ՀԱՄԱԽԱՌՆ ԵԿԱՄՏԻՑ ՆՎԱԶԵՑՎՈՂ ԾԱԽՍԵՐԻ ՎԵՐԱԲԵՐՅԱԼ

https://petekamutner.am/shared/Information/Irazekum%20292.pdf

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ
ԻՐԱԶԵԿՄԱՆ ԹԵՐԹԻԿ

20 նոյեմբերի 2021 թվականի N 292

ՀԱՄԱԽԱՌՆ ԵԿԱՄՏԻՑ ՆՎԱԶԵՑՎՈՂ ԾԱԽՍԵՐԻ ՎԵՐԱԲԵՐՅԱԼ

Հարց

Կազմակերպությունը կատարել է ներկայացուցչական ծախսեր, որոնք հիմնավորված են հաշվարկային փաստաթղթերով (ՀԴՄ, հարկային հաշիվ/հաշիվ վավերագիր): Արդյո՞ք վերոնշյալ փաստաթղթերի առկայությունը բավարար է կատարված ծախսերը ներկայացուցչական համարելու համար:

Կազմակերպությունը կատարում է տրանսպորտային միջոցների ընթացիկ սպասարկման (մասնավորապես` վառելիք, յուղ, ավտոլվացում և այլն) ծախսեր, որոնք հարկային տարվա ընթացքում հնարավոր է գերազանցեն ՀՀ հարկային օրենսգրքով սահմանված սահմանաչափերը: Արդյո՞ք նման ծախսերը ևս պետք է համարվեն կապիտալ ծախսեր և շահութահարկի հաշվարկման նպատակով նվազեցվեն ՀՀ հարկային օրենսգրքի 121-րդ հոդվածում նշված կարգով:

Պատասխան

1. ՀՀ հարկային օրենսգրքի`

- 111-րդ հոդվածի 1-ին և 2-րդ մասերի համաձայն` ռեզիդենտ շահութահարկ վճարողի և մշտական հաստատության միջոցով ՀՀ-ում գործունեություն իրականացնող ոչ ռեզիդենտ շահութահարկ վճարողի հարկման բազան որոշելիս համախառն եկամտից նվազեցվում են շահութահարկ վճարողի կատարած` օրենսգրքի 55-րդ հոդվածի 2-րդ մասի 1-5-րդ կետերով, ինչպես նաև նույն հոդվածի 11-13-րդ մասերով սահմանված փաստաթղթերով հիմնավորված ծախսերը, եթե նույն հոդվածի 2-րդ մասով և օրենսգրքի 113-րդ հոդվածով այլ բան սահմանված չէ (1-ին մաս): Անկախ նույն հոդվածի 1-ին մասի դրույթներից` ռեզիդենտ շահութահարկ վճարողի և մշտական հաստատության միջոցով ՀՀ-ում գործունեություն իրականացնող ոչ ռեզիդենտ շահութահարկ վճարողի հարկման բազան որոշելիս թույլատրվում է առանց փաստաթղթերով հիմնավորման համախառն եկամտից նվազեցնել օրենսգրքի 117-րդ հոդվածով սահմանված չափը չգերազանցող օրապահիկի, ինչպես նաև դաշտային պայմաններում և տեղափոխման (տեղաշարժման) աշխատանքների կատարման դեպքում` Կառավարության սահմանած չափը չգերազանցող չափով տրվող հատուցման գումարները,

- 116-րդ հոդվածի 1-ին մասի համաձայն` ռեզիդենտ շահութահարկ վճարողի և մշտական հաստատության միջոցով ՀՀ-ում գործունեություն իրականացնող ոչ ռեզիդենտ շահութահարկ վճարողի հարկման բազան որոշելիս համախառն եկամտից չի նվազեցվում ներկայացուցչական ծախսերի այն մասը, որը գերազանցում է հարկային տարվա համախառն եկամտի 0.5%-ը կամ հինգ միլիոն դրամը, բացառությամբ նույն հոդվածի 2-րդ մասով սահմանված դեպքերի,

- 116-րդ հոդվածի 3-րդ մասի համաձայն` նույն հոդվածի կիրառության իմաստով` ներկայացուցչական ծախսեր են համարվում այլ կազմակերպությունների և ֆիզիկական անձանց հետ փոխշահավետ համագործակցություն հաստատելու և (կամ) այն պահպանելու նպատակով կատարվող ծախսերը:

Հաշվի առնելով վերը նշվածը` հայտնում ենք, որ շահութահարկով հարկման բազան որոշելու նպատակով համախառն եկամտից նվազեցվում են շահութահարկ վճարողի կատարած` օրենսգրքի 55-րդ հոդվածի 2-րդ մասի 1-5-րդ կետերով, ինչպես նաև նույն հոդվածի 11-13-րդ մասերով սահմանված փաստաթղթերով հիմնավորված ներկայացուցչական ծախսերը` օրենսգրքի 116-րդ հոդվածով սահմանված չափերի շրջանակներում: Ընդ որում, ներկայացուցչական ծախսեր են համարվում այլ կազմակերպությունների և ֆիզիկական անձանց հետ փոխշահավետ համագործակցություն հաստատելու, այն պահպանելու նպատակով կատարվող ծախսերը:

2. ՀՀ հարկային օրենսգրքի 121-րդ հոդվածի 3-րդ մասի 1-ին կետի համաձայն` ռեզիդենտ շահութահարկ վճարողի և մշտական հաստատության միջոցով ՀՀ-ում գործունեություն իրականացնող ոչ ռեզիդենտ շահութահարկ վճարողի հարկման բազայի որոշման նպատակով համախառն եկամտից նվազեցվում են հիմնական միջոցների և ոչ նյութական ակտիվների (այդ թվում` գործառնական վարձակալությամբ կամ լիզինգով (տարատեսակներով) կամ անհատույց օգտագործմամբ վերցված) վրա կատարված կապիտալ բնույթի ծախսերը` նույն կետի «ա»-»գ» ենթակետերով սահմանված կարգով: Նույն կետի կիրառության իմաստով` հիմնական միջոցի և ոչ նյութական ակտիվի վրա կատարված ծախսը համարվում է կապիտալ բնույթի ծախս, եթե այն գերազանցում է տվյալ հիմնական միջոցի և ոչ նյութական ակտիվի սկզբնական արժեքի (օրենքով սահմանված կարգով իրականացված վերագնահատման դեպքում` վերագնահատված արժեքի) 5%-ը, կամ եթե հարկային տարվա ընթացքում հիմնական միջոցի և ոչ նյութական ակտիվի վրա կատարված` հիմնական միջոցի և ոչ նյութական ակտիվի սկզբնական արժեքի (օրենքով սահմանված կարգով իրականացված վերագնահատման դեպքում` վերագնահատված արժեքի) 5%-ը չգերազանցող առանձին ծախսերի հանրագումարը գերազանցում է տվյալ հիմնական միջոցի և ոչ նյութական ակտիվի սկզբնական արժեքի (օրենքով սահմանված կարգով իրականացված վերագնահատման դեպքում` վերագնահատված արժեքի) 15%-ը` այդ չափը գերազանցող մասով:

Հաշվի առնելով վերը նշվածը` հայտնում ենք, որ միայն հիմնական միջոցների և ոչ նյութական ակտիվների վրա կատարված ծախսերն են դասակարգվում ըստ ընթացիկ և կապիտալ բնույթի: Մնացած այլ ծախսերը` անկախ հիմնական միջոցի հետ կապված լինելու հանգամանքից (տվյալ դեպքում` վառելիք, յուղ, ավտոլվացում) վերագրվում են ապրանքների արտադրության, աշխատանքների կատարման և (կամ) ծառայությունների մատուցման հետ անմիջականորեն կապված ծախսերին կամ վարչական ծախսերին:

ՀՀ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ