ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
28 հոկտեմբերի 2021 թվականի N 1755-Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ «ԿՈՇ» ԵՎ «ՀՐԱԶԴԱՆ» ՔՐԵԱԿԱՏԱՐՈՂԱԿԱՆ ՀԻՄՆԱՐԿՆԵՐԻ ԳՈՐԾՈՒՆԵՈՒԹՅՈՒՆԸ ԴԱԴԱՐԵՑՆԵԼՈՒ ՄԱՍԻՆ
Հիմք ընդունելով «Քրեակատարողական ծառայության մասին» օրենքի 7-րդ հոդվածի 3-րդ և 43-րդ հոդվածի 1-ին մասերը` Հայաստանի Հանրապետության կառավարությունը որոշում է.
1. 2022 թվականի հունվարի 1-ից դադարեցնել Հայաստանի Հանրապետության արդարադատության նախարարության «Կոշ» և «Հրազդան» քրեակատարողական հիմնարկների (այսուհետ` հիմնարկներ) գործունեությունը:
2. Հայաստանի Հանրապետության արդարադատության նախարարին`
1) սույն որոշումն ուժի մեջ մտնելուց հետո տասնօրյա ժամկետում ապահովել հիմնարկների գործունեության դադարեցման աշխատանքներն իրականացնելու նպատակով հանձնաժողովի ստեղծումը.
2) սույն որոշման 2-րդ կետի 1-ին ենթակետով նախատեսված հանձնաժողովի ստեղծումից հետո մեկամսյա ժամկետում ներկայացնել առաջարկություններ հիմնարկների համապատասխան փաստաթղթերի, անշարժ և շարժական գույքի հանձնման-ընդունման, ինչպես նաև տնօրինման և հետագա պահպանության մասին.
3) սույն որոշումն ուժի մեջ մտնելուց հետո երկամսյա ժամկետում կրճատել Հայաստանի Հանրապետության արդարադատության նախարարության «Կոշ» քրեակատարողական հիմնարկի հաստիքային միավորները և ըստ անհրաժեշտության դրանք վերաբաշխել Հայաստանի Հանրապետության արդարադատության նախարարության այլ քրեակատարողական հիմնարկների և Հայաստանի Հանրապետության արդարադատության նախարարության պրոբացիայի ծառայության միջև, իսկ Հայաստանի Հանրապետության արդարադատության նախարարության «Կոշ» քրեակատարողական հիմնարկի գործունեության դադարեցման արդյունքում զբաղեցրած պաշտոնից ազատված ծառայողներին (աշխատակիցներին) օրենքով սահմանված դեպքերում և կարգով գրանցել կադրերի համապատասխան ռեզերվում.
4) սույն որոշումն ուժի մեջ մտնելուց հետո երկամսյա ժամկետում կրճատել Հայաստանի Հանրապետության արդարադատության նախարարության «Հրազդան» քրեակատարողական հիմնարկի հաստիքային միավորները և վերջինիս գործունեության դադարեցման արդյունքում զբաղեցրած պաշտոնից ազատված ծառայողներին (աշխատակիցներին) օրենքով սահմանված դեպքերում և կարգով գրանցել կադրերի համապատասխան ռեզերվում.
5) սույն որոշումն ուժի մեջ մտնելուց հետո երկամսյա ժամկետում կրճատել հիմնարկներում տեղակայված` «Քրեակատարողական բժշկության կենտրոն» պետական ոչ առևտրային կազմակերպության` բժշկական ստորաբաժանման հաստիքները և դրանք հատկացնել «Քրեակատարողական բժշկության կենտրոն» պետական ոչ առևտրային կազմակերպության` Հայաստանի Հանրապետության արդարադատության նախարարության «Արմավիր» քրեակատարողական հիմնարկում տեղակայված ստորաբաժանմանը.
6) մինչև 2022 թվականի հունվարի 1-ն ապահովել հիմնարկներում`
ա. պատիժ կրող դատապարտյալների տեղաբաշխումն այլ քրեակատարողական հիմնարկներ` ըստ վերջիններիս մեկուսացվածության աստիճանի, և
բ. պահվող կալանավորված անձանց տեղափոխումն այլ քրեակատարողական հիմնարկներ:
3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
Հայաստանի Հանրապետության
վարչապետ Ն. Փաշինյան
2021 թ. հոկտեմբերի 28
Երևան
Պաշտոնական հրապարակման օրը` 28 հոկտեմբերի 2021 թվական: