Սեղմել Esc փակելու համար:
ՀՀ ԷՆԵՐԳԱՀԱՄԱԿԱՐԳԻ ԷԼԵԿՏՐԱԷՆԵՐԳԻԱ ԲԱՇ...
Քարտային տվյալներ

Տեսակ
Գործում է
Ընդունող մարմին
Ընդունման ամսաթիվ
Համար

Վավերացման ամսաթիվ
ՈՒժի մեջ մտնելու ամսաթիվ
ՈՒժը կորցնելու ամսաթիվ
Ընդունման վայր
Սկզբնաղբյուր

Ժամանակագրական տարբերակ Փոփոխություն կատարող ակտ

Որոնում:
Բովանդակություն

Հղում իրավական ակտի ընտրված դրույթին X
irtek_logo

ՀՀ ԷՆԵՐԳԱՀԱՄԱԿԱՐԳԻ ԷԼԵԿՏՐԱԷՆԵՐԳԻԱ ԲԱՇԽՈՂ ՉՈՐՍ ԸՆԿԵՐՈՒԹՅԱՆ ԲԱԺՆԵՏՈՄՍԵՐԻ ՄԻՆՉԵՎ 20 ...

 

 

040.0795.041200

«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ

 

«4» դեկտեմբերի 2000 թ.

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

 

4 դեկտեմբերի 2000 թվականի N 795

 

i

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷՆԵՐԳԱՀԱՄԱԿԱՐԳԻ ԷԼԵԿՏՐԱԷՆԵՐԳԻԱ ԲԱՇԽՈՂ ՉՈՐՍ ԸՆԿԵՐՈՒԹՅԱՆ ԲԱԺՆԵՏՈՄՍԵՐԻ ՄԻՆՉԵՎ 20 ՏՈԿՈՍԻ ՈՒՂՂԱԿԻ ՎԱՃԱՌՔԻ ՎԵՐԱԲԵՐՅԱԼ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՈՒ ՎԵՐԱԿԱՌՈՒՑՄԱՆ ԵՎ ԶԱՐԳԱՑՄԱՆ ԵՎՐՈՊԱԿԱՆ ԲԱՆԿԻ ՄԻՋԵՎ ՍՏՈՐԱԳՐՎԵԼԻՔ ՊԱՅՄԱՆԱԳԻՐԸ ՀԱՍՏԱՏԵԼՈՒ ՄԱՍԻՆ

(1-ին մաս)

 

«Հայաստանի Հանրապետության պետական գույքի մասնավորեցման 1998-2000 թվականների ծրագրի մասին» Հայաստանի Հանրապետության օրենքում լրացում կատարելու և «Երևանի էլեկտրացանց», «Հյուսիսային էլեկտրացանց», «Հարավային էլեկտրացանց» և «Կենտրոնական էլեկտրացանց» փակ բաժնետիրական ընկերությունների մասնավորեցման մասին» Հայաստանի Հանրապետության օրենքի 6 հոդվածին և 7 հոդվածի «բ» ենթակետին համապատասխան` Հայաստանի Հանրապետության կառավարությունը որոշում է.

1. Հաստատել Հայաստանի Հանրապետության էներգահամակարգի էլեկտրաէներգիա բաշխող չորս ընկերության բաժնետոմսերի մինչև 20 տոկոսի ուղղակի վաճառքի վերաբերյալ Հայաստանի Հանրապետության կառավարության ու Վերակառուցման և զարգացման եվրոպական բանկի (ՎԶԵԲ) միջև ստորագրվելիք պայմանագիրը (կցվում է):

2. Լիազորել Հայաստանի Հանրապետության ֆինանսների և էկոնոմիկայի նախարար Վ. Խաչատրյանին, Հայաստանի Հանրապետության էներգետիկայի նախարար Կ. Գալուստյանին և Հայաստանի Հանրապետության արդարադատության նախարար Դ. Հարությունյանին Հայաստանի Հանրապետության կառավարության անունից ստորագրել սույն որոշմամբ հաստատված պայմանագիրը:

3. Սույն որոշումն ուժի մեջ է մտնում 2000 թվականի դեկտեմբերի 4-ից:

 

Հաստատված է

ՀՀ կառավարության 2000 թ.

դեկտեմբերի 4-ի N 795 որոշմամբ

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ԵՎ ՎԵՐԱԿԱՌՈՒՑՄԱՆ ԵՎ ԶԱՐԳԱՑՄԱՆ ԵՎՐՈՊԱԿԱՆ ԲԱՆԿ ՈՒՂՂԱԿԻ ՎԱՃԱՌՔԻ ՊԱՅՄԱՆԱԳԻՐ

 

նոյեմբեր 2000 թ.

 

ԲՈՎԱՆԴԱԿՈՒԹՅՈՒՆ

 

1. ՍԱՀՄԱՆՈՒՄՆԵՐ ԵՎ ՄԵԿՆԱԲԱՆՈՒԹՅՈՒՆՆԵՐ 2. ԳՆՎԵԼԻՔ ԲԱԺՆԵՏՈՄՍԵՐԻ ՎԱՃԱՌՔ ՈՒ ԳՆՈՒՄ ԵՎ ԵԶՐԱՓԱԿՈՒՄ 3. ՆԱԽԱՊԱՅՄԱՆՆԵՐ 4. ԴԱԴԱՐԵՑՄԱՆ ՀԱՆԳԱՄԱՆՔՆԵՐ 5. ՆԵՐԿԱՅԱՑՈՒՄՆԵՐ ԵՎ ԵՐԱՇԽԻՔՆԵՐ 6. ՀԱՎԱՍՏԻԱՑՈՒՄՆԵՐ ՀՀ ԿԱՌԱՎԱՐՈՒԹՅԱՆ ԿՈՂՄԻՑ 7. ԾԱՆՈՒՑՈՒՄՆԵՐ 8. ԿԱՐԳԱՎՈՐՈՂ ՕՐԵՆՍԴՐՈՒԹՅՈՒՆԸ ԵՎ ՎԵՃԵՐԻ ԼՈՒԾՈՒՄ 9. ԶԱՆԱԶԱՆ

Աղյուսակ 3.1 «Նախապայմանները գոհացնող ստացվելիք փաստաթղթերի ցուցակ»

Աղյուսակ 3.2. «Ծրագրային պայմանագրերից յուրաքանչյուրի հիմնական

դրույթները»

Աղյուսակ 3.2-ի Հավելված 1

Աղյուսակ 3.3. «Բանկի ետվաճառքի յուրաքանչյուր պայմանագրի հիմնական

դրույթները»

Աղյուսակ 5.1. Երաշխիքներ

 

ՈՒՂՂԱԿԻ ՎԱՃԱՌՔԻ ՊԱՅՄԱՆԱԳԻՐ (սույն «Պայմանագիրը») կնքված 5 դեկտեմբերի

2000 թ.

 

(1) ԶԱՐԳԱՑՄԱՆ ԵՎ ՎԵՐԱԿԱՌՈՒՑՄԱՆ ԵՎՐՈՊԱԿԱՆ ԲԱՆԿԻ («Բանկ»)`

միջազգային ֆինանսական կազմակերպություն, որը ստեղծվել է Զարգացման

և վերակառուցման եվրոպական բանկի Հիմնադրման Պայմանագրով`

ստորագրված 1990 թ. մայիսի 29-ին Փարիզում և, որի գործունեության

գլխավոր հասցեն է Ուան Էքսչեյնջ Սքուեր, Լոնդոն EC 2A 2 JN, Միացյալ

Թագավորություն,

և

 

(2) ՀԱՅԱՍՏԱՆԻ ԿԱՌԱՎԱՐՈՒԹՅԱՆ («ՀԿ»), որը ներկայացնում է Հայաստանի

Հանրապետությունը, գործելով լիազորված ներկայացուցիչների`

էներգետիկայի նախարարի, Ֆինանսների և Էկոնոմիկայի նախարարի և

Արդարադատության նախարարի միջոցով: միջև:

 

ՔԱՆԶԻ

 

(A) ՀԿ-ն նպատակ ունի սեփականաշնորհել Հայաստանի 4 (չորս) էլեկտրաբաշխիչ

ընկերություններից յուրաքանչյուրը.

 

(i) Երևանի Էլեկտրացանց ՓԲԸ («ԵԲԸ»)

 

(ii) Հյուսիսային էլեկտրացանց ՓԲԸ («ՀսԲԸ»)

 

(iii) Հարավային էլեկտրացանց ՓԲԸ («ՀվԲԸ»)

 

(iv) Կենտրոնական էլեկտրացանց ՓԲԸ («ԿԲԸ»)

 

որոնցից յուրաքանչյուրը Հայաստանի Հանրապետության օրենքներին համաձայն

ստեղծված փակ բաժնետիրական ընկերություն է, և որոնցից յուրաքանչյուրը

ամբողջությամբ հանդիսանում է ՀՀ-ի սեփականությունը (այսուհետև միասին

«ԷԲԸ-ներ», իսկ առանձին առանձին «ԷԲԸ»):

 

(B) ՀԿ-ն ԷԲԸ-ները վաճառքի համար խմբավորել է երկու փաթեթներում

(յուրաքանչյուրը «Փաթեթ»), որոնցից մեկը ներառում է ԵԲԸ-ն և

ՀսԲԸ-ն, իսկ մյուսը ՀվԲԸ-ն և ԿԲԸ-ն, և մտադիր է վաճառել

յուրաքանչյուր Փաթեթի յուրաքանչյուր ԷԲԸ-ի բաժնետոմսերի առնվազն

51%-ը ռազմավարական ներդրողին («ՌՆ») յուրաքանչյուր Փաթեթի մեջ

ընդգրկված ԷԲԸ-ների համար հավասար բաժնեմասերով (այսուհետև այդ

վաճառքներից յուրաքանչյուրը անվանվում է «Սեփականաշնորհում», իսկ

ՌՆ-ին վաճառվող բաժնեմասը` «Սեփականաշնորհվող Փաթեթ»):

 

(C) Սույն Պայմանագրի դրույթների և պայմանների համաձայն, Բանկը

ցանկանում է ՀԿ-ից գնել, իսկ ՀԿ-ն ցանկանում է վաճառել Բանկին

յուրաքանչյուր ԷԲԸ-ի բաժնետոմսերի մինչև 19.90%-ը: Ուստի, Բանկը

և ՀԿ-ն ցանկանում են կնքել սույն Պայմանագիրը մինչև ԷԲԸ-ների

Սեփականաշնորհումը, որպեսզի նրանում արտահայտվեն այն պայմանները,

որոնցով Բանկը կգնի և ՀԿ-ն կվաճառի այդ բաժնետոմսերը,

յուրաքանչյուր Սեփականաշնորհման ավարտից հետո:

 

ՈՒՍՏԻ նկատի առնելով ներքևում նշված փոխադարձ հավաստիացումները և

համաձայնությունները, ինչպես նաև այլ նպաստավոր արժեքավոր

նկատառումները (որոնց ստացումը և համապատասխանությունը ճանաչվում է

սույնով) Կողմերը համաձայնվեցին հետևյալի մասին.

 

1. ՍԱՀՄԱՆՈՒՄՆԵՐ ԵՎ ՄԵԿՆԱԲԱՆՈՒԹՅՈՒՆՆԵՐ

 

1.1. Սահմանումներ: Սույն Պայմանագրում հետևյալ տերմինները ունեն

ներքևում բերված իմաստները.

 

«ԷՀ»

Հայաստանի էներգետիկայի հանձնաժողովը

 

«Հարակից Պայմանագրեր»

Յուրաքանչյուր ԷԲԸ-ի համար.

 

(i) ԷՀ-ի կողմից, Սեփականաշնորհման օրը կամ դրանից առաջ ԷԲԸ-ին

տրամադրված համապատասխան աշխարհագրական տարածքում

էլեկտրաէներգիա բաշխելու անժամկետ լիցենզիան

 

(ii) ԷԲԸ-ի Սեփականաշնորհման օրը ԷՀ-ի և ՌՆ-ի միջև կնքված

Սակագնային Պայմանագիրը և

 

(iii) վերևում նշված (i) և (ii) կետերի հետ կապված որևէ

պայմանագիր, ԷԲԸ-ներին վերաբերող, որոնք կազմում են

Սեփականաշնորհման Փաթեթի մաս:

 

«Թույլտվություններ»

Որևէ լիազոր մարմնի կողմից նպատակային գործողությամբ կամ

անգործությամբ տրված կամ որևէ լիազոր մարմնի հետ կնքված որևէ

համաձայնություն, գրանցում, փաստաթղթի ներկայացում, պայմանագիր,

նոտարական վավերացում, վկայական, լիցենզիա, հավանություն,

թույլտվություն, լիազորում կամ արտոնություն, որևէ որոշակի

ժամանակահատվածում, ինչպես նաև կորպորատիվ, պայմանագրային,

կրեդիտորների և բաժնետերերի բոլոր համաձայնությունները և

հավանությունները. «Լիազոր մարմին» նշանակում է ազգային, միջազգային,

տարածքային կամ տեղական բոլոր իշխանությունները կամ կառավարական,

վարչական, ֆիսկալ, դատական կամ կառավարության ենթակա բոլոր

մարմինները, բաժինները, հանձնաժողովները, իշխանությունները,

դատարանները, գործակալությունները կամ կազմակերպությունները, ինչպես

նաև կենտրոնական բանկի ֆունկցիաներ իրականացնող անձ կամ

կազմակերպություն, անկախ նրանից կառավարական է թե` ոչ, և ինչպես է

այն սահմանված կամ կոչվում:

 

«Աշխատանքային օր»

յուրաքանչյուր օր բացի շաբաթ, կիրակի օրերից և պաշտոնական տոներից,

երբ առևտրային բանկային գործարքները չեն կատարվում Լոնդոնում

(Միացյալ Թագավորություն) կամ Երևանում (Հայաստան):

 

«Կանոնադրություն»

յուրաքանչյուր ԷԲԸ-ի կանոնադրություն, իր ժամանակ առ ժամանակ

կատարվող փոփոխություններով և վերագրանցումներով:

 

«Վերահսկողություն»

որևէ անձի նկատմամբ - պայմանագրի միջոցով կամ որևէ այլ կերպ նշված

անձի կառավարման և գործունեության ծրագրերի ընդունման գործում

սեփականության իրավունքով, կամ քվեարկելու իրավունքով որոշումներ

ընդունելու կամ որոշումների ընդունումը հարկադրելու իրավունքի

ուղղակի կամ անուղղակի տիրապետումը:

 

«Հայտնման նամակ»

հայտնման նամակը իր հավելվածների հետ միասին, կատարված Եզրափակման

պահին ՀԿ-ի Բանկին տրվող Երաշխիքի առնչությամբ: Հայտնված նշանակում

է լրիվ, արդար և ճշգրիտ հայտնումը Հայտնման Նամակում (Հայտնումը

պետք է մեկնաբանվի համապատասխանաբար)

 

«Դոլար», «$» կամ «US$»

Ամերիկայի Միացյալ Նահանգների օրինական դրամական միավորը

 

«Դրամ» կամ «AMD»

Հայաստանի Հանրապետության օրինական դրամական միավորը

 

«Մարդկանց առողջության և շրջակա միջավայրի պահպանության օրենսդրություն»

Բնության պահպանության մասին ընդհանուր կանոնները և Հայաստանում

սույն Պայմանագրի կնքման պահին գործող և դրանից առաջ գործած բոլոր

այլ օրենքները և կանոնակարգերը, որոնք վերաբերվում են մարդկանց

առողջության և շրջակա միջավայրի պաշտպանությանը:

 

«Մարդկանց առողջության և շրջակա միջավայրի պահպանության լիցենզիա»

դրա վերաբերյալ որևէ հավանություն, լիցենզիա, համաձայնություն կամ

այլ Թույլտվություն, որը անհրաժեշտ է ԷԲԸ-ի գործունեությունը

իրականացնելու համար այնպես, ինչպես այն իրականացվել է սույն

Պայմանագրի կնքման պահին:

 

«Մանդատային Նամակ»

1999 թ. նոյեմբերի 3-ին Հայաստանի Հանրապետության և Բանկի միջև

կնքված Մանդատային Նամակը: Սույն Պայմանագրում «Ծախսեր» տերմինը

ունի այն նշանակությունը, որը դրան տրված է Մանդատային Նամակով:

 

«Էական պայմանագրեր»

ցանկացած պայմանագիր համաձայն, որի կատարվում է տարեկան ավելի քան

$75,000 ծախս կամ ստացվում է ավելի քան $75,000 հասույթ, որի

կողմերից մեկը ԷԲԸ-ներից մեկն է:

 

«Առավելագույն Գումար»

ՀԿ-ի և Բանկի միջև առանձին նամակով («Առավելագույն Գումարի Նամակ»)

սահմանված գումար:

 

«Գործարքային Պայմանագրեր»

Սեփականաշնորհվող յուրաքանչյուր Փաթեթի համար.

 

(i) սույն Պայմանագիրը

 

(ii) Առավելագույն Գումարի Նամակը

 

(iii) Բանկի Եզրափակման համապատասխան Նամակ(ներ)ը,

 

(iv) Համապատասխան Ծրագրային Պայմանագիրը, և

 

(v) Բանկի Ետվաճառման համապատասխան Պայմանագիրը

 

«Երաշխիքներ»

Աղյուսակ 5.1-ում բերված ՀԿ-ի կողմից ներկայացումները և

երաշխիքները.

 

1.2. Մեկնաբանություն

 

1.2.1. Օրենսդրական ակտին որևէ ուղղակի կամ անուղղակի հղում

նշանակում է`

 

(a) այդ ակտը իր լրացումներով, անկախ այն բանից, թե դրանք

ընդունվել են սույն Պայմանագրի կնքումից առաջ, թե` հետո

 

(b) որևէ հրամանագիր, կանոնակարգ, հրաման կամ այլ

ենթաօրենսդրական ակտ, որը ընդունվել է (սույն Պայմանագրի

կնքումից առաջ կամ հետո) որևէ օրենսդրական ակտի համաձայն

կամ ի կատարումն դրա, ներառյալ պարբերություն (a)-ում

նշվածները

 

1.2.2. Որևէ փաստաթղթում որևէ կողմին հղումը ներառում է այդ կողմի

իրավահաջորդներին և իրավունքների արտոնված ստացողին:

 

1.2.3. բառերը, որոնք մատնանշում են անձի, ներառում են ֆիզիկական և

իրավաբանական անձինք, ընկերություններ և անձանց չգրանցված խմբեր,

նաև կառավարություններ, նախարարություններ և պետական այլ

գործակալություններ:

 

1.2.4. բառերը, որոնք օգտագործվում են եզակի թվով, ներառում են նաև

հոգնակի թիվը և հակառակը:

 

1.2.5. որևէ փաստաթղթի կամ պայմանագրի հղումը միայն փաստաթղթի ըմբռնումը

հեշտացնելու համար է և ներառում է հղում այդ փաստաթղթին կամ

պայմանագրին` ժամանակ առ ժամանակ կատարված փոփոխություններով և

լրացումներով հանդերձ, փոխարինված կամ փոխանցված վիճակում:

 

1.2.6. սույն Պայմանագրի վերնագրերը չեն ազդում սույն Պայմանագրի

մեկնաբանման վրա, որևէ հղում սույն «Պայմանագրին» նշանակում է

ամբողջ պայմանագիրը իր Հավելվածներով հանդերձ:

 

1.2.7. «Ֆինանսական տարի» նշանակում է օրացուցային տարին:

 

1.2.8. 1.2.1.-1.2.7. ենթաբաժինները կիրառելի են, եթե կողմերի հակառակ

մտադրություն չի երևում:

 

2. ԳՆՎԵԼԻՔ ԲԱԺՆԵՏՈՄՍԵՐԻ ՈՒՂՂԱԿԻ ՎԱՃԱՌՔՆ ՈՒ ԳՆՈՒՄԸ ԵՎ ԳՈՐԾԱՐՔԻ ԵԶՐԱՓԱԿՈՒՄԸ

 

2.1. Ընդհանուր: Որևէ Փաթեթի նկատմամբ 3-րդ կետում սահմանված

նախապայմանների բավարարման պայմանով, այդ Փաթեթի ԷԲԸ-ի

բաժնետոմսերի համար Բանկի Վճարման դիմաց Եզրափակման պահին ՀԿ-ն

կվաճառի և Բանկը կգնի Գնվելիք Բաժնետոմսերը (ինչպես սահմանված է

կետ 2.3.-ի (ii) մասում) ներառյալ գնվելիք բոլոր այդ

բաժնետոմսերի վերաբերվող իրավունքները:

Գնվելիք Բաժնետոմսերը կվաճառվեն կալանքներից, արգելանքներից և

երրորդ անձանց կողմից կիրառելի այլ պահանջներից զերծ:

 

2.2. Եզրափակման Ընթացակարգը

 

2.2.1. Սեփականաշնորհման Մասին Ծանուցում: ՀԿ-ն անմիջապես Բանկին

կծանուցի որևէ Փաթեթի նկատմամբ ՌՆ-ի հետ Առ ու վաճառքի

պայմանագրի կնքման մասին (այսուհետև «ՌՆ-ի Առ ու վաճառքի

պայմանագրի» «ՌՆ-ի ԱՎՊ»): Ծանուցման մեջ պետք է նշված լինի (i) այն

օրը, երբ ՀԿ-ն ԷԲԸ-ի բաժնետոմսերի առնվազն 51%-ը վերջնականապես

փոխանցեց ՌՆ-ին և ստացավ լրիվ վճարումը («Սեփականաշնորհման օրը»)

և (ii) յուրաքանչյուր ԷԲԸ-ի Բաժնետոմսի գնման գինը, որը ՌՆ-ը

վճարեց Փաթեթի մեջ մտնող յուրաքանչյուր ԷԲԸ-ի բաժնետոմսերի համար

(«ՌՆ-ի գնման գինը»): Ի լրումն, ծանուցմանը կցված կլինի (a) ՌՆ-ի

ԱՎՊ (b) հարակից պայմանագրերը Սեփականաշնորհվող Փաթեթի ԷԲԸ-ների

վերաբերյալ և (c) ՌՆ-ի ԱՎՊ-ի առնչությամբ կնքված

Սեփականաշնորհվող Փաթեթի վերաբերյալ բոլոր այլ պայմանագրերի

վավերացված պատճենը: Այն դեպքում, եթե երկու Փաթեթները

սեփականաշնորհվում են միաժամանակ, դա պետք է նշվի ծանուցման մեջ:

 

2.2.2. Բանկի Գնման Եզրափակումը: Սեփականաշնորհվող Փաթեթի բաժնետոմսերի

Առք ու վաճառքի եզրափակումը (յուրաքանչյուր դեպքում «Եզրափակում»)

տեղի կունենա Համապատասխան Փաթեթի (կետ 3-ի պայմանների համաձայն)

Սեփականաշնորհման օրվանից ոչ ավել, քան 30 Աշխատանքային օրից հետո

(«Բանկի Գնման Օրը»): Եզրափակման պահին`

 

(a) ՀԿ-ն Բանկի երևանյան գրասենյակին կտրամադրի բաժնետերերի

մատյանի համապատասխան քաղվածք, ուր նշված է, որ Բանկի գնվելիք

բաժնետոմսերի սեփականատերն է և վճարելուց հետո կունենա լրիվ

բաժնետիրական իրավունքներ,

 

(b) Բանկը վճարում է համապատասխան գնվելիք Բաժնետոմսերի համար

ՀԿ-ն կողմից նշված հաշվին,

 

(c) նշանակված հաշվին գումարի ստացումը հաստատելուն պես, ՀԿ-ն

կտրամադրի Բանկի երևանյան գրասենյակին Գնվելիք Բաժնետոմսերի

համապատասխան հավաստագրերը` Բանկի անունով և բաժնետերերի

մատյանների նոր քաղվածքներ, որոնք հաստատում են, որ Բանկը

Գնվելիք Բաժնետոմսերի լրիվ վճարած սեփականատերն է:

 

Բանկը և ՀԿ-ն կաշխատեն 3-րդ կետում նշված պայմանները գոհացնելու

համար Սեփականաշնորհման օրվանից 30 Աշխատանքային օրվա ընթացքում:

 

2.2.3. Բանկի Գնման Օրվա Ուշացում: Եթե ՀԿ-ին վերաբերվող վերոհիշյալ

դրույթները ամբողջությամբ կատարված չեն մինչև Եզրափակման օրը,

Բանկը (ի լրումն և առանց սահմանափակելու իր այլ իրավունքների կամ

վնասահատուցման պահանջների ներառյալ պատճառված վնասների համար

դրամական փոխհատուցում) իրավունք կունենա գրավոր ծանուցել ՀԿ-ին

հետևյալի մասին.

 

(a) սույն Պայմանագրի դադարելու մասին, բայց միայն այն չափով, որը

վերաբերվում է համապատասխան Սեփականաշնորհվող Փաթեթի ԷԲԸ-ի

բաժնետոմսերին,

 

(b) Եզրափակումը կատարել այն չափով, որքանով հնարավոր է, նկատի

առնելով տեղի ունեցած խախտումները,

 

(c) նշանակել նոր եզրափակման օր սույն Պայմանագրում սահմանված

Եզրափակման օրից ոչ ավել քան 30 օր հետո, որի դեպքում

Եզրափակումը կկատարվի սույն կետ 2.2. պայմաններին համաձայն:

 

2.3. Գնման Գնի Սահմանումը: Ընդհանուր վճարումը, որը պետք է վճարվի Բանկի

կողմից որևէ Սեփականաշնորհվող Փաթեթի ԷԲԸ-ների բաժնետոմսերի համար

(յուրաքանչյուրը «Վճարում») պետք է հավասար լինի հետևյալ թվերի

արտադրյալին.

 

(i) Սեփականաշնորհվող Փաթեթը կազմող ԷԲԸ-ների մեկ բաժնետոմսի ՌՆ-ի

կողմից Գնման Գին(ներ)ը,

 

(ii) Բանկի կողմից գնվող Սեփականաշնորհվող Փաթեթում ընդգրկած ԷԲԸ-ի

բաժնետոմսերի թիվը (յուրաքանչյուր դեպքում Գնվելիք

բաժնետոմսերը), որի քանակը սահմանվում է կետ 2.3. պայմաններով,

պայմանով, որ առավելագույն գումարը, որ Բանկը կվճարի բոլոր

ԷԲԸ-ների բաժնետոմսերի համար չի կարող գերազանցել Առավելագույն

Գումարը:

 

2.3.1. Միաժամանակյա Սեփականաշնորհում: Այն դեպքում, եթե Փաթեթները

սեփականաշնորհվեն միաժամանակ, նախքան եզրափակումը Բանկը և

ՀԿ-ն կհաշվեն Բանկի վճարելիք գումարը, եթե Բանկը պետք է գներ

յուրաքանչյուր ԷԲԸ-ի բաժնետոմսերի 19.90%-ը, յուրաքանչյուր

դեպքում համապատասխան ՌՆ-ի Գնման Գնով: Եթե այդ գումարը հավասար է

կամ պակաս Առավելագույն Գումարից, այդ դեպքում գնվելիք

բաժնետոմսերի թիվը կհավասարվի յուրաքանչյուր ԷԲԸ-ի բաժնետոմսերի

19.90%-ին: Եթե այդ գումարը գերազանցում է Առավելագույն գումար,

ապա Առավելագույն գումարը կվերաբաշխվի ԷԲԸ-ների միջև

համամասնաբար, ՌՆ-ի վճարված Գնման Գների համամասնությամբ, և

Գնվելիք Բաժնետոմսերի թիվը կհավասարվի վերաբաշխվող գումարի դիմաց

ստացված բաժնետոմսերի թվին:

 

2.3.2. Ոչ Միաժամանակյա Սեփականաշնորհումներ: Այն դեպքում, եթե Փաթեթները

Սեփականաշնորհվում են ոչ միաժամանակ Բանկը կգնի

Սեփականաշնորհվելիք առաջին Փաթեթի ԷԲԸ-ների առավելագույն թվով

բաժնետոմսերը չգերազանցելով դրանց 19.90% (Առավելագույն Գումարը

չգերազանցելով) («Առաջին Փաթեթ»), յուրաքանչյուր դեպքում

համապատասխան ՌՆ-ի Գնման Գնով: Առավելագույն Գումարի այն մասը

(եթե կա այդպիսին), որը չի օգտագործվել Առաջին Փաթեթի Գնման

ժամանակ, կօգտագործվի մնացած Փաթեթի ԷԲԸ-ների բաժնետոմսերի գնման

համար («Մնացած Փաթեթ»):

 

2.3.3. Բանկի Եզրափակման Նամակը: եթե տեղի են ունենում 2.3.1. կամ 2.3.2.

կետերով նախատեսված դեպքերը, ապա նախքան եզրափակումը Բանկը և

ՀԿ-ն կստորագրեն և կհանձնեն մի նամակ («Բանկի Եզրափակման

Նամակը») հաստատելով (i) յուրաքանչյուր Սեփականաշնորհվող Փաթեթը

կազմող ԷԲԸ-ների Գնվելիք բաժնետոմսերի թիվը և (ii) գինը, որով

Բանկը պետք է գնի այդ բաժնետոմսերը այդ կետերի համաձայն, եթե

գործարքը կատարվի 2.3.2. կետի համաձայն

 

(a) Բանկի Եզրափակման Նամակը կսահմանի Առավելագույն Գումարի

Առաջին Փաթեթի Գնումից մնացած գումարը,

 

(b) Նախքան մնացած Փաթեթը կազմող ԷԲԸ-ների բաժնետոմսերի գնման

Եզրափակումը Բանկի կողմից, Բանկը և ՀԿ-ն կկնքեն և հասցնեն

համապատասխան Բանկի Եզրափակման Նամակ այդ Փաթեթի համար:

 

3. ՆԱԽԱՊԱՅՄԱՆՆԵՐ

 

3.1. Ընդհանուր: Եզրափակման պահին Գնվելիք բաժնետոմսերը գնելու և դրանց

դիմաց վճարելու Բանկի պարտավորությունը կախված է յուրաքանչյուր

Սեփականաշնորհվող Փաթեթի համար մինչև Եզրափակումը այդ Փաթեթի համար

հետևյալ նախապայմանների կատարումից, եթե Բանկը չի հրաժարվում այդ

նախապայմաններից:

 

3.1.1. ՀԿ-ն և Բանկը պետք է ստորագրած լինեն Բանկի համապատասխան

Եզրափակման Նամակը և ՀԿ-ն Հայտնման Նամակը պետք է հանձնած լինի

Բանկին:

 

3.1.2. Բանկը պետք է ստացած լինի Աղյուսակ 3.1-ում նշված բոլոր

փաստաթղթերը Բանկին բավարարող ձևով և բովանդակությամբ.

 

3.1.3. Բանկը իր ողջամիտ հայեցողությամբ բավարարված է, որ

 

(a) ՀԿ-ն կատարել է սույն Պայմանագրով նախատեսված իր բոլոր

պարտականությունները, առանց վերոհիշյալը սահմանափակելու ՀԿ-ի կողմից

կատարված բոլոր Երաշխիքները ճիշտ ու ճշգրիտ Եզրափակման պահի

դրությամբ,

 

(b) Բաժնետոմսերի գնումը Բանկի կողմից չպետք է խախտի համապատասխան ԷԲԸ-ի

կանոնադրությունները, ԷԲԸ-ին վերաբերող որևէ Հարակից պայմանագիր,

որևէ Թույլտվություն, համապատասխան ԷԲԸ-ին վերաբերող որևէ էական

պայմանագիր կամ կիրառելի օրենք,

 

(c) ՀԿ-ն բավարարել է Հայաստանի օրենքների բոլոր պահանջները

Սեփականաշնորհման գործընթացի հետ կապված,

 

(d) ՀԿ-ի կողմից կիրառված մրցութային փաստաթղթերը և գնահատման մեթոդները

ապահովել են բաց և թափանցիկ մրցութային գործընթաց,

 

(e) Բանկի կողմից գնվելիք բաժնետոմսերը տալիս են նույն իրավունքները, ինչ

որ ՌՆ-ի գնված բաժնետոմսերը քվեարկելու, շահաբաժիններ ստանալու և

լուծարման հարցերում,

 

(f) Մրցույթի ընթացակարգի արդյունքով ընտրված ՌՆ-ն ընդունելի է Բանկին,

պայմանով, որ արդեն մրցութային գործընթացում մինչև սույն Պայմանագրի

կնքումը նախնական որակավորում անցած հետևյալ ընկերությունները

ընդունելի են Բանկին` ABB Energy Ventures, AES Silk Road Inc.,

Electricitie de France և Union Fenosa Acex, S.A.,

 

(g) ՌՆ-ի և ՀԿ-ի միջև պետք է կնքված լինի բաժնետոմսերի գնման

պայմանագրեր (այսինքն ՌՆ-ի ԱՎՊ) յուրաքանչյուր ԷԲԸ-ի առնվազն 51%

բաժնետոմսերի համար, և դրանցով նախատեսված բոլոր վճարումները

կատարված պետք է լինեն (ընդունելով, որ ՌՆ-ն կարող է ունենալ

շարունակվող պարտավորություններ, ՌՆ-ի ԱՎՊ-ով նախատեսված վճարումների

համար), համապատասխան ԷԲԸ-ի Հարակից պայմանագրերը կնքված են և

հասցված, և յուրաքանչյուր ՌՆ-ի ԱՎՊ և համապատասխան Հարակից

Պայմանագրերը ամբողջական ուժի մեջ են,

 

(h) Բանկը ողջամիտ դատողությամբ բավարարված է յուրաքանչյուր (i) ՌՆ-ի

ԱՎՊ-երով, ներառյալ, առանց սահմանափակելու սակայն, բաժնետոմսերի

գնման գինը, և (ii) Հարակից պայմանագրերով,

 

(i) սույն Պայմանագրով նախատեսված գործարքների կատարման համար ստացված են

բոլոր Թույլտվությունները,

 

(j) Պայմանագրի դադարեցման իրավունք տվող Դադարման որևէ հանգամանք

(ինչպես սահմանված է 4.1. կետում) չպետք է կայացած լինի, շարունակվի

կամ Բանկի կարծիքով վերահաս լինի:

 

3.1.4. Չպետք է լինի (i) որևէ դատարանի, տրիբունալի, վարչական կամ

կարգավորող որևէ մարմնի որևէ հրաման և (ii) որևէ երրորդ անձի,

վարչական կամ կարգավորող որևէ մարմնի կողմից որևէ դատարանում,

կարգավորող մարմնում կամ վարչական գործակալությունում կատարված

կամ սպասվող որևէ գործողություն, որը նպատակ ունի կանխել,

արգելել, կամ որևէ այլ կերպ խափանել սույն Պայմանագրով

նախատեսված գործարքների կատարումը:

 

3.1.5. Սույն Պայմանագրի կնքումից հետո չի պատահել որևէ դեպք և չի

ստեղծվել որևէ պայման, որը առաջացրել է կամ Բանկի ողջամիտ

կարծիքով կարող է առաջացնել համապատասխան Փաթեթը կազմող որևէ

ԷԲԸ-ի բիզնեսի, ֆինանսական վիճակի կամ հնարավորությունների էական

բացասական հետևանք:

 

3.2. Ծրագրային Պայմանագիր: Ի հավելումն, Եզրափակման պահին Գնվող

Բաժնետոմսերի գնման և դրանց դիմաց վճարման Բանկի պարտավորությունը

պայմանավորված է համապատասխան ՌՆ-ի և Բանկի միջև ծրագրային

պայմանագրի («Ծրագրային Պայմանագիր») կնքված վիճակում Բանկին

հանձնելուց, Բանկի ողջամիտ հայեցողությամբ բավարարող ձևով և

բովանդակությամբ: Ծրագրային Պայմանագրերի հիմնական դրույթները

ներկայացված են Աղյուսակ 3.2-ում:

 

Բանկի և ՌՆ-ի կողմից Ծրագրային Պայմանագրի կնքվելուն պես Բանկը

ՀԿ-ին կտրամադրի Ծրագրային Պայմանագրի կնքված օրինակի հաստատված

պատճենը և դրանից հետո Բանկը ՀԿ-ին կտրամադրի Բանկի և ՌՆ-ի կողմից

կնքված Ծրագրային Պայմանագրի լրացումների և փոփոխությունների

հաստատված պատճենները:

 

3.3. Բանկի Ետվաճառման Պայմանագիր: Բանկի սույն Պայմանագրով նախատեսված

պարտավորությունները նաև պայմանավորված են ՀԿ-ին, համապատասխան

ՌՆ-ի հետ Բանկի ետվաճառման պայմանագրի կնքված վիճակում Բանկին

հանձնումից, Բանկի ողջամիտ հայեցողությամբ բավարարող ձևով և

բովանդակությամբ («Բանկի Ետվաճառման Պայմանագիր»). Բանկի Ետվաճառման

Պայմանագրի հիմնական դրույթները ներկայացված են Աղյուսակ 3.3-ում:

 

3.4. Կիրառելիություն: Եթե Փաթեթներից մեկը Սեփականաշնորհված է, և Բանկը

գնել է այդ Փաթեթը կազմող ԷԲԸ-ների իր բաժնետոմսերը, ապա 3.1, 3.2.

և 3.3 կետերով նախատեսված պայմանները կկիրառվեն միայն մյուս` դեռ

չսեփականաշնորհված Փաթեթի նկատմամբ:

 

4. ԴԱԴԱՐՄԱՆ ՀԱՆԳԱՄԱՆՔՆԵՐ

 

4.1. Բանկն իրավունք ունի սույն Պայմանագիրը (ՀԿ-ին դրա մասին գրավոր

ծանուցելով) հետևյալ որևէ դեպքում («Դադարման Հանգամանքներ»)`

 

(a) եթե ՀԿ-ն չկատարի սույն Պայմանագրով ստանձնած իր որևէ

պարտավորություն,

 

(b) եթե Բանկի միջոցների օգտագործման ՀԿ-ի իրավունքը կասեցվի կամ

այլ կերպ փոփոխվի Բանկի Կառավարիչների խորհրդի կողմից Բանկի

Հիմնադրման Պայմանագրի Հոդված 8-ի 3-րդ պարբերության համաձայն,

 

(c) եթե երկու Փաթեթների Սեփականաշնորհումը չիրականանա մինչև 2001

թ.-ի մայիսի 31-ը կամ, եթե կետ 3-ում ներկայացված

նախապայմանները չեն բավարարվել սահմանված ժամկետում երկու

Փաթեթի համար,

 

(d) եթե ՀԿ-ն դադարեցնի կամ հրաժարվի իրականացնել ԷԲԸ-ների

սեփականաշնորհման գործընթացը,

 

(e) Եթե ՀԿ-ի կողմից, որևէ գործակալության միջոցով, ազգայնացվեն,

բռնագրավվեն, առգրավվեն կամ նմանօրինակ այլ գործողության

ենթարկվեն արդեն սեփականաշնորհված կամ սեփականաշնորհվող ԷԲԸ-ները

կամ դրանց ունեցվածքի կամ բաժնետոմսերի նշանակալից մասը, որի

հետևանքով կարող է խաթարվել ԷԲԸ-ի բնականոն աշխատանքը: Սույն

ենթակետով առաջացած որևէ վեճ նախ պետք է քննվի կողմերին

ընդունելի անկախ փորձագիտական ընկերության կողմից, որը կողմերից

որևէ մեկի համար անընդունելի լինելու դեպքում ենթակա է միջնորդ

դատավարության` ներքևում բերված դրույթների համաձայն,

 

(f) եթե որևէ ԷԲԸ-ի կողմից կամ նրա դեմ իրականացվի սնանկության,

արտաքին կառավարման, վերակազմակերպման, լուծարման կամ

նմանօրինակ այլ գործողություն, որը կկայանա մինչև Եզրափակումը,

պայմանով, որ այդ գործողությունը կամայական չէ, ունի

հաջողության հասնելու հեռանկար և որին ԷԲԸ-ն հիմնավորված

պատասխան չի տալիս,

 

(g) Եթե որևէ այլ հանգամանք կամ դեպք տեղի ունենա, որը Բանկի

ողջամիտ կարծիքով կարող է առաջացնել որևէ ԷԲԸ-ի բիզնեսի,

ֆինանսական վիճակի կամ հնարավորությունների էական բացասական

հետևանք, նախքան Եզրափակումը:

 

4.2. Նկատի ունենալով հոդված 4.3-ը, այն դեպքում եթե սույն Պայմանագիրը

դադարում է, համաձայն սույն Պայմանագրի հոդված 4.1-ի (a), (b) կամ

(d) կետերով, ՀԿ-ն պարտավորվում է վճարել կամ պարտավորեցնել, որ

որևէ երրորդ կողմ վճարի Բանկի բոլոր ողջամիտ Ծախսերը (ի թիվս

այլոց, փաստաբանների վճարները և այլ իրավական և ընթացիկ ծախսերը),

որոնք Բանկը կատարել է կապված սույն Պայմանագրի շուրջ

բանակցությունների, դրա պատրաստման, լրացման և եզրափակման հետ,

(որոնք կարող են, Բանկի հայեցողությամբ փոխհատուցվել Բանկի կողմից

սույն Պայմանագրով վճարվելիք գումարներից համապատասխան գումարը ըստ

Մանդատային Նամակի հաշվանցելու միջոցով), բացառությամբ այն ծախսերի,

որոնք փոխհատուցվել են Բանկին այլ ձևերով:

 

4.3. Եթե Եզրափակումը տեղի ունենա մինչև 2001 թ. ապրիլի 15-ը, ՀԿ-ի

կողմից Բանկի Ծախսերի փոխհատուցվելիք գումարը չի կարող գերազանցել

500,000 ԱՄՆ դոլար: Եթե Եզրափակումը տեղի չունենա մինչև 2001 թ.

ապրիլի 15-ը փոխհատուցման գումարի սահմանափակումը չի կիրառվի և

ՀԿ-ն պարտավոր կլինի վճարել կամ պարտավորեցնել, որ որևէ երրորդ

կողմ վճարի Բանկին բոլոր ողջամիտ ծախսերը առանց սահմանափակումների:

 

5. ՆԵՐԿԱՅԱՑՈՒՄՆԵՐ ԵՎ ԵՐԱՇԽԻՔՆԵՐ

 

5.1. Հիմնական Երաշխիքները: ՀԿ-ն ներկայացնում է և երաշխավորում է

Բանկին, որ սույն Պայմանագրի կնքման պահին և Եզրափակման պահին

Աղյուսակ 5.1-ում ներկայացված յուրաքանչյուր Սեփականաշնորհման

Փաթեթին վերաբերող հաստատումները, բացառությամբ Հայտնվածների, ճիշտ

են և ճշգրիտ:

 

5.2. Վստահություն: ՀԿ-ն ճանաչում է, որ Բանկը կնքում է այս Պայմանագիրը,

ի թիվս այլոց, հիմք ունենալով Երաշխիքները:

 

6. ՀԱՎԱՍՏԻԱՑՈՒՄՆԵՐ ՀԿ-Ի ԿՈՂՄԻՑ

 

Հավաստիացումները նախքան Սեփականաշնորհումը: ՀԿ-ն հավաստիացնում է, որ

կապահովի, ինչքանով որ կարող է գործող օրենքների համաձայն, որ

յուրաքանչյուր Փաթեթի Սեփականաշնորհումից առաջ ԷԲԸ-ներից և ոչ մեկը`

 

(a) վաճառած, վարձած, փոխանցած, գրավադրված կամ այլակերպ օտարած չլինի

իր ակտիվները, կամ դրանց նշանակալից մասը, (բացառությամբ ԷԲԸ-ների

միջև ակտիվների փոխանցմանը, դեբիտորական հաշիվների փոխանցմանը`

ԷԲԸ-ների պարտքի վերակազմավորման նպատակով կամ մինչև

սեփականաշնորհումը ԷԲԸ-ների սովորական աշխատանքի հետ չկապված

ակտիվների փոխանցմանը, որը չի խաթարում ԷԲԸ-ների բնականոն

աշխատանքը),

 

(b) ստեղծած չլինի որևէ դուստր ընկերություն, ներդրում

կատարի որևէ ԷԲԸ-ի մեջ կամ գնի որևէ ակտիվ (ցանկացած ձևով),

բացառությամբ (i) այն դեպքի երբ դա սեփականաշնորհմանը ԷԲԸ-ի

նախապատրաստման մի մասն է կամ (ii) գոյություն ունեցող ակտիվների

գնում, որոնք գտնվում են ԷԲԸ-ների օգտագործման մեջ առայժմ և/կամ,

որոնք անհրաժեշտ են գնել ԷԲԸ-ների գործունեությունը շարունակելու

համար, պայմանով, որ դուստր ձեռնարկությունների ստեղծումը,

ներդրումների կատարումը կամ ակտիվների ձեռք բերումը չի խաթարում

ԷԲԸ-ների բնականոն աշխատանքը,

 

(c) չմիաձուլվի այլ ընկերության հետ (որը ԷԲԸ չէ) կամ ենթարկվի նման

վերակազմակերպման, կամ

 

(d) չփոփոխի իր կանոնադրական կապիտալը, բաժնետոմսերի թիվը կամ անվանական

արժեքը (բացառությամբ Հայաստանի օրենքներով պահանջվող դեպքերի):

 

Ի հավելումն, ՀԿ-ն հավաստիացնում է, որ տեղյակ կպահի Բանկին ԷԲԸ-ների

Սեփականաշնորհման մրցույթի հետ կապված բոլոր էական իրադարձությունների

մասին: Առանց վերոհիշյալի ընդհանրությունը սահմանափակելու, ՀԿ-ն

կտրամադրի կամ տրամադրել կտա ներքոհիշյալ փաստաթղթերը, այդ փաստաթղթերը

մատչելի դառնալուն պես` (i) ապագա ռազմավարական ներդրողին առաջարկվող

բոլոր փաստաթղթերը և նույնին վերաբերվող բոլոր լրացուցիչ նյութերը

(ներառյալ, առանց սահմանափակելու սակայն, ապագա գնորդի կողմից

բարձրացված բոլոր հարցերի պատասխանները) և (ii) ՌՆ-ի ԱՎՊ-ն և Հարակից

պայմանագրերը, ինչպես նաև որևէ այլ պայմանագիր, որը կարող է էական

լինել նախատեսվող սեփականաշնորհման համար:

 

7. ԾԱՆՈՒՑՈՒՄՆԵՐ

 

7.1. Ընդհանուր: Սույն Պայմանագրի շրջանակներում մեկ կողմից մյուս կողմին

տրվելիք ծանուցումները, պահանջները և այլ հաղորդակցությունները

պետք է ներկայացվեն գրավոր տեսքով: Ծանուցումները, պահանջները կամ

այլ հաղորդակցությունները կարող են տրվել առձեռն, փոստով, ֆաքսով

կամ միջազգային փոստային ծառայության միջոցով մյուս կողմի հասցեով,

ինչը նշված է ներքևում, կամ այլ հասցեով, որի մասին ժամանակ առ

ժամանակ կծանուցի մյուս կողմին:

 

Բանկի համար`

 

Զարգացման և Վերակառուցման Եվրոպական Բանկ

Ի ուշադրություն` Գործառնությունների Կառավարման Միավոր

Ուան Էքսչայնջ Սքուեար

Լոնդոն EC2A 2JN

Միացյալ Թագավորություն

Այլընտրանքային` ֆաքս, (44-207) 338-6100, պատճեն ուղարկել

(44-207) 338-7710

 

ՀԿ-ի համար`

 

ՀՀ էներգետիկայի նախարարություն

Ի ուշադրություն` Էներգետիկայի նախարարի

Կառավարության շենք թիվ 2

Հանրապետության Հրապարակ

Երևան 375010, Հայաստանի Հանրապետություն

Այլընտրանքային` ֆաքս (374) 151-687

 

7.2. Առաքում: Որևէ ծանուցում, պահանջ կամ այլ հաղորդակցություն

համարվում է կատարված, եթե`

 

7.2.1. առաքված է առձեռն, հանձնման պահին,

 

7.2.2. ուղարկված է փոստով, փոստային ծառայությանը հանձնելուց հետո

երկրորդ (միջազգային փոստի դեպքում` վեցերորդ) Աշխատանքային օրվա

ժամը 10:00-ին,

 

7.2.3. ուղարկված է ֆաքսով առաքման պահից երկու ժամ հետո, եթե առաքված է

որևէ Աշխատանքային օրում մինչև ժամը 15:00-ը և որևէ այլ

դեպքում` առաքման օրվա հաջորդ Աշխատանքային օրը ժամը 10:00-ին,

 

7.2.4. ուղարկված է միջազգային փոստային սուրհանդակով, առաքման օրվանից

երկրորդ Աշխատանքային օրը ժամը 10:00-ին, եթե սուրհանդակի կողմից

վերցված է որևէ Աշխատանքային օրվա ժամը 18:00-ից առաջ, կամ

առաքման օրվանից երրորդ Աշխատանքային օրը ժամը 10:00-ին, եթե

սուրհանդակի կողմից վերցված է որևէ Աշխատանքային օրվա ժամը

18:00-ից հետո:

 

8. ԿԱՐԳԱՎՈՐՈՂ ՕՐԵՆՍԴՐՈՒԹՅՈՒՆԸ ԵՎ ՎԵՃԵՐԻ ԼՈՒԾՈՒՄԸ

 

8.1. Կարգավորող օրենսդրությունը. Սույն Պայմանագիրը կարգավորվում է և

ձևակերպվում է ԱՄՆ Նյու-Յորք նահանգի օրենքներով, առանց կիրառելու

այդ նահանգի օրենսդրության օրենքների բախման սկզբունքները:

 

8.2. Վեճերի լուծումը. Սույն Պայմանագրի կապակցությամբ կամ դրանից ծագող

ցանկացած վեճ, հակասություն, հայց, կամ վերոհիշյալ պայմանագրերի

խախտում, դադարեցում կամ անվավերության պահանջ պետք է վերջնականապես

լուծվի միջնորդ դատարանի միջոցով համապատասխան Միավորված Ազգերի

Կազմակերպության Միջազգային Առևտրային Օրենքների Հանձնաժողովի

(UNCITRAL) Միջնորդ Դատարանի Կանոնների համաձայն, որոնք ներկայումս

ուժի մեջ են: Կլինի մեկ միջնորդ դատավոր, որը կնշանակվի Ամերիկյան

Միջնորդ Դատավարության Ասոցիացիայի նախագահի կողմից: Միջնորդ

դատարանի Իրավաբանական նստավայրը Նյու-Յորք քաղաքն է, Նյու-Յորք,

ԱՄՆ: Միջնորդ դատարանը կարող է անցկացնել միջնորդ դատավարությունը

ամբողջությամբ կամ մասամբ որևէ այլ տեղ, որը կհամարի պատշաճ` հաշվի

առնելով դատավարության և կողմերի հարմարությունը: Վարույթի

ընթացքում օգտագործվելու է անգլերեն լեզուն: Միջնորդ դատարանի

որոշումը կլինի վերջնական և պարտադիր կողմերի համար: Կողմերը

սույնով հրաժարվում են որևէ կիրառելի օրենսդրությամբ որևէ միջնորդ

դատարանի վճռի վերանայումը հայցելու իրավունքից, և նաև հրաժարվում

են այդպիսի վարույթի առնչությամբ նախնական օրենսդրական մեկնաբանման

համար դատարան դիմելու իրավունքից: Միջնորդ դատարանը իրավասու չէ

արտոնել, և ՀԿ-ն իրավունք չունի որևէ դատարանից հայցել, որևէ

միջանկյալ իրավունքների պաշտպանության միջոցներ կամ նախնական

վնասահատուցում Բանկի դեմ, չնայած UNCITRAL-ի դրույթներին: Միջնորդ

դատարանը իրավասու է քննարկել և ներառել որևէ վարույթի որոշման

կամ վճռի մեջ որևէ առաջացած վեճ, որը Բանկի (բայց ոչ այլ անձերի)

կողմից պատշաճորեն ներկայացված է, եթե այդ վեճը առաջացած է սույն

Պայմանագրից, սակայն նկատի առնելով վերոհիշյալը ոչ մի այլ կողմ կամ

այլ վեճ չպիտի ներառվի կամ միաձուլվի միջնորդ դատարանի

վարույթներին: Որևէ միջնորդ դատավարության ընթացքում Բանկի

հավաստիացումները Բանկին հասանելիք գումարի մասին օգտվում են

ճշմարտացիության կանխավարկածից:

 

8.3. Բանկի Արտոնությունները և Անձեռնմխելիությունը: Որևէ դրույթ սույն

Պայմանագրում չպետք է համարվի հրաժարում որևէ կիրառելի օրենքով կամ

միջազգային կոնվենցիայով կամ 29 մայիսի, 1990 թ. Փարիզում կնքված

Զարգացման և Վերակառուցման Եվրոպական Բանկի Հիմնադրման Պայմանագրով

ամրագրված անձեռնմխելիությունից, արտոնություններից կամ

ազատումներից, որոնք վերապահված են Բանկին:

 

8.4. ՀԿ-ի առևտրային գործունեություն: ՀԿ-ն ներկայացնում է և

երաշխավորում, որ սույն Պայմանագիրը առևտրային բնույթ ունի, այլ ոչ

թե պետական բնույթ, և որ ՀԿ-ն իրավունք չունի անձեռնմխելիությամբ

պաշտպանվել դատավարություններից իր հանդեպ կամ իր ունեցվածքի հանդեպ

սուվերենության կամ այլ հիմունքներով, որևէ օրենսդրությամբ կամ

որևէ դատարանում ուր դատական հայց կներկայացվի սույն Պայմանագրից

բխող պարտականությունների գործադրման համար: ՀԿ-ն սույնով

համաձայնվում է սույն Պայմանագրից բխող իր պարտականությունների

առնչությամբ չօգտվել անձեռնմխելիության իրավունքից այն չափով, ինչ

չափով իր ունեցվածքը ներկայումս կամ ապագայում կարող է օգտվել որևէ

անձեռնմխելիության իրավունքից, ներառյալ հաշվանցման, դատական

վարույթների նախնական կալանքի, այլ կալանքների կամ դատավճռի

հարկադիր կատարման առնչությամբ անձեռնմխելիությունից,

սուվերենության կամ այլ հիմունքների վրա:

 

9. ԶԱՆԱԶԱՆ

 

9.1. Ժամկետը: Քանի դեռ այս Պայմանագիրը չի դադարեցվել համաձայն Հոդված

4-ի, այս Պայմանագիրը անժամկետ է, եթե այն չի դադարեցվում և ուժը

կորցնում կողմերի փոխադարձ համաձայնությամբ: Որևէ այսպիսի դադարման

դեպքում Պայմանագրի բոլոր հոդվածները դադարում են գործելուց բացի

Հոդված 4.2-ից և 4.3-ից (Դադարման Հանգամանքներ), Հոդված 8-ից,

(Կառավարող Օրենք և Վեճերի Լուծում), 9.4-ից (Վճարներ և Ծախսեր),

9.5-ից (Անգլերեն լեզուն), 9.6-ից (Իրավունքներ, Վնասահատուցում և

Իրավունքներից Հրաժարում), 9.7.-ից (Իրավահաջորդներ և Իրավունքների

Ջեռքբերողներ), 9.8-ից (Լրացում), 9.9-ից (Բաժանելիություն) և

9.12-ից (Ուշացման տոկոսները), որոնք ենթակա չեն այս Պայմանագրի

դադարմանը (և որևէ կողմ չի կարող ունենալ որևէ պահանջ մյուսի

նկատմամբ այս Պայմանագրի ներքո, բացի այն պահանջներից, որոնք

առաջանում են Հոդված 2.2.2 երկրորդ մասում պարունակվող

պարտավորվածությունների դադարումից):

 

9.2. Հարկեր: ՀԿ-ն պետք է վճարի բոլոր հարկերը (ներառյալ դրոշմահարկերը),

տուրքերը, վճարները կամ այլ գանձումները, որոնք պետք է վճարվեն

կապված այս Պայմանագրի կատարման, թողարկման, առաքման, գրանցման կամ

վավերացման հետ, կամ այս Պայմանագրի շրջանակներում Բանկի

բաժնետոմսերի վաճառքի, փոխանցման կամ առաքման և դրանց վերաբերող

որևէ փաստաթղթի կամ կապված ՀԿ-ի կողմից հատուցվելիք որևէ վնասի

հետ, որը ծագում է Երաշխիքների շրջանակներում գոյություն ունեցող

պահանջից, և պետք է փոխհատուցի Բանկին որևէ այդպիսի հարկերի,

տուրքերի, վճարների կամ այլ գանձումների համար, որոնք վճարվել են

Բանկի կողմից:

 

9.3. Վճարման Մանրամասները: Քանի դեռ պարզորոշ ձևով այլ բան չի

հաստատված, բոլոր վճարումները պետք է կատարվեն Դոլարով մյուս կողմին

հետևյալ կերպ`

 

9.3.1. ՀԿ-ին անմիջականորեն առկա միջոցներով` Հայաստանի Հայաստանի

Հանրապետության Կենտրոնական Բանկում Գանձապետարանի 103004034858

հաշվին, և

9.3.2. Բանկին անմիջականորեն առկա միջոցներով Բանկի հաշվին, որի մասին

ՀԿ-ն կծանուցվի համապատասխան ժամանակ:

 

9.4. Վճարներ և Ծախսեր:

 

9.4.1. Նկատի առնելով հոդված 9.4.2.-ը, ՀԿ-ն պարտավոր է Բանկին վճարել

կամ ստիպել որևէ երրորդ կողմի վճարել Բանկի բոլոր ողջամիտ

Ծախսերը` Մանդատային Նամակի համաձայն (որը շարունակում է մնալ

ուժի մեջ):

9.4.2. եթե Եզրափակումը տեղի ունենա մինչև 2001 թ. ապրիլի 15-ը, ՀԿ-ի

կողմից Բանկի Ծախսերի փոխհատուցվելիք գումարը չի կարող գերազանցել

500,000 ԱՄՆ դոլար: եթե Եզրափակումը տեղի չունենա մինչև 2001 թ.

ապրիլի 15-ը փոխհատուցման գումարի սահմանափակումը չի կիրառվի և

ՀԿ-ն պարտավոր կլինի վճարել կամ պարտավորեցնել, որ որևէ երրորդ

կողմ վճարի Բանկին բոլոր ողջամիտ ծախսերը առանց

սահմանափակումների:

 

9.5. Անգլերեն լեզուն: Կողմերը կնքում են սույն Պայմանագիրը անգլերեն

լեզվով վավերացված հայերեն թարգմանությամբ: Անգլերեն տարբերակի և

վավերացված հայերեն տարբերակի միջև որևէ հակասության դեպքում

անգլերեն տարբերակը կգերակայի, այնուամենայնիվ հայերեն

թարգմանությունը կարող է օգտագործվել անգլերեն տարբերակի

մեկնաբանման համար: Այս Պայմանագրին համապատասխան բոլոր ներկայացվող

փաստաթղթերը և հաղորդակցությունները պետք է կատարվեն անգլերեն

լեզվով կամ, եթե այլ լեզվով են, պետք է ուղեկցվեն անգլերեն

թարգմանությամբ, վավերացված ՀԿ-ի ներկայացուցչի կողմից, որը

հանդիսանում է տիրապետող տարբերակ ՀԿ-ի և Բանկի համար:

 

9.6. Իրավունքները, Վնասահատուցումները և Իրավունքներից Հրաժարվելը

 

9.6.1. Որևէ կողմին վերաբերող որևէ գործելակերպ կամ որևէ իրավունքի

օգտագործման ուշացում կամ իրավունքից, լիազորությունից կամ

վնասահատուցման իրավունքից օգտվելու բացթողում, այս Պայմանագրի

կամ այլ պայմանագրի պարտավորությունները չկատարելու դեպքում, չեն

նվազեցնում որևէ այդպիսի իրավունք, լիազորություն կամ

վնասահատուցման իրավունք, կամ չեն մեկնաբանվում, որպես դրանցից

հրաժարում կամ լուռ համաձայնություն; որևէ կողմի գործողություն

կապված այդպիսի հրաժարումից, կամ սույնում որևէ լուռ

համաձայնություն չի ազդում կամ նվազեցնում այդ կողմի

լիազորությունները կամ վնասահատուցման իրավունքը որևէ այլ

խախտման նկատմամբ:

 

9.6.2. Որևէ կողմի վերաբերող սույն կամ այլ պայմանագրի խախտմամբ

առաջացած իրավունքի, լիազորության կամ վնասահատուցման իրավունքի

առանձին կամ մասնակի օգտագործումը չի կարող արգելել այդ իրավունքի

հետագա օգտագործումը կամ որևէ այլ օրինական իրավունքի

օգտագործումը:

 

9.6.3. Սույն Պայմանագրի որևէ կողմին վերաբերող իրավունքից,

լիազորությունից կամ վնասահատուցման իրավունքից հրաժարումը սույն

Պայմանագրի կամ որևէ այլ Պայմանագրի խախտման դեպքում ուժի մեջ է

միայն, եթե այդ կողմը դա ներկայացնի գրավոր տեսքով:

 

9.6.4. Սույնով նախատեսված իրավունքները և վնասահատուցման իրավունքները

կուտակվող են և չեն բացառում օրենքով նախատեսված այլ

իրավունքները, լիազորությունները կամ վնասահատուցման

իրավունքները:

 

9.6.5. Սույնով նախատեսված կամ այլ հիմունքներով առաջացած որևէ

իրավունքից կամ վնասահատուցման իրավունքից օգտվելը չի բացառում

միաժամանակ որևէ այլ պատշաճ իրավունքից կամ վնասահատուցման

իրավունքից օգտվելը:

 

9.6.6. Բանկի կողմից կամ նրա անունով ձեռնարկված ՀԿ-ի կամ ԷԲԸ-ների

գործողությունների քննումը, սույն Պայմանագրի կնքումը կամ

կատարումը կամ որևէ այլ գործողություն, որը կարվի Բանկի կողմից

կամ նրա անունից սույն Պայմանագրի առնչությամբ, որը կարող էր

սույն դրույթի բացակայության դեպքում սահմանափակել բանկի

իրավունքները կամ վնասահատուցման իրավունքները չի սահմանափակում

ՀԿ-ի կողմից տրված որևէ երաշխիքի խախտումից առաջացած Բանկի

իրավունքները կամ վնասահատուցման իրավունքները:

 

9.6.7. Բանկը իր բացառիկ և բացարձակ հայեցողությամբ որևէ ժամանակ կարող

է շնորհել ՀԿ-ին արտոնություններ, ընդ որում դրանք որևէ ձևով

չեն ազատում և անվավեր չեն դարձնում ՀԿ-ի` սույնով նախատեսված

այլ պարտականությունները:

 

9.6.8. ՀԿ-ն իր բացառիկ և բացարձակ հայեցողությամբ որևէ ժամանակ կարող

է շնորհել Բանկին արտոնություններ, ընդ որում դրանք որևէ ձևով

չեն ազատում և անվավեր չեն դարձնում Բանկի` սույնով նախատեսված

այլ պարտականությունները:

 

9.7. Իրավահաջորդները և Իրավունքների Ձեռքբերողները: Կողմերից ոչ մեկը

իրավունք չունի սույն Պայմանագրով նախատեսված իր իրավունքները լրիվ

կամ մասամբ փոխանցել առանց մյուս կողմի նախնական գրավոր

համաձայնության: Ենթակա վերոհիշյալին սույն Պայմանագիրը կիրառելի է

և նրա իրավունքներից օգտվում են սույն պայմանագրի կողմերի

իրավահաջորդները և նրանց իրավունքների թույլատրված ձեռքբերողները:

 

9.8. Լրացում: Սույն Պայմանագիրը չի կարող լրացվել, փոփոխվել կամ

դադարել, բացի այն դեպքից, եթե այդպիսի լրացումը կամ փոփոխությունը

կամ դադարումը ուղղակիորեն համաձայնեցված է ՀԿ-ի և Բանկի կողմից

գրավոր տեսքով:

 

9.9. Բաժանելիություն: Եթե սույն Պայմանագրի որևէ դրույթ միջնորդ

դատարանի կողմից համարվում է անվավեր կամ անգործադրելի, այդ դրույթը

կհամարվի սույն Պայմանագրից հանված և Պայմանագրի մնացած դրույթները

լիարժեք կմնան ուժի մեջ, այս Պայմանագիրը կմեկնաբանվի և կգործադրվի

այնպես, որպես թե չլիներ այս անվավեր կամ անգործադրելի դրույթը:

Չնայած վերոհիշյալին, կողմերը բարեխղճորեն կբանակցեն, որպեսզի

համաձայնվեն փոխշահավետ նոր դրույթների վերաբերյալ, որոնք

հնարավորին չափ օրենքի սահմաններում ունենան նույն տնտեսական

արդյունքը և հետապնդեն նույն նպատակները, ինչպիսիք հետապնդում էր

անվավեր կամ անգործադրելի գտնված դրույթը և այդ նույն դրույթը

կփոխանակվի անվավեր կամ անգործադրելի դրույթով:

 

9.10. Երրորդ կողմի շահագրգռվածության բացառումը: Սույն Պայմանագիրը

կնքվում է բացարձակապես սույն Պայմանագրի կողմերի օգտի համար և ոչ

մի երրորդ կողմ իրավունքներ ձեռք չի բերում սույնով և չի

համարվում սրանից օգտվող կողմ:

 

9.11. Համալրող Փաստաթղթեր: Սույն փաստաթուղթը կարող է ստորագրվել տարբեր

տեղերում մեկ կամ մի քանի համալրող մասերով, որոնցից

յուրաքանչյուրը բնագրի ուժ ունի և որոնք միասին կազմում են մեկ

միասնական օրինական փաստաթուղթ:

 

9.12. Ուշացման տոկոսներ: Առանց սահմանափակելու Սույն պայմանագրով

ապահովված վնասահատուցման իրավունքները, եթե սույնով Բանկին

վճարվելիք որևէ գումար չվճարվի Վճարման օրը ըստ սույն Պայմանագրի,

ՀԿ-ն պարտավոր է վճարել տոկոսներ ուշացած գումարի վրա (Դոլարով)

սկսած նշանակված վճարման օրվանից մինչև լրիվ վճարումը, ընդ որում

տոկոսադրույքը հավասար է միջին տոկոսադրույքին, որը բանկերը

պահանջում էին նախորդ վեց ամսվա ժամանակահատվածում ՀԿ-ին

տրամադրվող դոլարային վարկերի համար, որոնք համեմատելի են

վճարվելիք գումարին, գումարած տարեկան երկու տոկոս տուգանքի համար,

պայմանով որ, եթե ՀԿ-ն ժամանակին չտրամադրի Բանկին անհրաժեշտ

տեղեկությունները, որպեսզի Բանկը սահմանի այս միջին տոկոսադրույքը,

այն կշտկվի Բանկի կողմից իր ողջամիտ հայեցողությամբ:

 

9.13. Հավելյալ Երաշխիքներ: Կողմերը խոստանում են ընդհանրապես ստորագրել

բոլոր այն պայմանագրերը և այն փաստաթղթերը և կատարել բոլոր այն

անհրաժեշտ գործողությունները, որպեսզի լիարժեք կատարվեն սույն

Պայմանագրի պայմանները, պահանջները և դրույթները:

 

Ի ՀԱՍՏԱՏՈՒՄՆ ՎԵՐՈՀԻՇՅԱԼԻ կողմերը` ներկայացված իրենց լիազոր

ներկայացուցիչների կողմից, ստորագրել և հանձնել են սույն Պայմանագիրը,

առաջինը վերևում նշված թվականին:

 

ԶԱՐԳԱՑՄԱՆ ԵՎ ՎԵՐԱԿԱՌՈՒՑՄԱՆ ԵՎՐՈՊԱԿԱՆ ԲԱՆԿ

 

______________________________

                          անուն` Հիլդեգարդ Գաշեկ

                          պաշտոն` Կովկասի, Բելոռուսի և Մոլդովայի

                                  Տարածաշրջանային Տնօրեն,

 

ՀԱՅԱՍՏԱՆԻ ԿԱՌԱՎԱՐՈՒԹՅԱՆ

 

______________________________

                          անուն` Կարեն Գալուստյան

                          պաշտոն` Էներգետիկայի նախարար

 

______________________________

                          անուն` Վարդան Խաչատրյան

                          պաշտոն` Ֆինանսների և էկոնոմիկայի նախարար

 

______________________________

                          անուն` Դավիթ Հարությունյան

                          պաշտոն` Արդարադատության նախարար

 

Լիազորված ներկայացուցիչներ

 

Աղյուսակ 3.1.

Նախապայմանները գոհացնող ստացվելիք փաստաթղթերի ցուցակ

 

Յուրաքանչյուր Սեփականաշնորհվող Փաթեթի վերաբերյալ պետք է հասցվեն

հետևյալ ստացվելիք փաստաթղթերը.

 

1. Բանկը պետք է ստանա հետևյալ փաստաթղթերից յուրաքանչյուրի իսկական

պատճեն`

 

(a) Գործարքային Պայմանագրեր,

 

(b) Հարակից Պայմանագրերը,

 

(c) Գործարքային Պայմանագրերի յուրաքանչյուր կողմի կնքած

Սեփականաշնորհման հետ կապված բոլոր այլ պայմանագրերը,

 

և յուրաքանչյուր այդպիսի պայմանագիր, մատնանշված (a)-ում, (b)-ում և

(c)-ում պետք է լինեն գործող, վավեր և պայման չնախատեսող:

 

2. Բանկը պետք է ստանա յուրաքանչյուր ԷԲԸ-ի ֆինանսական

հաշվետվությունների («Ֆինանսական Հաշվետվություններ») վավերացված

պատճենները, բաղկացած Սեփականաշնորհման Փաթեթից, որը տրվել էր ՀԿ-ի

կողմից ՌՆ-ին` կապված Սեփականաշնորհման եզրափակման հետ:

 

3. Բանկը պետք է ստանա Կանոնադրությունների վավերացված պատճենները,

համապատասխան գրանցման վկայականները, ինչպես նաև յուրաքանչյուր ԷԲԸ-ի

տնօրենների խորհրդի որոշումները և կանոնակարգերը (եթե այդպիսիք

կան) (հայերեն, անգլերեն թարգմանությամբ` որտեղ, որ անհրաժեշտ է):

 

4. Բանկը պետք է ստանա բոլոր անհրաժեշտ Թույլտվությունների վավերացված

պատճենները (անգլերեն թարգմանությամբ` եթե անհրաժեշտ է) հետևյալի

համար`

 

(a) ԷԲԸ-ների բաժնետոմսերի առք ու վաճառքը համապատասխան սույն

Պայմանագրի պայմանների,

 

(b) Գործարքային Պայմանագրերի` ներառյալ գործարքային Պայմանագրերը

ՀԿ-ի կողմից ստորագրողների լիազորագրերը, ըստ օրենքի կնքելու,

հասցնելու, օրինական լինելու և գործադրելու և պայմանների

կատարելու,

 

(c) ԷԲԸ-ների կողմից իրենց գործունեության կատարման, ներառյալ

անհրաժեշտ բոլոր կառավարական, կրեդիտորական և այլ արտոնագրային

պահանջները:

 

5. Բանկը պետք է ստացած լինի իրավական եզրակացություններ

Սեփականաշնորհման և ԷԲԸ-ների բաժնետոմսերի Բանկի կողմից գնման հետ

կապված դեպքերի համար Բանկի չափանիշների համապատասխան ձևով

(ներառյալ, չսահմանափակվելով սակայն, սույն Պայմանագրի, այլ

Գործարքային Պայմանագրերի և Հարակից Պայմանագրերի օրենքով սահմանված

կարգով իրավասու կնքումը, իրավազորությունը և գործադրելիությունը)

այնպես ինչպես կարող է ընդունված կամ ստանդարտ լինել նման գործարքների

համար` յուրաքանչյուր դեպքում Բանկին ընդունելի ձևով և

բովանդակությամբ: Նման եզրակացությունները պետք է տրվի Բանկին

ընդունելի իրավախորհրդատուի կողմից, ներառյալ (i) Արդարադատության

նախարարություն, (ii) ՀԿ-ի և ԷԲԸ-ների Հայաստանյան և միջազգային

իրավախորհրդատուները և (iii) Բանկի Հայաստանյան և միջազգային

իրավախորհրդատուները (համապատասխան ձևով):

 

6. Բանկը պետք է նախքան Եզրափակումը ստանա ողջամտորեն պահանջված բոլոր

փաստաթղթերը:

 

7. Բանկը պետք է ստանա ծանուցում, որը կհավաստի այն անձի կամ անձանց

լիազորությունները, որոնք ՀԿ-ի կողմից կստորագրեն Գործարքային

Պայմանագրերը կամ կձեռնարկեն որևէ այլ քայլ կամ կկնքեն որևէ այլ

փաստաթուղթ, որ պահանջվում է կամ թույլատրվում է ձեռնարկել կամ կնքել

Գործարքային Պայմանագրերով և այդ անձանցից յուրաքանչյուրի

ստորագրության վավերացված նմուշները:

 

-----------------------------------------------------------

հեղինակաների կողմից - շարունակությունը հաջորդ մասում

 

 

pin
ՀՀ կառավարություն
04.12.2000
N 795
Որոշում