ՇԱՀՈՒԹԱՀԱՐԿԻ ՀԱՇՎԱՐԿՆԵՐԻ ՆԵՐԿԱՅԱՑՄԱՆ ՎԵՐԱԲԵՐՅԱԼ

https://petekamutner.am/shared/Information/Irazekum%20206.pdf

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ
ԻՐԱԶԵԿՄԱՆ ԹԵՐԹԻԿ

1 հունիսի 2021 թվականի N 206

ՇԱՀՈՒԹԱՀԱՐԿԻ ՀԱՇՎԱՐԿՆԵՐԻ ՆԵՐԿԱՅԱՑՄԱՆ ՎԵՐԱԲԵՐՅԱԼ

Հարց

Կազմակերպությունը աշխատում է շրջանառության հարկի համակարգում, պե՞տք է արդյոք ներկայացնի ռեզիդենտ շահութահարկ վճարողի և մշտական հաստատության միջոցով ՀՀ-ում գործունեություն իրականացնող ոչ ռեզիդենտ շահութահարկ վճարողի շահութահարկի հաշվետվություն:

Պատասխան

ՀՀ հարկային օրենսգրքի 134-րդ հոդվածի 1-ին մասին համապատասխան` ռեզիդենտ շահութահարկ վճարողները, ՀՀ-ում հաշվառված, կանոնները գրանցած պայմանագրային ներդրումային ֆոնդերը (բացառությամբ կենսաթոշակային ֆոնդերի և երաշխիքային ֆոնդերի), ինչպես նաև մշտական հաստատության միջոցով ՀՀ-ում գործունեություն իրականացնող ոչ ռեզիդենտ շահութահարկ վճարողները մինչև հաշվետու ժամանակաշրջանին հաջորդող հարկային տարվա ապրիլի 20-ը ներառյալ օրենսգրքի 53-րդ հոդվածով սահմանված կարգով հարկային մարմին են ներկայացնում շահութահարկի հաշվարկ:

Ռեզիդենտ շահութահարկ վճարողի և մշտական հաստատության միջոցով ՀՀ-ում գործունեություն իրականացնող ոչ ռեզիդենտ շահութահարկ վճարողի շահութահարկի հաշվարկի (այսուհետ` շահութահարկի հաշվարկ) ձևը և լրացման կարգը հաստատված է ՀՀ ՊԵԿ նախագահի 12.12.2018թ. N 749-Ն հրամանի հավելված 1-ով: Նշված հավելվածով հաստատված կարգի 1-ին կետին համապատասխան` հաշվարկ հարկային մարմին չեն ներկայացնում հաշվետու տարվա ամբողջ ընթացքում շրջանառության հարկի համակարգում գործունեություն իրականացնող ռեզիդենտ կազմակերպությունները:

Հաշվի առնելով վերոգրյալը` հայտնում ենք, որ հաշվետու տարվա ամբողջ ընթացքում շրջանառության հարկի համակարգում գործունեություն իրականացնող ռեզիդենտ կազմակերպությունները շահութահարկի հաշվարկ չեն ներկայացնում:

ՀՀ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ