| ԻՐՏԵԿ |
Սույն ակտի ուժի մեջ մտնելու ամսաթիվը անհնար է որոշել, քանի որ ակտը ընդունող մարմնի կողմից չի կատարվել «Նորմատիվ իրավական ակտերի մասին» ՀՀ օրենքի 23-րդ հոդվածի 7-րդ մասի` ընդունող մարմնի պաշտոնական կայքէջում իրավական ակտի հրապարակման օրը նշելու պահանջը: |
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌՈՂՋԱՊԱՀՈՒԹՅԱՆ ՆԱԽԱՐԱՐ
ՀՐԱՄԱՆ
15 օգոստոսի 2019 թվականի N 2259-Լ
ԿԱՏԱՂՈՒԹՅԱՆ ԴԵՄ «ՌԱԲԻՎԱՔՍ-Ս» (RABIVAX-S) ԻՆԱԿՏԻՎԱՑՎԱԾ ՊԱՏՎԱՍՏԱՆՅՈՒԹԻ ԿԻՐԱՌՄԱՆ ՀՐԱՀԱՆԳԸ ՀԱՍՏԱՏԵԼՈՒ ՄԱՍԻՆ
i
Հիմք ընդունելով Հայաստանի Հանրապետության վարչապետի 2018 թվականի հունիսի 11-ի թիվ 728-Լ որոշման հավելվածով հաստատված Հայաստանի Հանրապետության առողջապահության նախարարության կանոնադրության 18-րդ կետի 20-րդ ենթակետը,
ՀՐԱՄԱՅՈՒՄ ԵՄ`
1. Հաստատել կատաղության դեմ «Ռաբիվաքս-Ս» ինակտիվացված պատվաստանյութի կիրառման հրահանգը` համաձայն հավելվածի:
2. Առողջապահության նախարարության հասարակայնության հետ կապերի բաժնի պետ Լիլիթ Բաբախանյանին` ապահովել.
1) Սույն հրամանի տեղադրումը առողջապահության նախարարության պաշտոնական կայքում:
3. Սույն հրամանն ուժի մեջ է մտնում հրապարակմանը հաջորդող օրվանից:
Ա. ԹՈՐՈՍՅԱՆ
Հավելված
Առողջապահության նախարարի
2019 թվականի օգոստոսի 15-ի
N 2259-Լ հրամանի
ՀՐԱՀԱՆԳ ԿԱՏԱՂՈՒԹՅԱՆ ԴԵՄ «ՌԱԲԻՎԱՔՍ-Ս» ԻՆԱԿՏԻՎԱՑՎԱԾ ՊԱՏՎԱՍՏԱՆՅՈՒԹԻ ԿԻՐԱՌՄԱՆ
1. ՆԿԱՐԱԳՐՈՒԹՅՈՒՆ
1. ՌԱԲԻՎԱՔՍ-Ս-ն (կատաղության դեմ ինակտիվացված (լիոֆիլացված) պատվաստանյութ), մանրէազերծ, մաքրված, ինակտիվացված կատաղության դեմ պատվաստանյութ է` պատրաստված Վերո բջիջների կուլտուրայում:
2. ՌԱԲԻՎԱՔՍ-Ս-ն լիոֆիլացված է և թողարկվում է հավաքածուի ձևով` լուծիչի հետ (1 դեղաչափ պատվաստանյութի շշիկ և 1 մլ լուծիչի սրվակ): Պատվաստանյութն իրենից ներկայացնում է սպիտակ գույնի լիոֆիլիզատ:
3. Պատվաստանյութը համապատասխանում է Առողջապահության համաշխարհային կազմակերպության պահանջներին:
2. ԲԱՂԱԴՐՈՒԹՅՈՒՆ
4. Յուրաքանչյուր 1 մլ դեղաչափը պարունակում է կատաղության վիրուսի մաքրված հակածին (Պիտման-Մուրի ենթատեսակ) (3218-ՎԵՐՈ), հարմարեցված և աճեցված Վերո բջիջների վրա, ինակտիվացված β-պրոպիոլակտոնի օգնությամբ, ոչ պակաս 2.5 ՄՄ:
5. Վերականգնվում է 1 մլ ներարկումների համար նախատեսված մանրէազերծ ջրով:
6. Ներմուծման եղանակը և դեղաչափը. 1 մլ, միջմկանային ներարկման համար:
7. Լուծիչ. մանրէազերծ ջուր` ներարկումների համար:
8. Օժանդակ նյութեր. սախարոզ, գլիցին, մարդկային շիճուկային ալբումին:
3. ԿԻՐԱՌՄԱՆ ՑՈՒՑՈՒՄՆԵՐ
9. ՌԱԲԻՎԱՔՍ-Ս-ն նախատեսված է երեխաների և մեծահասակների մոտ կատաղության կանխարգելման համար:
10. Կատաղության կանխարգելման նպատակով կարող է կիրառվել նախքան ազդեցությունը (առանց կծված դեպքի առկայության) և ազդեցությունից (կծված դեպքից) հետո:
1) Կանխարգելում նախքան ազդեցությունը: Առաջարկվում է կատարել այն անձանց, ովքեր ենթակա են կատաղության վիրուսով վարակման բարձր ռիսկի, հատկապես` անասնաբույժներին, ուսանող-անասնաբույժներին, կենդանիների տերերին, որսորդներին, անտառային տնտեսության աշխատակիցներին, կենդանիներ վարժեցնողներին, մսագործներին, լաբորատորիաների` կատաղության վիրուսի հետ աշխատող անձնակազմին, կատաղության վիրուսով վարակման բարձր ռիսկի ենթակա երեխաներին, կամ բարձր էնդեմիկություն ունեցող տարածքներ այցելելուց առաջ:
2) Կանխարգելում ազդեցությունից հետո: ՌԱԲԻՎԱՔՍ-Ս-ի կիրառումը ցուցված է կատաղության վիրուսով վարակվածության կասկածով անձանց մոտ կատաղության կանխարգելման համար: ՌԱԲԻՎԱՔՍ-Ս-ն անհրաժեշտ է մշտապես կիրառել Առողջապահության համաշխարհային կազմակերպության առաջարկություններին համապատասխան, կախված կատաղությամբ կասկածելի հիվանդ կենդանու հետ շփման տեսակից:
._____________________________________________________________.
|Դասեր|Շփման տեսակը |Առաջարկվող բուժումը |
|_____|_________________________________|_____________________|
|1 |Կենդանուն հպումը կամ կերակրելը: |Բուժում չի պահանջվում|
| |Չվնասված մաշկային ծածկույթի | |
| |թքոտում | |
|_____|_________________________________|_____________________|
|2 |Չպաշտպանված մաշկային ծածկույթների|Անհրաժեշտ է անհապաղ |
| |կծվածք, աննշան քերծվածքներ կամ |պատվաստում |
| |չարյունահոսող վերքեր | |
|_____|_________________________________|_____________________|
|3 |Միանգամյա կամ բազմակի կծվածքներ |Անհրաժեշտ է անհապաղ |
| |կամ քերծվածքներ, լորձաթաղանթների |պատվաստում և |
| |վարակում թքով, վնասված մաշկային |իմունոգլոբուլինի |
| |ծածկույթների թքոտում: Չղջիկի |կիրառում |
| |կողմից ցանկացած թքոտում կամ | |
| |վնասվածք: | |
._____________________________________________________________.
11. Բոլոր դեպքերում առաջարկվում է անհապաղ կատարել բոլոր վերքերի և քերծվածքների լվացում:
12. Անհրաժեշտության դեպքում պետք է կատարել փայտացման կանխարգելում` փայտացման անատոքսինով:
13. Բուժումն անհրաժեշտ է սկսել շփումից հետո որքան հնարավոր է շուտ, և ոչ մի դեպքում չի կարելի հրաժարվել պացիենտին բուժելուց, անկախ նրանից, թե որքան ժամանակ է անցել վնասվածքից հետո:
4. ՀԱԿԱՑՈՒՑՈՒՄՆԵՐ
14. Կանխարգելում նախքան ազդեցությունը: Տենդային վիճակի կամ սուր հիվանդության առկայության դեպքում պատվաստումն անհրաժեշտ է հետաձգել: ՌԱԲԻՎԱՔՍ-Ս-ի կիրառումը հակացուցված է նրա բաղադրիչներից որևէ մեկի նկատմամբ պացիենտի անամնեզում սուր գերզգայնության ռեակցիայի առկայության դեպքում:
15. Կանխարգելում ազդեցությունից հետո: Հաշվի առնելով կատաղությամբ հիվանդանալու դեպքում մահվան ելքի հավանականությունը, ազդեցությունից հետո ՌԱԲԻՎԱՔՍ-Ս-ով կանխարգելման համար հակացուցումը բացակայում է:
16. Արգելվում է պատվաստանյութի ներմաշկային ճանապարհով ներարկումն այն անձանց, որոնք երկարատև բուժում են ստացել կորտիկոստերոիդներով կամ իմունասուպրեսիվ դեղամիջոցներով, կամ մալարիայի բուժման կամ կանխարգելման նպատակով քլորոխին են ստացել, ինչպես նաև թուլացած իմունիտետով անձանց: Տվյալ անձանց մոտ կատաղության պատվաստանյութի ներմաշկային ներարկման դեպքում իմուն պատասխանը կարող է թույլ լինել, այդ պատճառով անհրաժեշտ է պատվաստանյութը նրանց ներարկել միջմկանային:
17. Պատվաստանյութը կարող է նեոմիցինի հետքեր պարունակել: Նեոմիցինից անաֆիլակտիկ կամ անաֆիլակտոիդ ռեակցիաները, անաֆիլակտիկ կամ անաֆիլակտոիդ ռեակցիաները բացարձակ հակացուցում են հանդիսանում:
5. ՆԱԽԱԶԳՈՒՇԱՑՈՒՄ
18. Արգելվում է պատվաստանյութի ներանոթային ներարկումը:
19. Արգելվում է իմունոգլոբուլինը և կատաղության պատվաստանյութը մեկ ներարկչի մեջ խառնելը, կամ մարմնի նույն հատվածում ներարկելը:
20. Ծանր ալերգաբանական ռեակցիայի առաջացման դեպքում անհրաժեշտ է կատարել համապատասխան դեղորայքային (օրինակ` ադրենալինի կիրառում) և ախտանշանային բուժում:
6. ՆԱԽԱԶԳՈՒՇԱԿԱՆ ՄԻՋՈՑԱՌՈՒՄՆԵՐ
21. Անհրաժեշտ է գնահատել ալերգաբանական ռեակցիաների առաջացման հավանականությունն այն անձանց մոտ, որոնք զգայուն են պատվաստանյութի բաղադրիչների նկատմամբ: Անաֆիլաքսիայի կամ սուր գերզգայնության ռեակցիայի առաջացման դեպքում անհետաձգելի օգնություն ցուցաբերելու համար անհրաժեշտ է ունենալ ադրենալինի հիդրոքլորիդի լուծույթ (1:1000) և այլ համապատասխան միջոցներ:
22. Անհրաժեշտ է հատուկ զգուշություն ցուցաբերել և թույլ չտալ պատվաստանյութի ներարկում արյունատար անոթի մեջ:
23. Ոչ մի դեպքում չի թույլատրվում մեկ ներարկչի մեջ խառնել կամ մարմնի նույն հատվածում ներարկել ՌԱԲԻՎԱՔՍ-Ս-ն և իմունոգլոբուլինը:
24. Յուրաքանչյուր պացիենտի համար անհրաժեշտ է օգտագործել առանձին մանրէազերծ ներարկիչ և ասեղ:
25. ՌԱԲԻՎԱՔՍ-Ս-ի ներերակային ներարկումը խիստ արգելվում է: Ինչպես բոլոր միջմկանային ներարկումների ժամանակ, ՌԱԲԻՎԱՔՍ-Ս-ի ներարկման ժամանակ նույնպես, արյան մակարդելիության խանգարումներ ունեցող պացիենտների մոտ հնարավոր է արյունահոսություն:
7. ՆԱԽԱԶԳՈՒՇԱԿԱՆ ՄԻՋՈՑԱՌՈՒՄՆԵՐ ՆԵՐՄԱՇԿԱՅԻՆ ՆԵՐԱՐԿՄԱՆ ԺԱՄԱՆԱԿ
26. Շատ կարևոր է, որ ՌԱԲԻՎԱՔՍ-Ս-ի ներմաշկային ներարկումը կատարվի միայն տվյալ ներարկումը կատարելու համար ուսուցանված բուժանձնակազմի կողմից, որպեսզի բացառվի պատվաստանյութի անցումը մաշկի տակ:
27. Ներմաշկային ներարկումը կատարվում է ֆիքսված ասեղ ունեցող միանգամյա օգտագործման ներարկչով (ինսուլինային): Ճիշտ ներարկման դեպքում առաջանում է լիմոնի կեղևի տեսքով բշտիկ (պապուլա): Մաշկի տակ պատվաստանյութի շատ խորը ներարկման ժամանակ, բշտիկ չի առաջանում: Այդ դեպքում պետք է ասեղը հանել և մի փոքր հեռու ներարկել: Եթե երկու հաջորդաբար կատարված ներարկումներից բշտիկ չի առաջանում, անհրաժեշտ է պատվաստանյութը պացիենտին միջմկանային ներարկել:
28. ՌԱԲԻՎԱՔՍ-Ս-ն կոնսերվանտներ չի պարունակում, այդ պատճառով անհրաժեշտ է շատ զգույշ լինել` վերականգնված պատվաստանյութի կոնտամինացիայից խուսափելու համար: Վերականգնված պատվաստանյութն անհրաժեշտ է օգտագործել վերականգնելուց հետո 6 ժամվա ընթացքում, +2oC - +8oC ջերմաստիճանում նրա պահպանման դեպքում:
29. 6 ժամվա ընթացքում չօգտագործված վերականգնված պատվաստանյութն անհրաժեշտ է ոչնչացնել:
30. Խաչաձև աղտոտումից խուսափելու համար յուրաքանչյուր պացիենտի համար պատվաստանյութի յուրաքանչյուր դեղաչափը հավաքելու և ներարկելու համար անհրաժեշտ է օգտագործել նոր ստերիլ ներարկիչ և ասեղ:
8. ՓՈԽԱԶԴԵՑՈՒԹՅՈՒՆՆ ԱՅԼ ԴԵՂԱՄԻՋՈՑՆԵՐԻ ՀԵՏ
31. Կորտիկոստերոիդները, քլորոխինը և այլ իմունասուպրեսիվ դեղամիջոցները կարող են նվազեցնել պատվաստանյութի ներարկման նկատմամբ իմուն պատասխանը և պատվաստման անարդյունավետության պատճառ դառնալ:
32. Իմունոգլոբուլինը և պատվաստանյութն անհրաժեշտ է ներարկել մարմնի տարբեր (հակադիր) հատվածներում:
33. Արգելվում է գերազանցել կատաղության իմունոգլոբուլինի սահմանված դեղաչափը, ինչպես նաև արգելվում է պատվաստման կուրսը սկսելուց հետո իմունոգլոբուլինի կրկնակի դեղաչափի կիրառումը, քանի որ իմունոգլոբուլինի դեղաչափի ավելացումը կարող է նվազեցնել ներարկված պատվաստանյութի նկատմամբ իմուն պատասխանը:
9. ՀՂԻՈՒԹՅՈՒՆ ԵՎ ԿՐԾՔՈՎ ԿԵՐԱԿՐՈՒՄ
34. ՌԱԲԻՎԱՔՍ-Ս-ն համարվում է անվտանգ, ոչ տերատոգեն պատվաստանյութ: Հղի առնետների շրջանում պատվաստանյութի ներարգանդային տոքսիկության ուսումնասիրության արդյունքում չի հայտնաբերվել տոքսիկ ազդեցություն պտղի ներարգանդային զարգացման վրա: Հայտնի չէ, թե կարող է արդյոք ՌԱԲԻՎԱՔՍ- Ս-ն վնասել պտղին` հղի կնոջ պատվաստման դեպքում, կամ բացասական ազդեցություն ունենալ վերարտադրողական ֆունկցիայի վրա: Տեղեկատվություն չկա նաև այն մասին, թե անցնում է արդյոք ՌԱԲԻՎԱՔՍ-Ս-ն կրծքի կաթի մեջ:
35. Հղի կանանց կամ կրծքով կերակրողներին նախքան ազդեցությունը (առանց կծված դեպքի առկայության) ՌԱԲԻՎԱՔՍ-Ս-ով կանխարգելիչ պատվաստում կատարելուց առաջ անհրաժեշտ է մանրամասն գնահատել պատվաստումից ակնկալվող օգուտը` պոտենցիալ ռիսկերի համեմատությամբ:
36. Հաշվի առնելով կատաղությամբ հիվանդանալու դեպքում մահվան ելքի հավանականությունը, ազդեցությունից (կծված դեպքից) հետո հղիությունը և կրծքով կերակրելը ՌԱԲԻՎԱՔՍ-Ս-ով պատվաստման համար հակացուցում չեն հանդիսանում:
10. ԿՈՂՄՆԱԿԻ ՌԵԱԿՑԻԱՆԵՐ
37. ՌԱԲԻՎԱՔՍ-Ս-ի կիրառման արդյունքում կարող են առաջանալ ներարկման տեղում ցավ, կարմրություն, այտուց, քոր և կոշտություն, ինչպես նաև ընդհանուր երևույթներ` տենդ, ցնցումներ, ուշագնացության, ասթենիա, գլխացավ, գլխապտույտ, մկանային ցավեր, սրտխառնոց, ցավեր որովայնի շրջանում, հոդացավեր: Սովորաբար այս երևույթները ցածր հաճախականություն և անցողիկ բնույթ ունեն, անցնում են առանց բարդությունների: Հազվադեպ, բազմաձև կարմրությունը նկատվում է հյուսվածքային կուլտուրաներից ստացված կատաղության այլ պատվաստանյութերի դեպքում:
11. ԿԻՐԱՌՄԱՆ ՄԵԹՈԴԸ ԵՎ ԴԵՂԱՉԱՓԸ
38. ՌԱԲԻՎԱՔՍ-Ս-ն վերականգնվում է մանրէազերծ ներարկչով և ասեղով, օգտագործելով հավաքածուի մեջ առկա լուծիչի ամբողջ ծավալը (ներարկման համար նախատեսված մանրէազերծ ջուր): Պատվաստանյութը թափահարում են մինչև չոր փոշու լուծվելը: Պատվաստանյութն անհրաժեշտ է օգտագործել վերականգնելուց անմիջապես հետո:
39. ՌԱԲԻՎԱՔՍ-Ս պատվաստանյութի շշիկի ցուցիչը (ՊՇՑ) գտնվում է պատվաստանյութի շշիկի կափարիչի վրա, պատվաստանյութը վերականգնելուց հետո այն ոչնչացնում են:
40. Պատվաստում կատարելուց առաջ լուծիչը և պատվաստանյութը զննվում են` համոզվելու համար, որ մեխանիկական խառնուրդները և ֆիզիկական հատկությունների շեղումները բացակայում են: Ցանկացած թերություն հայտնաբերելու դեպքում լուծիչը կամ վերականգնված պատվաստանյութը ոչնչացվում է:
41. Մեծահասակներին և 2 տարեկանից բարձր տարիքի երեխաներին պատվաստումը կատարվում է բազկի դելտայաձև մկանի մեջ, իսկ մինչև 2 տարեկաններին` ազդրի առաջադրսային մակերեսին:
42. Չի թույլատրվում կատաղության պատվաստանյութը ներարկել նստատեղի շրջանում, քանի որ այս դեպքում նվազում է իմուն պատասխանը:
43. Պատվաստանյութի ներմաշկային ներարկումը կատարվում է այն երկրներում, որտեղ պատվաստանյութի ներմաշկային ներարկումը թույլատրված է պետական առողջապահական մարմինների կողմից և թույլատրվում է կատարել այն անձանց, որոնք ենթարկվել են 2-րդ և 3-րդ դասերի վիրուսների ազդեցությանը:
1) Կանխարգելում նախքան ազդեցությունը (առանց կծված դեպքի առկայության)
ա. Կատաղության վիրուսով վարակման բարձր ռիսկի ենթակա անձանց շրջանում անհրաժեշտ է կիրառել պատվաստման հետևյալ սխեման.
.______________________________________________________________.
|Ներմուծման |Դեղաչափ|Դեղաչափերի|Ժամանակացույց |
|ճանապարհը | |թիվը | |
|___________|_______|__________|_______________________________|
|Միջմկանային| 1 մլ | 3 |0, 7-րդ և 21-րդ կամ 28-րդ օրեր|
|___________|_______|__________|_______________________________|
|Ներմաշկային| 0,1 մ | 3 |0, 7-րդ և 21-րդ կամ 28-րդ օրեր|
.______________________________________________________________.
բ. Լրացուցիչ պաշտպանության ապահովման նպատակով, այն անձանց, ովքեր իրենց գործունեության բնույթի հետ կապված մշտապես կամ հաճախ ենթարկվում են կատաղության վիրուսով վարակման ռիսկի, առաջարկվում է պարբերաբար պատվաստում ստանալ:
գ. Այն անձանց, ովքեր ենթարկվում են կատաղության կենդանի վիրուսի բարձր կոնցենտրացիայի լաբորատոր ազդեցության ռիսկի, անհրաժեշտ է յուրաքանչյուր 6 ամիսը 1 անգամ հակածինների մակարդակի որոշման հետազոտություն անցնել:
դ. Այն աշխատակիցները, որոնք իրենց գործունեության բնույթի հետ կապված ազդեցության մշտական ռիսկի չեն ենթարկվում, պետք է շճաբանական հետազոտության ենթարկվել 2 տարին մեկ անգամ:
ե. Քանի որ պատվաստման արդյունքում առաջացած իմունիտետը մեծ մասամբ պահպանվում է մի քանի տարի, կրկնապատվաստումն անհրաժեշտ է կատարել այն դեպքերում, երբ կատաղության վիրուսին չեզոքացնող հակամարմինների տիտրը նվազում է մինչև 0,5 ՄՄ/մլ մակարդակը:
2) Կանխարգելում ազդեցությունից (կծված դեպքից) հետո
ա. Կատաղության վիրուսն առավելագույն ձևով հեռացնելու նպատակով անհրաժեշտ է անհապաղ լավ լվանալ վերքը ջրով և օճառով: Այնուհետև վերքն անհրաժեշտ է մշակել սպիրտով (70%) կամ յոդի լուծույթով:
բ. Ազդեցությունից հետո նախկինում չպատվաստված անձանց մոտ կատաղության կանխարգելման համար կիրառվում է պատվաստման հետևյալ ժամանակացույցը.
._____________________________________________________________________.
|Ներմուծման |Դեղաչափ |Դեղա- |Ժամանակացույց |
|ճանապարհը | |չափերի| |
| | |թիվը | |
|___________|_______________|______|__________________________________|
|Միջմկանային| 1 մլ | 5 |0, 3-րդ, 7-րդ, 14-րդ և 28-րդ օրեր|
|___________|_______________|______|__________________________________|
|Ներմաշկային|0,1 մլ + 0,1 մլ| 4 |0, 3-րդ, 7-րդ և 28-րդ օրեր |
._____________________________________________________________________.
գ. Ներմաշկային ներարկման դեպքում չորս դեղաչափ պետք է ներարկվի (2-ական ներարկում յուրաքանչյուրը 0.1 մլ մարմնի 2 տարբեր հատվածներում) վերը ներկայացված թաիլանդական Կարմիր խաչի նորացված ժամանակացույցին համապատասխան (2-2-2-0-2):
դ. Նախկինում պատվաստման ամբողջական կուրսը ստացած անձանց (նախա- և հետազդեցությունային կանխարգելում), առաջարկվում է ներարկել 2 դեղաչափ, յուրաքանչյուրը 1 մլ, միջմկանային, կամ 2 դեղաչափ, յուրաքանչյուրը 0.1 մլ` ներմաշկային` 0 և 3-րդ օրերին:
ե. Ազդեցության 3-րդ և 2-րդ դասերի դեպքում իմունային անբավարարությամբ պացիենտներին 0 (ազդեցության) օրը կատաղության ինակտիվացված (լիոֆիլացված) պատվաստանյութի հետ անհրաժեշտ է ներարկել կատաղության մարդկային իմունոգլոբուլին (20 ՄՄ/կգ) կամ կատաղության ձիու իմունոգլոբուլին (40 ՄՄ/կգ): Եթե անատոմիական տեղակայումը թույլ է տալիս, վերքի շուրջը և վերքի ներսային մակերեսը պետք է ներծծել կատաղության իմունոգլոբուլինի ամբողջական դեղաչափով: Իմունոգլոբուլինի մնացած քանակությունը ներարկվում է մարմնի այն հատվածի հակադիր հատվածում (մյուս կողմի վերջույթին), որտեղ ներարկվել է կատաղության պատվաստանյութը:
զ. Կատաղության իմունոգլոբուլինն անհրաժեշտ է վերականգնել այն ծավալով, որն անհրաժեշտ է բոլոր վերքերի արդյունավետ և անվտանգ ներծծման համար:
է. Եթե պատվաստանյութի առաջին դեղաչափի ներարկման ժամանակ կատաղության իմունոգլոբուլին առկա չէ, այն պետք է ներարկվի պատվաստանյութի առաջին դեղաչափի ներարկումից հետո 7 օրից ոչ ուշ, քանի որ իմունոգլոբուլինի ավելի ուշ ներարկումը կարող է նվազեցնել պատվաստանյութի նկատմամբ իմուն պատասխանը:
12. ՊԱՀՊԱՆՈՒՄԸ
44. Պատվաստանյութն անհրաժեշտ է պահել +2oC-ից մինչև +8oC ջերմաստիճանում:
45. Լուծիչը պետք է պահվի սառը տեղում, բայց չսառեցվի:
13. ՊԻՏԱՆԵԼԻՈՒԹՅԱՆ ԺԱՄԿԵՏԸ
46. Պատվաստանյութի պիտանելիության ժամկետը 36 ամիս է:
14. ԹՈՂԱՐԿՄԱՆ ՁԵՎԸ
47. ՌԱԲԻՎԱՔՍ-Ս-ն թողարկվում է հետևյալ ձևերով.
1) 1 դեղաչափանոց հավաքածու` 1 մլ-ոց շշիկ պատվաստանյութով և 1 մլ լուծիչ:
2) 1 դեղաչափանոց հավաքածու` 1 մլ-ոց շշիկ պատվաստանյութով, 1 մլ լուծիչ, ներարկիչ և ասեղ:
3) 1 դեղաչափանոց 5 շշիկ (1 մլ-ոց) պատվաստանյութ և 5 սրվակ (1 մլ) լուծիչ:
15. ՊԱՏՎԱՍՏԱՆՅՈՒԹԻ ՇՇԻԿԻ ՑՈՒՑԻՉ
48. Հնարավոր են հետևյալ տարբերակները.
1) Ներքին քառակուսին շրջանակից բաց գույն ունի: Եթե պիտանելիության ժամկետը չի լրացել, ապա պատվաստանյութը ենթակա է օգտագործման:
2) Եթե ներքին քառակուսին դեռևս ավելի բաց գույն ունի, քան շրջանակը, իսկ պիտանելիության ժամկետը չի լրացել, ապա պատվաստանյութը ենթակա է օգտագործման:
3) Պատվաստանյութը ենթակա է խոտանման, եթե.
Ներքին քառակուսու գույնը համընկնում է շրջանակի գույնին: Պատվաստանյութը չի կարելի օգտագործել:
4) Պատվաստանյութը համարվում է բացարձակ ոչ պիտանի, եթե.
Ներքին քառակուսին շրջանակից մուգ գույն ունի: Պատվաստանյութը չի կարելի օգտագործել:
Պատվաստանյութի շշիկի ցուցիչ
._____________________________________________________________________.
|պատկերը|V |Ներքին քառակուսին ավելի բաց գույնի է, քան արտաքին շրջանը:|
|չի | |ՕԳՏԱԳՈՐԾԵԼ պատվաստանյութը, եթե պիտանելիության ժամկետն |
|բերվում| |անցած չի: |
|_______|___|_________________________________________________________|
|պատկերը|V |Ներքին քառակուսին գույնը փոխել է, բայց ավելի բաց գույնի |
|չի | |է, քան արտաքին շրջանը: |
|բերվում| |ՕԳՏԱԳՈՐԾԵԼ պատվաստանյութը, եթե պիտանելիության ժամկետն |
| | |անցած չի: |
|_______|___|_________________________________________________________|
|պատկերը|X |Անհրաժեշտ է խոտանել |
|չի | |Ներքին քառակուսու գույնը հավասարվել է արտաքին շրջանի |
|բերվում| |գույնի հետ: |
| | |ՉՕԳՏԱԳՈՐԾԵԼ պատվաստանյութը: |
|_______|___|_________________________________________________________|
|պատկերը|X |Խոտանման ժամկետն անցել է |
|չի | |Ներքին քառակուսին ավելի մուգ գույնի է, քան արտաքին |
|բերվում| |շրջանը: |
| | |ՉՕԳՏԱԳՈՐԾԵԼ պատվաստանյութը: |
._____________________________________________________________________.
49. Կատաղության ինակտիվացված (լիոֆիլացված) պատվաստանյութի շշիկի ջերմաստիճանային զգայորոշիչը գտնվում է շշիկի կափարիչի վրա: Գունավոր կետը, որը հայտնվում է շշիկի վրա, դա հենց պատվաստանյութի ջերմաստիճանային զգայորոշիչն է, որը գրանցում է շշիկի ջերմաստիճանի փոփոխությունները: Այն հանդիսանում է շշիկի տաքացման զգայորոշիչը և նախազգուշացնում է օգտագործողին շշիկի տաքացման հետևանքով պատվաստանյութի վնասվելու մասին:
50. Պատվաստանյութի շշիկի ջերմաստիճանային զգայորոշիչի մեկնաբանությունը շատ հեշտ է: Հատուկ ուշադրություն պետք է դարձնել քառակուսու գույնին, որն աստիճանաբար փոխվում է: Եթե ներքին քառակուսին ավելի բաց գույն ունի, քան քառակուսին, ապա պատվաստանյութը ենթակա է օգտագործման: Եթե ներքին քառակուսին և շրջանակը նույն գույնն ունեն, կամ ներքին քառակուսին ավելի մուգ գույն ունի քան շրջանակը, ապա պատվաստանյութն օգտագործման ենթակա չէ:
51. Արտադրող` Հնդկաստան, Սերում ինստիտուտ
Խադապսար 212/2, Պունե 411028: