրահանգի աղյուսակ 1-ում ներկայացված նորմաներին:

Աղյուսակ 1

._________________________________________________________________.

| |Հսկվող ցուցանիշներ                 |Նորմա                      |

|_|___________________________________|___________________________|

|1|Արտաքին տեսք, գույն և              |Թափանցիկ կարմրա-նարնջագույն|

| |                                   |հեղուկ                     |

|_|___________________________________|___________________________|

|2|Հոտ                                |Յուրահատուկ                |

|_|___________________________________|___________________________|

|3|Իզոպրոպիլային սպիրտի զանգվածային   |69,0+-2,0                  |

| |բաժինը, %, սահմաններում            |                           |

|_|___________________________________|___________________________|

|4|Դիդեցիլդիմեթիլամոնիումի քլորիդի    |0,22+-0,02                 |

| |զանգվածային բաժինը, %, սահմաններում|                           |

._________________________________________________________________.

29. Արտաքին տեսքը որոշվում է ակնադիտորեն անցողիկ լույսի տակ: Դրա համար 30-32 մմ ներքին տրամագծով անգույն ապակուց փորձանոթի մեջ լցնում են միջոցը մինչև կեսը և դիտում են արտացոլված կամ անցնող լույսի տակ:

30. Հոտը որոշում են օրգանոլեպտիկ մեթոդով:

31. Իզոպրոպիլային սպիրտի զանգվածային բաժնի որոշում: Իզոպրոպիլային սպիրտի զանգվածային բաժնի որոշումն իրականացնում են գազահեղուկային քրոմատոգրաֆիայի մեթոդով` ներքին էտալոնի կիրառմամբ:

1) Սարքեր, ռեակտիվներ, սպասք.

ա. Քրոմատոգրաֆ` բոցա-իոնիզացնող դետեկտորով,

բ. Քրոմատոգրաֆիկ սյունակ չժանգոտվող պողպատից 2 մ երկարությամբ, ներքին տրամագիծը 3 մմ,

գ. Սորբենտ` պոլիսորբ-1, մասնիկների չափսերը 0,16-0,20 մմ,

դ. Գազ-կրիչ` ազոտ ըստ ԳՕՍՏ 9293-74-ի, հատուկ մաքրության կամ 1-ին սորտի բարձր մաքրության, հելիում ըստ ՏՈՒ 51-940-80-ի, մաքրված Ա կամ Բ մակնիշի,

ե. Խտացրած օդ բալոնային կամ կոմպրեսորից,

զ. Տեխնիկական ջրածին ըստ ԳՕՍՏ 3022-80-ի,

է. Իզոպրոպիլային սպիրտ քրոմատոգրաֆիայի համար, քիմիական մաքուր (այսուհետ` ք.մ.), ՏՈՒ 6-09-4522-77,

ը. Նյութ-էտալոն` տրետ-բութիլային սպիրտ քրոմատոգրաֆիայի համար ըստ ՏՈՒ 6-09-4297-83,

թ. Մետաղական չափիչ քանոն ըստ ԳՕՍՏ 427 0-250 մմ սանդղակի միջակայքով և 1 մմ բաժանման արժեքով,

ժ. Չափիչ խոշորացույց ըստ ԳՕՍՏ 25706-83 կամ չափիչ մանրադիտակ,

ի. Ինտեգրատոր,

լ. Կշեռք ՎՌԼ-200, կշռման թույլատրելի սխալ մինչև 50+-0,0005 գր, սանդղակ (50 - 200) +- 0,001 գր ըստ ԳՕՍՏ 24104-88,

խ. Բաժակիկ կշռման համար ՍՎ-19/9 ըստ ԳՕՍՏ 25336-82,

ծ. ՄՇ տեսակի միկրոներարկիչ, 1 կամ 10 մմ3 տարողությամբ ըստ ՏՈՒ 2.833.106-89:

2) Նախապատրաստում հետազոտությանը.

ա) Սյունակի նախապատրաստում:

Սորբենտով լցված սյունակը տեղադրում են քրոմատոգրաֆի թերմոստատի մեջ և, առանց դետեկտորին միացնելու, փչում են գազ-կրիչով 30 +- 5 սմ3/րոպե արագությամբ ջերմաստիճանի ծրագրավորմամբ 50oC-ից մինչև 190oC, այնուհետև 190+-3oC դեպքում այնքան ժամանակ, մինչև սահմանվի կայուն զրոյական գիծ սարքի առավելագույն զգայունության ժամանակ: Քրոմատոգրաֆի դուրս բերումն աշխատանքային ռեժիմին իրականացվում է սարքի հրահանգին համապատասխան:

բ) Քրոմատոգրաֆի աստիճանանշում: Սարքն աստիճանանշում են ըստ 3 արհեստական խառնուրդների, որոնց բաղադրությունը ներկայացված է Աղյուսակ 2-ում:

Աղյուսակ 2

.__________________________________________________________________.

|Բաղադրիչի անվանում  |Բաղադրիչի զանգվածը արհեստական խառնուրդում, գր|

|                    |_____________________________________________|

|                    |1               |2             |3            |

|____________________|________________|______________|_____________|

|Իզոպրոպիլային սպիրտ |     0,73       |     0,75     |     0,77    |

|____________________|________________|______________|_____________|

|Տրետբութիլային սպիրտ|     0,75       |     0,75     |     0,75    |

|____________________|________________|______________|_____________|

|Ջուր                |     0,27       |     0,25     |     0,23    |

.__________________________________________________________________.

Խառնուրդները հանգամանորեն խառնում են: Յուրաքանչյուր խառնուրդի բաղադրիչների կշռման արդյունքները գրանցում են գրամներով մինչև չորրորդ տասնորդական նիշ ճշգրտությամբ: Յուրաքանչյուր արհեստական խառնուրդ քրոմատոգրաֆիայի են ենթարկում 3 անգամից ոչ պակաս սույն հրահանգի 31 կետի 2-րդ ենթակետի գ) ենթակետով սահմանված հետազոտության իրականացման պայմանների:

Աստիճանանշումային գործակիցը (K) հաշվարկում են բանաձևով.

K = (mi x Sէտ) / (mէտ x Si),

որտեղ.

mi - իզոպրոպիլային սպիրտի զանգվածն է արհեստական խառնուրդի մեջ, գ,

mէտ - նյութ-էտալոնի զանգված, գ,

Si և Sէտ - իզոպրոպիլային սպիրտի և նյութ-էտալոնի կոնկրետ որոշման ժամանակ գագաթի մակերես, մմ2:

Արդյունքները կլորացնում են մինչև երկրորդ տասնորդական նշանը:

Որպես իզոպրոպիլային սպիրտի աստիճանանշումային գործակից (Ki) ընդունում են բոլոր որոշումների միջին թվաբանականը, որոնց միջև բացարձակ տարբերությունները չեն գերազանցում թույլատրելի տարբերությունը, որը հավասար է 0.04%: Աստիճանանշումային գործակիցների որոշման թույլատրելի հարաբերական գումարային շեղումը կազմում է 2%` p=0.95 վստահելիության հավանականության դեպքում:

Քրոմատոգրաֆի աստիճանանշումն անհրաժեշտ է իրականացնել ոչ ուշ, քան 400 հետազոտությունից հետո:

3) Հետազոտության իրականացում: Կշռված բաժակիկի մեջ դոզավորում են 1 գ հետազոտվող պատրաստուկ, փակում են կափարիչով և կշռում: Այնուհետև դոզավորում են 0,75 գ տրետբութիլային սպիրտ, փակում են կափարիչով և նորից կշռում: Կշռման արդյունքները գրամներով գրանցում են մինչև չորրորդ տասնորդական նիշի ճշգրտությամբ: Բաժակիկի պարունակությունը հանգամանորեն խառնում և քրոմատոգրաֆում են:

Հետազոտության իրականացման պայմաններ.

ա) գազ-կրիչի ծախս` (20+-5) սմ3/րոպե,

բ) ջրածնի ծախս` (30+-3) սմ3/րոպե,

գ) օդի ծախս` (300+-20) սմ3/րոպե,

դ) գոլորշացուցիչի ջերմաստիճանը` (250+-10)oC,

ե) գծապատկերային ժապավենի արագություն` 240 մմ/ժամ,

զ) ներմուծվող նմուշի ծավալ` 1 մմ3,

է) սյունյակի թերմոստատի ջերմաստիճան` (110+-3)oC

4) Արդյունքների մշակում: Գագաթի մակերեսը չափում են ինտեգրատորով կամ հաշվարկում են բոլորի կողմից ընդունված մեթոդով:

Իզոպրոպիլային սպիրտի զանգվածային բաժինը X, % հաշվում են բանաձևով.

X = (Ki x Si x mէտ x 100) / (Sէտ x m),

Ki - իզոպրոպիլային սպիրտի աստիճանանշումային գործակից,

Si և Sէտ - հետազոտվող պատրաստուկում իզոպրոպիլային սպիրտի և նյութ-էտալոնի գագաթի մակերես, մմ2:

m և mէտ - հետազոտվող պատրաստուկի զանգված և նյութ-էտալոնի զանգված, գ:

Որպես հետազոտության արդյունք ընդունում են երկու զուգահեռ որոշումների արդյունքների միջին թվաբանականը, որոնց միջև բացարձակ տարբերությունները չեն գերազանցում թույլատրելի տարբերությունը, որը հավասար է 0,8%: Հետազոտության արդյունքների թույլատրելի հարաբերական գումարային շեղումը կազմում է +-7%` p=0,95 վստահելիության հավանականության դեպքում:

32. Դիդեցիլդիմեթիլամոնիումի քլորիդի զանգվածային բաժնի որոշում:

1) Սարքավորում, ռեակտիվներ, լուծույթներ.

ա. Լաբորատոր կշեռք ընդհանուր նշանակության 2-րդ դասի ճշգրտության կշռման առավելագույն սահմանը 200 գ` ըստ ԳՕՍՏ 24104-88,

բ. բյուրետ 1-1-2-25-0.1 ըստ ԳՕՍՏ 29251-91,

գ. կոլբա կոնաձև ԿՆ-1-50 ըստ ԳՕՍՏ 25336-82 հղկված խցանով,

դ. կաթոցիկներ 4(5)-1-1, 2-1-5 ըստ ԳՕՍՏ 20292-74,

ե. գլաններ 1-25, 1-50, 1-100 ըստ ԳՕՍՏ 1770-74,

զ. նատրիումի լաուրիլսուլֆատ (դոդեցիլսուլֆատ) ըստ ՏՈՒ 6-09-64-75,

է. ցետիլպիրիդինիումի քլորիդ 1-ջրային հիմնական նյութի 99,0% ոչ պակաս պարունակությամբ «Մերկ» (Գերմանիա) ընկերության արտադրության կամ նմանատիպ որակավորման ռեակտիվ,

ը. ինդիկատոր էոզին-մեթիլենային կապույտ (ըստ Մայ-Գրյունվալդի), մաքուր մակնիշի, ըստ ՏՈՒ ՄԶ 34-51,

թ. քլորոֆորմ ըստ ԳՕՍՏ 20015-88,

ժ. նատրիումի ծծմբաթթու, քիմիական մաքուր (այսուհետ` ք.մ.) կամ մաքուր հետազոտության համար (այսուհետ` մ.հ.հ.) մակնիշի, ըստ ԳՕՍՏ 4166-76,

ի. նատրիումի ածխաթթու ք.մ. կամ մ.հ.հ. մակնիշի, ըստ ԳՕՍՏ 83-79,

լ. կալիումի քլորիդ, ք.մ. կամ մ.հ.հ. մակնիշի, ըստ ԳՕՍՏ 4234-77,

խ. թորած ջուր ըստ ԳՕՍՏ 6709-72:

2) Նախապատրաստում հետազոտությանը:

ա) Նատրիումի լաուրիլսուլֆատի 0.005 Ն ջրային լուծույթի նախապատրաստում: 0.150 գ նատրիումի լաուրիլսուլֆատ լուծում են թորած ջրում 100 սմ3 տարողությամբ չափիչ կոլբայի մեջ` ծավալը թորած ջրով հասցնելով մինչև գծանիշը:

բ) Չոր ինդիկատորային խառնուրդի նախապատրաստում: Ինդիկատոր էոզին-մեթիլենային կապույտը խառնում են կալիումի քլորիդի հետ 1:100 հարաբերությամբ և մանրակրկիտ տրորում հախճապակյա հավանգի մեջ:

գ) Ցետիլպիրիդինիումի քլորիդի 0,005 Ն ջրային լուծույթի նախապատրաստում: 0.179 գ ցետիլպիրիդինիումի քլորիդ լուծում են թորած ջրում 100 սմ3 տարողությամբ չափիչ կոլբայի մեջ` ծավալը թորած ջրով հասցնելով մինչև գծանիշ:

դ) Կարբոնատա-սուլֆատային բուֆերային լուծույթի նախապատրաստում: pH 11-ով կարբոնատա-սուլֆատային բուֆերային լուծույթ պատրաստում են, լուծելով 100 գ ծծմբաթթու նատրիում և 10 գ ածխաթթու նատրիում թորած ջրում 1 դմ3 տարողությամբ չափիչ կոլբայի մեջ` ծավալը թորած ջրով հասցնելով մինչև գծանիշ:

ե) Նատրիումի լաուրիլսուլֆատի լուծույթի շտկման գործակցի որոշում: Նատրիումի լաուրիլսուլֆատի լուծույթի շտկիչ գործակիցը որոշում են ցետիլպիրիդինիումի քլորիդի լուծույթի 0.005Ն նատրիումի լաուրիլսուլֆատի լուծույթով երկփուլ տիտրմամբ: 50 սմ3 տարողությամբ չափիչ կոլբայի մեջ 10 սմ3 ցետիլպիրիդինիումի քլորիդի լուծույթին ավելացնում են 10 սմ3 քլորոֆորմ, ներմուծում են 30-50 մգ չոր ինդիկատորային խառնուրդ և ավելացնում 5 սմ3 բուֆերային լուծույթ: Կոլբան փակում են խցանով և թափահարում լուծույթը: Ցետիլպիրիդինիումի քլորիդի լուծույթը տիտրում են նատրիումի լաուրիլսուլֆատի լուծույթով: Տիտրանտի հերթական չափաբաժնի ավելացումից հետո լուծույթը կոլբայում թափահարում են: Տիտրման ավարտին քլորոֆորմային շերտի վարդագույն գունավորումը փոխվում է կապույտի: Նատրիումի լաուրիլսուլֆատի լուծույթի K շտկիչ գործակցի արժեքը որոշում են բանաձևով.

K = VՑՊ / VԼՍ,

որտեղ.

VՑՊ - ցետիլպիրիդինիումի քլորիդի 0,005Ն լուծույթի ծավալ, սմ3,

VԼՍ - տիտրման գնացած նատրիումի լաուրիլսուլֆատի 0,005 Ն լուծույթի ծավալ, սմ3:

3) Հետազոտության իրականացում: Հետազոտվող միջոցի 1,5-2,0 գ զանգվածով կշռուկ, վերցված մինչև 0,0002 գ ճշգրտությամբ, քանակապես տեղափոխում են 100 սմ3 տարողությամբ չափիչ կոլբայի մեջ և ծավալը թորած ջրով հասցնում մինչև գծանիշ: Հղկված խցանով 50 սմ3 տարողությամբ չափիչ կոլբայի կամ գլանի մեջ լցնում են 10 սմ3 ստացված «Աստրադեզ-ՕՊ» միջոցի լուծույթ, 10 սմ3 քլորոֆորմ, 30-50 մգ չոր ինդիկատորային խառնուրդ և ավելացնում են 5 սմ3 բուֆերային լուծույթ: Կոլբան փակում են խցանով և թափահարում լուծույթը: Ստացված երկֆազային համակարգը տիտրում են նատրիումի լաուրիլսուլֆատի լուծույթով: Տիտրանտի հերթական չափաբաժնի ավելացումից հետո լուծույթը կոլբայում թափահարում են: Տիտրման ավարտին քլորոֆորմային շերտի վարդագույն գունավորումը փոխվում է կապույտի:

4) Արդյունքների մշակում: Դիդեցիլդիմեթիլամոնիումի քլորիդի զանգվածային բաժինը (X1), արտահայտված տոկոսներով, հաշվարկում են բանաձևով.

X1 = (0,001775 x V x K x V1 x 100) / (m x V2),

որտեղ.

0,001775 - դիդեցիլդիմեթիլամոնիումի քլորիդի զանգված, որը համապատասխանում 1 սմ3 հստակ C(C12H25SO4Na)=0.005 մոլ/դմ3 (0.005Ն) խտության նատրիումի լաուրիլսուլֆատի լուծույթին, գ,

V - C(C12H25SO4Na)=0.005 մոլ/դմ3 (0.005Ն) խտության նատրիումի լաուրիլսուլֆատի լուծույթի ծավալ,

K - C(C12H25SO4Na)=0.005 մոլ/դմ3 (0.005Ն) խտության նատրիումի լաուրիլսուլֆատի լուծույթի շտկիչ գործակից,

m - հետազոտվող նմուշի ծավալ, գ,

V1 - ծավալ, որի մեջ լուծված է «Աստրադեզ-ՕՊ» միջոցի կշռուկը, հավասար 100 սմ3,

V2 - տիտրման համար վերցված հետազոտվող լուծույթի ալիկվոտայի ծավալ (100 սմ3):

Որպես հետազոտության արդյունք ընդունում են երկու զուգահեռ որոշումների արդյունքների միջին թվաբանականը, որոնց միջև բացարձակ տարբերությունները չեն գերազանցում թույլատրելի տարբերությունը, որը հավասար է 0,5%:

Հետազոտության արդյունքների թույլատրելի հարաբերական գումարային շեղումը կազմում է +- 3%` p=0,95 վստահելիության հավանականության դեպքում: Հետազոտության արդյունքը կլորացնում են մինչև ստորակետից հետո առաջին տասնորդական նշանը: