Սեղմել Esc փակելու համար:
ԴԱՏԱՐԱՆԻ ՆԻՍՏԵՐԻ ԴԱՀԼԻՃԻ ԵՎ ԴԱՏԱՎՈՐԻ ...
Քարտային տվյալներ

Տեսակ
Գործում է
Ընդունող մարմին
Ընդունման ամսաթիվ
Համար

ՈՒժի մեջ մտնելու ամսաթիվ
ՈՒժը կորցնելու ամսաթիվ
Ընդունման վայր
Սկզբնաղբյուր

Ժամանակագրական տարբերակ Փոփոխություն կատարող ակտ

Որոնում:
Բովանդակություն

Հղում իրավական ակտի ընտրված դրույթին X
irtek_logo
 

ԴԱՏԱՐԱՆԻ ՆԻՍՏԵՐԻ ԴԱՀԼԻՃԻ ԵՎ ԴԱՏԱՎՈՐԻ ԱՇԽԱՏԱՍԵՆՅԱԿԻ ՏԻՊԱՅԻՆ ԿԱՀԱՎՈՐՄԱՆ ՆԿԱՐԱԳՐՈՒԹ ...

 

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՈՒՐԴ

ՈՐՈՇՈՒՄ

 

ԲԴԽ-78-Ո-173

2020թ.

 

ԴԱՏԱՐԱՆԻ ՆԻՍՏԵՐԻ ԴԱՀԼԻՃԻ ԵՎ ԴԱՏԱՎՈՐԻ ԱՇԽԱՏԱՍԵՆՅԱԿԻ ՏԻՊԱՅԻՆ ԿԱՀԱՎՈՐՄԱՆ ՆԿԱՐԱԳՐՈՒԹՅՈՒՆԸ ՍԱՀՄԱՆԵԼՈՒ ՄԱՍԻՆ

 

i

Հիմք ընդունելով «Հայաստանի Հանրապետության դատական օրենսգիրք» սահմանադրական օրենքի 89-րդ հոդվածի 1-ին մասի 26-րդ կետը, 16-րդ հոդվածի 2-րդ մասը և 94-րդ հոդվածի 1-ին մասը` Բարձրագույն դատական խորհուրդը

 

ՈՐՈՇՈՒՄ է

 

1. Սահմանել դատարանի նիստերի դահլիճի և դատավորի աշխատասենյակի տիպային կահավորման նկարագրությունը` համաձայն հավելվածի:

2. Սույն որոշումն ուժի մեջ է մտնում հրապարակմանը հաջորդող օրվանից:

 

ԲԱՐՁՐԱԳՈՒՅՆ ԴԱՏԱԿԱՆ

    ԽՈՐՀՐԴԻ ՆԱԽԱԳԱՀ                        Ռ. ՎԱՐԴԱԶԱՐՅԱՆ

 

2020թ. դեկտեմբերի 3

ք. Երևան

 

Հավելված

Բարձրագույն դատական խորհրդի

2020 թվականի դեկտեմբերի 3-ի

թիվ ԲԴԽ-78-Ո-173 որոշման

 

ԳԼՈՒԽ 1. ՆԿԱՐԱԳՐՈՒԹՅՈՒՆ ԴԱՏԱՐԱՆԻ ՆԻՍՏԵՐԻ ԴԱՀԼԻՃԻ ՏԻՊԱՅԻՆ ԿԱՀԱՎՈՐՄԱՆ

 

1. Դատարանի յուրաքանչյուր նիստերի դահլիճ (այսուհետ նաև` Դահլիճ) ունի առնվազն երկու ոչ ապակեպատ մուտքի-ելքի դուռ, որոնցից մեկը նախատեսված է բաց, իսկ մյուսը` փակ գոտուց մուտքի-ելքի համար: Դատական նիստերին մասնակցելու համար ձերբակալված և կալանավորված անձինք Դահլիճ են բերվում փակ գոտուց մուտքի-ելքի համար նախատեսված դռնով, եթե տվյալ Դահլիճը չունի այդ նպատակի համար նախատեսված ոչ ապակեպատ առանձին դուռ:

2. Դահլիճն ունի հերթական համար, որի համարակալումն սկսվում է թիվ 1-ից` աճողական կարգով: Դահլիճի համարը և մեծատառերով գրված «ՆԻՍՏԵՐԻ ԴԱՀԼԻՃ» բառերը նշվում են 15 սմ * 30 սմ պլաստիկե ցուցանակի վրա: Դահլիճի համարը և «ՆԻՍՏԵՐԻ ԴԱՀԼԻՃ» բառերը նշված են 100 տառաչափով և «Գրապալատ» տառատեսակով: Ցուցանակն ամրացվում է Դահլիճի արտաքին մուտքի-ելքի դռան աջ կամ ձախ կողքի պատին` տեսանելի, դռան վերին նիշի բարձրությամբ:

3. Դահլիճը պետք է համապատասխանի անվտանգության ապահովման ու առողջության պահպանման վերաբերյալ աշխատանքային նորմերի պահանջներին:

4. Դահլիճն առանձնացված է երկու հատվածի` դատավարական գործողություններ իրականացնող անձանց համար նախատեսված հատվածի (դատավոր, դատական նիստերի քարտուղար, դատավարության մասնակիցներ) (այսուհետ` Դատավարական հատված) և դատական նիստին ներկա գտնվող անձանց համար նախատեսված հատվածի (այսուհետ` Այցելուների հատված):

5. Դահլիճում Դատավարական հատվածն Այցելուների հատվածից առանձնացված է Դահլիճի կահավորանքին համապատասխան առնվազն 1 մետր բարձրությամբ փայտե կամ զրահապատ ապակե միջնորմով:

6. Դահլիճի Դատավարական հատվածի կենտրոնական հանդիսացող պատի մեջտեղում` հատակից առնվազն 2 մետր բարձրության վրա, ամրացված է «Հայաստանի Հանրապետության զինանշանի մասին» օրենքի պահանջներին համապատասխանող Հայաստանի Հանրապետության զինանշանը:

7. Դատավարական հատվածի կենտրոնական մասում` Հայաստանի Հանրապետության զինանշանի տակ, տեղադրված է դատավորի, իսկ դատական գործերի կոլեգիալ կազմով քննության դեպքում` դատավորների քանակին համապատասխան սեղան և բազկաթոռ(ներ):

8. Դահլիճի Դատավարական հատվածում` դատավորի, իսկ դատական գործերի կոլեգիալ կազմով քննության դեպքում` դատավորների սեղանի աջակողմյան կամ ձախակողմյան մասում` կլոր փայտե պատվանդանի վրա, տեղադրված է «Հայաստանի Հանրապետության դրոշի մասին» օրենքի պահանջներին համապատասխանող, առնվազն 2 մետր բարձրությամբ դրոշաձողի վրա ամրացված 1 մ * 2 մ Հայաստանի Հանրապետության դրոշը:

9. Դատավորի սեղանը պատրաստված է փայտից և երեք կողմերից` վերևի դիմային և կողային հատվածների գծով ունի 10 սմ բարձրությամբ և 2 սմ հաստությամբ պատնեշ:

10. Դատական գործերի միանձնյա քննության դեպքում դատավորի, իսկ դատական գործերի կոլեգիալ կազմով քննության դեպքում` դատավորների սեղանը հարմարեցված է մեկ համակարգչի օգտագործման համար, և սեղանին առկա է համակարգիչ, ինչպես նաև դատական նիստի ձայնագրման ապահովման համար բարձրախոսներ:

11. Վերաքննիչ դատարաններում դատական գործերի կոլեգիալ կազմով քննության դեպքում և Վճռաբեկ դատարանում համակարգիչը տեղադրված է նախագահող և զեկուցող դատավորների դիմաց:

12. Դատավորի, իսկ դատական գործերի կոլեգիալ կազմով քննության դեպքում` դատավորների սեղանի հետնամասում տեղադրված է դատավորի/դատավորների ընդարձակ և կաշվեպատ բազկաթոռը/բազկաթոռները: Վճռաբեկ դատարանում նախագահող դատավորի բազկաթոռը տարբերվում է մյուս դատավորների բազկաթոռներից:

13. Դատավորի սեղանը, բազկաթոռը և Հայաստանի Հանրապետության դրոշը պետք է տեղադրված լինի առնվազն 0,45 սմ բարձրությամբ հարթակի վրա:

14. Դատավորի սեղանի աջակողմյան կամ ձախակողմյան հատվածում տեղադրված է դատական նիստերի քարտուղարի համար նախատեսված գրասենյակային սեղանը, որը հարմարեցված է համակարգչի օգտագործման համար, իսկ գրասենյակային սեղանի հետնամասում տեղադրված է աթոռ:

15. Դատավորի սեղանի դիմաց` կենտրոնական հատվածում, տեղադրված է ամբիոնը, որի վրա պետք է ամրացված լինի դատական նիստի ձայնագրման ապահովման համար բարձրախոս:

16. Դատավորի սեղանի դիմաց` աջակողմյան և ձախակողմյան հատվածներում, տեղադրված է(են) դատավարության կողմերի համար նախատեսված գրասենյակային սեղան (սեղաններ)` դրան (դրանց) համապատասխան քանակի աթոռներով:

17. Քաղաքացիական և վարչական գործեր քննելու համար նախատեսված Դահլիճներում դատավարության կողմերի համար նախատեսված գրասենյակային սեղանը (սեղանները) տեղադրված է(են) դատավորի սեղանի դիմաց` կողք կողքի, իսկ քրեական գործեր քննելու համար նախատեսված Դահլիճներում` դատավորի սեղանի դիմաց` միմյանց դեմ դիմաց:

18. Դահլիճում դատավարության կողմերի համար նախատեսված գրասենյակային սեղանի (սեղանների) վրա տեղադրված են դատական նիստի ձայնագրման ապահովման համար բարձրախոսներ:

19. Այցելուների հատվածում ողջամիտ հեռավորությամբ տեղադրված են Դահլիճում ներկա գտնվող անձանց համար նախատեսված` ընդհանուր կահավորանքին համապատասխան նստարաններ:

20. Դահլիճում առկա է առանձին դատավարական գործողություններ իրականացնելու համար նախատեսված մոնիտոր` տեսանելի տեղում:

21. Դատարանի վարչական շենքում առնվազն մեկ Դահլիճ պետք է կահավորված լինի լսողական և/կամ տեսողական խնդիրներ ունեցող անձանց համար նախատեսված համապատասխան սարքով:

22. Դատարանների յուրաքանչյուր վարչական շենքում առնվազն մեկ Դահլիճում պետք է լինի հաշմանդամություն ունեցող և հենաշարժական հատուկ միջոցներ օգտագործող անձանց համար նախատեսված տարածք:

23. Անհրաժեշտությունից ելնելով` Դահլիճում կարող է տեղադրվել այլ կահավորանք, ժամանակակից տեխնիկական և այլ միջոցներ:

24. Դահլիճի պատուհանը (պատուհանները) ծածկված է(են) Դահլիճի պատերի գույնին համադրելի միագույն շերտավարագույրով(ներով):

25. Դահլիճը ձայնամեկուսացված է, և Դահլիճի պատերը կաթնագույն են:

26. Դահլիճում կառուցվածքային առանձնահատկությունների և տեխնիկական հնարավորությունների հաշվառմամբ տեղադրվում է օդորակիչ:

27. Դահլիճում հնարավորության սահմանում պետք է նախատեսվի հարմարեցված տեղեր և պայմաններ լրագրողների գործունեության համար:

 

ԳԼՈՒԽ 2. ՆԿԱՐԱԳՐՈՒԹՅՈՒՆ ԴԱՏԱՎՈՐԻ ԱՇԽԱՏԱՍԵՆՅԱԿԻ ՏԻՊԱՅԻՆ ԿԱՀԱՎՈՐՄԱՆ

 

28. Դատավորի աշխատասենյակի (այսուհետ նաև` Աշխատասենյակ) 15 սմ * 30 սմ չափերով ցուցանակի վրա մեծատառերով, 64 տառաչափով և «Գրապալատ» տառատեսակով նշված է` «ԴԱՏԱՎՈՐ» բառը, 64 տառաչափով և «Գրապալատ» տառատեսակով դատավորի անունը, ազգանունը:

29. Աշխատասենյակը պետք է համապատասխանի անվտանգության ապահովման ու առողջության պահպանման վերաբերյալ աշխատանքային նորմերի պահանջներին:

30. Աշխատասենյակը հնարավորինս լուսավոր է, ձայնամեկուսացված, իսկ պատերը բաց գույնի են:

31. Աշխատասենյակում` կենտրոնական պատին, ամրացված է Հայաստանի Հանրապետության զինանշանը, տեղադրված են Հայաստանի Հանրապետության դրոշը, դատավորի աշխատասեղանը, կաշվեպատ բազկաթոռը:

32. Աշխատասենյակում` կենտրոնական հանդիսացող պատի մեջտեղի հատվածում, հատակից առնվազն 2 մետր բարձրության վրա փակցված է «Հայաստանի Հանրապետության զինանշանի մասին» օրենքի պահանջներին համապատասխանող Հայաստանի Հանրապետության զինանշանը:

33. Հայաստանի Հանրապետության զինանշանի աջակողմյան կամ ձախակողմյան հատվածում 2 մետր բարձրությամբ դրոշաձող ունեցող փայտե պատվանդանով տեղադրված է «Հայաստանի Հանրապետության դրոշի մասին» օրենքի պահանջներին համապատասխանող Հայաստանի Հանրապետության դրոշը:

34. Աշխատասենյակում աշխատասեղանը տեղակայված է այնպես, որ սենյակ մտնելիս այն տեսանելի լինի:

35. Դատավորի աշխատասեղանի հետնամասում տեղադրված է դատավորի կաշվեպատ բազկաթոռը, որն արտաքին տեսքով տարբերվում է Աշխատասենյակում առկա մյուս աթոռներից:

36. Դատավորի աշխատասեղանն ունի ուղղահայաց տեղադրված դիմադիր կամ առանձին սեղան` համապատասխան քանակի աթոռներով:

37. Աշխատասենյակում մնացած կահավորանքի դասավորությունը կատարված է սենյակի պատերի հատվածով այնպես, որ սենյակի կենտրոնն ազատ լինի:

38. Աշխատասենյակի պատուհանի համար նախատեսված է միագույն շերտավարագույր կամ վարագույր:

39. Աշխատասենյակի կահավորանքը ներառում է նաև`

1) չհրկիզվող պահարան,

2) գրապահարան,

3) զգեստապահարան,

4) հեռախոս,

5) համակարգիչ,

6) օդորակիչ:

40. Աշխատասենյակում կարող են լրացուցիչ տեղադրվել նաև`

1) գրասենյակային սեղան` հարմարեցված համակարգչի շահագործման համար,

2) տակդիր` նախատեսված հեռախոսի համար,

3) հեռուստացույցի տակդիր և հեռուստացույց,

4) բազմոց, բազկաթոռ,

5) սառնարան,

6) այլ կահավորանք, ժամանակակից տեխնիկական և այլ միջոցներ:

 

ԳԼՈՒԽ 3. ԱՆՑՈՒՄԱՅԻՆ ԴՐՈՒՅԹՆԵՐ

 

41. Սույն հավելվածով սահմանված Դահլիճի և Աշխատասենյակի տիպային կահավորման նկարագրությունը կիրառելի է այնքանով, որքանով դա հնարավոր է իրականացնել` ելնելով Դահլիճի և Աշխատասենյակի տեղակայման, մակերեսի և դիրքի յուրահատկություններից և հաշվի առնելով նաև ֆինանսական հնարավորությունները:

 

 

pin
Բարձրագույն դատական խորհուրդ
03.12.2020
N ԲԴԽ-78-Ո-173
Որոշում