040.0730.091100
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«9» նոյեմբերի 2000 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
9 նոյեմբերի 2000 թվականի N 730
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆՆ ԱՌԸՆԹԵՐ ՄԻԳՐԱՑԻԱՅԻ ԵՎ ՓԱԽՍՏԱԿԱՆՆԵՐԻ ՎԱՐՉՈՒԹՅԱՆՆ ԱՆԱՎԱՐՏ ՇԻՆԱՐԱՐՈՒԹՅԱՆ ՕԲՅԵԿՏ ՀԱՆՁՆԵԼՈՒ ՄԱՍԻՆ
Հայաստանի Հանրապետության հանգրվանած փախստական ընտանիքների բնակարանային հիմնախնդիրները լուծելու նպատակով Հայաստանի Հանրապետության կառավարությունը որոշում է.
1. Երևանի քաղաքապետարանի տնօրինության «Երքաղգործկոմի պրոֆտեխնիկական ուսումնարան Նուբարաշենում» անավարտ շինարարության օբյեկտը (14212000 դրամ հաշվեկշռային արժեքով) հանձնել Հայաստանի Հանրապետության կառավարությանն առընթեր միգրացիայի և փախստականների վարչության տնօրինությանը` այն որպես բնակելի շենք վերակառուցելու համար:
2. Նշված օբյեկտի վերակառուցման ավարտից հետո բնակելի մակերեսի 90 տոկոսը, որպես բնակարաններ, սահմանված կարգով հատկացնել Երևան քաղաքի վթարային շենքերում, ինչպես նաև ժամանակավոր կացարաններում բնակվող փախստական ընտանիքներին, իսկ մնացած 10 տոկոսը սահմանված կարգով անհատույց, սեփականության իրավունքով հանձնել Երևանի Նուբարաշեն թաղային համայնքին:
3. Երևանի քաղաքապետին ու Հայաստանի Հանրապետության կառավարությանն առընթեր միգրացիայի և փախստականների վարչությանը` մեկամսյա ժամկետում ապահովել նշված անավարտ շինարարության օբյեկտի սահմանված կարգով հանձնման-ընդունման աշխատանքների կատարումը և գույքային իրավունքների պետական գրանցումը:
4. Սույն որոշումն ուժի մեջ է մտնում 2000 թվականի նոյեմբերի 9-ից: