ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԲԱՐՁՐԱԳՈՒՅՆ ԴԱՏԱԿԱՆ ԽՈՐՀՈՒՐԴ
ՈՐՈՇՈՒՄ
ԲԴԽ-65-Ո-162
2021թ.
ԱՌԱՋԻՆ ԱՏՅԱՆԻ ԴԱՏԱՐԱՆՆԵՐՈՒՄ ԴԱՏԱՎՈՐՆԵՐԻ ԹԵԿՆԱԾՈՒՆԵՐԻ ՑՈՒՑԱԿԻ ՀԱՄԱՊԱՏԱՍԽԱՆ ՄԱՍՆԱԳԻՏԱՑՄԱՆ ԲԱԺԻՆՆԵՐԻ ՀԱՄԱԼՐՄԱՆ ԱՆՀՐԱԺԵՇՏՈՒԹՅԱՆ ՄԱՍԻՆ
«Հայաստանի Հանրապետության դատական օրենսգիրք» սահմանադրական օրենքի (այսուհետ` Օրենք) 95-րդ հոդվածի 1-ին մասի` դատավորների թեկնածուների ցուցակի հերթական և արտահերթ համալրումն իրականացվում է ըստ քրեական, քաղաքացիական և վարչական մասնագիտացումների: Քաղաքացիական մասնագիտացման բաժնում ներառվում է նաև սնանկության մասնագիտացումը:
Նույն հոդվածի 2-րդ մասի համաձայն` Բարձրագույն դատական խորհուրդը մինչև յուրաքանչյուր տարվա սեպտեմբերի 1-ը հաշվարկում է հաջորդ երկու տարվա ընթացքում առաջին ատյանի դատարանում դատավորների թափուր պաշտոնների համալրման համար անհրաժեշտ դատավորների քանակը և դրա հիման վրա որոշում է կայացնում դատավորների թեկնածուների ցուցակի համապատասխան մասնագիտացման բաժնի համալրման անհրաժեշտության մասին, եթե դատավորների թեկնածուների ցուցակում առկա թեկնածուների քանակը համապատասխանաբար քրեական և քաղաքացիական մասնագիտացման բաժնում չի գերազանցում հաջորդ երկու տարում թափուր պաշտոնների կանխատեսվող քանակը չորսով, իսկ վարչական մասնագիտացման բաժնում` երկուսով:
Օրենքի 110-րդ հոդվածի 1-ին մասի համաձայն` Բարձրագույն դատական խորհուրդը Արդարադատության ակադեմիայում ուսուցումն ավարտած դատավորների թեկնածուների հավակնորդներին ներառում է դատավորների թեկնածուների ցուցակներում` ըստ համապատասխան մասնագիտացումների:
Ելնելով վերոգրյալից և հաշվի առնելով այն հանգամանքը, որ Բարձրագույն դատական խորհրդի 2021 թվականի մարտի 10-ի թիվ ԲԴԽ-12-Ո-14 որոշմամբ դատավորների թեկնածուների հավակնորդների ցուցակում ընդգրկված քրեական մասնագիտացման թեկնածուներից 3-ը և քաղաքացիական մասնագիտացման թեկնածուներից 2-ն Արդարադատության ակադեմիայում ուսուցումը դեռ չեն ավարտել, ուստի նրանք, որպես դատավորի թեկնածուներ, չեն կարող ընդգրկվել մինչև սույն թվականի սեպտեմբերի 1-ը Օրենքի 95-րդ հոդվածի 2-րդ մասով կատարվելիք հաշվարկում:
Ներկայիս դատավորների թեկնածուների ցուցակում` ըստ համապատասխան մասնագիտացման բաժինների, ընդգրկված են քրեական մասնագիտացմամբ` 0 թեկնածու, քաղաքացիական մասնագիտացմամբ` 5 թեկնածու, իսկ վարչական մասնագիտացմամբ` 4 թեկնածու:
Հարկ է նշել, որ առաջին ատյանի դատարաններում առաջիկա երկու տարում
(30.08.2021-30.08.2023թթ.) թոշակի է անցնելու քաղաքացիական գործեր քննող 5, քրեական գործեր քննող 2 և վարչական գործեր քննող 0 դատավոր:
Ամփոփելով վերոգրյալը կարող ենք փաստել, որ 24.08.2021-24.08.2023թթ. առաջին ատյանի դատարաններում կանխատեսվում է դատավորի 7 թափուր հաստիքի առաջացում:
Բացի դրանից ներկա պահին առաջին ատյանի դատարաններում առկա են դատավորի 28 թափուր հաստիք, որից 25-ը` քրեական (ներառյալ առաջին ատյանի ընդհանուր իրավասության դատարաններում դատավորների թեկնածուների ցուցակի քրեական մասնագիտացման բաժնի մինչդատական քրեական վարույթի նկատմամբ դատական վերահսկողության գործերի և օպերատիվ-հետախուզական միջոցառումներ իրականացնելու մասին միջնորդությունների ենթաբաժնի համար հատկացված 17 հաստիքը), իսկ 3-ը` քաղաքացիական մասնագիտացման:
Այսպիսով, հաշվի առնելով այն հանգամանքը, որ դատավորների թեկնածուների ցուցակի քրեական և քաղաքացիական մասնագիտացման բաժիններում առկա թեկնածուների քանակը չի գերազանցում հաջորդ երկու տարում թափուր պաշտոնների կանխատեսվող քանակը չորսով, իսկ վարչական մասնագիտացման բաժնում առկա թեկնածուների քանակը գերազանցում է հաջորդ երկու տարում կանխատեսվող թափուր հաստիքների քանակը երկուսով, ուստի անհրաժեշտ է համալրել դատավորների թեկնածուների ցուցակի միայն քրեական և քաղաքացիական մասնագիտացման բաժինները:
Օրենքի 95-րդ հոդվածի 3-րդ մասի համաձայն` դատավորների թեկնածուների ցուցակի համալրման համար անհրաժեշտ թեկնածուների քանակի հաշվարկը կատարվում է հաջորդ երկու տարվա ընթացքում քրեական և քաղաքացիական մասնագիտացման բաժիններում համալրման համար անհրաժեշտ քանակը յոթական թեկնածուով, իսկ վարչական մասնագիտացման բաժնում` երկու թեկնածուով գերազանցող քանակի հաշվարկով:
Վերոգրյալի արդյունքում անհրաժեշտ է դատավորների թեկնածուների ցուցակի քրեական մասնագիտացման բաժինը համալրել 34 թեկնածուով, իսկ քաղաքացիականը` 10 թեկնածուով` հիմքում դնելով հետևյալ հաշվարկը.
._____________________________________________________________________.
| |Քրեական |Քաղաքացիական |
| |մասնագիտացում|մասնագիտացում|
|_________________________________________|_____________|_____________|
|Ներկայումս առկա թափուր պաշտոնների քանակ |25 |3 |
|_________________________________________|_____________|_____________|
|30.08.2021թ.-ից մինչև 31.12.2021թ. |0 |0 |
|_________________________________________|_____________|_____________|
|01.01.2022թ.-ից մինչև 31.12.2022թ. |1 |3 |
|_________________________________________|_____________|_____________|
|01.01.2023թ.-ից մինչև 30.08.2023թ. |1 |2 |
|_________________________________________|_____________|_____________|
|Օրենքի 95-րդ հոդվածի 3-րդ մասի պահանջ |7 |7 |
|_________________________________________|_____________|_____________|
|Ներկա պահին դատավորների թեկնածուների |(-) 0 |(-)5 |
|ցուցակում առկա թեկնածուների քանակ | | |
|_________________________________________|_____________|_____________|
|Ընդհանուր |34 |10 |
._____________________________________________________________________.
Ելնելով վերոգրյալից և հիմք ընդունելով Օրենքի 94-րդ հոդվածի 1-ին մասը և 95-րդ հոդվածի 2-րդ մասը` Բարձրագույն դատական խորհուրդը
ՈՐՈՇՈՒՄ Է
1. Հաստատել դատավորների թեկնածուների ցուցակի համալրման անհրաժեշտ թվաքանակը, համապատասխանաբար`
- քրեական մասնագիտացման բաժին` 34 (երեսունչորս) թեկնածու.
- քաղաքացիական մասնագիտացման բաժին` 10 (տասը) թեկնածու:
2. Սույն որոշումն ուժի մեջ է մտնում հրապարակմանը հաջորդող օրվանից:
ԲԱՐՁՐԱԳՈՒՅՆ ԴԱՏԱԿԱՆ
ԽՈՐՀՐԴԻ ՆԱԽԱԳԱՀԻ
ՊԱՇՏՈՆԱԿԱՏԱՐ Գ. ՋՀԱՆԳԻՐՅԱՆ
2021թ. օգոստոսի 30
Երևան
Հրապարակվել է ԲԴԽ կայքէջում (www.court.am)` 9 սեպտեմբերի 2021 թվական: