ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌՈՂՋԱՊԱՀՈՒԹՅԱՆ ՆԱԽԱՐԱՐ
ՀՐԱՄԱՆ
8 նոյեմբերի 2021 թվականի N 4305-Լ
ԿՈՐՈՆԱՎԻՐՈՒՍԱՅԻՆ ՀԻՎԱՆԴՈՒԹՅԱՆ (COVID-19) ԴԵՄ ԻՐԱԿԱՆԱՑՎՈՂ ՊԱՏՎԱՍՏՈՒՄՆԵՐԻ ԳՐԱՆՑՄԱՆ «ԱՐՄԵԴ» ԷԼԵԿՏՐՈՆԱՅԻՆ ԱՌՈՂՋԱՊԱՀՈՒԹՅԱՆ ՀԱՄԱԿԱՐԳՈՒՄ «ՇԱՐԺԱԿԱՆ ՊԱՏՎԱՍՏՈՒՄԱՅԻՆ ԿԵՏ» ՆՈՐ ԲԱԺՆԻ ԼՐԱՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
Հիմք ընդունելով Առողջապահության նախարարի 2020 թվականի օգոստոսի 17-ի թիվ 21-Ն հրամանի հավելվածի 65-րդ կետը, ղեկավարվելով Հայաստանի Հանրապետության վարչապետի 2018 թվականի հունիսի 11-ի թիվ 728-Լ որոշման հավելվածով հաստատված Հայաստանի Հանրապետության առողջապահության նախարարության կանոնադրության 18-րդ կետի 20-րդ ենթակետով, ինչպես նաև կորոնավիրուսային հիվանդության (COVID-19) դեմ իրականացված պատվաստումների վերաբերյալ տեղեկատվության մուտքագրման գործընթացի կանոնակարգման նպատակով.
ՀՐԱՄԱՅՈՒՄ ԵՄ
1. Հաստատել`
1) Կորոնավիրուսային հիվանդության (COVID-19) դեմ իրականացվող պատվաստումների գրանցման «Արմեդ» էլեկտրոնային առողջապահության համակարգում «Շարժական պատվաստումային կետ» նոր բաժնի լրացման կարգը` համաձայն հավելվածի:
2. Առաջարկել «էլեկտրոնային առողջապահության ազգային օպերատոր» փակ բաժնետիրական ընկերության տնօրեն Ավետ Մանուկյանին (համաձայնությամբ)` ապահովել.
1) Կորոնավիրուսային հիվանդության (COVID-19) դեմ իրականացվող պատվաստումների գրանցման «Արմեդ» էլեկտրոնային առողջապահության համակարգում «Շարժական պատվաստումային կետ» նոր բաժնի գործարկումը` համաձայն հավելվածի:
3. Առաջարկել մարզպետարանների գլխավոր քարտուղարներին, Երևանի քաղաքապետարանի աշխատակազմի քարտուղար Դավիթ Համբարյանին, բժշկական օգնություն և սպասարկում իրականացնող կազմակերպությունների ղեկավարներին (համաձայնությամբ)` ապահովել
1) Կորոնավիրուսային հիվանդության (COVID-19) դեմ իրականացվող պատվաստումների գրանցման «Արմեդ» էլեկտրոնային առողջապահության համակարգում «Շարժական պատվաստումային կետ» նոր բաժնի լրացումը` համաձայն հավելվածի:
4. Առողջապահության նախարարության հասարակայնության հետ կապերի բաժնի պետ Լիլիթ Բաբախանյանին` ապահովել.
1) Սույն հրամանի տեղադրումը Առողջապահության նախարարության պաշտոնական կայքում:
5. Սույն հրամանն ուժի մեջ է մտնում հրապարակմանը հաջորդող օրվանից:
6. Սույն հրամանի կատարման հսկողությունը հանձնարարել Առողջապահության նախարարի առաջին տեղակալ Լենա Նանուշյանին:
Ա. ԱՎԱՆԵՍՅԱՆ
Հավելված
Առողջապահության նախարարի
2021 թվականի նոյեմբերի 8-ի
N 4305-Լ հրամանի
ԿԱՐԳ
ԿՈՐՈՆԱՎԻՐՈՒՍԱՅԻՆ ՀԻՎԱՆԴՈՒԹՅԱՆ (COVID-19) ԴԵՄ ԻՐԱԿԱՆԱՑՎՈՂ ՊԱՏՎԱՍՏՈՒՄՆԵՐԻ ԳՐԱՆՑՄԱՆ «ԱՐՄԵԴ» ԷԼԵԿՏՐՈՆԱՅԻՆ ԱՌՈՂՋԱՊԱՀՈՒԹՅԱՆ ՀԱՄԱԿԱՐԳՈՒՄ «ՇԱՐԺԱԿԱՆ ՊԱՏՎԱՍՏՈՒՄԱՅԻՆ ԿԵՏ» ՆՈՐ ԲԱԺՆԻ ԼՐԱՑՄԱՆ
1. Բժշկական օգնություն և սպասարկում իրականացնող կազմակերպություններում էլեկտրոնային առողջապահության «Արմեդ» համակարգում ստեղծվում է «Շարժական պատվաստումային կետ» անվանմամբ նոր բաժին` շարժական պատվաստումային կետերում իրականացված պատվաստումների մասին տվյալների մուտքագրման նպատակով:
2. Բժշկական օգնություն և սպասարկում իրականացնող կազմակերպությունների պատվաստումային շարժական կետերում կորոնավիրուսային հիվանդության դեմ պատվաստումային գործընթաց իրականացնող բուժաշխատողները կատարված պատվաստումների մասին տվյալները մուտքագրում են էլեկտրոնային առողջապահության «Արմեդ» համակարգ:
3. «Շարժական պատվաստումային կետ» նոր բաժնում ավելացվում են շարժական պատվաստումային գործընթացում ներգրավված բոլոր բուժաշխատողների տվյալները (բժիշկներ, բուժքույրեր):
4. Շարժական պատվաստումային կետում կատարված պատվաստումների մասին տեղեկատվությունը մուտքագրվում է Էլեկտրոնային առողջապահության «Արմեդ» համակարգում «Շարժական պատվաստումային կետ» նոր բաժնում` համակարգում մուտքագրում իրականացնող անձնակազմի (բժիշկներ, բուժքույրեր, մուտքագրող օպերատորներ) կողմից: