ՀՀ-ԻՑ ԱՐՏԱՀԱՆՄԱՆ ԵՎ ՀՀ ՆԵՐՄՈՒԾՄԱՆ ՀԱՄԱՐ ԱՐԳԵԼՎԱԾ ՍՆԴԻԿԻ ՀԱՎԵԼԻՉՈՎ ԱՐՏԱԴՐԱՆՔԻ ՑԱՆ ...

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

24 սեպտեմբերի 2026 թվականի N 1384-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆԻՑ ԱՐՏԱՀԱՆՄԱՆ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ ՆԵՐՄՈՒԾՄԱՆ ՀԱՄԱՐ ԱՐԳԵԼՎԱԾ ՍՆԴԻԿԻ ՀԱՎԵԼԻՉՈՎ ԱՐՏԱԴՐԱՆՔԻ ՑԱՆԿԸ ՍԱՀՄԱՆԵԼՈՒ ՄԱՍԻՆ

Ղեկավարվելով «Սնդիկի մասին» օրենքի 4-րդ հոդվածի 1-ին մասի 1-ին կետով և համաձայն «Եվրասիական տնտեսական միության մասին» պայմանագրի 47-րդ հոդվածի, 7-րդ հավելվածի X բաժնի` Հայաստանի Հանրապետության կառավարությունը որոշում է.

1. Սահմանել սնդիկի հավելիչով արտադրանքի ցանկը, որոնց արտահանումը Հայաստանի Հանրապետությունից և ներմուծումը Հայաստանի Հանրապետություն արգելվում է վեց ամիս ժամկետով` համաձայն հավելվածի:

2. Սույն որոշման 1-ին կետով սահմանված արգելքը չի տարածվում`

1) սնդիկի հավելիչով այն արտադրանքի (ապրանքների) վրա, որոնց մաքսային ընթացակարգով ձևակերպման ժամանակ առկա է ներմուծողի կամ արտահանողի կողմից կազմված և հաստատված գրավոր հայտարարությունը` քաղաքացիական պաշտպանության, ռազմական, հետազոտությունների (այդ թվում` բժշկական), սարքերի չափաբերման և որպես չափանմուշ (էտալոն) օգտագործման նպատակով արտադրանքի անհրաժեշտության վերաբերյալ.

2) «Մաքսային տարանցում» մաքսային ընթացակարգով ձևակերպվող ապրանքների վրա:

3. Սույն որոշման կարգավորման շրջանակներում, սույն որոշման հավելվածով սահմանված արտադրանքի ցանկի 3-րդ կետում նշված արտադրանքը համարվում է սնդիկային, եթե այն հայտարարատուի կողմից մաքսային հայտարարագրի համապատասխան դաշտում հայտարարագրվել է որպես սնդիկ պարունակող արտադրանք կամ այդ արտադրանքի մաքսային հսկողության արդյունքում (այդ թվում` տեղեկատվական բաց աղբյուրների օգտագործմամբ) պարզվել է, որ այն հանդիսանում է հեղուկ սնդիկով աշխատող չափման միջոց (սարք) կամ այդ արտադրանքում առկա են հեղուկ սնդիկով լցված մասեր կամ դրանց մակնշվածքում, փաթեթավորման վրա կամ արտադրանքն ուղեկցող փաստաթղթերում առկա են տվյալներ` արտադրանքում սնդիկի պարունակության վերաբերյալ:

4. Հայաստանի Հանրապետության էկոնոմիկայի նախարարին`

1) սույն որոշումն ուժի մեջ մտնելուց առնվազն 3 օրացուցային օր առաջ ծանուցել Եվրասիական տնտեսական հանձնաժողովին սույն որոշման ընդունման մասին.

2) սույն որոշումն ուժի մեջ մտնելուց առնվազն 3 օրացուցային օր առաջ Եվրասիական տնտեսական հանձնաժողովի քննարկմանը ներկայացնել առաջարկ` Եվրասիական տնտեսական միության մաքսային տարածքից սույն որոշման 1-ին կետով սահմանված ապրանքների արտահանման և Եվրասիական տնտեսական միության մաքսային տարածք այդ ապրանքների ներմուծման արգելքի կիրառման մասին:

5. Սույն որոշումն ուժի մեջ է մտնում պաշտոնական հրապարակմանը հաջորդող օրվանից և գործում է վեց ամիս ժամկետով:

Հայաստանի Հանրապետության

    փոխվարչապետ                  Մ. Գրիգորյան

2026 թ. սեպտեմբերի 24

Երևան

Հավելված

ՀՀ կառավարության

2026 թվականի սեպտեմբերի 24-ի

N 1384-Ն որոշման

ՑԱՆԿ

ՍՆԴԻԿԻ ՀԱՎԵԼԻՉՈՎ ԱՐՏԱԴՐԱՆՔԻ, ՈՐՈՆՑ ԱՐՏԱՀԱՆՈՒՄԸ ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆԻՑ ԵՎ ՆԵՐՄՈՒԾՈՒՄԸ ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ ԱՐԳԵԼՎԱԾ Է

._____________________________________________________________________.

|NN  |         Արտադրանքի անվանումը               |Ծածկագիրն ըստ ԵԱՏՄ |

|ը/կ |                                            |ԱՏԳ ԱԱ-ի           |

|____|____________________________________________|___________________|

|1.  |Առաջնային տարրեր և  առաջնային մարտկոցներ`   |8506 30 000 0      |

|    |սնդիկ-օքսիդային                             |                   |

|____|____________________________________________|___________________|

|2.  |Սնդիկային լամպեր                            |8539 32 200 1      |

|____|____________________________________________|___________________|

|3.  |Սնդիկային, ոչ էլեկտրոնային չափման միջոցներ  |9025 80 200 0-ից,  |

|    |(սարքեր)` բարոմետրեր (մթնոլորտային ճնշաչափ),|                   |

|    |                                            |                   |

|    |հիգրոմետրեր (մթնոլորտային օդի և  այլ գազի   |9025 80 800 0-ից,  |

|    |խոնավաչափ),                                 |                   |

|    |                                            |                   |

|    |մանոմետրեր (հեղուկների և  գազերի ճնշաչափ),  |9026 20 400 0-ից,  |

|    |                                            |9026 20 800 0-ից,  |

|    |                                            |                   |

|    |ջերմաչափեր,                                 |9025 11-ից,        |

|    |                                            |                   |

|    |սֆիգմոմանոմետրեր (արյան ճնշաչափ)            |9018 90 100 0-ից   |

|____|____________________________________________|___________________|

|4.  |Սնդիկի քլորիդ, սնդիկի երկքլորիդ, սնդիկի     |2852 10 000 8-ից   |

|    |ցիանիդ, սնդիկի օքսիցիանիդ                   |                   |

._____________________________________________________________________.

1. Սույն ցանկում ներառված ապրանքների (արտադրանքի) անվանման և ԵԱՏՄ ԱՏԳ ԱԱ ծածկագրի միջև անհամապատասխանությունների դեպքում ծածկագրերը կրում են կողմնորոշիչ բնույթ և անհրաժեշտ է առաջնորդվել ապրանքների անվանումներով:

Պաշտոնական հրապարակման օրը` 25 սեպտեմբերի 2026 թվական: