ԵՐԵՎԱՆԻ ՇԵՆԳԱՎԻԹ ԹԱՂԱՅԻՆ ՀԱՄԱՅՆՔԻՆ ՇԵՆՔ ՎԱՃԱՌԵԼՈՒ ՄԱՍԻՆ

040.0226.210301

«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ

«21» մարտի 2001 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

21 մարտի 2001 թվականի N 226

ԵՐԵՎԱՆԻ ՇԵՆԳԱՎԻԹ ԹԱՂԱՅԻՆ ՀԱՄԱՅՆՔԻՆ ՇԵՆՔ ՎԱՃԱՌԵԼՈՒ ՄԱՍԻՆ

«Մահուդ» փակ բաժնետիրական ընկերության տնօրինության մանկապարտեզի շենքում բնակվող` զոհված և հաշմանդամ ազատամարտիկների ընտանիքներին բնակարաններով ապահովելու նպատակով, ինչպես նաև հաշվի առնելով «Մահուդ» փակ բաժնետիրական ընկերության և Երևանի Շենգավիթ թաղային համայնքի ավագանու համաձայնությունը` Հայաստանի Հանրապետության կառավարությունը որոշում է.

1. «Մահուդ» փակ բաժնետիրական ընկերության տնօրինության մանկապարտեզի շենքը (Երևանի Ս. Տյուլենինի 10) սահմանված կարգով առանձնացնել ընկերության գույքի կազմից և վաճառել Երևանի Շենգավիթ թաղային համայնքին` հետևյալ պայմաններով`

ա) սույն որոշումն ուժի մեջ մտնելուց հետո մեկամսյա ժամկետում Երևանի Շենգավիթ թաղային համայնքի 2001 թվականի բյուջեից սահմանված կարգով «Մահուդ» փակ բաժնետիրական ընկերությանը կվճարվի 24,0 մլն դրամ.

բ) նշված շենքը սահմանված կարգով վերակառուցել որպես բնակարանային ֆոնդ` հաստատված նախագծային փաստաթղթերի հիման վրա, և հանձնել շենքում բնակվող զոհված ու հաշմանդամ ազատամարտիկների ընտանիքներին` նախագծային և շինարարական աշխատանքները նրանց միջոցներով իրականացնելու պայմանով:

2. Հայաստանի Հանրապետության արդյունաբերության և առևտրի նախարարությանը` մեկամսյա ժամկետում Երևանի Շենգավիթ թաղային համայնքի ղեկավարի հետ համատեղ ապահովել նշված շենքի սահմանված կարգով հանձնման-ընդունման աշխատանքների կատարումը, առուվաճառքի պայմանագրի կնքումը և գույքային իրավունքների պետական գրանցումը:

3. Սույն որոշումն ուժի մեջ է մտնում 2001 թվականի մարտի 21-ից: