ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
21 հոկտեմբերի 2021 թվականի N 1728-Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԱՐՁԱՆԱԳՐԱՅԻՆ ՈՐՈՇՈՒՄՆԵՐՆ ԱՆՎԱՎԵՐ ՃԱՆԱՉԵԼՈՒ ՄԱՍԻՆ
Հիմք ընդունելով «Նորմատիվ իրավական ակտերի մասին» Հայաստանի Հանրապետության օրենքի 38-րդ հոդվածի 1-ին մասը` Հայաստանի Հանրապետության կառավարությունը որոշում է.
1. Անվավեր ճանաչել մինչև սույն որոշումն ուժի մեջ մտնելը Հայաստանի Հանրապետության կառավարության կողմից ընդունված բոլոր արձանագրային որոշումները:
2. Սույն որոշումն ուժի մեջ է մտնում 2022 թվականի հունվարի 1-ից:
Հայաստանի Հանրապետության
վարչապետ Ն. Փաշինյան
2021 թ. հոկտեմբերի 21
Երևան
Պաշտոնական հրապարակման օրը` 21 հոկտեմբերի 2021 թվական:
| ԻՐՏԵԿ |
«Իրավական ակտերի մասին» ՀՀ օրենքի և «Նորմատիվ իրավական ակտերի մասին» ՀՀ օրենքի համաձայն ՀՀ կառավարության արձանագրային որոշումներն իրավական ակտեր չեն` այդ թվում դրանք չեն հանդիսանում նաև ենթաօրենսդրական իրավական ակտեր և դրանց հետ կապված խնդիրները չեն լուծվում վերոհիշյալ օրենքներվ:
Այսպես` ՀՀ նախագահի 2002 թվականի մարտի 16-ի ՆՀ-1064 հրամանագրով հաստատված ՀՀ կառավարության գործունեության կարգի 12-րդ կետում ուղղակի նշվում է, որ օրենսդրական և ենթաօրենսդրական լուծում չպահանջող հարցերը Կառավարության քննարկմանն են ներկայացվում հաշվետվությունների, զեկուցագրերի, առաջարկությունների և գործնականում ընդունված, օրենսդրության պահանջներին չհակասող այլ ձևերով, որոնք ենթակա չեն սույն կարգով նախատեսված համաձայնեցման, եթե այլ բան չի բխում նշված փաստաթղթերի հիմքը հանդիսացող հանձնարարականներից: Նման դեպքերում, ինչպես նաև նույն կետի «ա», «բ» և «դ» ենթակետերով նախատեսված դեպքերում Կառավարությունն ընդունում է արձանագրային որոշում:
Նույնը սահմանված է ՀՀ Նախագահի 2007 թվականի հուլիսի 18-ի ՆՀ-174-Ն հրամանագրով սահմանված կարգի 32-րդ կետում:
Հետևաբար, այդ արձանագրային որոշումները ոչ միայն չեն հակասել ավելի բարձր իրավական ակտերին, այլ ուղղակի բխել են այդ իրավական ակտերից: Այս առումով ՀՀ կառավարության արձանագրային որոշումները չեն կարող ճանաչվել անվավեր «Նորմատիվ իրավական ակտերի մասին» Հայաստանի Հանրապետության օրենքի 38-րդ հոդվածի համաձայն: |