ՇՐՋԱԿԱ ՄԻՋԱՎԱՅՐԻ ՎՐԱ ԱԶԴԵՑՈՒԹՅԱՆ ԳՆԱՀԱՏՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

25 հուլիսի 2024 թվականի N 1143-Ն

ՇՐՋԱԿԱ ՄԻՋԱՎԱՅՐԻ ՎՐԱ ԱԶԴԵՑՈՒԹՅԱՆ ԳՆԱՀԱՏՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Շրջակա միջավայրի վրա ազդեցության գնահատման և փորձաքննության մասին» օրենքի 8-րդ հոդվածի 1-ին մասի 2-րդ կետը` Հայաստանի Հանրապետության կառավարությունը որոշում է.

1. Հաստատել շրջակա միջավայրի վրա ազդեցության գնահատման կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության

    փոխվարչապետ                  Տ. Խաչատրյան

2024 թ. հուլիսի 25

Երևան

Հավելված

ՀՀ կառավարության

2024 թվականի հուլիսի 25-ի

N 1143-Ն որոշման

ԿԱՐԳ

ՇՐՋԱԿԱ ՄԻՋԱՎԱՅՐԻ ՎՐԱ ԱԶԴԵՑՈՒԹՅԱՆ ԳՆԱՀԱՏՄԱՆ

1. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կարգավորվում են «Շրջակա միջավայրի վրա ազդեցության գնահատման և փորձաքննության մասին» օրենքի (այսուհետ` օրենք) 4-րդ հոդվածի 1-ին մասի 7-րդ կետով ամրագրված նախատեսվող գործունեության շրջակա միջավայրի վրա ազդեցության գնահատման (այսուհետ` ՇՄԱԳ) իրականացման հետ կապված հարաբերությունները:

2. Գնահատման և փորձաքննության ենթակա` Ա, Բ կատեգորիայի նախատեսվող գործունեության տեսակների նախագծային փաստաթղթի և ՇՄԱԳ հաշվետվության գնահատման և փորձաքննության գործընթացներն իրականացվում են օրենքով սահմանված ժամկետներում և ընթացակարգով:

2. ՇՄԱԳ ԳՈՐԾԸՆԹԱՑՆԵՐԸ

3. Օրենքով սահմանված նախատեսվող գործունեության տեսակ հանդիսանալու կամ ՇՄԱԳ-ի ենթակա նախատեսվող գործունեության տեսակի (ըստ կատեգորիաների) դասակարգման վերաբերյալ պարզաբանում ստանալու նպատակով, մինչև ՇՄԱԳ գործընթացի սկսելը, նախաձեռնողը կարող է գրավոր դիմել լիազոր մարմնին` ներկայացնելով նախատեսվող գործունեության ընդհանուր բնութագիրը (վայր, տեսակ, ծավալ, հնարավոր ազդեցություն):

4. Լիազոր մարմինը սույն կարգի 3-րդ կետով պահանջվող պարզաբանումը գրավոր տեղեկացնում է դիմումատուին` դիմումն ստանալու օրվանից 5 աշխատանքային օրվա ընթացքում:

5. Նախագծային փաստաթղթով նախատեսված լուծումների այլընտրանքային տարբերակների բացահայտման նպատակով դիտարկվում են հնարավոր այլընտրանքային, այդ թվում` զրոյական` նախատեսվող գործունեության չիրականացնելու տարբերակները: Այլընտրանքները պետք է ներառեն այլընտրանքային վայրերի, տեղադիրքի, երթուղիների, տեխնոլոգիաների, գործընթացների, հումքի, նախագծային և շինարարական աշխատանքների լուծումների, բնապահպանական և սոցիալական միջոցառումների նկարագրություններ: Նախընտրելի տարբերակի ընտրությունը հիմնավորելու նպատակով իրականացվում է նախատեսվող գործունեության նախընտրելի տարբերակի և այլընտրանքային տարբերակների բնապահպանական և սոցիալ-տնտեսական համեմատական վերլուծություն:

6. ՇՄԱԳ գործընթացում նախաձեռնողը կարող է գրավոր դիմել լիազոր մարմնին` գնահատման գործընթացի վերաբերյալ լրացուցիչ տեղեկատվություն ստանալու նպատակով:

7. Լիազոր մարմինն իր լիազորությունների շրջանակներում սույն կարգի 6-րդ կետով պահանջվող տեղեկատվությունը գրավոր տրամադրում է դիմումատուին` դիմումն ստանալու օրվանից 10 աշխատանքային օրվա ընթացքում:

3. ՄՇՏԱԴԻՏԱՐԿՈՒՄ ԵՎ ՀԵՏՆԱԽԱԳԾԱՅԻՆ ՎԵՐԼՈՒԾՈՒԹՅՈՒՆ

8. Նախաձեռնողը, իր լիազորությունների շրջանակում իրականացնում է մշտադիտարկում (մոնիթորինգ)` համաձայն նախատեսվող գործունեության բնապահպանական կառավարման պլանի և մշտադիտարկման ծրագրի` շրջակա միջավայրի` ներառյալ մարդու առողջության վրա ազդեցությունների հետևանքով առաջացող հնարավոր փոփոխությունները կանխատեսելու նպատակով:

9. Մշտադիտարկման տարեկան արդյունքների, նախատեսվող գործունեության նախագծի և ՇՄԱԳ հաշվետվության տվյալների համեմատական վերլուծության արդյունքում նախաձեռնողի կողմից կազմվում է հետնախագծային վերլուծության տարեկան ծրագիր, բացառությամբ սույն կարգի 11-րդ կետի:

10. Յուրաքանչյուր տարվա մինչև փետրվարի առաջին տասնօրյակը մշտադիտարկման և հետնախագծային վերլուծության արդյունքները հրապարակվում են նախաձեռնողի կայքում (առկայության դեպքում) կամ տրամադրվում են լիազոր մարմնին` վերջինիս կայքում տեղադրելու նպատակով:

11. Գործունեության կոնկրետ տեսակների կամ օբյեկտների մշտադիտարկման համար օրենսդրությամբ հատուկ ընթացակարգեր սահմանված լինելու դեպքում անհրաժեշտ է առաջնորդվել հատուկ սահմանված ընթացակարգերով:

Պաշտոնական հրապարակման օրը` 25 հուլիսի 2024 թվական: