040.0799.051200
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«5» դեկտեմբերի 2000 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
5 դեկտեմբերի 2000 թվականի N 799
«ՀԱՅԱՍՏԱՆԻ ԱԶԳԱՅԻՆ ՍԿԱՈՒՏԱԿԱՆ ՇԱՐԺՈՒՄ» ՀԱՍԱՐԱԿԱԿԱՆ ԿԱԶՄԱԿԵՐՊՈՒԹՅԱՆԸ ՍԵՓԱԿԱՆՈՒԹՅԱՆ ԻՐԱՎՈՒՆՔՈՎ ԱՆՀԱՏՈՒՅՑ ՀԱՆԳՍՏՅԱՆ ՏՈՒՆ ՀԱՆՁՆԵԼՈՒ ՄԱՍԻՆ
Հայաստանի Հանրապետությունում պատանիների շրջանում տարվող դաստիարակչական աշխատանքների բարելավման ու մանկապատանեկան զբոսաշրջության զարգացման նպատակով և Հայաստանի Հանրապետության քաղաքացիական օրենսգրքի 605 հոդվածին համապատասխան` Հայաստանի Հանրապետության կառավարությունը որոշում է.
1. «Ոռոգում» փակ բաժնետիրական ընկերության գույքի կազմից Հայաստանի Հանրապետության օրենսդրությամբ սահմանված կարգով առանձնացնել Արագածոտնի մարզի Բյուրականի հանգստյան տունը` 4022 հազ. դրամ հաշվեկշռային արժեքով, և, իբրև Հայաստանի Հանրապետության սեփականություն, սեփականության իրավունքով անհատույց հանձնել «Հայաստանի ազգային սկաուտական շարժում» հասարակական կազմակերպությանը:
2. Հայաստանի Հանրապետության գյուղատնտեսության նախարարությանը` մեկամսյա ժամկետում ապահովել Հայաստանի Հանրապետության անունից «Հայաստանի ազգային սկաուտական շարժում» հասարակական կազմակերպության հետ նշված հանգստյան տան նվիրաբերության պայմանագրի սահմանված կարգով կնքումը և գույքային իրավունքների պետական գրանցումը:
3. Արագածոտնի մարզպետին` մեկամսյա ժամկետում ապահովել անհրաժեշտ հողամասի` սահմանված կարգով ձևակերպումը:
4. Սույն որոշումն ուժի մեջ է մտնում 2000 թվականի դեկտեմբերի 5-ից: