ԱՐՏԱՔԻՆ ԳՈՎԱԶԴ ՏԵՂԱԴՐԵԼՈՒ ԹՈՒՅԼՏՎՈՒԹՅԱՆ ՎԵՐԱՁԵՎԱԿԵՐՊՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

24 հունիսի 2021 թվականի N 1036-Ն

ԱՐՏԱՔԻՆ ԳՈՎԱԶԴ ՏԵՂԱԴՐԵԼՈՒ ԹՈՒՅԼՏՎՈՒԹՅԱՆ ՎԵՐԱՁԵՎԱԿԵՐՊՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

Հիմք ընդունելով «Ավտոմոբիլային ճանապարհների մասին» օրենքում փոփոխություններ և լրացումներ կատարելու մասին» Հայաստանի Հանրապետության 2020 թվականի դեկտեմբերի 10-ի ՀՕ-499-Ն օրենքի 3-րդ հոդվածը`

Հայաստանի Հանրապետության կառավարությունը որոշում է`

1. Սահմանել արտաքին գովազդ տեղադրելու թույլտվության վերաձևակերպման կարգը` համաձայն հավելվածի:

2. Սույն որոշումն ուժի մեջ է մտնում հրապարակման օրվան հաջորդող տասներորդ օրը:

Հայաստանի Հանրապետության

    վարչապետի պաշտոնակատար       Ն. Փաշինյան

2021 թ. հունիսի 24

Երևան

Հավելված

ՀՀ կառավարության

2021 թվականի հունիսի 24-ի

N 1036-Ն որոշման

ՎԵՐԱՁԵՎԱԿԵՐՊՄԱՆ ԿԱՐԳ ԱՐՏԱՔԻՆ ԳՈՎԱԶԴ ՏԵՂԱԴՐԵԼՈՒ ԹՈՒՅԼՏՎՈՒԹՅԱՆ

1. Սույն կարգով կարգավորվում են բնակավայրերի սահմանների միջով անցնող տարանցիկ հատվածներում արտաքին գովազդ տեղադրելու թույլտվության վերաձևակերպման հետ կապված հարաբերությունները:

2. ՀՀ կառավարության 2006 թվականի հունվարի 19-ի N 765-Ն որոշմամբ սահմանված կարգով բնակավայրերի սահմանների միջով անցնող տարանցիկ հատվածներում արտաքին գովազդ տեղադրելու թույլտվությունը (այսուհետ` թույլտվություն) ենթակա է վերաձևակերպման տվյալ բնակավայրերը ներառող համայնքների ղեկավարների (այսուհետ` համայնքի ղեկավար) կողմից:

3. Բնակավայրերի սահմանների միջով անցնող տարանցիկ հատվածներում արտաքին գովազդ տեղադրելու թույլտվություն ունեցող գովազդակիրը (այսուհետ` գովազդակիր) թույլտվությունը վերաձևակերպելու նպատակով` համայնքի ղեկավարին ներկայացնում է դիմում (այսուհետ` դիմում)` համաձայն ձևի:

4. Դիմումին կցվում են`

1) թույլտվության բնօրինակը.

2) գովազդային վահանակի էսքիզի լուսանկար.

3) տարածքի 2 լուսանկար (10x15 չափսի) տարբեր դիրքերից, որտեղ սխեմատիկ նշված լինի գովազդի դիրքը ճանապարհի նկատմամբ.

4) ճանապարհի պաշտպանական գոտիներում տեղադրելու դեպքում` տարածքը տնօրինողի գրավոր համաձայնության պատճենը.

5) եթե դիմումը ներկայացվում է գովազդակրի լիազորված անձի կողմից, ապա օրենքով սահմանված կարգով լիազորագիր և լիազորվածի անձը հաստատող փաստաթղթի պատճենը:

5. Համայնքի ղեկավարը մերժում է թույլտվության վերաձևակերպումը, եթե ներկայացված փաստաթղթերը թերի են և դրա մասին պատշաճ ձևով նախազգուշացումը համայնքի ղեկավարի կողմից ուղարկվելու օրվան հաջորդող 7 օրվա ընթացքում գովազդակիրը չի ներկայացնում անհրաժեշտ փաստաթղթերը կամ նյութերը:

6. Սույն կարգի 4-րդ կետում նշված փաստաթղթերն ամբողջությամբ ներկայացնելու կամ հավելվածի 5-րդ կետով սահմանված ժամկետում համալրելու դեպքում` 10 աշխատանքային օրվա ընթացքում համայնքի ղեկավարն ընդունում է թույլտվության վերաձևակերպման մասին որոշում` այդ մասին որոշման ընդունումից հետո մեկ աշխատանքային օրվա ընթացքում պատշաճ ձևով տեղեկացնելով գովազդակրին:

7. Թույլտվության վերաձևակերպման մասին որոշումը գովազդակրին է տրամադրվում թույլտվության բնօրինակի հետ միասին:

Ձև

Հայաստանի Հանրապետության ____ մարզի ______ համայնքի ղեկավար

______________________________________ ին (անուն, ազգանուն)

Դիմող` __________________________________

(ֆիզիկական անձի դեպքում` անուն, ազգանուն,

իրավաբանական անձի դեպքում` անվանում,

բնակության վայր/գտնվելու վայր, կոնտակտային տվյալներ)

ԴԻՄՈՒՄ

Խնդրում եմ վերաձևակերպել ՀՀ կառավարության 2006 թվականի հունվարի 19-ի N 765-Ն որոշմամբ սահմանված կարգով բնակավայրերի սահմանների միջով անցնող տարանցիկ հատվածներում արտաքին գովազդ տեղադրելու նպատակով ինձ տրամադրված ___________________________________ թույլտվությունը:

    Դիմող`         ___________________

                   (ստորագրություն)

                                         անուն, ազգանուն

                                       __________________

                                           (ամսաթիվ)

Պաշտոնական հրապարակման օրը` 25 հունիսի 2021 թվական: