ՊԱՏՎԱՐՆԵՐԻ ԱՆՎՏԱՆԳՈՒԹՅԱՆ ԾՐԱԳԻՐՆ ԻՐԱԿԱՆԱՑՆՈՂ ՊԵՏԱԿԱՆ ՀԻՄՆԱՐԿԻ ՄԱՍԻՆ

040.0513.240800

«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ

«24» օգոստոսի 2000 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

24 օգոստոսի 2000 թվականի N 513

ՊԱՏՎԱՐՆԵՐԻ ԱՆՎՏԱՆԳՈՒԹՅԱՆ ԾՐԱԳԻՐՆ ԻՐԱԿԱՆԱՑՆՈՂ ՊԵՏԱԿԱՆ ՀԻՄՆԱՐԿԻ ՄԱՍԻՆ

Հիմք ընդունելով Հայաստանի Հանրապետության և Միջազգային զարգացման ընկերակցության միջև 1999 թվականի հոկտեմբերի 7-ին ստորագրված վարկային համաձայնագրի (պատվարների անվտանգության ծրագիր) պայմանները, ինչպես նաև հաշվի առնելով այն, որ պատվարների անվտանգության ծրագիրը նախապատրաստվել և դրա սկզբնական փուլի աշխատանքները ներկայումս իրականացվում են «Ոռոգման համակարգերի վերականգնում» ծրագրի իրականացման գրասենյակի կողմից` Հայաստանի Հանրապետության կառավարությունը որոշում է.

1. Պատվարների անվտանգության ծրագրով նախատեսված աշխատանքների իրականացման պարտականությունները դնել «Ոռոգման համակարգերի վերականգնում» ծրագրի իրականացման գրասենյակ պետական հիմնարկի վրա:

2. Պատվարների անվտանգության ծրագրի կառավարման խորհրդի պարտականությունները դնել Հայաստանի Հանրապետության վարչապետի 2000 թվականի փետրվարի 8-ի «Օտարերկրյա պետությունների և միջազգային վարկատու կազմակերպությունների կողմից Հայաստանի Հանրապետությանը տրամադրվող վարկային և դրամաշնորհային միջոցների հաշվին նախապատրաստվող ու իրականացվող ծրագրերի կառավարման խորհուրդների կանոնադրություններն ու անհատական կազմերը հաստատելու մասին» N 44 որոշմամբ հաստատված «Ոռոգման համակարգերի վերականգնում» և «Գյուղատնտեսության բարեփոխումների աջակցություն» ծրագրերի կառավարման խորհրդի վրա:

3. Սույն որոշումն ուժի մեջ է մտնում պաշտոնական հրապարակման պահից: