«ՀՀ ԿԵՆՏՐՈՆԱԿԱՆ ԲԱՆԿՈՒՄ ՓՈՐՁԱԳԵՏՆԵՐԻ ԳՈՐԾՈՒՆԵՈՒԹՅԱՆ ԿԱՐԳԸ» ՀԱՍՏԱՏԵԼՈՒ ՄԱՍԻՆ

050.0172.300600

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

ՈՐՈՇՈՒՄ

30 հունիսի 2000 թվականի թիվ 172

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿՈՒՄ ՓՈՐՁԱԳԵՏՆԵՐԻ ԳՈՐԾՈՒՆԵՈՒԹՅԱՆ ԿԱՐԳԸ» ՀԱՍՏԱՏԵԼՈՒ ՄԱՍԻՆ

Հիմք ընդունելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի դրույթները, ելնելով Հայաստանի Հանրապետության կենտրոնական բանկում փորձագետների գործունեությունը կարգավորելու անհրաժեշտությունից` Հայաստանի Հանրապետության կենտրոնական բանկի խորհուրդը որոշում է.

1. Հաստատել «Հայաստանի Հանրապետության կենտրոնական բանկում փորձագետների գործունեության կարգը» (կցվում է):

2. Հանձնարարել Հայաստանի Հանրապետության կենտրոնական բանկի իրավաբանական վարչությանը, սույն որոշումն ուժի մեջ մտնելու պահից եռօրյա ժամկետում Հայաստանի Հանրապետության կենտրոնական բանկի նախագահի հաստատմանը ներկայացնել Հայաստանի Հանրապետության կենտրոնական բանկի և փորձագետների միջև կնքվելիք «Ծառայությունների մատուցման» ու «Բանկային և ծառայողական գաղտնիք կազմող տեղեկությունների տրամադրման և պահպանման մասին» պայմանագրերի օրինակելի ձևերը:

3. Սույն որոշումն ուժի մեջ է մտնում ընդունման պահից:

Հաստատված է

ՀՀ կենտրոնական բանկի խորհրդի

2000 թվականի հունիսի 30-ի թիվ 172 որոշմամբ

ԿԱՐԳ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿՈՒՄ ՓՈՐՁԱԳԵՏՆԵՐԻ ԳՈՐԾՈՒՆԵՈՒԹՅԱՆ

ՄԱՍ I. ԿԱՐԳԻ ԿԱՐԳԱՎՈՐՄԱՆ ԱՌԱՐԿԱՆ

Կանոն 1. Սույն կարգը սահմանում է Հայաստանի Հանրապետության կենտրոնական բանկում (այսուհետև` Կենտրոնական բանկ) փորձագետների (այսուհետև` փորձագետ) աշխատանքի հրավիրման ընթացակարգը, ինչպես նաև Կենտրոնական բանկում վերջիններիս գործունեության կարգը:

Փորձագետները Կենտրոնական բանկի կողմից կարող են հրավիրվել վերջինիս խնդիրների, գործառույթների, ինչպես նաև այլ գործարքների իրականացման համար:

ՄԱՍ II . ՓՈՐՁԱԳԵՏՆԵՐԻ ՀՐԱՎԻՐՄԱՆ ԿԱՐԳԸ

Կանոն 2. Կենտրոնական բանկում միջազգային փորձագետները աշխատում են Կենտրոնական բանկի հրավերի հիման վրա, որը տրվում է Կենտրոնական բանկի նախաձեռնությամբ կամ այլ կազմակերպությունների, կամ պետական մարմինների (այսուհետև` կազմակերպություն) առաջարկության հիման վրա:

Սույն կանոնով նախատեսված Կենտրոնական բանկի նախաձեռնության կամ կազմակերպությունների առաջարկությունների համար հիմք կարող են հանդիսանալ նաև կնքված միջազգային համաձայնագրերն ու պայմանագրերը, ինչպես նաև այլ պայմանավորվածություններ:

Կենտրոնական բանկի կողմից փորձագետներ կարող են հրավիրվել նաև մրցութային կարգով` մրցույթում հաղթող անձի հետ կնքելով համապատասխան պայմանագիր: Սույն մասով նախատեսված մրցույթը անցկացվում է Հայաստանի Հանրապետության օրենսդրությամբ և Կենտրոնական բանկի կողմից սահմանված կարգով:

Կանոն 3. Փորձագետի հրավերը Կենտրոնական բանկի նախաձեռնությամբ լինելու դեպքում նախագահի կամ նրա տեղակալի (այսուհետև` նախագահ) հանձնարարությամբ համապատասխան կառուցվածքային ստորաբաժանումը փորձագետի կամ շահագրգիռ կազմակերպության հետ վարում է փորձագետի կատարելիք աշխատանքների վերաբերյալ բանակցություններ:

Բանակցությունների արդյունքում համաձայնության կայացման դեպքում Կենտրոնական բանկը փորձագետին է ներկայացնում պաշտոնական հրավեր, իսկ շահագրգիռ կազմակերպության առկայության դեպքում վերջինիս առաքվում է հրավերի պատճենը:

Կենտրոնական բանկի հրավերում պարտադիր նշվում են մատուցվելիք ծառայությունների տեսակը, սույն կարգի 6 կանոնում նշված պահանջը, ինչպես նաև այլ անհրաժեշտ տեղեկություններ (վճարները, ծավալները, որակը և այլն):

Կանոն 4. Այն դեպքում, երբ փորձագետի ծառայություններն առաջարկվում են այլ կազմակերպության կողմից, մինչև Կենտրոնական բանկից հրավեր ստանալը, փորձագետը (անհրաժեշտության դեպքում` նաև տվյալ կազմակերպությունը) Կենտրոնական բանկ է ներկայացնում Կենտրոնական բանկում իր աշխատանքների կատարման գրավոր առաջարկությունը:

Նախագահի հանձնարարությամբ համապատասխան կառուցվածքային ստորաբաժանումը քննարկում է տվյալ փորձագետի առաջարկությունն ու աշխատանքների կատարման նպատակահարմարությունը և նախագահին է ներկայացնում համապատասխան եզրակացություն:

Կանոն 5. Նախագահը, քննարկելով սույն կարգի կանոն 4-ում նշված եզրակացությունը, որոշում է կայացնում փորձագետին հրավիրելու կամ վերջինիս առաջարկը մերժելու մասին: Նշված որոշման հիման վրա Կենտրոնական բանկը փորձագետին է ներկայացնում պաշտոնական հրավեր կամ մերժում:

ՄԱՍ III . ԿԵՆՏՐՈՆԱԿԱՆ ԲԱՆԿՈՒՄ ՓՈՐՁԱԳԵՏԻ ԳՈՐԾՈՒՆԵՈՒԹՅԱՆ ԿԱՐԳԸ

Կանոն 6. Փորձագետը ժամանումից հետո պարտավոր է երկշաբաթյա ժամկետում նախագահի հաստատմանը ներկայացնել Կենտրոնական բանկում իր աշխատանքների մանրամասն ծրագիրը (այսուհետև` ծրագիր)` նախապես այն համաձայնեցնելով համապատասխան կառուցվածքային ստորաբաժանման ղեկավարի հետ: Ընդ որում, սույն կետում նշված պարտավորության մասին պարտադիր նշում է կատարվում փորձագետին ուղղված Կենտրոնական բանկի հրավերում:

Ծրագիրը նախագահի կողմից հաստատվելուց հետո պետք է ներառվի տվյալ կառուցվածքային ստորաբաժանման աշխատանքային ծրագրում:

Կանոն 7. Նախագահի կողմից ծրագրի հաստատումից հետո համապատասխան կառուցվածքային ստորաբաժանումը նախագահի և փորձագետի ստորագրմանն է ներկայացնում ծառայությունների մատուցման պայմանագրի երկու բնօրինակներ: Ընդ որում, ծրագիրը հանդիսանում է ծառայությունների մատուցման պայմանագրի անբաժանելի մաս (հավելված):

Կանոն 8. Փորձագետը Կենտրոնական բանկում աշխատանքներ իրականացնելիս կարող է ծանոթանալ բանկային և ծառայողական գաղտնիք կազմող տեղեկությունների` բացառապես նախագահի գրավոր թույլտվությամբ: Այդպիսի թույլտվություն ստանալու դեպքում Կենտրոնական բանկի և փորձագետի միջև կնքվում է «Բանկային և ծառայողական գաղտնիք կազմող տեղեկությունների տրամադրման և պահպանման մասին» պայմանագիր:

Կանոն 9. Փորձագետի հետ կնքվող ծառայությունների մատուցման պայմանագրում հստակ նշվում են Կենտրոնական բանկի և փորձագետի իրավունքներն ու պարտականությունները, պատասխանատվությունը պայմանագրով սահմանված պարտականությունները չկատարելու կամ ոչ պատշաճ ձևով կատարելու համար, ինչպես նաև Հայաստանի Հանրապետության քաղաքացիական օրենսգրքով սահմանված այլ պարտադիր պայմաններ:

Կանոն 10. Ծառայությունների մատուցման պայմանագրով նախատեսված պարտականությունների չկատարման կամ ոչ պատշաճ ձևով կատարման համար փորձագետը կրում է Հայաստանի Հանրապետության օրենսդրությամբ նախատեսված պատասխանատվություն:

Կանոն 11. Ելնելով փորձագետի աշխատանքների կատարման փուլայնությունից` փորձագետը և համապատասխան կառուցվածքային ստորաբաժանման ղեկավարը պարտավոր են աշխատանքային ծրագրերի կատարման վերաբերյալ համատեղ հաշվետվություններ ներկայացնել Կենտրոնական բանկի խորհրդին կամ նախագահին:

Կանոն 12. Կենտրոնական բանկում գործունեություն իրականացնելիս փորձագետների վրա տարածվում է Կենտրոնական բանկի նախագահի կողմից հաստատված «Հայաստանի Հանրապետության կենտրոնական բանկի անցագրային ռեժիմի կազմակերպման կարգի» պահանջները: Ծառայությունների մատուցման պայմանագրի կնքումից հետո փորձագետներին տրամադրվում են սույն մասում նշված կարգի 2.2 կետում նախատեսված ժամանակավոր անցագրերը:

Կենտրոնական բանկում գործունեություն իրականացնելիս փորձագետները պետք է ենթարկվեն «Հայաստանի Հանրապետության կենտրոնական բանկի աշխատանքային ներքին կարգապահական կանոններով» և այլ ներքին կանոնակարգերով Կենտրոնական բանկի աշխատակիցների համար սահմանված վարքագծի կանոններին:

ՄԱՍ IV. ԱՆՑՈՒՄԱՅԻՆ ԴՐՈՒՅԹՆԵՐ

Կանոն 13. Սույն կարգի դրույթները տարածվում են Հայաստանի Հանրապետության կամ այլ պետությունների քաղաքացիություն ունեցող կամ քաղաքացիություն չունեցող փորձագետների և Կենտրոնական բանկի իրավահարաբերությունների վրա: