050.0296.211100
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ
ՈՐՈՇՈՒՄ
21 նոյեմբերի 2000 թվականի թիվ 296
«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿՈՒՄ ՀԱՏՈՒԿ ՀԱՇՎԱՌՄԱՆ ՓԱՍՏԱԹՂԹԵՐԻ (ԱՆԴՈՐՐԱԳՐԵՐԻ) ՀԱՇՎԱՌՄԱՆ ԿԱՐԳԸ» ՀԱՍՏԱՏԵԼՈՒ ՄԱՍԻՆ
Ղեկավարվելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի «ե» կետի դրույթներով` Հայաստանի Հանրապետության կենտրոնական բանկի խորհուրդը որոշում է.
1. Հաստատել «Հայաստանի Հանրապետության կենտրոնական բանկում հատուկ հաշվառման փաստաթղթերի (անդորրագրերի) հաշվառման կարգը» (կցվում է):
2. Հանձնարարել Հայաստանի Հանրապետության կենտրոնական բանկի հաշվապահական հաշվառման վարչությանը` սույն որոշման 1-ին կետով հաստատված «Հայաստանի Հանրապետության կենտրոնական բանկում հատուկ հաշվառման փաստաթղթերի (անդորրագրերի) հաշվառման կարգը» ընդգրկել «Հայաստանի Հանրապետության կենտրոնական բանկի ծախսերի նախահաշվի և կապիտալ ներդրումների ծրագրի կազմումը, կատարումը և վերահսկումը» ձեռնարկի նախագծի հավելվածներում:
3. Սույն որոշումն ուժի մեջ է մտնում ընդունման պահից:
Հաստատված է
ՀՀ կենտրոնական բանկի խորհրդի
2000 թ. նոյեմբերի 21-ի թիվ 296 որոշմամբ
ԿԱՐԳ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿՈՒՄ ՀԱՏՈՒԿ ՀԱՇՎԱՌՄԱՆ ՓԱՍՏԱԹՂԹԵՐԻ (ԱՆԴՈՐՐԱԳՐԵՐԻ) ՀԱՇՎԱՌՄԱՆ
Կանոն 1. Կարգավորման առարկան
Սույն կարգը կարգավորում է ՀՀ կենտրոնական բանկի կողմից անդորրագրերի ձեռքբերման, տրամադրման և հաշվառման գործընթացը:
Կանոն 2. Հիմնական հասկացությունները
Անդորրագրեր - ՀՀ կենտրոնական բանկի խորհրդի 1999 թ. նոյեմբերի 12-ի թիվ 183 որոշման համաձայն բանկերին, արտարժույթի փոխանակման կետերին, արժութային դիլերներին տրամադրվող անդորրագրերը
Կենտրոնական բանկ - ՀՀ կենտրոնական բանկ
Բանկային գործառնությունների բաժին - Կենտրոնական բանկի հաշվապահական հաշվառման վարչության բանկային գործառնությունների բաժին
Լիցենզավորման և բանկային ռեգիստրի բաժին - Կենտրոնական բանկի բանկային վերահսկողության դեպարտամենտի լիցենզավորման և բանկային ռեգիստրի բաժին
Դրամարկղային գործառնությունների բաժին - Կենտրոնական բանկի էմիսիոն գործառնությունների և դրամական պահուստների վարչության դրամարկղային գործառնությունների բաժին
Դիլեր - Կենտրոնական բանկի կողմից լիցենզավորված բանկ, արժութային դիլեր, արտարժույթի փոխանակման կետ
Լիազորված անձ - Դիլերի կողմից անդորրագրերի գրքույկը ստանալու համար լիազորված անձ
Կանոն 3. Անդորրագրերի ձեռքբերումը և հաշվառումը
3.1. Կենտրոնական բանկը անդորրագրերը կանխավճարով ձեռք բերելու դեպքում մատակարար կազմակերպությանը փոխանցվող կանխավճարի գումարները հաշվառում է Կենտրոնական բանկի հաշվեկշռի 2611 «Արտաքին դեբիտորներ ռեզիդենտների գծով ՀՀ դրամով» և 2621 «Արտաքին դեբիտորներ ռեզիդենտների գծով արտարժույթով» հաշիվներում:
3.2. Անդորրագրերը մատակարար կազմակերպություններից ստացվում են համարակալված և յուրաքանչյուր հարյուրական թերթերով կարված, լարանցված վիճակում:
3.3. Անդորրագրերի գրքույկները ստանալիս, 2611 և 2621 հաշիվներում հաշվառվող կանխավճարի գումարները դուրս են գրվում ծախսերի 7691 «Այլ ծախսեր» հաշվին` անդորրագրերը հաշվառելով արտահաշվեկշռային 9901 «Տարբեր արժեքներ և փաստաթղթեր» հաշվում (հաշվառումը տարվում է հատերով):
3.4. Ստացված անդորրագրերի գրքույկները մուտքագրվում են Կենտրոնական բանկի շրջանառու դրամապահոց:
Կանոն 4. Անդորրագրերի տրամադրումը
4.1. Լիցենզավորման և բանկային ռեգիստրի բաժինը բանկային գործառնությունների բաժին է ներկայացնում դիլերների վերաբերյալ տեղեկանք: Տեղեկանքը ներկայացվում է դիլերների ցանկում յուրաքանչյուր փոփոխության դեպքում:
4.2. Դիլերը անդորրագրերի գրքույկը ստանալու նպատակով բանկային գործառնությունների բաժին է ներկայացնում 3 օրինակից հայտ (կցվում է) և տվյալ դիլերի կողմից լիազորված անձին տրված լիազորագիր:
4.3. Բանկային գործառնությունների բաժնի համապատասխան աշխատակիցը անդորրագրերի գրքույկը տրամադրում է այն դեպքում, երբ տեղեկանքում առկա է դիլերի անվանումը կամ անունը: Հայտը բավարարվում է ըստ պահանջի` երեք աշխատանքային օրվա ընթացքում:
4.4. Բանկային գործառնությունների բաժնի համապատասխան աշխատակիցը ստացված հայտի 3 օրինակները տրամադրում է դրամարկղի պատասխանատու աշխատակցին: Վերջինս ներկայացված հայտին համապատասխան քանակի անդորրագրերի գրքույկների դարձերեսին դնում է «ՀՀ կենտրոնական բանկի էմիսիոն գործառնությունների և դրամական պահուստների վարչություն» դրոշմակնիքը և հայտի 3 օրինակների վրա գրում տրամադրվող անդորրագրերի գրքույկների համարները: Հայտի մեկ օրինակը պահվում է դրամապահոցում, իսկ մյուս երկու օրինակները դրամարկղային գործառնությունների բաժնի պատասխանատու աշխատակիցը վերադարձնում է բանկային գործառնությունների բաժնի համապատասխան աշխատակցին:
4.5. Բանկային գործառնությունների բաժնի համապատասխան աշխատակիցը դրամարկղային գործառնությունների բաժնի աշխատակցից ստացված հայտի հիման վրա հատուկ գրանցամատյանում գրանցում է հետևյալ տվյալները`
- անդորրագրերի գրքույկի տրամադրման ամսաթիվը,
- անդորրագրերի գրքույկը ստացողի անվանումը/անունը, հասցեն և այլն,
- անդորրագրերի գրքույկի համարը:
4.6. Դիլերի կողմից լիազորված անձը ներկայանում է բանկային գործառնությունների բաժին: Բանկային գործառնությունների բաժնի աշխատակիցը ելքի գործարք է կատարում արտահաշվեկշռային 9901 «Տարբեր արժեքներ և փաստաթղթեր» հաշվից` ձևավորելով 3 օրինակից ելքի օրդեր: Բանկային գործառնությունների բաժնում կատարվում է ելքի գործարքի առաջին հաստատումը, որից հետո օրդերի մեկ օրինակը կարվում է բանկային գործառնությունների բաժնի կողմից գլխավոր հաշվապահական գրքում, իսկ երկու օրդերը հայտի մեկ օրինակի հետ տրամադրվում են դիլերին կամ դիլերի կողմից լիազորված անձին: Վերջինս օրդերի երկու օրինակները ներկայացնում է դրամարկղային գործառնությունների բաժնի հսկիչին: Դրամարկղային գործառնությունների բաժնի հսկիչը, ստանալով ելքի օրդերի օրինակները, կատարում է երկրորդ հաստատումը, որից հետո օրդերի մեկ օրինակը կարում է դրամարկղի գրքում, իսկ մյուս օրինակը` վերադարձնում լիազորված անձին, որի հիման վրա դրամարկղային գործառնությունների բաժնի համապատասխան աշխատակիցը անդորրագրերի գրքույկը հանձնում է դիլերին կամ դիլերի կողմից լիազորված անձին:
ՀԱՅՏ
1. Բանկերի, արժութային դիլերների, արտարժույթի փոխանակման կետերի անվանումը/անունը ---------------------------------------------------
--------------------------------------------------------------------
2. Լիցենզիայի N ------------------------------------------------
3. Անդորրագրերի գրքույկների քանակը -----------------------------
4. Լիազորված անձի ստորագրությունը ------------------------------
5. Տրամադրվող անդորրագրերի գրքույկների NN ----------------------
6. Դրամապահոցի աշխատակցի ստորագրությունը ----------------------